| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
২. রট্ঠপালসুত্তৰণ্ণনা
2. Raṭṭhapālasuttavaṇṇanā
২৯৩. থূলমেৰ থুল্লং, থুল্লা ৰিপুলা মহন্তা কোট্ঠা জাতা ইমস্সাতি থুল্লকোট্ঠিকন্তি ওদনপূপপহূতৰসেন লদ্ধনামো নিগমো। অট্ঠকথাযং পন থুল্লকোট্ঠন্তি অত্থো ৰুত্তো। তেন পাল়িযং ইক-সদ্দেন পদৰড্ঢনং কতন্তি দস্সেতি।
293. Thūlameva thullaṃ, thullā vipulā mahantā koṭṭhā jātā imassāti thullakoṭṭhikanti odanapūpapahūtavasena laddhanāmo nigamo. Aṭṭhakathāyaṃ pana thullakoṭṭhanti attho vutto. Tena pāḷiyaṃ ika-saddena padavaḍḍhanaṃ katanti dasseti.
২৯৪. রট্ঠপালোতি ইদং তস্স কুলপুত্তস্স নামং। পৰেণিৰসেন আগতকুলৰংসানুগতন্তি সমুদাগমতো পট্ঠায দস্সেতুং ‘‘কস্মা রট্ঠপালো’’তিআদি ৰুত্তং। সন্ধারেতুন্তি ৰিনাসনতো পুব্বে যাদিসং, তথেৰ সম্মদেৰ ধারেতুং সমত্থো। সদ্ধাতি কম্মফলসদ্ধায সম্পন্না। সামণেরং দিস্ৰাতি সিক্খাকামতায এতদগ্গে ঠপিযমানং দিস্ৰা।
294.Raṭṭhapāloti idaṃ tassa kulaputtassa nāmaṃ. Paveṇivasena āgatakulavaṃsānugatanti samudāgamato paṭṭhāya dassetuṃ ‘‘kasmā raṭṭhapālo’’tiādi vuttaṃ. Sandhāretunti vināsanato pubbe yādisaṃ, tatheva sammadeva dhāretuṃ samattho. Saddhāti kammaphalasaddhāya sampannā. Sāmaṇeraṃ disvāti sikkhākāmatāya etadagge ṭhapiyamānaṃ disvā.
সহ রঞ্ঞাতি সরাজিকং, রঞ্ঞা সদ্ধিং রাজপরিসং। চাতুৰণ্ণন্তি ব্রাহ্মণাদিচতুৰণ্ণসমুদাযং। পোসেতুন্তি ৰদ্ধেতুং দানাদীহি সঙ্গহৰত্থূহি সঙ্গণ্হিতুং। যং কুলং। পহোস্সতীতি সক্খিস্সতি।
Saha raññāti sarājikaṃ, raññā saddhiṃ rājaparisaṃ. Cātuvaṇṇanti brāhmaṇādicatuvaṇṇasamudāyaṃ. Posetunti vaddhetuṃ dānādīhi saṅgahavatthūhi saṅgaṇhituṃ. Yaṃ kulaṃ. Pahossatīti sakkhissati.
তেন তেন মে উপপরিক্খতোতি ‘‘কামা নামেতে অনিচ্চা দুক্খা ৰিপরিণামধম্মা, অট্ঠিকঙ্কলূপমা’’তি (ম॰ নি॰ ১.২৩৪; পাচি॰ ৪১৭; মহানি॰ ৩, ৬) চ আদিনা যেন যেন আকারেন কামেসু আদীনৰং ওকারং সংকিলেসং, তব্বিপরিযাযতো নেক্খম্মে আনিসংসং গুণং পকাসেন্তং ভগৰতা ধম্মং দেসিতং আজানামি, তেন তেন পকারেন উপপরিক্খতো ৰীমংসন্তস্স ময্হং এৰং হোতি এৰং উপট্ঠাতি। সিক্খত্তযব্রহ্মচরিযন্তি অধিসীলাদিসিক্খত্তযসঙ্গহং সেট্ঠচরিযং। অখণ্ডাদিভাৰাপাদনেন অখণ্ডং লক্খণৰচনঞ্হেতং। কঞ্চিপি সিক্খেকদেসং অসেসেত্ৰা একন্তেনেৰ পরিপূরেতব্বতায একন্তপরিপুণ্ণং। চিত্তুপ্পাদমত্তম্পি সংকিলেসমলং অনুপ্পাদেত্ৰা অচ্চন্তমেৰ ৰিসুদ্ধং কত্ৰা