| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. রথোপমসুত্তৰণ্ণনা
2. Rathopamasuttavaṇṇanā
২৩৯. সুসংৰুতিন্দ্রিযস্স ভোজনে মত্তঞ্ঞুনো সতস্স সম্পজানস্স ৰিহরতো কিলেসনিমিত্তং দুক্খং অনৰসরন্তি সুখসোমনস্সবহুলতা ৰুত্তা। যৰতি তেন ফলং মিস্সিতং ৰিয হোতীতি যোনি, একন্তিকং কারণং। অস্সাতি ভিক্খুনো। পরিপুণ্ণন্তি অৰিকলং। অনৰসেসং আসৰে খেপেতীতি আসৰক্খযো, অগ্গমগ্গো। যং যন্তি দন্ধং মজ্ঝং জৰোতি জৰাদীসু যং যং গমনং। রক্খণত্থাযাতি কিলেসচোরেহি রক্খণত্থায । ৰেগনিগ্গহণত্থাযাতি কিলেসহেতুকস্স ইন্দ্রিযৰেগস্স নিগ্গণ্হনত্থায। নিব্বিসেৰনত্থাযাতি ৰিসেৰনস্স ৰিপ্ফন্দিতস্স নিরোধনায। কিলেসূপসমত্থাযাতি কিলেসানং উপরূপরি সমনত্থায ৰূপসমনত্থায।
239. Susaṃvutindriyassa bhojane mattaññuno satassa sampajānassa viharato kilesanimittaṃ dukkhaṃ anavasaranti sukhasomanassabahulatā vuttā. Yavati tena phalaṃ missitaṃ viya hotīti yoni, ekantikaṃ kāraṇaṃ. Assāti bhikkhuno. Paripuṇṇanti avikalaṃ. Anavasesaṃ āsave khepetīti āsavakkhayo, aggamaggo. Yaṃ yanti dandhaṃ majjhaṃ javoti javādīsu yaṃ yaṃ gamanaṃ. Rakkhaṇatthāyāti kilesacorehi rakkhaṇatthāya . Veganiggahaṇatthāyāti kilesahetukassa indriyavegassa niggaṇhanatthāya. Nibbisevanatthāyāti visevanassa vipphanditassa nirodhanāya. Kilesūpasamatthāyāti kilesānaṃ uparūpari samanatthāya vūpasamanatthāya.
সমণরতি নাম সমথৰিপস্সনামগ্গফলসুখানি। দন্তানম্পি সিন্ধৰানং সারথিনো পযোগেন সিযা কাচি ৰিসেৰনমত্তাতি তদভাৰং দস্সেন্তো ‘‘নিব্বিসেৰনে কত্ৰা পেসেন্তো’’তি ৰুত্তং। ঞাণং গচ্ছতীতি অসঙ্গমনং পৰত্ততি পগেৰ ইন্দ্রিযভাৰনায কতত্তা, কিলেসনিগ্গহস্স সুখেনেৰ সিদ্ধত্তা। দাযকস্স অজ্ঝাসযো ৰসো উল়ারো লামকো। দেয্যধম্মস্স পমাণং ৰসো অপ্পকং বহুকঞ্চ।
Samaṇarati nāma samathavipassanāmaggaphalasukhāni. Dantānampi sindhavānaṃ sārathino payogena siyā kāci visevanamattāti tadabhāvaṃ dassento ‘‘nibbisevane katvā pesento’’ti vuttaṃ. Ñāṇaṃ gacchatīti asaṅgamanaṃ pavattati pageva indriyabhāvanāya katattā, kilesaniggahassa sukheneva siddhattā. Dāyakassa ajjhāsayo vaso uḷāro lāmako. Deyyadhammassa pamāṇaṃ vaso appakaṃ bahukañca.
মহামণ্ডপট্ঠানং নাম লোহপাসাদস্স পুরতো এৰ মহাভিক্খুসঙ্ঘস্স সন্নিপাতকালে তেসং পহোনকৰসেন মহামণ্ডপস্স কত্তব্বট্ঠানং। গহণমানন্তি পরিৰিসগহণভাজনং।
Mahāmaṇḍapaṭṭhānaṃ nāma lohapāsādassa purato eva mahābhikkhusaṅghassa sannipātakāle tesaṃ pahonakavasena mahāmaṇḍapassa kattabbaṭṭhānaṃ. Gahaṇamānanti parivisagahaṇabhājanaṃ.
