| Library / Tipiṭaka / ཏིཔིཊཀ • Tipiṭaka / དྭེམཱཏིཀཱཔཱལི༹ • Dvemātikāpāḷi |
༩. རཏནཝགྒོ
9. Ratanavaggo
༡. ཨནྟེཔུརསིཀྑཱཔདཝཎྞནཱ
1. Antepurasikkhāpadavaṇṇanā
རཏནཝགྒསྶ པཋམེ ཁཏྟིཡསྶཱཏི ཁཏྟིཡཛཱཏིཀསྶ, མུདྡྷཱབྷིསིཏྟསྶཱཏི ཁཏྟིཡཱབྷིསེཀེན མུདྡྷནི ཨབྷིསིཏྟསྶ། ཨནིཀྑནྟོ རཱཛཱ ཨིཏོཏི ཨནིཀྑནྟརཱཛཀཾ, ཏསྨིཾ ཨནིཀྑནྟརཱཛཀེ, སཡནིགྷརེཏི ཨཏྠོ། རཏནཾ ཝུཙྩཏི མཧེསཱི, ནིགྒཏནྟི ནིཀྑནྟཾ, ཨནིགྒཏཾ རཏནཾ ཨིཏོཏི ཨནིགྒཏརཏནཀཾ, ཏསྨིཾ ཨནིགྒཏརཏནཀེ, སཡནིགྷརེཏི ཨཏྠོ། ཨིནྡཁཱིལཾ ཨཏིཀྐམེཡྻཱཏི ཨེཏྠ ཨཏྟནོ ཨཱགཏབྷཱཝཾ ཨཛཱནཱཔེཏྭཱ སཡནིགྷརསྶ ཨུམྨཱརཾ པཋམཾ པཱདཾ ཨཏིཀྐཱམེནྟསྶ དུཀྐཊཾ, དུཏིཡཾ པཱཙིཏྟིཡཾ།
Ratanavaggassa paṭhame khattiyassāti khattiyajātikassa, muddhābhisittassāti khattiyābhisekena muddhani abhisittassa. Anikkhanto rājā itoti anikkhantarājakaṃ, tasmiṃ anikkhantarājake, sayanighareti attho. Ratanaṃ vuccati mahesī, niggatanti nikkhantaṃ, aniggataṃ ratanaṃ itoti aniggataratanakaṃ, tasmiṃ aniggataratanake, sayanighareti attho. Indakhīlaṃatikkameyyāti ettha attano āgatabhāvaṃ ajānāpetvā sayanigharassa ummāraṃ paṭhamaṃ pādaṃ atikkāmentassa dukkaṭaṃ, dutiyaṃ pācittiyaṃ.
སཱཝཏྠིཡཾ ཨཱཡསྨནྟཾ ཨཱནནྡཾ ཨཱརབྦྷ རཉྙོ ཨནྟེཔུརཔྤཝིསནཝཏྠུསྨིཾ པཉྙཏྟཾ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, པཊིསཾཝིདིཏེ ཨཔྤཊིསཾཝིདིཏསཉྙིནོ, ཝེམཏིཀསྶ ཙ དུཀྐཊཾ། པཊིསཾཝིདིཏསཉྙིསྶ, ན ཁཏྟིཡསྶ ཝཱ, ན ཁཏྟིཡཱབྷིསེཀེན ཨབྷིསིཏྟསྶ ཝཱ, ཨུབྷོསུ ཝཱ, ཨུབྷིནྣཾ ཝཱ ཨཉྙཏརསྨིཾ ནིཀྑནྟེ སཡནིགྷརཾ པཝིསནྟསྶ, ཨསཡནིགྷརེ, ཨུམྨཏྟཀཱདཱིནཉྩ ཨནཱཔཏྟི། ཁཏྟིཡཏཱ, ཨབྷིསིཏྟཏཱ, ཨུབྷིནྣམྤི སཡནིགྷརཏོ ཨནིཀྑནྟཏཱ, ཨཔྤཊིསཾཝིདིཏཏཱ, ཨིནྡཁཱིལཱཏིཀྐམོཏི ཨིམཱནེཏྠ པཉྩ ཨངྒཱནི། སམུཊྛཱནཱདཱིནི པཋམཀཐིནསདིསཱནི, ཨིདཾ པན ཀིརིཡཱཀིརིཡནྟི།
Sāvatthiyaṃ āyasmantaṃ ānandaṃ ārabbha rañño antepurappavisanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, paṭisaṃvidite appaṭisaṃviditasaññino, vematikassa ca dukkaṭaṃ. Paṭisaṃviditasaññissa, na khattiyassa vā, na khattiyābhisekena abhisittassa vā, ubhosu vā, ubhinnaṃ vā aññatarasmiṃ nikkhante sayanigharaṃ pavisantassa, asayanighare, ummattakādīnañca anāpatti. Khattiyatā, abhisittatā, ubhinnampi sayanigharato anikkhantatā, appaṭisaṃviditatā, indakhīlātikkamoti imānettha pañca aṅgāni. Samuṭṭhānādīni paṭhamakathinasadisāni, idaṃ pana kiriyākiriyanti.
ཨནྟེཔུརསིཀྑཱཔདཝཎྞནཱ ནིཊྛིཏཱ།
Antepurasikkhāpadavaṇṇanā niṭṭhitā.
