| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
2. ரத்தந்த⁴காரவக்³கோ³
2. Rattandhakāravaggo
1. ரத்தந்த⁴காரஸிக்கா²பத³வண்ணனா
1. Rattandhakārasikkhāpadavaṇṇanā
அந்த⁴காரவக்³க³ஸ்ஸ பட²மே ரத்தந்த⁴காரேதி ரத்திஅந்த⁴காரே. அப்பதீ³பேதி பஜ்ஜோதசந்த³ஸூரியஅக்³கீ³ஸு ஏகேகேனாபி அனோபா⁴ஸிதே. புரிஸேனாதி ஸந்திட்டி²துங் ஸல்லபிதுஞ்ச விஞ்ஞுனா மனுஸ்ஸபுரிஸேன ஸத்³தி⁴ங். ஸந்திட்டெ²ய்ய வாதி ஹத்த²பாஸே டி²தமத்தாய பாசித்தியங். ஸல்லபெய்யாதி தத்த² ட²த்வா கே³ஹஸிதகத²ங் கதெ²ந்தியாபி பாசித்தியமேவ.
Andhakāravaggassa paṭhame rattandhakāreti rattiandhakāre. Appadīpeti pajjotacandasūriyaaggīsu ekekenāpi anobhāsite. Purisenāti santiṭṭhituṃ sallapituñca viññunā manussapurisena saddhiṃ. Santiṭṭheyya vāti hatthapāse ṭhitamattāya pācittiyaṃ. Sallapeyyāti tattha ṭhatvā gehasitakathaṃ kathentiyāpi pācittiyameva.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ ஏவங் ஸந்திட்ட²னவத்து²ஸ்மிங் பஞ்ஞத்தங், புரிஸஸ்ஸ ஹத்த²பாஸங் விஜஹித்வா, யக்கா²தீ³னங் ஹத்த²பாஸங் அவிஜஹித்வாபி ஸந்திட்ட²ந்தியா, ஸல்லபெந்தியா வா து³க்கடங், யங்கிஞ்சி விஞ்ஞுங் து³தியங் க³ஹெத்வா ஏவங் கரொந்தியா, அரஹோபெக்கா²ய, அஞ்ஞவிஹிதாய, உம்மத்திகாதீ³னஞ்ச அனாபத்தி. ரத்தந்த⁴காரதா, புரிஸஸ்ஸ ஹத்த²பாஸே டா²னங் வா ஸல்லபனங் வா, ஸஹாயாபா⁴வோ, ரஹோபெக்க²தாதி இமானெத்த² சத்தாரி அங்கா³னி. தெ²ய்யஸத்த²ஸமுட்டா²னங், கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், திவேத³னந்தி.
Sāvatthiyaṃ aññataraṃ bhikkhuniṃ ārabbha evaṃ santiṭṭhanavatthusmiṃ paññattaṃ, purisassa hatthapāsaṃ vijahitvā, yakkhādīnaṃ hatthapāsaṃ avijahitvāpi santiṭṭhantiyā, sallapentiyā vā dukkaṭaṃ, yaṃkiñci viññuṃ dutiyaṃ gahetvā evaṃ karontiyā, arahopekkhāya, aññavihitāya, ummattikādīnañca anāpatti. Rattandhakāratā, purisassa hatthapāse ṭhānaṃ vā sallapanaṃ vā, sahāyābhāvo, rahopekkhatāti imānettha cattāri aṅgāni. Theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
ரத்தந்த⁴காரஸிக்கா²பத³வண்ணனா நிட்டி²தா.
Rattandhakārasikkhāpadavaṇṇanā niṭṭhitā.
2. படிச்ச²ன்னோகாஸஸிக்கா²பத³வண்ணனா
2. Paṭicchannokāsasikkhāpadavaṇṇanā
து³தியே படிச்ச²ன்னே ஓகாஸேதி குட்டாதீ³ஸு யேன கேனசி படிச்ச²ன்னே, இத³மேவெத்த² நானத்தங்.
Dutiye paṭicchanne okāseti kuṭṭādīsu yena kenaci paṭicchanne, idamevettha nānattaṃ.
படிச்ச²ன்னோகாஸஸிக்கா²பத³வண்ணனா நிட்டி²தா.
Paṭicchannokāsasikkhāpadavaṇṇanā niṭṭhitā.
3. அஜ்ஜோ²காஸஸல்லபனஸிக்கா²பத³வண்ணனா
3. Ajjhokāsasallapanasikkhāpadavaṇṇanā
ததியே அஜ்ஜோ²காஸேதி நானங், ஸேஸங் உப⁴யத்தா²பி பட²மஸதி³ஸமேவாதி.
