| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
২. রত্তন্ধকারৰগ্গো
2. Rattandhakāravaggo
১. রত্তন্ধকারসিক্খাপদৰণ্ণনা
1. Rattandhakārasikkhāpadavaṇṇanā
অন্ধকারৰগ্গস্স পঠমে রত্তন্ধকারেতি রত্তিঅন্ধকারে। অপ্পদীপেতি পজ্জোতচন্দসূরিযঅগ্গীসু একেকেনাপি অনোভাসিতে। পুরিসেনাতি সন্তিট্ঠিতুং সল্লপিতুঞ্চ ৰিঞ্ঞুনা মনুস্সপুরিসেন সদ্ধিং। সন্তিট্ঠেয্য ৰাতি হত্থপাসে ঠিতমত্তায পাচিত্তিযং। সল্লপেয্যাতি তত্থ ঠত্ৰা গেহসিতকথং কথেন্তিযাপি পাচিত্তিযমেৰ।
Andhakāravaggassa paṭhame rattandhakāreti rattiandhakāre. Appadīpeti pajjotacandasūriyaaggīsu ekekenāpi anobhāsite. Purisenāti santiṭṭhituṃ sallapituñca viññunā manussapurisena saddhiṃ. Santiṭṭheyya vāti hatthapāse ṭhitamattāya pācittiyaṃ. Sallapeyyāti tattha ṭhatvā gehasitakathaṃ kathentiyāpi pācittiyameva.
সাৰত্থিযং অঞ্ঞতরং ভিক্খুনিং আরব্ভ এৰং সন্তিট্ঠনৰত্থুস্মিং পঞ্ঞত্তং, পুরিসস্স হত্থপাসং ৰিজহিত্ৰা, যক্খাদীনং হত্থপাসং অৰিজহিত্ৰাপি সন্তিট্ঠন্তিযা, সল্লপেন্তিযা ৰা দুক্কটং, যংকিঞ্চি ৰিঞ্ঞুং দুতিযং গহেত্ৰা এৰং করোন্তিযা, অরহোপেক্খায, অঞ্ঞৰিহিতায, উম্মত্তিকাদীনঞ্চ অনাপত্তি। রত্তন্ধকারতা, পুরিসস্স হত্থপাসে ঠানং ৰা সল্লপনং ৰা, সহাযাভাৰো, রহোপেক্খতাতি ইমানেত্থ চত্তারি অঙ্গানি। থেয্যসত্থসমুট্ঠানং, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, তিৰেদনন্তি।
Sāvatthiyaṃ aññataraṃ bhikkhuniṃ ārabbha evaṃ santiṭṭhanavatthusmiṃ paññattaṃ, purisassa hatthapāsaṃ vijahitvā, yakkhādīnaṃ hatthapāsaṃ avijahitvāpi santiṭṭhantiyā, sallapentiyā vā dukkaṭaṃ, yaṃkiñci viññuṃ dutiyaṃ gahetvā evaṃ karontiyā, arahopekkhāya, aññavihitāya, ummattikādīnañca anāpatti. Rattandhakāratā, purisassa hatthapāse ṭhānaṃ vā sallapanaṃ vā, sahāyābhāvo, rahopekkhatāti imānettha cattāri aṅgāni. Theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, tivedananti.
রত্তন্ধকারসিক্খাপদৰণ্ণনা নিট্ঠিতা।
Rattandhakārasikkhāpadavaṇṇanā niṭṭhitā.
২. পটিচ্ছন্নোকাসসিক্খাপদৰণ্ণনা
2. Paṭicchannokāsasikkhāpadavaṇṇanā
দুতিযে পটিচ্ছন্নে ওকাসেতি কুট্টাদীসু যেন কেনচি পটিচ্ছন্নে, ইদমেৰেত্থ নানত্তং।
Dutiye paṭicchanne okāseti kuṭṭādīsu yena kenaci paṭicchanne, idamevettha nānattaṃ.
পটিচ্ছন্নোকাসসিক্খাপদৰণ্ণনা নিট্ঠিতা।
Paṭicchannokāsasikkhāpadavaṇṇanā niṭṭhitā.