༢. རཏནསིཀྑཱཔདཝཎྞནཱ
2. Ratanasikkhāpadavaṇṇanā
དུཏིཡེ རཏནནྟི མུཏྟཱདིདསཝིདྷཾ། རཏནསམྨཏནྟི ཡཾཀིཉྩི མནུསྶཱནཾ ཨུཔབྷོགཔརིབྷོགཾ། ཨཛ྄ཛྷཱརཱམེ ཝཱཏི པརིཀྑིཏྟསྶ ཨནྟོཔཊིཀྑེཔེ ཨཔརིཀྑིཏྟསྶ དྭིནྣཾ ལེཌྜུཔཱཏཱནཾ ཨནྟོ། ཨཛ྄ཛྷཱཝསཐེཏི པརིཀྑིཏྟསྶ ཨནྟོཔཊིཀྑེཔེ, ཨཔརིཀྑིཏྟསྶ མུསལཔཱཏབྦྷནྟརེ། ཨཡཾ པནེཏྠ ཝིནིཙྪཡོ – ཛཱཏརཱུཔརཛཏཾ ཨཏྟནོ ཨཏྠཱཡ ཨུགྒཎྷནྟསྶ ཝཱ ཨུགྒཎྷཱཔེནྟསྶ ཝཱ ནིསྶགྒིཡཾ པཱཙིཏྟིཡཾ ། སངྒྷགཎཔུགྒལཙེཏིཡནཝཀམྨཱནཾ ཨཏྠཱཡ དུཀྐཊཾ, ཨཝསེསེ མུཏྟཱདིརཏནེ སབྦེསམྤི ཨཏྠཱཡ དུཀྐཊམེཝ། ཀཔྤིཡཝཏྠུཾ ཝཱ ཨཀཔྤིཡཝཏྠུཾ ཝཱ ཨནྟམསོ མཱཏུསནྟཀམྤི བྷཎྜཱགཱརིཀསཱིསེན པཊིསཱམེནྟསྶ པཱཙིཏྟིཡཾ, ཏཱདིསཾ པན ཨཏྟནོ སནྟཀཾ ཀཏྭཱ པཊིསཱམེཏུཾ ཝཊྚཏི། ‘‘ཨིདཾ པཊིསཱམེཐཱ’’ཏི ཝུཏྟེ པན ‘‘ན ཝཊྚཏཱི’’ཏི པཊིཀྑིཔིཏབྦཾ། སཙེ ཀུཔིཏཱ པཱཏེཏྭཱ གཙྪནྟི, པལིབོདྷོ ནཱམ ཧོཏི, པཊིསཱམེཏབྦཾ། ཝིཧཱརེ ཀམྨཾ ཀརོནྟཱ ཝཌྜྷཀཱིཨཱདཡོ ཝཱ རཱཛཝལླབྷཱ ཝཱ ‘‘ཡཾཀིཉྩི ཨུཔཀརཎཾ ཝཱ སཡནབྷཎྜཾ ཝཱ པཊིསཱམེཏྭཱ དེཐཱ’’ཏི ཝདནྟི, ཚནྡེནཔི བྷཡེནཔི ན ཀཱཏབྦམེཝ, གུཏྟཊྛཱནཾ པན དསྶེཏུཾ ཝཊྚཏི།
Dutiye ratananti muttādidasavidhaṃ. Ratanasammatanti yaṃkiñci manussānaṃ upabhogaparibhogaṃ. Ajjhārāme vāti parikkhittassa antopaṭikkhepe aparikkhittassa dvinnaṃ leḍḍupātānaṃ anto. Ajjhāvasatheti parikkhittassa antopaṭikkhepe, aparikkhittassa musalapātabbhantare. Ayaṃ panettha vinicchayo – jātarūparajataṃ attano atthāya uggaṇhantassa vā uggaṇhāpentassa vā nissaggiyaṃ pācittiyaṃ . Saṅghagaṇapuggalacetiyanavakammānaṃ atthāya dukkaṭaṃ, avasese muttādiratane sabbesampi atthāya dukkaṭameva. Kappiyavatthuṃ vā akappiyavatthuṃ vā antamaso mātusantakampi bhaṇḍāgārikasīsena paṭisāmentassa pācittiyaṃ, tādisaṃ pana attano santakaṃ katvā paṭisāmetuṃ vaṭṭati. ‘‘Idaṃ paṭisāmethā’’ti vutte pana ‘‘na vaṭṭatī’’ti paṭikkhipitabbaṃ. Sace kupitā pātetvā gacchanti, palibodho nāma hoti, paṭisāmetabbaṃ. Vihāre kammaṃ karontā vaḍḍhakīādayo vā rājavallabhā vā ‘‘yaṃkiñci upakaraṇaṃ vā sayanabhaṇḍaṃ vā paṭisāmetvā dethā’’ti vadanti, chandenapi bhayenapi na kātabbameva, guttaṭṭhānaṃ pana dassetuṃ vaṭṭati.