Tatiye ajjhokāseti nānaṃ, sesaṃ ubhayatthāpi paṭhamasadisamevāti.
அஜ்ஜோ²காஸஸல்லபனஸிக்கா²பத³வண்ணனா நிட்டி²தா.
Ajjhokāsasallapanasikkhāpadavaṇṇanā niṭṭhitā.
4. து³தியிகஉய்யோஜனஸிக்கா²பத³வண்ணனா
4. Dutiyikauyyojanasikkhāpadavaṇṇanā
சதுத்தே² ரதி²காயாதி ரச்சா²யங். ப்³யூஹேதி அனிவித்³த⁴ரச்சா²யங் . ஸிங்கா⁴டகேதி சச்சரே. நிகண்ணிகங் வா ஜப்பெய்யாதி கண்ணமூலே கிஞ்சி ஜப்பெய்ய. உய்யோஜெய்யாதி அனாசாரங் சரிதுகாமதாய ‘‘க³ச்ச² த்வ’’ந்தி து³தியிகங் உய்யோஜெய்ய. பாசித்தியந்தி புரிமனயேனேவ தாவ ஸந்திட்ட²னாதீ³ஸு தீணி பாசித்தியானி, உய்யோஜெந்தியா பன உய்யோஜனே ச ஹத்த²பாஸவிஜஹனே ச து³க்கடங், விஜஹிதே பாசித்தியங்.
Catutthe rathikāyāti racchāyaṃ. Byūheti anividdharacchāyaṃ . Siṅghāṭaketi caccare. Nikaṇṇikaṃ vā jappeyyāti kaṇṇamūle kiñci jappeyya. Uyyojeyyāti anācāraṃ caritukāmatāya ‘‘gaccha tva’’nti dutiyikaṃ uyyojeyya. Pācittiyanti purimanayeneva tāva santiṭṭhanādīsu tīṇi pācittiyāni, uyyojentiyā pana uyyojane ca hatthapāsavijahane ca dukkaṭaṃ, vijahite pācittiyaṃ.
ஸாவத்தி²யங் து²ல்லனந்த³ங் ஆரப்³ப⁴ ஏவங் ஸந்திட்ட²னவத்து²ஸ்மிங் பஞ்ஞத்தங், ஸேஸங் புரிமத்தயஸதி³ஸமேவ. அனாபத்தியங் பன ‘‘ந அனாசாரங் ஆசரிதுகாமா, ஸதி கரணீயே து³தியிகங் பி⁴க்கு²னிங் உய்யோஜேதீ’’தி (பாசி॰ 852) எத்தகங் அதி⁴கந்தி.
Sāvatthiyaṃ thullanandaṃ ārabbha evaṃ santiṭṭhanavatthusmiṃ paññattaṃ, sesaṃ purimattayasadisameva. Anāpattiyaṃ pana ‘‘na anācāraṃ ācaritukāmā, sati karaṇīye dutiyikaṃ bhikkhuniṃ uyyojetī’’ti (pāci. 852) ettakaṃ adhikanti.
து³தியிகஉய்யோஜனஸிக்கா²பத³வண்ணனா நிட்டி²தா.
Dutiyikauyyojanasikkhāpadavaṇṇanā niṭṭhitā.
5. அனாபுச்சா²பக்கமனஸிக்கா²பத³வண்ணனா
5. Anāpucchāpakkamanasikkhāpadavaṇṇanā
பஞ்சமே புரேப⁴த்தந்தி அருணுக்³க³மனங் உபாதா³ய யாவ மஜ்ஜ²ன்ஹிகங். ஆஸனேதி பல்லங்கஸ்ஸோகாஸபூ⁴தே. ஸாமிகே அனாபுச்சா²தி தஸ்மிங் குலே யங்கிஞ்சி விஞ்ஞுங் மனுஸ்ஸங் அனாபுச்சா². பக்கமெய்யாதி எத்த² ச²ன்னஸ்ஸ அந்தோ நிஸீதி³த்வா அனோவஸ்ஸகங் அஜ்ஜோ²காஸே உபசாரங் அதிக்காமெந்தியா பட²மபாதே³ து³க்கடங், து³தியே பாசித்தியங்.