৩. অজ্ঝোকাসসল্লপনসিক্খাপদৰণ্ণনা
3. Ajjhokāsasallapanasikkhāpadavaṇṇanā
ততিযে অজ্ঝোকাসেতি নানং, সেসং উভযত্থাপি পঠমসদিসমেৰাতি।
Tatiye ajjhokāseti nānaṃ, sesaṃ ubhayatthāpi paṭhamasadisamevāti.
অজ্ঝোকাসসল্লপনসিক্খাপদৰণ্ণনা নিট্ঠিতা।
Ajjhokāsasallapanasikkhāpadavaṇṇanā niṭṭhitā.
৪. দুতিযিকউয্যোজনসিক্খাপদৰণ্ণনা
4. Dutiyikauyyojanasikkhāpadavaṇṇanā
চতুত্থে রথিকাযাতি রচ্ছাযং। ব্যূহেতি অনিৰিদ্ধরচ্ছাযং । সিঙ্ঘাটকেতি চচ্চরে। নিকণ্ণিকং ৰা জপ্পেয্যাতি কণ্ণমূলে কিঞ্চি জপ্পেয্য। উয্যোজেয্যাতি অনাচারং চরিতুকামতায ‘‘গচ্ছ ত্ৰ’’ন্তি দুতিযিকং উয্যোজেয্য। পাচিত্তিযন্তি পুরিমনযেনেৰ তাৰ সন্তিট্ঠনাদীসু তীণি পাচিত্তিযানি, উয্যোজেন্তিযা পন উয্যোজনে চ হত্থপাসৰিজহনে চ দুক্কটং, ৰিজহিতে পাচিত্তিযং।
Catutthe rathikāyāti racchāyaṃ. Byūheti anividdharacchāyaṃ . Siṅghāṭaketi caccare. Nikaṇṇikaṃ vā jappeyyāti kaṇṇamūle kiñci jappeyya. Uyyojeyyāti anācāraṃ caritukāmatāya ‘‘gaccha tva’’nti dutiyikaṃ uyyojeyya. Pācittiyanti purimanayeneva tāva santiṭṭhanādīsu tīṇi pācittiyāni, uyyojentiyā pana uyyojane ca hatthapāsavijahane ca dukkaṭaṃ, vijahite pācittiyaṃ.
সাৰত্থিযং থুল্লনন্দং আরব্ভ এৰং সন্তিট্ঠনৰত্থুস্মিং পঞ্ঞত্তং, সেসং পুরিমত্তযসদিসমেৰ। অনাপত্তিযং পন ‘‘ন অনাচারং আচরিতুকামা, সতি করণীযে দুতিযিকং ভিক্খুনিং উয্যোজেতী’’তি (পাচি॰ ৮৫২) এত্তকং অধিকন্তি।
Sāvatthiyaṃ thullanandaṃ ārabbha evaṃ santiṭṭhanavatthusmiṃ paññattaṃ, sesaṃ purimattayasadisameva. Anāpattiyaṃ pana ‘‘na anācāraṃ ācaritukāmā, sati karaṇīye dutiyikaṃ bhikkhuniṃ uyyojetī’’ti (pāci. 852) ettakaṃ adhikanti.
দুতিযিকউয্যোজনসিক্খাপদৰণ্ণনা নিট্ঠিতা।
Dutiyikauyyojanasikkhāpadavaṇṇanā niṭṭhitā.
৫. অনাপুচ্ছাপক্কমনসিক্খাপদৰণ্ণনা
5. Anāpucchāpakkamanasikkhāpadavaṇṇanā
পঞ্চমে পুরেভত্তন্তি অরুণুগ্গমনং উপাদায যাৰ মজ্ঝন্হিকং। আসনেতি পল্লঙ্কস্সোকাসভূতে। সামিকে অনাপুচ্ছাতি তস্মিং কুলে যংকিঞ্চি ৰিঞ্ঞুং মনুস্সং অনাপুচ্ছা। পক্কমেয্যাতি এত্থ ছন্নস্স অন্তো নিসীদিত্ৰা অনোৰস্সকং অজ্ঝোকাসে উপচারং অতিক্কামেন্তিযা পঠমপাদে দুক্কটং, দুতিযে পাচিত্তিযং।
Pañcame purebhattanti aruṇuggamanaṃ upādāya yāva majjhanhikaṃ. Āsaneti pallaṅkassokāsabhūte. Sāmike anāpucchāti tasmiṃ kule yaṃkiñci viññuṃ manussaṃ anāpucchā. Pakkameyyāti ettha channassa anto nisīditvā anovassakaṃ ajjhokāse upacāraṃ atikkāmentiyā paṭhamapāde dukkaṭaṃ, dutiye pācittiyaṃ.