ཨཛ྄ཛྷཱརཱམཨཛ྄ཛྷཱཝསཐེསུཔི ཡཱདིསེ ཋཱནེ ‘‘བྷིཀྑཱུཧི ཝཱ སཱམཎེརེཧི ཝཱ གཧིཏཾ བྷཝིསྶཏཱི’’ཏི ཨཱསངྐཱ ཨུཔྤཛྫཏི, ཏཱདིསེཡེཝ ཋཱནེ ཨུགྒཧེཏྭཱ ཝཱ ཨུགྒཧཱཔེཏྭཱ ཝཱ སཉྙཱཎཾ ཀཏྭཱ ནིཀྑིཔིཏབྦཾ, ‘‘ཡསྶ བྷཎྜཾ ནཊྛཾ, སོ ཨཱགཙྪཏཱུ’’ཏི ཙ ཨཱཙིཀྑིཏབྦཾ། ཨཐ ཡོ ཨཱགཙྪཏི, སོ ‘‘ཀཱིདིསཾ ཏེ བྷཎྜཾ ནཊྛ’’ནྟི པུཙྪིཏབྦོ, སཙེ སཉྙཱཎེན སམྤཱདེཏི, དཱཏབྦཾ། ནོ ཙེ, ‘ཝིཙིནཱཧཱི’ཏི ཝཏྟབྦོ། ཏམྷཱ ཨཱཝཱསཱ པཀྐམནྟེན པཏིརཱུཔཱནཾ བྷིཀྑཱུནཾ ཧཏྠེ, ཏེསུ ཨསཏི པཏིརཱུཔཱནཾ གཧཔཏིཀཱནཾ ཧཏྠེ ནིཀྑིཔིཏྭཱ པཀྐམིཏབྦཾ། ཡོ པན ནེཝ པཀྐམཏི, ན སཱམིཀཾ པསྶཏི, ཏེན ཐཱཝརཾ སེནཱསནཾ ཝཱ ཙེཏིཡཾ ཝཱ པོཀྑརཎིཾ ཝཱ ཀཱརེཏབྦོ། སཙེ དཱིགྷསྶ ཨདྡྷུནོ ཨཙྩཡེན སཱམིཀོ ཨཱགཙྪཏི, ཏཾ དསྶེཏྭཱ ‘ཨནུམོདཱཧཱི’ཏི ཝཏྟབྦོ། སཙེ ནཱནུམོདཏི, ‘‘དེཧི མེ དྷན’’ནྟི ཙོདེཏི, སམཱདཔེཏྭཱ དཱཏབྦཾ།
Ajjhārāmaajjhāvasathesupi yādise ṭhāne ‘‘bhikkhūhi vā sāmaṇerehi vā gahitaṃ bhavissatī’’ti āsaṅkā uppajjati, tādiseyeva ṭhāne uggahetvā vā uggahāpetvā vā saññāṇaṃ katvā nikkhipitabbaṃ, ‘‘yassa bhaṇḍaṃ naṭṭhaṃ, so āgacchatū’’ti ca ācikkhitabbaṃ. Atha yo āgacchati, so ‘‘kīdisaṃ te bhaṇḍaṃ naṭṭha’’nti pucchitabbo, sace saññāṇena sampādeti, dātabbaṃ. No ce, ‘vicināhī’ti vattabbo. Tamhā āvāsā pakkamantena patirūpānaṃ bhikkhūnaṃ hatthe, tesu asati patirūpānaṃ gahapatikānaṃ hatthe nikkhipitvā pakkamitabbaṃ. Yo pana neva pakkamati, na sāmikaṃ passati, tena thāvaraṃ senāsanaṃ vā cetiyaṃ vā pokkharaṇiṃ vā kāretabbo. Sace dīghassa addhuno accayena sāmiko āgacchati, taṃ dassetvā ‘anumodāhī’ti vattabbo. Sace nānumodati, ‘‘dehi me dhana’’nti codeti, samādapetvā dātabbaṃ.
སཱཝཏྠིཡཾ ཨཉྙཏརཾ བྷིཀྑུཾ ཨཱརབྦྷ རཏནཨུགྒཎྷནཝཏྠུསྨིཾ པཉྙཏྟཾ, ‘‘ཨཉྙཏྲ ཨཛ྄ཛྷཱརཱམཱ ཝཱ, ཨཛ྄ཛྷཱཝསཐཱ ཝཱ’’ཏི ཨཡམེཏྠ དུཝིདྷཱ ཨནུཔཉྙཏྟི, སཱདྷཱརཎཔཉྙཏྟི, སཱཎཏྟིཀཾ, ཨནུཉྙཱཏཊྛཱནེ ཨནཱདརིཡེན ཨུགྒཧེཏྭཱ ཨནིཀྑིཔནྟསྶ དུཀྐཊཾ། ཨནུཉྙཱཏཊྛཱནེ གཧེཏྭཱ ནིཀྑིཔནྟསྶ, ཡཾ ཧོཏི ཨཱམཱསཾ རཏནསམྨཏཾ, ཏཾ ཝིསྶཱསཾ ཝཱ ཏཱཝཀཱལིཀཾ ཝཱ ཨུགྒཎྷནྟསྶ, པཾསུཀཱུལསཉྙཱཡ གཎྷཏོ, ཨུམྨཏྟཀཱདཱིནཉྩ ཨནཱཔཏྟི། ཨནནུཉྙཱཏཀརཎཾ, པརསནྟཀཏཱ, ཝིསྶཱསགྒཱཧཔཾསུཀཱུལསཉྙཱནཾ ཨབྷཱཝོ, ཨུགྒཧཎཾ ཝཱ ཨུགྒཧཱཔནཾ ཝཱཏི ཨིམཱནེཏྠ ཙཏྟཱརི ཨངྒཱནི། སམུཊྛཱནཱདཱིནི སཉྩརིཏྟསདིསཱནཱིཏི།
Sāvatthiyaṃ aññataraṃ bhikkhuṃ ārabbha ratanauggaṇhanavatthusmiṃ paññattaṃ, ‘‘aññatra ajjhārāmā vā, ajjhāvasathā vā’’ti ayamettha duvidhā anupaññatti, sādhāraṇapaññatti, sāṇattikaṃ, anuññātaṭṭhāne anādariyena uggahetvā anikkhipantassa dukkaṭaṃ. Anuññātaṭṭhāne gahetvā nikkhipantassa, yaṃ hoti āmāsaṃ ratanasammataṃ, taṃ vissāsaṃ vā tāvakālikaṃ vā uggaṇhantassa, paṃsukūlasaññāya gaṇhato, ummattakādīnañca anāpatti. Ananuññātakaraṇaṃ, parasantakatā, vissāsaggāhapaṃsukūlasaññānaṃ abhāvo, uggahaṇaṃ vā uggahāpanaṃ vāti imānettha cattāri aṅgāni. Samuṭṭhānādīni sañcarittasadisānīti.