পরিহরিতব্বতায একন্তপরিসুদ্ধং। ততো এৰ সঙ্খং ৰিয লিখিতন্তি সঙ্খলিখিতং। তেনাহ ‘‘লিখিতসঙ্খসদিস’’ন্তি। দাঠিকাপি মস্সুগ্গহণেনেৰ গহেত্ৰা ‘‘মস্সু’’ত্ৰেৰ ৰুত্তং, উত্তরাধরমস্সুন্তি অত্থো। কসাযেন রত্তানি কাসাযানি। অননুঞ্ঞাতং পুত্তং ন পব্বাজেতি ‘‘মাতাপিতূনং লোকিযমহাজনস্স চিত্তঞ্ঞথত্তং মা হোতূ’’তি। তথা হি সুদ্ধোদনমহারাজস্স তথা ৰরো দিন্নো।
Tena tena me upaparikkhatoti ‘‘kāmā nāmete aniccā dukkhā vipariṇāmadhammā, aṭṭhikaṅkalūpamā’’ti (ma. ni. 1.234; pāci. 417; mahāni. 3, 6) ca ādinā yena yena ākārena kāmesu ādīnavaṃ okāraṃ saṃkilesaṃ, tabbipariyāyato nekkhamme ānisaṃsaṃ guṇaṃ pakāsentaṃ bhagavatā dhammaṃ desitaṃ ājānāmi, tena tena pakārena upaparikkhato vīmaṃsantassa mayhaṃ evaṃ hoti evaṃ upaṭṭhāti. Sikkhattayabrahmacariyanti adhisīlādisikkhattayasaṅgahaṃ seṭṭhacariyaṃ. Akhaṇḍādibhāvāpādanena akhaṇḍaṃ lakkhaṇavacanañhetaṃ. Kañcipi sikkhekadesaṃ asesetvā ekanteneva paripūretabbatāya ekantaparipuṇṇaṃ. Cittuppādamattampi saṃkilesamalaṃ anuppādetvā accantameva visuddhaṃ katvā pariharitabbatāya ekantaparisuddhaṃ. Tato eva saṅkhaṃ viya likhitanti saṅkhalikhitaṃ. Tenāha ‘‘likhitasaṅkhasadisa’’nti. Dāṭhikāpi massuggahaṇeneva gahetvā ‘‘massu’’tveva vuttaṃ, uttarādharamassunti attho. Kasāyena rattāni kāsāyāni. Ananuññātaṃ puttaṃ na pabbājeti ‘‘mātāpitūnaṃ lokiyamahājanassa cittaññathattaṃ mā hotū’’ti. Tathā hi suddhodanamahārājassa tathā varo dinno.
২৯৫. পিযাযিতব্বতো পিযোতি আহ ‘‘পীতিজনকো’’তি। মনস্স অপ্পাযনতো মনাপোতি আহ ‘‘মনৰড্ঢনকো’’তি। সুখেধিতো তরুণদারককালে। ততো পরঞ্চ সপ্পিখীরাদিসাদুরসমনুঞ্ঞভোজনাদিআহারসম্পত্তিযা সুখপরিভতো। অথ ৰা দল়্হভত্তিকধাতিজনাদিপরিজনসম্পত্তিযা চেৰ পরিচ্ছদসম্পত্তিযা চ উল়ারপণীতসুখপচ্চযূপহারেহি চ সুখেধিতো, অকিচ্ছেনেৰ দুক্খপ্পচ্চযৰিনোদনেন সুখপরিভতো। অজ্ঝত্তিকঙ্গসম্পত্তিযা ৰা সুখেধিতো, বাহিরঙ্গসম্পত্তিযা সুখপরিভতো। কস্সচীতি উপযোগত্থে সামিৰচনং, কিঞ্চীতি ৰুত্তং হোতি, অযমেৰ ৰা পাঠো। তথা হি ‘‘অপ্পমত্তকম্পি কলভাগং দুক্খস্স ন জানাসী’’তি অত্থো ৰুত্তো। এৰং সন্তেতি ননু মযং রট্ঠপাল মরণাদীসু কেনচি উপাযেন অপ্পতীকারেন মরণেনপি তযা অকামকাপি ৰিনা ভৰিস্সাম, এৰং সতি। যেনাতি যেন কারণেন। কিং পনাতি এত্থ কিন্তি কারণত্থে পচ্চত্তৰচনন্তি দস্সেন্তো আহ ‘‘কেন পন কারণেনা’’তি।