Pañcame purebhattanti aruṇuggamanaṃ upādāya yāva majjhanhikaṃ. Āsaneti pallaṅkassokāsabhūte. Sāmike anāpucchāti tasmiṃ kule yaṃkiñci viññuṃ manussaṃ anāpucchā. Pakkameyyāti ettha channassa anto nisīditvā anovassakaṃ ajjhokāse upacāraṃ atikkāmentiyā paṭhamapāde dukkaṭaṃ, dutiye pācittiyaṃ.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ அனாபுச்சா² பக்கமனவத்து²ஸ்மிங் பஞ்ஞத்தங், திகபாசித்தியங், பல்லங்கஸ்ஸ அனோகாஸே து³க்கடங், ததா² ஆபுச்சி²தே அனாபுச்சி²தஸஞ்ஞாய சேவ வேமதிகாய ச. ஆபுச்சி²தஸஞ்ஞாய பன, அஸங்ஹாரிமே, கி³லானாய, ஆபதா³ஸு, உம்மத்திகாதீ³னஞ்ச அனாபத்தி. புரேப⁴த்ததா, அந்தரக⁴ரே நிஸஜ்ஜா, ஆஸனஸ்ஸ பல்லங்கோகாஸதா, அஞ்ஞத்ர அனுஞ்ஞாதகாரணா அனாபுச்ச²னங், வுத்தபரிச்சே²தா³திக்கமோதி இமானெத்த² பஞ்ச அங்கா³னி. ஸமுட்டா²னாதீ³னி கதி²னஸதி³ஸானி, இத³ங் பன கிரியாகிரியந்தி.
Sāvatthiyaṃ aññataraṃ bhikkhuniṃ ārabbha anāpucchā pakkamanavatthusmiṃ paññattaṃ, tikapācittiyaṃ, pallaṅkassa anokāse dukkaṭaṃ, tathā āpucchite anāpucchitasaññāya ceva vematikāya ca. Āpucchitasaññāya pana, asaṃhārime, gilānāya, āpadāsu, ummattikādīnañca anāpatti. Purebhattatā, antaraghare nisajjā, āsanassa pallaṅkokāsatā, aññatra anuññātakāraṇā anāpucchanaṃ, vuttaparicchedātikkamoti imānettha pañca aṅgāni. Samuṭṭhānādīni kathinasadisāni, idaṃ pana kiriyākiriyanti.
அனாபுச்சா²பக்கமனஸிக்கா²பத³வண்ணனா நிட்டி²தா.
Anāpucchāpakkamanasikkhāpadavaṇṇanā niṭṭhitā.
6. அனாபுச்சா²அபி⁴னிஸீத³னஸிக்கா²பத³வண்ணனா
6. Anāpucchāabhinisīdanasikkhāpadavaṇṇanā
ச²ட்டே² பச்சா²ப⁴த்தந்தி மஜ்ஜ²ன்ஹிகே வீதிவத்தே யாவ ஸூரியஸ்ஸ அத்த²ங்க³மா. அபி⁴னிஸீதெ³ய்ய வாதி ஆதி³ம்ஹி நிஸீதி³த்வா க³ச்ச²ந்தியா ஏகா ஆபத்தி, அனிஸீதி³த்வா நிபஜ்ஜித்வாவ க³ச்ச²ந்தியாபி ஏகா, நிஸீதி³த்வா நிபஜ்ஜந்தியா த்³வே.
Chaṭṭhe pacchābhattanti majjhanhike vītivatte yāva sūriyassa atthaṅgamā. Abhinisīdeyya vāti ādimhi nisīditvā gacchantiyā ekā āpatti, anisīditvā nipajjitvāva gacchantiyāpi ekā, nisīditvā nipajjantiyā dve.
ஸாவத்தி²யங் து²ல்லனந்த³ங் ஆரப்³ப⁴ ஆஸனே அபி⁴னிஸீத³னவத்து²ஸ்மிங் பஞ்ஞத்தங் , ஸேஸங் பஞ்சமஸதி³ஸமேவ. யதா² பன தத்த² அஸங்ஹாரிமே, ஏவமித⁴ து⁴வபஞ்ஞத்தே அனாபத்தீதி.
Sāvatthiyaṃ thullanandaṃ ārabbha āsane abhinisīdanavatthusmiṃ paññattaṃ , sesaṃ pañcamasadisameva. Yathā pana tattha asaṃhārime, evamidha dhuvapaññatte anāpattīti.
அனாபுச்சா²அபி⁴னிஸீத³னஸிக்கா²பத³வண்ணனா நிட்டி²தா.
Anāpucchāabhinisīdanasikkhāpadavaṇṇanā niṭṭhitā.