རཏནསིཀྑཱཔདཝཎྞནཱ ནིཊྛིཏཱ།
Ratanasikkhāpadavaṇṇanā niṭṭhitā.
༣. ཝིཀཱལགཱམཔྤཝེསནསིཀྑཱཔདཝཎྞནཱ
3. Vikālagāmappavesanasikkhāpadavaṇṇanā
ཏཏིཡེ སནྟཾ བྷིཀྑུཾ ཨནཱཔུཙྪཱཏི ཨིདཾ ཙཱརིཏྟེ ཝུཏྟནཡམེཝ། ཝིཀཱལེཏི མཛ྄ཛྷནྷིཀཱཏིཀྐམཏོ པཊྛཱཡ ཨནྟོཨརུཎེ, ཨེཏསྨིཾ ཨནྟརེ ‘‘ཝིཀཱལེ གཱམཔྤཝེསནཾ ཨཱཔུཙྪཱམཱི’’ཏི ཝཱ, ‘‘གཱམཾ པཝིསིསྶཱམཱི’’ཏི ཝཱ ཨནཱཔུཙྪིཏྭཱ ཨསཏི ཏཐཱརཱུཔེ ཨཙྩཱཡིཀེ ཀརཎཱིཡེ པརིཀྑིཏྟསྶ གཱམསྶ པརིཀྑེཔཾ ཨཏིཀྐམནྟསྶ, ཨཔརིཀྑིཏྟསྶ ཨུཔཙཱརཾ ཨོཀྐམནྟསྶ པཋམཔཱདེ དུཀྐཊཾ, དུཏིཡཔཱདེ པཱཙིཏྟིཡཾ། སཙེཔི སམྦཧུལཱ ཀེནཙི ཀམྨེན གཱམཾ པཝིསནྟི, སབྦེཧི ཨཉྙམཉྙཾ ཨཱཔུཙྪིཏབྦཾ། ‘‘ཏསྨིཾ གཱམེ ཏཾ ཀམྨཾ ན སམྤཛྫཏཱི’’ཏི ཨཉྙཾ གཱམཾ གཙྪནྟཱནཾ པུན ཨཱཔུཙྪནཀིཙྩཾ ནཏྠི། སཙེ པན ཨུསྶཱཧཾ པཊིཔྤསྶམྦྷེཏྭཱ ཝིཧཱརཾ གཙྪནྟཱ ཨནྟརཱ ཨཉྙཾ གཱམཾ པཝིསིཏུཀཱམཱ ཧོནྟི, ཨཱཔུཙྪིཏབྦམེཝ། ཀུལགྷརེ ཝཱ ཨཱསནསཱལཱཡཾ ཝཱ བྷཏྟཀིཙྩཾ ཀཏྭཱ ཏེལབྷིཀྑཱཡ ཝཱ སཔྤིབྷིཀྑཱཡ ཝཱ ཙརིཏུཀཱམེན སཙེ པསྶེ བྷིཀྑུ ཨཏྠི, ཨཱཔུཙྪིཏབྦོ, ཨསནྟེ ‘ནཏྠཱི’ཏི གནྟབྦཾ། ཝཱིཐིཾ ཨོཏརིཏྭཱ པན བྷིཀྑུཾ དིསྭཱཔི ཨཱཔུཙྪནཀིཙྩཾ ནཏྠི། ཡོ པན གཱམམཛ྄ཛྷེན མགྒོ ཧོཏི, སཙེ ཏེན གཙྪནྟསྶ ‘‘ཏེལཱདཱིནཾ ཨཏྠཱཡ ཙརིསྶཱམཱི’’ཏི ཙིཏྟཾ ཨུཔྤཛྫཏི, པསྶེ བྷིཀྑུཾ དིསྭཱ ཨཱཔུཙྪིཏབྦཾ། མགྒཱ ཨནོཀྐམྨ ཙརནྟསྶ པན ཨཱཔུཙྪནཀིཙྩཾ ནཏྠི, ཨོཀྐམནྟསྶ ཝུཏྟནཡེནེཝ པཱཙིཏྟིཡཾ།
Tatiye santaṃ bhikkhuṃ anāpucchāti idaṃ cāritte vuttanayameva. Vikāleti majjhanhikātikkamato paṭṭhāya antoaruṇe, etasmiṃ antare ‘‘vikāle gāmappavesanaṃ āpucchāmī’’ti vā, ‘‘gāmaṃ pavisissāmī’’ti vā anāpucchitvā asati tathārūpe accāyike karaṇīye parikkhittassa gāmassa parikkhepaṃ atikkamantassa, aparikkhittassa upacāraṃ okkamantassa paṭhamapāde dukkaṭaṃ, dutiyapāde pācittiyaṃ. Sacepi sambahulā kenaci kammena gāmaṃ pavisanti, sabbehi aññamaññaṃ āpucchitabbaṃ. ‘‘Tasmiṃ gāme taṃ kammaṃ na sampajjatī’’ti aññaṃ gāmaṃ gacchantānaṃ puna āpucchanakiccaṃ natthi. Sace pana ussāhaṃ paṭippassambhetvā vihāraṃ gacchantā antarā aññaṃ gāmaṃ pavisitukāmā honti, āpucchitabbameva. Kulaghare vā āsanasālāyaṃ vā bhattakiccaṃ katvā telabhikkhāya vā sappibhikkhāya vā caritukāmena sace passe bhikkhu atthi, āpucchitabbo, asante ‘natthī’ti gantabbaṃ. Vīthiṃ otaritvā pana bhikkhuṃ disvāpi āpucchanakiccaṃ natthi. Yo pana gāmamajjhena maggo hoti, sace tena gacchantassa ‘‘telādīnaṃ atthāya carissāmī’’ti cittaṃ uppajjati, passe bhikkhuṃ disvā āpucchitabbaṃ. Maggā anokkamma carantassa pana āpucchanakiccaṃ natthi, okkamantassa vuttanayeneva pācittiyaṃ.