সাৰত্থিযং অঞ্ঞতরং ভিক্খুনিং আরব্ভ অনাপুচ্ছা পক্কমনৰত্থুস্মিং পঞ্ঞত্তং, তিকপাচিত্তিযং, পল্লঙ্কস্স অনোকাসে দুক্কটং, তথা আপুচ্ছিতে অনাপুচ্ছিতসঞ্ঞায চেৰ ৰেমতিকায চ। আপুচ্ছিতসঞ্ঞায পন, অসংহারিমে, গিলানায, আপদাসু, উম্মত্তিকাদীনঞ্চ অনাপত্তি। পুরেভত্ততা, অন্তরঘরে নিসজ্জা, আসনস্স পল্লঙ্কোকাসতা, অঞ্ঞত্র অনুঞ্ঞাতকারণা অনাপুচ্ছনং, ৰুত্তপরিচ্ছেদাতিক্কমোতি ইমানেত্থ পঞ্চ অঙ্গানি। সমুট্ঠানাদীনি কথিনসদিসানি, ইদং পন কিরিযাকিরিযন্তি।
Sāvatthiyaṃ aññataraṃ bhikkhuniṃ ārabbha anāpucchā pakkamanavatthusmiṃ paññattaṃ, tikapācittiyaṃ, pallaṅkassa anokāse dukkaṭaṃ, tathā āpucchite anāpucchitasaññāya ceva vematikāya ca. Āpucchitasaññāya pana, asaṃhārime, gilānāya, āpadāsu, ummattikādīnañca anāpatti. Purebhattatā, antaraghare nisajjā, āsanassa pallaṅkokāsatā, aññatra anuññātakāraṇā anāpucchanaṃ, vuttaparicchedātikkamoti imānettha pañca aṅgāni. Samuṭṭhānādīni kathinasadisāni, idaṃ pana kiriyākiriyanti.
অনাপুচ্ছাপক্কমনসিক্খাপদৰণ্ণনা নিট্ঠিতা।
Anāpucchāpakkamanasikkhāpadavaṇṇanā niṭṭhitā.
৬. অনাপুচ্ছাঅভিনিসীদনসিক্খাপদৰণ্ণনা
6. Anāpucchāabhinisīdanasikkhāpadavaṇṇanā
ছট্ঠে পচ্ছাভত্তন্তি মজ্ঝন্হিকে ৰীতিৰত্তে যাৰ সূরিযস্স অত্থঙ্গমা। অভিনিসীদেয্য ৰাতি আদিম্হি নিসীদিত্ৰা গচ্ছন্তিযা একা আপত্তি, অনিসীদিত্ৰা নিপজ্জিত্ৰাৰ গচ্ছন্তিযাপি একা, নিসীদিত্ৰা নিপজ্জন্তিযা দ্ৰে।
Chaṭṭhe pacchābhattanti majjhanhike vītivatte yāva sūriyassa atthaṅgamā. Abhinisīdeyya vāti ādimhi nisīditvā gacchantiyā ekā āpatti, anisīditvā nipajjitvāva gacchantiyāpi ekā, nisīditvā nipajjantiyā dve.
সাৰত্থিযং থুল্লনন্দং আরব্ভ আসনে অভিনিসীদনৰত্থুস্মিং পঞ্ঞত্তং , সেসং পঞ্চমসদিসমেৰ। যথা পন তত্থ অসংহারিমে, এৰমিধ ধুৰপঞ্ঞত্তে অনাপত্তীতি।
Sāvatthiyaṃ thullanandaṃ ārabbha āsane abhinisīdanavatthusmiṃ paññattaṃ , sesaṃ pañcamasadisameva. Yathā pana tattha asaṃhārime, evamidha dhuvapaññatte anāpattīti.