295. Piyāyitabbato piyoti āha ‘‘pītijanako’’ti. Manassa appāyanato manāpoti āha ‘‘manavaḍḍhanako’’ti. Sukhedhito taruṇadārakakāle. Tato parañca sappikhīrādisādurasamanuññabhojanādiāhārasampattiyā sukhaparibhato. Atha vā daḷhabhattikadhātijanādiparijanasampattiyā ceva paricchadasampattiyā ca uḷārapaṇītasukhapaccayūpahārehi ca sukhedhito, akiccheneva dukkhappaccayavinodanena sukhaparibhato. Ajjhattikaṅgasampattiyā vā sukhedhito, bāhiraṅgasampattiyā sukhaparibhato. Kassacīti upayogatthe sāmivacanaṃ, kiñcīti vuttaṃ hoti, ayameva vā pāṭho. Tathā hi ‘‘appamattakampi kalabhāgaṃ dukkhassa na jānāsī’’ti attho vutto. Evaṃ santeti nanu mayaṃ raṭṭhapāla maraṇādīsu kenaci upāyena appatīkārena maraṇenapi tayā akāmakāpi vinā bhavissāma, evaṃ sati. Yenāti yena kāraṇena. Kiṃ panāti ettha kinti kāraṇatthe paccattavacananti dassento āha ‘‘kena pana kāraṇenā’’ti.
২৯৬. পরিচারেহীতি পরিতো তত্থ তত্থ যথাসকং ৰিসযেসু চারেহি। তেনাহ ‘‘ইতো চিতো চ উপনেহী’’তি। পরিচারেহীতি ৰা সুখূপকরণেহি অত্তানং পরিচারেহি, অত্তনো পরিচরণং কারেহি। তথাভূতো চ যস্মা লল়ন্তো কীল়ন্তো নাম হোতি, তস্মা ‘‘লল়া’’তিআদি ৰুত্তং। নিচ্চদানং দানং নাম, উপোসথদিৰসাদীসু দাতব্বং অতিরেকদানং পদানং নাম। পৰেণীরক্খণৰসেন ৰা দীযমানং দানং নাম, অত্তনাৰ পট্ঠপেত্ৰা দীযমানং পদানং নাম। পচুরজনসাধারণং ৰা নাতিউল়ারং দানং নাম, অনঞ্ঞসাধারণং অতিউল়ারং পদানং নাম। উদ্দস্সেতব্বাতি উদ্ধং দস্সেতব্বা। কুতো উদ্ধং তে দস্সেতব্বা? পব্বজিততো উদ্ধং অত্তানং মাতাপিতরো দস্সেতব্বা, তেনাহ ‘‘যথা’’তিআদি।
296.Paricārehīti parito tattha tattha yathāsakaṃ visayesu cārehi. Tenāha ‘‘ito cito ca upanehī’’ti. Paricārehīti vā sukhūpakaraṇehi attānaṃ paricārehi, attano paricaraṇaṃ kārehi. Tathābhūto ca yasmā laḷanto kīḷanto nāma hoti, tasmā ‘‘laḷā’’tiādi vuttaṃ. Niccadānaṃ dānaṃ nāma, uposathadivasādīsu dātabbaṃ atirekadānaṃ padānaṃ nāma. Paveṇīrakkhaṇavasena vā dīyamānaṃ dānaṃ nāma, attanāva paṭṭhapetvā dīyamānaṃ padānaṃ nāma. Pacurajanasādhāraṇaṃ vā nātiuḷāraṃ dānaṃ nāma, anaññasādhāraṇaṃ atiuḷāraṃ padānaṃ nāma. Uddassetabbāti uddhaṃ dassetabbā. Kuto uddhaṃ te dassetabbā? Pabbajitato uddhaṃ attānaṃ mātāpitaro dassetabbā, tenāha ‘‘yathā’’tiādi.