སཱཝཏྠིཡཾ ཚབྦགྒིཡེ ཨཱརབྦྷ ཝིཀཱལེ གཱམཔྤཝེསནཝཏྠུསྨིཾ པཉྙཏྟཾ, ‘‘སནྟཾ བྷིཀྑུ’’ནྟི ཙ ‘‘ཨནཱཔུཙྪཱ’’ཏི ཙ ‘‘ཨཉྙཏྲ ཏཐཱརཱུཔཱ ཨཙྩཱཡིཀཱ ཀརཎཱིཡཱ’’ཏི ཙ ཨིམཱ པནེཏྠ ཏིསྶོ ཨནུཔཉྙཏྟིཡོ, ཨསཱདྷཱརཎཔཉྙཏྟི, ཨནཱཎཏྟིཀཾ, ཏིཀཔཱཙིཏྟིཡཾ, ཀཱལེ ཝིཀཱལསཉྙིནོ, ཝེམཏིཀསྶ ཙ དུཀྐཊཾ། ཀཱལསཉྙིནོ པན, ཡོ ཙ ཨཙྩཱཡིཀེ ཝཱ ཀརཎཱིཡེ, སནྟཾ ཝཱ ཨཱཔུཙྪིཏྭཱ, ཨསནྟཾ ཝཱ ཨནཱཔུཙྪིཏྭཱ པཝིསཏི, ཨནྟརཱརཱམབྷིཀྑུནུཔསྶཡཏིཏྠིཡསེཡྻཔཊིཀྐམནེསུ ཝཱ ཨཉྙཏརཾ གཙྪཏི, ཏསྶ, གཱམེན མགྒོ ཧོཏི, ཏེན གཙྪཏོ, ཨཱཔདཱསུ, ཨུམྨཏྟཀཱདཱིནཉྩ ཨནཱཔཏྟི། སནྟཾ བྷིཀྑུཾ ཨནཱཔུཙྪཏཱ, ཨནུཉྙཱཏཀཱརཎཱབྷཱཝོ, ཝིཀཱལེ གཱམཔྤཝིསནནྟི ཨིམཱནེཏྠ ཏཱིཎི ཨངྒཱནི། སམུཊྛཱནཱདཱིནི ཀཐིནསདིསཱནེཝ, ཨིདཾ པན ཀིརིཡཱཀིརིཡནྟི།
Sāvatthiyaṃ chabbaggiye ārabbha vikāle gāmappavesanavatthusmiṃ paññattaṃ, ‘‘santaṃ bhikkhu’’nti ca ‘‘anāpucchā’’ti ca ‘‘aññatra tathārūpā accāyikā karaṇīyā’’ti ca imā panettha tisso anupaññattiyo, asādhāraṇapaññatti, anāṇattikaṃ, tikapācittiyaṃ, kāle vikālasaññino, vematikassa ca dukkaṭaṃ. Kālasaññino pana, yo ca accāyike vā karaṇīye, santaṃ vā āpucchitvā, asantaṃ vā anāpucchitvā pavisati, antarārāmabhikkhunupassayatitthiyaseyyapaṭikkamanesu vā aññataraṃ gacchati, tassa, gāmena maggo hoti, tena gacchato, āpadāsu, ummattakādīnañca anāpatti. Santaṃ bhikkhuṃ anāpucchatā, anuññātakāraṇābhāvo, vikāle gāmappavisananti imānettha tīṇi aṅgāni. Samuṭṭhānādīni kathinasadisāneva, idaṃ pana kiriyākiriyanti.
ཝིཀཱལགཱམཔྤཝེསནསིཀྑཱཔདཝཎྞནཱ ནིཊྛིཏཱ།
Vikālagāmappavesanasikkhāpadavaṇṇanā niṭṭhitā.
༤. སཱུཙིགྷརསིཀྑཱཔདཝཎྞནཱ
4. Sūcigharasikkhāpadavaṇṇanā
ཙཏུཏྠེ བྷེདནམེཝ བྷེདནཀཾ, ཏཾ ཨསྶ ཨཏྠཱིཏི བྷེདནཀཾ། ཏསྨཱ ཨེཝརཱུཔེ སཱུཙིགྷརེ ཀརཎཀཱརཱཔནེསུ དུཀྐཊཾ, པཊིལཱབྷེན པན ཏཾ བྷིནྡིཏྭཱ པཱཙིཏྟིཡཾ དེསེཏབྦཾ།
Catutthe bhedanameva bhedanakaṃ, taṃ assa atthīti bhedanakaṃ. Tasmā evarūpe sūcighare karaṇakārāpanesu dukkaṭaṃ, paṭilābhena pana taṃ bhinditvā pācittiyaṃ desetabbaṃ.