পকতিযা ভত্তকারকিচ্চে অধিগতো উপট্ঠাকুপাসকো। মুদুসমখরসঞ্ঞিতেহি, দহনপচনভজ্জনসঞ্ঞিতেহি ৰা তীহি পাকেহি।
Pakatiyā bhattakārakicce adhigato upaṭṭhākupāsako. Mudusamakharasaññitehi, dahanapacanabhajjanasaññitehi vā tīhi pākehi.
পরিসোধেত্ৰাতি রঞ্ঞো অনুচ্ছৰিকভাৰং পরিসোধেত্ৰা। ভূমিযং ছড্ডেসি ‘‘ভিক্খূনং অদত্ৰা মযা মুখে পক্খিত্ত’’ন্তি। মুখেন গণ্হি তস্স নিদ্দোসভাৰং দস্সেতুং। মত্তং জানাপেতুং পমজ্জি। ‘‘ত্ৰং কুতো আগতো’’তি পুচ্ছনে পমাদং আপজ্জি। অনুভাগোতি অৰসিট্ঠভাগো। ইদমত্থিযন্তি ইদং পযোজনং। ইতরন্তি পাল়িযং অনাগতম্পি আহারে পমাণজাননং।
Parisodhetvāti rañño anucchavikabhāvaṃ parisodhetvā. Bhūmiyaṃ chaḍḍesi ‘‘bhikkhūnaṃ adatvā mayā mukhe pakkhitta’’nti. Mukhena gaṇhi tassa niddosabhāvaṃ dassetuṃ. Mattaṃ jānāpetuṃ pamajji. ‘‘Tvaṃ kuto āgato’’ti pucchane pamādaṃ āpajji. Anubhāgoti avasiṭṭhabhāgo. Idamatthiyanti idaṃ payojanaṃ. Itaranti pāḷiyaṃ anāgatampi āhāre pamāṇajānanaṃ.
সযনং সেয্যা, কামভোগীনং সেয্যা কামভোগিসেয্যা। দক্খিণপস্সেন সযানো নাম নত্থি দক্খিণহত্থেন কাতব্বকিচ্চকরণতো। তেজুস্সদত্তাতি ইদং অনুত্রাসস্সেৰ সীহস্স সযনন্তি দস্সেতুং ৰুত্তং। দ্ৰে পুরিমপাদে একস্মিং, পচ্ছিমপাদে একস্মিং ঠানে ঠপেত্ৰাতি হি ইদং পাদানং অৰিক্খিত্তভাৰকরণদস্সনং।
Sayanaṃ seyyā, kāmabhogīnaṃ seyyā kāmabhogiseyyā. Dakkhiṇapassena sayāno nāma natthi dakkhiṇahatthena kātabbakiccakaraṇato. Tejussadattāti idaṃ anutrāsasseva sīhassa sayananti dassetuṃ vuttaṃ. Dve purimapāde ekasmiṃ, pacchimapāde ekasmiṃ ṭhāne ṭhapetvāti hi idaṃ pādānaṃ avikkhittabhāvakaraṇadassanaṃ.
চতুত্থজ্ঝানসেয্যাতি চতুত্থজ্ঝানিকং ফলসমাপত্তিং ৰদতি। যেভুয্যেন হি তথাগতা ফলসমাপত্তিং সমাপজ্জিত্ৰাৰ সযন্তি। সা চ নেসং চতুত্থজ্ঝানতো ৰুট্ঠায, কিলেসপরিনিব্বানস্স চ কতত্তাতি ৰদন্তি । ইধ সীহসেয্যা আগতা পাদং অচ্চাধায পুব্বেনাপরং অজহিতসংলক্খণা সেয্যাতি কত্ৰা। তেনাহ ‘‘অযং হী’’তিআদি। এৰন্তি ‘‘দক্খিণেন পস্সেনা’’তিআদিনা ৰুত্তাকারেন সেয্যং কপ্পেতি।
Catutthajjhānaseyyāti catutthajjhānikaṃ phalasamāpattiṃ vadati. Yebhuyyena hi tathāgatā phalasamāpattiṃ samāpajjitvāva sayanti. Sā ca nesaṃ catutthajjhānato vuṭṭhāya, kilesaparinibbānassa ca katattāti vadanti . Idha sīhaseyyā āgatā pādaṃ accādhāya pubbenāparaṃ ajahitasaṃlakkhaṇā seyyāti katvā. Tenāha ‘‘ayaṃ hī’’tiādi. Evanti ‘‘dakkhiṇena passenā’’tiādinā vuttākārena seyyaṃ kappeti.