২৯৯. বলং গহেত্ৰাতি এত্থ বলগ্গহণং নাম কাযবলস্স উপ্পাদনমেৰাতি আহ ‘‘কাযবলং জনেত্ৰা’’তি। এৰং ৰিহরন্তোতি যথা পাল়িযং ৰুত্তং এৰং একো ৰূপকট্ঠো অপ্পমত্তো ৰিহরন্তো। তস্মাতি যস্মা নেয্যো, ন উগ্ঘটিতঞ্ঞূ, ন চ ৰিপঞ্চিতঞ্ঞূ, তস্মা। চিরেন পব্বজিতো দ্ৰাদসমে ৰস্সে অরহত্তং পাপুণি। যং পন ৰুত্তং পাল়িযং ‘‘ন চিরস্সেৰা’’তি, তং সট্ঠি ৰস্সানি ততো অধিকম্পি ৰিপস্সনাপরিৰাসং ৰসন্তে উপাদায ৰুত্তং।
299.Balaṃ gahetvāti ettha balaggahaṇaṃ nāma kāyabalassa uppādanamevāti āha ‘‘kāyabalaṃ janetvā’’ti. Evaṃ viharantoti yathā pāḷiyaṃ vuttaṃ evaṃ eko vūpakaṭṭho appamatto viharanto. Tasmāti yasmā neyyo, na ugghaṭitaññū, na ca vipañcitaññū, tasmā. Cirena pabbajito dvādasame vasse arahattaṃ pāpuṇi. Yaṃ pana vuttaṃ pāḷiyaṃ ‘‘na cirassevā’’ti, taṃ saṭṭhi vassāni tato adhikampi vipassanāparivāsaṃ vasante upādāya vuttaṃ.
সত্তদ্ৰারকোট্ঠকস্সাতি সত্তগব্ভন্তরদ্ৰারকোট্ঠকসীসেন গব্ভন্তরানি ৰদতি। পহরাপেতীতি ৰযোৰুড্ঢানুরূপং কপ্পাপনাদিনা অলঙ্কারাপেতি। অন্তোজাততায ঞাতিসদিসী দাসী ঞাতিদাসী। পূতিভাৰেনেৰ লক্খিতব্বো দোসো ৰা অভিদোসো, সোৰ আভিদোসিকো, অভিদোসং ৰা পচ্চূসকালং গতো পত্তো অতিক্কন্তোতি আভিদোসিকো। তেনাহ ‘‘একরত্তাতিক্কন্তস্সা’’তিআদি । অপরিভোগারহো পূতিভূতভাৰেন। অরিযৰোহারেনাতি অরিযসমুদাচারেন। অরিযা হি মাতুগামং ভগিনিৰাদেন সমুদাচরন্তি। নিস্সট্ঠপরিগ্গহন্তি পরিচ্চত্তালযং। ৰত্তুং ৰট্টতীতি নিরপেক্খভাৰতো ৰুত্তং, ইধ পন ৰিসেসতো অপরিভোগারহত্তাৰ ৰত্থুনো। নিমীযতি সঞ্ঞাযতীতি নিমিত্তং, তথাসল্লক্খিতো আকারোতি আহ ‘‘আকারং অগ্গহেসী’’তি।
Sattadvārakoṭṭhakassāti sattagabbhantaradvārakoṭṭhakasīsena gabbhantarāni vadati. Paharāpetīti vayovuḍḍhānurūpaṃ kappāpanādinā alaṅkārāpeti. Antojātatāya ñātisadisī dāsī ñātidāsī. Pūtibhāveneva lakkhitabbo doso vā abhidoso, sova ābhidosiko, abhidosaṃ vā paccūsakālaṃ gato patto atikkantoti ābhidosiko. Tenāha ‘‘ekarattātikkantassā’’tiādi . Aparibhogāraho pūtibhūtabhāvena. Ariyavohārenāti ariyasamudācārena. Ariyā hi mātugāmaṃ bhaginivādena samudācaranti. Nissaṭṭhapariggahanti pariccattālayaṃ. Vattuṃ vaṭṭatīti nirapekkhabhāvato vuttaṃ, idha pana visesato aparibhogārahattāva vatthuno. Nimīyati saññāyatīti nimittaṃ, tathāsallakkhito ākāroti āha ‘‘ākāraṃ aggahesī’’ti.
৩০০. ঘরং পৰিসিত্ৰাতি গেহসামিনিযা নিসীদিতব্বট্ঠানভূতং অন্তোগেহং পৰিসিত্ৰা। আলপনেতি দাসিজনস্স আলপনে। বহি নিক্খমন্তাতি যথাৰুত্তঅন্তোগেহতো বহি নিক্খমন্তিযো। ঘরেসু সালা হোন্তীতি ঘরেসু একমন্তে ভোজনসালা হোন্তি পাকারপরিক্খিত্তা সুসংৰিহিতদ্ৰারবন্ধা সুসম্মট্ঠৰালিকঙ্গণা।
300.Gharaṃpavisitvāti gehasāminiyā nisīditabbaṭṭhānabhūtaṃ antogehaṃ pavisitvā. Ālapaneti dāsijanassa ālapane. Bahi nikkhamantāti yathāvuttaantogehato bahi nikkhamantiyo. Gharesu sālā hontīti gharesu ekamante bhojanasālā honti pākāraparikkhittā susaṃvihitadvārabandhā susammaṭṭhavālikaṅgaṇā.