སཀྐེསུ སམྦཧུལེ བྷིཀྑཱུ ཨཱརབྦྷ བཧུསཱུཙིགྷརཝིཉྙཱཔནཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སཱཎཏྟིཀཾ, ཨཏྟནཱ ཝིཔྤཀཏཾ ཨཏྟནཱ ཝཱ, པརེཧི ཝཱ, པརེཧི ཝིཔྤཀཏམྤི ཨཏྟནཱ ཝཱ, པརེཧི ཝཱ པརིཡོསཱཔེཏྭཱ ལབྷནྟསྶ ཙཏུཀྐཔཱཙིཏྟིཡཾ། ཨཉྙསྶཏྠཱཡ ཀརཎཀཱརཱཔནེསུ, ཨཉྙེན ཀཏཾ པཊིལབྷིཏྭཱ པརིབྷུཉྫནེ དུཀྐཊཾ། གཎྛིཀེ ཨརཎིཀེ ཝིདྷེ ཨཉྫནིཡཱ ཨཉྫནིསལཱཀཱཡ ཝཱསིཛཊེ ཨུདཀཔུཉྪནིཡཱཏི ཨེཏེསུ ཡཾཀིཉྩི ཨཊྛིཨཱདཱིཧི ཀརོནྟསྶ, ཨུམྨཏྟཀཱདཱིནཉྩ ཨནཱཔཏྟི། སཱུཙིགྷརཏཱ, ཨཊྛིམཡཱདིཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནེཏྠ ཏཱིཎི ཨངྒཱནི། སམུཊྛཱནཱདཱིནི སཉྩརིཏྟསདིསཱནཱིཏི།
Sakkesu sambahule bhikkhū ārabbha bahusūcigharaviññāpanavatthusmiṃ paññattaṃ, sādhāraṇapaññatti, sāṇattikaṃ, attanā vippakataṃ attanā vā, parehi vā, parehi vippakatampi attanā vā, parehi vā pariyosāpetvā labhantassa catukkapācittiyaṃ. Aññassatthāya karaṇakārāpanesu, aññena kataṃ paṭilabhitvā paribhuñjane dukkaṭaṃ. Gaṇṭhike araṇike vidhe añjaniyā añjanisalākāya vāsijaṭe udakapuñchaniyāti etesu yaṃkiñci aṭṭhiādīhi karontassa, ummattakādīnañca anāpatti. Sūcigharatā, aṭṭhimayāditā, attano atthāya karaṇaṃ vā kārāpetvā vā paṭilābhoti imānettha tīṇi aṅgāni. Samuṭṭhānādīni sañcarittasadisānīti.
སཱུཙིགྷརསིཀྑཱཔདཝཎྞནཱ ནིཊྛིཏཱ།
Sūcigharasikkhāpadavaṇṇanā niṭṭhitā.
༥. མཉྩཔཱིཋསིཀྑཱཔདཝཎྞནཱ
5. Mañcapīṭhasikkhāpadavaṇṇanā
པཉྩམེ མཉྩནྟི མསཱརཀཱདཱིསུ ཨཉྙཏརཾ། པཱིཋམྤི ཏཱདིསམེཝ, ཏཾ པན མཉྩོ ཝིཡ ཨཏིདཱིགྷཾ, ཨཱསནྡིཀོ ཝིཡ ཙ སམཾ ཙཏུརསྶཾ ན ཧོཏི། ཚེདནཀཾ བྷེདནཀསདིསམེཝ།
Pañcame mañcanti masārakādīsu aññataraṃ. Pīṭhampi tādisameva, taṃ pana mañco viya atidīghaṃ, āsandiko viya ca samaṃ caturassaṃ na hoti. Chedanakaṃ bhedanakasadisameva.
སཱཝཏྠིཡཾ ཨུཔནནྡཾ ཨཱརབྦྷ ཨུཙྩེ མཉྩེ སཡནཝཏྠུསྨིཾ པཉྙཏྟཾ, པམཱཎིཀཾ ཀརོནྟསྶ, པམཱཎཱཏིཀྐནྟཾ ལབྷིཏྭཱ ཚིནྡིཏྭཱ ཡཐཱ པམཱཎམེཝ ཨུཔརི དིསྶཏི, ཨེཝཾ ནིཁཎིཏྭཱ ཝཱ, ཨུཏྟཱནཾ ཝཱ ཀཏྭཱ, ཨཊྚཀཾ ཝཱ བནྡྷིཏྭཱ པརིབྷུཉྫནྟསྶ, ཨུམྨཏྟཀཱདཱིནཉྩ ཨནཱཔཏྟི། པམཱཎཱཏིཀྐནྟམཉྩཔཱིཋཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནེཏྠ དྭེ ཨངྒཱནི། སེསཾ སབྦཾ སཱུཙིགྷརསིཀྑཱཔདསདིསམེཝཱཏི།
Sāvatthiyaṃ upanandaṃ ārabbha ucce mañce sayanavatthusmiṃ paññattaṃ, pamāṇikaṃ karontassa, pamāṇātikkantaṃ labhitvā chinditvā yathā pamāṇameva upari dissati, evaṃ nikhaṇitvā vā, uttānaṃ vā katvā, aṭṭakaṃ vā bandhitvā paribhuñjantassa, ummattakādīnañca anāpatti. Pamāṇātikkantamañcapīṭhatā, attano atthāya karaṇaṃ vā kārāpetvā vā paṭilābhoti imānettha dve aṅgāni. Sesaṃ sabbaṃ sūcigharasikkhāpadasadisamevāti.
མཉྩཔཱིཋསིཀྑཱཔདཝཎྞནཱ ནིཊྛིཏཱ།
Mañcapīṭhasikkhāpadavaṇṇanā niṭṭhitā.