7. அனாபுச்சா²ஸந்த²ரணஸிக்கா²பத³வண்ணனா
7. Anāpucchāsantharaṇasikkhāpadavaṇṇanā
ஸத்தமே விகாலேதி அத்த²ங்க³தே ஸூரியே. ஸெய்யந்தி அந்தமஸோ பண்ணஸந்தா²ரம்பி, ஸேஸங் ச²ட்ட²ஸதி³ஸமேவ.
Sattame vikāleti atthaṅgate sūriye. Seyyanti antamaso paṇṇasanthārampi, sesaṃ chaṭṭhasadisameva.
இத³ங் பன ஸாவத்தி²யங் ஸம்ப³ஹுலா பி⁴க்கு²னியோ ஆரப்³ப⁴ விகாலே குலானி உபஸங்கமித்வா ஸாமிகே அனாபுச்சி²த்வா ஸெய்யங் ஸந்த²ரித்வா அபி⁴னிஸீத³னவத்து²ஸ்மிங் பஞ்ஞத்தங், அனாபத்தியஞ்செத்த² து⁴வபஞ்ஞத்தங் நாம நத்தீ²தி.
Idaṃ pana sāvatthiyaṃ sambahulā bhikkhuniyo ārabbha vikāle kulāni upasaṅkamitvā sāmike anāpucchitvā seyyaṃ santharitvā abhinisīdanavatthusmiṃ paññattaṃ, anāpattiyañcettha dhuvapaññattaṃ nāma natthīti.
அனாபுச்சா²ஸந்த²ரணஸிக்கா²பத³வண்ணனா நிட்டி²தா.
Anāpucchāsantharaṇasikkhāpadavaṇṇanā niṭṭhitā.
8. பரஉஜ்ஜா²பனகஸிக்கா²பத³வண்ணனா
8. Paraujjhāpanakasikkhāpadavaṇṇanā
அட்ட²மே து³க்³க³ஹிதேன தூ³பதா⁴ரிதேனாதி யங் வுத்தங், ததோ அஞ்ஞதா² க³ஹிதேன ச உபதா⁴ரிதேன ச. பரந்தி ‘‘அஹங் கிரய்யே அய்யங் ந ஸக்கச்சங் உபட்ட²ஹாமீ’’திஆதி³னா (பாசி॰ 869) நயேன உபஸம்பன்னங் உஜ்ஜா²பெந்தியா பாசித்தியங்.
Aṭṭhame duggahitena dūpadhāritenāti yaṃ vuttaṃ, tato aññathā gahitena ca upadhāritena ca. Paranti ‘‘ahaṃ kirayye ayyaṃ na sakkaccaṃ upaṭṭhahāmī’’tiādinā (pāci. 869) nayena upasampannaṃ ujjhāpentiyā pācittiyaṃ.
ஸாவத்தி²யங் அஞ்ஞதரங் பி⁴க்கு²னிங் ஆரப்³ப⁴ ஏவங் பரங் உஜ்ஜா²பனவத்து²ஸ்மிங் பஞ்ஞத்தங், திகபாசித்தியங், அனுபஸம்பன்னாய திகது³க்கடங், உம்மத்திகாதீ³னங்யேவ அனாபத்தி. து³க்³க³ஹிததா, உஜ்ஜா²பனங், யங் உஜ்ஜா²பேதி, தஸ்ஸா உபஸம்பன்னதாதி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Sāvatthiyaṃ aññataraṃ bhikkhuniṃ ārabbha evaṃ paraṃ ujjhāpanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, ummattikādīnaṃyeva anāpatti. Duggahitatā, ujjhāpanaṃ, yaṃ ujjhāpeti, tassā upasampannatāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
பரஉஜ்ஜா²பனகஸிக்கா²பத³வண்ணனா நிட்டி²தா.
Paraujjhāpanakasikkhāpadavaṇṇanā niṭṭhitā.
9. பரஅபி⁴ஸபனஸிக்கா²பத³வண்ணனா
9. Paraabhisapanasikkhāpadavaṇṇanā
நவமே அபி⁴ஸபெய்யாதி ஸபத²ங் கரெய்ய. தத்த² ‘‘நிரயே உபபஜ்ஜாமி, நிரயே உபபஜ்ஜதூ’’திஏவமாதீ³னி வத³மானா நிரயேன அபி⁴ஸபதி நாம, அக்கோஸதீதி அத்தோ². ‘‘கி³ஹினீ ஹோமி, கி³ஹினீ ஹோதூ’’திஏவமாதீ³னி வத³மானா ப்³ரஹ்மசரியேன. தஸ்ஸா வாசாய வாசாய பாசித்தியங்.