অনোকপ্পনং অসদ্দহনং। অমরিসনং অসহনং। অনাগতৰচনং অনাগতসদ্দপ্পযোগো, অত্থো পন ৰত্তমানকালিকোৰ। তেনাহ ‘‘পচ্চক্খম্পী’’তি। অরিযিদ্ধিযন্তি ‘‘পটিকূলে অপটিকূলসঞ্ঞী ৰিহরতী’’তি (অ॰ নি॰ ৫.১৪৪) এৰং ৰুত্তঅরিযিদ্ধিযং।
Anokappanaṃ asaddahanaṃ. Amarisanaṃ asahanaṃ. Anāgatavacanaṃ anāgatasaddappayogo, attho pana vattamānakālikova. Tenāha ‘‘paccakkhampī’’ti. Ariyiddhiyanti ‘‘paṭikūle apaṭikūlasaññī viharatī’’ti (a. ni. 5.144) evaṃ vuttaariyiddhiyaṃ.
পূতিকুম্মাসো ছড্ডনীযধম্মো তস্স গেহতো লদ্ধোপি ন দাতব্বযুত্তকো দাসিজনেন দিন্নোতি আহ ‘‘দেয্যধম্মৰসেন নেৰ দানং অলত্থম্হা’’তি। ‘‘ইমেহি মুণ্ডকেহী’’তিআদিনা নিত্থুননৰচনেন পচ্চক্খানং অত্থতো লদ্ধমেৰ, তস্স পন উজুকফাসুসমাচারৰসেন অলদ্ধত্তা ৰুত্তং ‘‘ন পচ্চক্খান’’ন্তি। তেনাহ – ‘‘পটিসন্থারৰসেন পচ্চক্খানম্পি ন অলত্থম্হা’’তি। ‘‘নেৰ দান’’ন্তিআদি পচ্চাসীসায অক্খন্তিযা চ ৰুত্তং ৰিয পচুরজনো মঞ্ঞেয্যাতি তন্নিৰত্তনত্থং অধিপ্পাযমস্স ৰিৰরিতুং ‘‘কস্মা পনা’’তিআদি ৰুত্তং। সুত্তিকাপটিচ্ছন্নন্তি সিপ্পিকাছদাহি ছন্নং।
Pūtikummāso chaḍḍanīyadhammo tassa gehato laddhopi na dātabbayuttako dāsijanena dinnoti āha ‘‘deyyadhammavasena neva dānaṃ alatthamhā’’ti. ‘‘Imehi muṇḍakehī’’tiādinā nitthunanavacanena paccakkhānaṃ atthato laddhameva, tassa pana ujukaphāsusamācāravasena aladdhattā vuttaṃ ‘‘na paccakkhāna’’nti. Tenāha – ‘‘paṭisanthāravasena paccakkhānampi na alatthamhā’’ti. ‘‘Neva dāna’’ntiādi paccāsīsāya akkhantiyā ca vuttaṃ viya pacurajano maññeyyāti tannivattanatthaṃ adhippāyamassa vivarituṃ ‘‘kasmā panā’’tiādi vuttaṃ. Suttikāpaṭicchannanti sippikāchadāhi channaṃ.