༦. ཏཱུལོནདྡྷསིཀྑཱཔདཝཎྞནཱ
6. Tūlonaddhasikkhāpadavaṇṇanā
ཚཊྛེ ཏཱུལཾ ཨོནདྡྷམེཏྠཱཏི ཏཱུལོནདྡྷཾ, ཙིམིལིཀཾ པཏྠརིཏྭཱ ཏཱུལཾ པཀྑིཔིཏྭཱ ཨུཔརི ཙིམིལིཀཱཡ ཨོནདྡྷནྟི ཝུཏྟཾ ཧོཏི། ཨུདྡཱལནཀཾ བྷེདནཀསདིསམེཝ།
Chaṭṭhe tūlaṃ onaddhametthāti tūlonaddhaṃ, cimilikaṃ pattharitvā tūlaṃ pakkhipitvā upari cimilikāya onaddhanti vuttaṃ hoti. Uddālanakaṃ bhedanakasadisameva.
སཱཝཏྠིཡཾ ཚབྦགྒིཡེ ཨཱརབྦྷ ཏཱུལོནདྡྷཀཱརཱཔནཝཏྠུསྨིཾ པཉྙཏྟཾ, ཨཱཡོགེ ཀཱཡབནྡྷནེ ཨཾསབདྡྷཀེ པཏྟཏྠཝིཀཱཡ པརིསྶཱཝནེ བིམྦོཧནེ, ཨཉྙེན ཀཏཾ ཏཱུལོནདྡྷཾ པཊིལབྷིཏྭཱ ཨུདྡཱལེཏྭཱ པརིབྷུཉྫནྟསྶ, ཨུམྨཏྟཀཱདཱིནཉྩ ཨནཱཔཏྟི། བིམྦོཧནཉྩེཏྠ སཱིསཔྤམཱཎམེཝ ཝཊྚཏི, སཱིསཔྤམཱཎཾ ནཱམ ཡསྶ ཝིཏྠཱརཏོ ཏཱིསུ ཀོཎེསུ དྭིནྣཾ ཨནྟརཾ ཝིདཏྠིཙཏུརངྒུལཾ ཧོཏི, མཛ྄ཛྷེ མུཊྛིརཏནཾ, དཱིགྷཏོ དིཡཌྜྷརཏནཾ ཝཱ དྭིརཏནཾ ཝཱ། ཏཱུལོནདྡྷམཉྩཔཱིཋཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནེཏྠ དྭེ ཨངྒཱནི། སེསཾ ཝུཏྟནཡེནེཝ ཝེདིཏབྦནྟི།
Sāvatthiyaṃ chabbaggiye ārabbha tūlonaddhakārāpanavatthusmiṃ paññattaṃ, āyoge kāyabandhane aṃsabaddhake pattatthavikāya parissāvane bimbohane, aññena kataṃ tūlonaddhaṃ paṭilabhitvā uddāletvā paribhuñjantassa, ummattakādīnañca anāpatti. Bimbohanañcettha sīsappamāṇameva vaṭṭati, sīsappamāṇaṃ nāma yassa vitthārato tīsu koṇesu dvinnaṃ antaraṃ vidatthicaturaṅgulaṃ hoti, majjhe muṭṭhiratanaṃ, dīghato diyaḍḍharatanaṃ vā dviratanaṃ vā. Tūlonaddhamañcapīṭhatā, attano atthāya karaṇaṃ vā kārāpetvā vā paṭilābhoti imānettha dve aṅgāni. Sesaṃ vuttanayeneva veditabbanti.
ཏཱུལོནདྡྷསིཀྑཱཔདཝཎྞནཱ ནིཊྛིཏཱ།
Tūlonaddhasikkhāpadavaṇṇanā niṭṭhitā.
༧. ནིསཱིདནསིཀྑཱཔདཝཎྞནཱ
7. Nisīdanasikkhāpadavaṇṇanā
སཏྟམེ ནིསཱིདནནྟི སནྠཏསདིསཾ སནྠརིཏྭཱ ཨེཀསྨིཾ ཨནྟེ སུགཏཝིདཏྠིཔྤམཱཎཾ དྭཱིསུ ཋཱནེསུ ཕཱལེཏྭཱ ཀཏཱཧི ཏཱིཧི དསཱཧི ཡུཏྟསྶ པརིཀྑཱརསྶེཏཾ ནཱམཾ།
Sattame nisīdananti santhatasadisaṃ santharitvā ekasmiṃ ante sugatavidatthippamāṇaṃ dvīsu ṭhānesu phāletvā katāhi tīhi dasāhi yuttassa parikkhārassetaṃ nāmaṃ.
སཱཝཏྠིཡཾ ཚབྦགྒིཡེ ཨཱརབྦྷ ཨཔྤམཱཎིཀཱནི ནིསཱིདནཱནི དྷཱརཎཝཏྠུསྨིཾ པཉྙཏྟཾ, ‘‘དསཱ ཝིདཏྠཱི’’ཏི ཨཡམེཏྠ ཨནུཔཉྙཏྟི, ཨསཱདྷཱརཎཔཉྙཏྟི, པམཱཎིཀཾ ཝཱ ཨཱུནཀཾ ཝཱ ཀརོནྟསྶ, ཨཉྙེན ཀཏཾ པམཱཎཱཏིཀྐནྟཾ པཊིལབྷིཏྭཱ ཚིནྡིཏྭཱ པརིབྷུཉྫནྟསྶ, ཝིཏཱནཱདཱིསུ ཡཾཀིཉྩི ཀརོནྟསྶ, ཨུམྨཏྟཀཱདཱིནཉྩ ཨནཱཔཏྟི། ནིསཱིདནསྶ པམཱཎཱཏིཀྐནྟཏཱ, ཨཏྟནོ ཨཏྠཱཡ ཀརཎཾ ཝཱ ཀཱརཱཔེཏྭཱ ཝཱ པཊིལཱབྷོཏི ཨིམཱནེཏྠ དྭེ ཨངྒཱནི། སེསཾ ཝུཏྟནཡེནེཝ ཝེདིཏབྦནྟི།
Sāvatthiyaṃ chabbaggiye ārabbha appamāṇikāni nisīdanāni dhāraṇavatthusmiṃ paññattaṃ, ‘‘dasā vidatthī’’ti ayamettha anupaññatti, asādhāraṇapaññatti, pamāṇikaṃ vā ūnakaṃ vā karontassa, aññena kataṃ pamāṇātikkantaṃ paṭilabhitvā chinditvā paribhuñjantassa, vitānādīsu yaṃkiñci karontassa, ummattakādīnañca anāpatti. Nisīdanassa pamāṇātikkantatā, attano atthāya karaṇaṃ vā kārāpetvā vā paṭilābhoti imānettha dve aṅgāni. Sesaṃ vuttanayeneva veditabbanti.