Navame abhisapeyyāti sapathaṃ kareyya. Tattha ‘‘niraye upapajjāmi, niraye upapajjatū’’tievamādīni vadamānā nirayena abhisapati nāma, akkosatīti attho. ‘‘Gihinī homi, gihinī hotū’’tievamādīni vadamānā brahmacariyena. Tassā vācāya vācāya pācittiyaṃ.
ஸாவத்தி²யங் சண்ட³காளிங் ஆரப்³ப⁴ ஏவங் அபி⁴ஸபனவத்து²ஸ்மிங் பஞ்ஞத்தங், திகபாசித்தியங், அனுபஸம்பன்னாய திகது³க்கடங், திரச்சா²னயோனியா வா பெத்திவிஸயேன வா மனுஸ்ஸதோ³ப⁴க்³கே³ன வா அபி⁴ஸபனே து³க்கடங். அத்த²த⁴ம்மானுஸாஸனிபுரெக்கா²ரானங் உம்மத்திகாதீ³னஞ்ச அனாபத்தி. நிரயேன வா ப்³ரஹ்மசரியேன வா அபி⁴ஸபனங் , உபஸம்பன்னதா, அத்த²த⁴ம்மபுரெக்கா²ராதீ³னங் அபா⁴வோதி இமானெத்த² தீணி அங்கா³னி. ஸமுட்டா²னாதீ³னி அட்ட²மஸதி³ஸானேவாதி.
Sāvatthiyaṃ caṇḍakāḷiṃ ārabbha evaṃ abhisapanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, tiracchānayoniyā vā pettivisayena vā manussadobhaggena vā abhisapane dukkaṭaṃ. Atthadhammānusāsanipurekkhārānaṃ ummattikādīnañca anāpatti. Nirayena vā brahmacariyena vā abhisapanaṃ , upasampannatā, atthadhammapurekkhārādīnaṃ abhāvoti imānettha tīṇi aṅgāni. Samuṭṭhānādīni aṭṭhamasadisānevāti.
பரஅபி⁴ஸபனஸிக்கா²பத³வண்ணனா நிட்டி²தா.
Paraabhisapanasikkhāpadavaṇṇanā niṭṭhitā.
10. ரோத³னஸிக்கா²பத³வண்ணனா
10. Rodanasikkhāpadavaṇṇanā
த³ஸமே வதி⁴த்வாதி ஹத்தா²தீ³ஹி பஹரித்வா, உப⁴யங் கரொந்தியாவ பாசித்தியங்.
Dasame vadhitvāti hatthādīhi paharitvā, ubhayaṃ karontiyāva pācittiyaṃ.
ஸாவத்தி²யங் சண்ட³காளிங் ஆரப்³ப⁴ அத்தானங் வதி⁴த்வா ரோத³னவத்து²ஸ்மிங் பஞ்ஞத்தங், கேவலங் வத⁴ந்தியா வா ரோத³ந்தியா வா து³க்கடமேவ. ஞாதிரோக³போ⁴க³ப்³யஸனேஹி பு²ட்டா²ய கேவலங் ரோத³ந்தியா ஏவ ந வத⁴ந்தியா, உம்மத்திகாதீ³னஞ்ச அனாபத்தி. அத்தானங் வத⁴னஞ்சேவ, ரோத³னஞ்சாதி இமானெத்த² த்³வே அங்கா³னி. ஸமுட்டா²னாதீ³னி ஸமனுபா⁴ஸனஸதி³ஸானி, இத³ங் பன கிரியமேவாதி.
Sāvatthiyaṃ caṇḍakāḷiṃ ārabbha attānaṃ vadhitvā rodanavatthusmiṃ paññattaṃ, kevalaṃ vadhantiyā vā rodantiyā vā dukkaṭameva. Ñātirogabhogabyasanehi phuṭṭhāya kevalaṃ rodantiyā eva na vadhantiyā, ummattikādīnañca anāpatti. Attānaṃ vadhanañceva, rodanañcāti imānettha dve aṅgāni. Samuṭṭhānādīni samanubhāsanasadisāni, idaṃ pana kiriyamevāti.
ரோத³னஸிக்கா²பத³வண்ணனா நிட்டி²தா.
Rodanasikkhāpadavaṇṇanā niṭṭhitā.
ரத்தந்த⁴காரவக்³கோ³ து³தியோ.
Rattandhakāravaggo dutiyo.