অনাপুচ্ছাঅভিনিসীদনসিক্খাপদৰণ্ণনা নিট্ঠিতা।
Anāpucchāabhinisīdanasikkhāpadavaṇṇanā niṭṭhitā.
৭. অনাপুচ্ছাসন্থরণসিক্খাপদৰণ্ণনা
7. Anāpucchāsantharaṇasikkhāpadavaṇṇanā
সত্তমে ৰিকালেতি অত্থঙ্গতে সূরিযে। সেয্যন্তি অন্তমসো পণ্ণসন্থারম্পি, সেসং ছট্ঠসদিসমেৰ।
Sattame vikāleti atthaṅgate sūriye. Seyyanti antamaso paṇṇasanthārampi, sesaṃ chaṭṭhasadisameva.
ইদং পন সাৰত্থিযং সম্বহুলা ভিক্খুনিযো আরব্ভ ৰিকালে কুলানি উপসঙ্কমিত্ৰা সামিকে অনাপুচ্ছিত্ৰা সেয্যং সন্থরিত্ৰা অভিনিসীদনৰত্থুস্মিং পঞ্ঞত্তং, অনাপত্তিযঞ্চেত্থ ধুৰপঞ্ঞত্তং নাম নত্থীতি।
Idaṃ pana sāvatthiyaṃ sambahulā bhikkhuniyo ārabbha vikāle kulāni upasaṅkamitvā sāmike anāpucchitvā seyyaṃ santharitvā abhinisīdanavatthusmiṃ paññattaṃ, anāpattiyañcettha dhuvapaññattaṃ nāma natthīti.
অনাপুচ্ছাসন্থরণসিক্খাপদৰণ্ণনা নিট্ঠিতা।
Anāpucchāsantharaṇasikkhāpadavaṇṇanā niṭṭhitā.
৮. পরউজ্ঝাপনকসিক্খাপদৰণ্ণনা
8. Paraujjhāpanakasikkhāpadavaṇṇanā
অট্ঠমে দুগ্গহিতেন দূপধারিতেনাতি যং ৰুত্তং, ততো অঞ্ঞথা গহিতেন চ উপধারিতেন চ। পরন্তি ‘‘অহং কিরয্যে অয্যং ন সক্কচ্চং উপট্ঠহামী’’তিআদিনা (পাচি॰ ৮৬৯) নযেন উপসম্পন্নং উজ্ঝাপেন্তিযা পাচিত্তিযং।
Aṭṭhame duggahitena dūpadhāritenāti yaṃ vuttaṃ, tato aññathā gahitena ca upadhāritena ca. Paranti ‘‘ahaṃ kirayye ayyaṃ na sakkaccaṃ upaṭṭhahāmī’’tiādinā (pāci. 869) nayena upasampannaṃ ujjhāpentiyā pācittiyaṃ.
সাৰত্থিযং অঞ্ঞতরং ভিক্খুনিং আরব্ভ এৰং পরং উজ্ঝাপনৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, উম্মত্তিকাদীনংযেৰ অনাপত্তি। দুগ্গহিততা, উজ্ঝাপনং, যং উজ্ঝাপেতি, তস্সা উপসম্পন্নতাতি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন দুক্খৰেদনন্তি।
Sāvatthiyaṃ aññataraṃ bhikkhuniṃ ārabbha evaṃ paraṃ ujjhāpanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, ummattikādīnaṃyeva anāpatti. Duggahitatā, ujjhāpanaṃ, yaṃ ujjhāpeti, tassā upasampannatāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
পরউজ্ঝাপনকসিক্খাপদৰণ্ণনা নিট্ঠিতা।
Paraujjhāpanakasikkhāpadavaṇṇanā niṭṭhitā.
৯. পরঅভিসপনসিক্খাপদৰণ্ণনা
9. Paraabhisapanasikkhāpadavaṇṇanā
নৰমে অভিসপেয্যাতি সপথং করেয্য। তত্থ ‘‘নিরযে উপপজ্জামি, নিরযে উপপজ্জতূ’’তিএৰমাদীনি ৰদমানা নিরযেন অভিসপতি নাম, অক্কোসতীতি অত্থো। ‘‘গিহিনী হোমি, গিহিনী হোতূ’’তিএৰমাদীনি ৰদমানা ব্রহ্মচরিযেন। তস্সা ৰাচায ৰাচায পাচিত্তিযং।
Navame abhisapeyyāti sapathaṃ kareyya. Tattha ‘‘niraye upapajjāmi, niraye upapajjatū’’tievamādīni vadamānā nirayena abhisapati nāma, akkosatīti attho. ‘‘Gihinī homi, gihinī hotū’’tievamādīni vadamānā brahmacariyena. Tassā vācāya vācāya pācittiyaṃ.