ནིསཱིདནསིཀྑཱཔདཝཎྞནཱ ནིཊྛིཏཱ།
Nisīdanasikkhāpadavaṇṇanā niṭṭhitā.
༨. ཀཎྜུཔྤཊིཙྪཱདིསིཀྑཱཔདཝཎྞནཱ
8. Kaṇḍuppaṭicchādisikkhāpadavaṇṇanā
ཨཊྛམེ ཀཎྜུཔྤཊིཙྪཱདིནྟི ཨདྷོནཱབྷིཨུབྦྷཛཱཎུམཎྜལཾ ཀཎྜུཔཱིལ༹ཀཨསྶཱཝཐུལླཀཙྪཱབཱདྷཱནཾ པཊིཙྪཱདནཏྠཾ ཨནུཉྙཱཏཾ ཙཱིཝརཾ།
Aṭṭhame kaṇḍuppaṭicchādinti adhonābhiubbhajāṇumaṇḍalaṃ kaṇḍupīḷakaassāvathullakacchābādhānaṃ paṭicchādanatthaṃ anuññātaṃ cīvaraṃ.
སཱཝཏྠིཡཾ ཚབྦགྒིཡེ ཨཱརབྦྷ ཨཔྤམཱཎིཀཱཡོ ཀཎྜུཔྤཊིཙྪཱདིཀཱཡོ དྷཱརཎཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སེསཾ ནིསཱིདནེ ཝུཏྟནཡེནེཝ ཝེདིཏབྦནྟི།
Sāvatthiyaṃ chabbaggiye ārabbha appamāṇikāyo kaṇḍuppaṭicchādikāyo dhāraṇavatthusmiṃ paññattaṃ, sādhāraṇapaññatti, sesaṃ nisīdane vuttanayeneva veditabbanti.
ཀཎྜུཔྤཊིཙྪཱདིསིཀྑཱཔདཝཎྞནཱ ནིཊྛིཏཱ།
Kaṇḍuppaṭicchādisikkhāpadavaṇṇanā niṭṭhitā.
༩. ཝསྶིཀསཱཊིཀསིཀྑཱཔདཝཎྞནཱ
9. Vassikasāṭikasikkhāpadavaṇṇanā
ནཝམེ སཱཝཏྠིཡཾ ཚབྦགྒིཡེ ཨཱརབྦྷ ཨཔྤམཱཎིཀཱཡོ ཝསྶིཀསཱཊིཀཱཡོ དྷཱརཎཝཏྠུསྨིཾ པཉྙཏྟཾ, སེསམེཏྠ ཡཾ ཝཏྟབྦཾ, ཏཾ ནིསཱིདནེ ཝུཏྟནཡམེཝཱཏི།
Navame sāvatthiyaṃ chabbaggiye ārabbha appamāṇikāyo vassikasāṭikāyo dhāraṇavatthusmiṃ paññattaṃ, sesamettha yaṃ vattabbaṃ, taṃ nisīdane vuttanayamevāti.
ཝསྶིཀསཱཊིཀསིཀྑཱཔདཝཎྞནཱ ནིཊྛིཏཱ།
Vassikasāṭikasikkhāpadavaṇṇanā niṭṭhitā.
༡༠. ནནྡསིཀྑཱཔདཝཎྞནཱ
10. Nandasikkhāpadavaṇṇanā
དསམེ སཱཝཏྠིཡཾ ཨཱཡསྨནྟཾ ནནྡཾ ཨཱརབྦྷ སུགཏཙཱིཝརཔྤམཱཎཾ ཙཱིཝརཾ དྷཱརཎཝཏྠུསྨིཾ པཉྙཏྟཾ, སཱདྷཱརཎཔཉྙཏྟི, སེསཾ ནིསཱིདནེ ཝུཏྟནཡམེཝཱཏི།
Dasame sāvatthiyaṃ āyasmantaṃ nandaṃ ārabbha sugatacīvarappamāṇaṃ cīvaraṃ dhāraṇavatthusmiṃ paññattaṃ, sādhāraṇapaññatti, sesaṃ nisīdane vuttanayamevāti.
ནནྡསིཀྑཱཔདཝཎྞནཱ ནིཊྛིཏཱ།
Nandasikkhāpadavaṇṇanā niṭṭhitā.
རཏནཝགྒོ ནཝམོ།
Ratanavaggo navamo.
ཀངྑཱཝིཏརཎིཡཱ པཱཏིམོཀྑཝཎྞནཱཡ
Kaṅkhāvitaraṇiyā pātimokkhavaṇṇanāya
སུདྡྷཔཱཙིཏྟིཡཝཎྞནཱ ནིཊྛིཏཱ།
Suddhapācittiyavaṇṇanā niṭṭhitā.