কথং নিদ্দাযন্তো সতো সম্পজানো হোতি? ভৰঙ্গচিত্তেন হি নিদ্দূপগমনন্তি অধিপ্পাযো। অপ্পহানেনাতি তদধিমুত্ততায তদপ্পহানং দট্ঠব্বং। তথা তেসু নিদ্দোক্কমনস্স আদিপরিযোসানেসু অজহিতসতিসম্পজঞ্ঞং হোতি। তেনাহ – ‘‘নিদ্দং ওক্কমন্তোপি সতো সম্পজানো হোতী’’তি। এতং পনাতি ‘‘নিদ্দং ওক্কমন্তোপি সতো সম্পজানো হোতী’’তি ৰুত্তনযং ৰদতি। ঞাণধাতুকন্তি ন রোচযিংসূতি নিদ্দোক্কমনেপি জাগরণে পৰত্তঞাণসভাৰমেৰাতি ন রোচযিংসু পোরাণা। নিরন্তরং ভৰঙ্গচিত্তেসু ৰত্তমানেসু সতিসম্পজঞ্ঞাসম্ভৰোতি অধিপ্পাযো। পুরিমস্মিঞ্হি নযে সতিসম্পজঞ্ঞস্স অসংৰরো, ন ভৰঙ্গস্স। ইন্দ্রিযসংৰরো, ভোজনে মত্তঞ্ঞুতা, জাগরিযানুযোগোতি ইমেহি তিৰঙ্গিকা, নিমিত্তানুব্যঞ্জনপরিৰজ্জনাদি সব্বং ৰিপস্সনাপক্খিকমেৰাতি অধিপ্পাযো।
Kathaṃniddāyanto sato sampajāno hoti? Bhavaṅgacittena hi niddūpagamananti adhippāyo. Appahānenāti tadadhimuttatāya tadappahānaṃ daṭṭhabbaṃ. Tathā tesu niddokkamanassa ādipariyosānesu ajahitasatisampajaññaṃ hoti. Tenāha – ‘‘niddaṃ okkamantopi sato sampajāno hotī’’ti. Etaṃ panāti ‘‘niddaṃ okkamantopi sato sampajāno hotī’’ti vuttanayaṃ vadati. Ñāṇadhātukanti na rocayiṃsūti niddokkamanepi jāgaraṇe pavattañāṇasabhāvamevāti na rocayiṃsu porāṇā. Nirantaraṃ bhavaṅgacittesu vattamānesu satisampajaññāsambhavoti adhippāyo. Purimasmiñhi naye satisampajaññassa asaṃvaro, na bhavaṅgassa. Indriyasaṃvaro, bhojane mattaññutā, jāgariyānuyogoti imehi tivaṅgikā, nimittānubyañjanaparivajjanādi sabbaṃ vipassanāpakkhikamevāti adhippāyo.
তানেৰাতি ৰিপস্সনাক্খণে পৰত্তানি ইন্দ্রিযাদীনি। যাৰ অরহত্তা দেসনা ৰিত্থারতো কথেতব্বা। পাল়িযং পন ‘‘যোনি চস্স আরদ্ধা হোতি আসৰানং খযাযা’’তি সঙ্খেপেন কথিতা।
Tānevāti vipassanākkhaṇe pavattāni indriyādīni. Yāva arahattā desanā vitthārato kathetabbā. Pāḷiyaṃ pana ‘‘yoni cassa āraddhā hoti āsavānaṃ khayāyā’’ti saṅkhepena kathitā.
রথোপমসুত্তৰণ্ণনা নিট্ঠিতা।
Rathopamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. রথোপমসুত্তং • 2. Rathopamasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. রথোপমসুত্তৰণ্ণনা • 2. Rathopamasuttavaṇṇanā