সাৰত্থিযং চণ্ডকাল়িং আরব্ভ এৰং অভিসপনৰত্থুস্মিং পঞ্ঞত্তং, তিকপাচিত্তিযং, অনুপসম্পন্নায তিকদুক্কটং, তিরচ্ছানযোনিযা ৰা পেত্তিৰিসযেন ৰা মনুস্সদোভগ্গেন ৰা অভিসপনে দুক্কটং। অত্থধম্মানুসাসনিপুরেক্খারানং উম্মত্তিকাদীনঞ্চ অনাপত্তি। নিরযেন ৰা ব্রহ্মচরিযেন ৰা অভিসপনং , উপসম্পন্নতা, অত্থধম্মপুরেক্খারাদীনং অভাৰোতি ইমানেত্থ তীণি অঙ্গানি। সমুট্ঠানাদীনি অট্ঠমসদিসানেৰাতি।
Sāvatthiyaṃ caṇḍakāḷiṃ ārabbha evaṃ abhisapanavatthusmiṃ paññattaṃ, tikapācittiyaṃ, anupasampannāya tikadukkaṭaṃ, tiracchānayoniyā vā pettivisayena vā manussadobhaggena vā abhisapane dukkaṭaṃ. Atthadhammānusāsanipurekkhārānaṃ ummattikādīnañca anāpatti. Nirayena vā brahmacariyena vā abhisapanaṃ , upasampannatā, atthadhammapurekkhārādīnaṃ abhāvoti imānettha tīṇi aṅgāni. Samuṭṭhānādīni aṭṭhamasadisānevāti.
পরঅভিসপনসিক্খাপদৰণ্ণনা নিট্ঠিতা।
Paraabhisapanasikkhāpadavaṇṇanā niṭṭhitā.
১০. রোদনসিক্খাপদৰণ্ণনা
10. Rodanasikkhāpadavaṇṇanā
দসমে ৰধিত্ৰাতি হত্থাদীহি পহরিত্ৰা, উভযং করোন্তিযাৰ পাচিত্তিযং।
Dasame vadhitvāti hatthādīhi paharitvā, ubhayaṃ karontiyāva pācittiyaṃ.
সাৰত্থিযং চণ্ডকাল়িং আরব্ভ অত্তানং ৰধিত্ৰা রোদনৰত্থুস্মিং পঞ্ঞত্তং, কেৰলং ৰধন্তিযা ৰা রোদন্তিযা ৰা দুক্কটমেৰ। ঞাতিরোগভোগব্যসনেহি ফুট্ঠায কেৰলং রোদন্তিযা এৰ ন ৰধন্তিযা, উম্মত্তিকাদীনঞ্চ অনাপত্তি। অত্তানং ৰধনঞ্চেৰ, রোদনঞ্চাতি ইমানেত্থ দ্ৰে অঙ্গানি। সমুট্ঠানাদীনি সমনুভাসনসদিসানি, ইদং পন কিরিযমেৰাতি।
Sāvatthiyaṃ caṇḍakāḷiṃ ārabbha attānaṃ vadhitvā rodanavatthusmiṃ paññattaṃ, kevalaṃ vadhantiyā vā rodantiyā vā dukkaṭameva. Ñātirogabhogabyasanehi phuṭṭhāya kevalaṃ rodantiyā eva na vadhantiyā, ummattikādīnañca anāpatti. Attānaṃ vadhanañceva, rodanañcāti imānettha dve aṅgāni. Samuṭṭhānādīni samanubhāsanasadisāni, idaṃ pana kiriyamevāti.
রোদনসিক্খাপদৰণ্ণনা নিট্ঠিতা।
Rodanasikkhāpadavaṇṇanā niṭṭhitā.
রত্তন্ধকারৰগ্গো দুতিযো।
Rattandhakāravaggo dutiyo.