উক্কট্ঠএকাসনিকতাযাতি ইদং ভূতকথনমত্তং থেরস্স তথাভাৰদীপনতো। মুদুকস্সপি হি একাসনিকস্স যায নিসজ্জায কিঞ্চিমত্তং ভোজনং ভুত্তং, ৰত্তসীসেনপি ততো ৰুট্ঠিতস্স পুন ভুঞ্জিতুং ন ৰট্টতি। তেনাহ তিপিটকচূল়াভযত্থেরো ‘‘আসনং ৰা রক্খেয্য ভোজনং ৰা’’তি। উক্কট্ঠসপদানচারিকোতি পুরতো পচ্ছতো চ আহটভিক্খম্পি অগ্গহেত্ৰা বহিদ্ৰারে ঠত্ৰা পত্তৰিস্সজ্জনমেৰ করোতি। এতেনেৰ থেরস্স উক্কট্ঠপিণ্ডপাতিকভাৰো দীপিতো। তেনাহ – ‘‘স্ৰাতনায ভিক্খং নাম নাধিৰাসেতী’’তি। অথ কস্মা অধিৰাসেসীতি আহ ‘‘মাতু অনুগ্গহেনা’’তিআদি । পণ্ডিতা হি মাতাপিতূনং আচরিযুপজ্ঝাযানং ৰা কাতব্বং অনুগ্গহং অজ্ঝুপেক্খিত্ৰা ধুতঙ্গসুদ্ধিকা ন ভৰন্তি।
Ukkaṭṭhaekāsanikatāyāti idaṃ bhūtakathanamattaṃ therassa tathābhāvadīpanato. Mudukassapi hi ekāsanikassa yāya nisajjāya kiñcimattaṃ bhojanaṃ bhuttaṃ, vattasīsenapi tato vuṭṭhitassa puna bhuñjituṃ na vaṭṭati. Tenāha tipiṭakacūḷābhayatthero ‘‘āsanaṃ vā rakkheyya bhojanaṃ vā’’ti. Ukkaṭṭhasapadānacārikoti purato pacchato ca āhaṭabhikkhampi aggahetvā bahidvāre ṭhatvā pattavissajjanameva karoti. Eteneva therassa ukkaṭṭhapiṇḍapātikabhāvo dīpito. Tenāha – ‘‘svātanāya bhikkhaṃ nāma nādhivāsetī’’ti. Atha kasmā adhivāsesīti āha ‘‘mātu anuggahenā’’tiādi . Paṇḍitā hi mātāpitūnaṃ ācariyupajjhāyānaṃ vā kātabbaṃ anuggahaṃ ajjhupekkhitvā dhutaṅgasuddhikā na bhavanti.
৩০১. পযুত্তন্তি ৰদ্ধিৰসেন পযোজিতং, তদ্ধিতলোপং কত্ৰা ৰুত্তন্তি ৰেদিতব্বং যথা অঞ্ঞত্থাপি ‘‘পিতামহং ধনং লদ্ধা, সুখং জীৰতি সঞ্চযো’’তি । জেট্ঠকিত্থিযোতি পধানিত্থিযো। ইতোতি ইমস্মিং কুলে অনুভৰিতব্বৰিভৰসম্পত্তিতো। অঞ্ঞতোতি ইমস্স দিন্নত্তা অঞ্ঞস্মিং কুলে অনুভৰিতব্বসম্পত্তিতো।
301.Payuttanti vaddhivasena payojitaṃ, taddhitalopaṃ katvā vuttanti veditabbaṃ yathā aññatthāpi ‘‘pitāmahaṃ dhanaṃ laddhā, sukhaṃ jīvati sañcayo’’ti . Jeṭṭhakitthiyoti padhānitthiyo. Itoti imasmiṃ kule anubhavitabbavibhavasampattito. Aññatoti imassa dinnattā aññasmiṃ kule anubhavitabbasampattito.
৩০২. চিত্তৰিচিত্তন্তি কপ্পনায চেৰ অরহরূপেন অলঙ্কারাদিনা চ চিত্তিতঞ্চেৰ ৰিচিত্তিতঞ্চ। ৰণকাযন্তি ৰণভূতং কাযং। সমন্ততো উস্সিতন্তি হেট্ঠিমকাযৰসেন হেট্ঠা উপরি চ সন্নিস্সিতং। নিচ্চাতুরন্তি অভিণ্হপ্পটিপীল়িতং, সদা দুক্খিতং ৰা। বহুসঙ্কপ্পন্তি রাগৰত্থুভাৰেন অভিজনেহি হাৰভাৰৰিলাসৰসেন, আমিসৰসেন চ সোণসিঙ্গালাদীহি বহূহি সঙ্কপ্পেতব্বং। ঠিতীতি অৰট্ঠানং অৰিপরিণামো নত্থি। তেনাহ – ‘‘ভিজ্জনধম্মতাৰ নিযতা’’তি, পরিস্সৰভাৰাপত্তি চেৰ ৰিনাসপত্তি চ একন্তিকাতি অত্থো।
302.Cittavicittanti kappanāya ceva araharūpena alaṅkārādinā ca cittitañceva vicittitañca. Vaṇakāyanti vaṇabhūtaṃ kāyaṃ. Samantato ussitanti heṭṭhimakāyavasena heṭṭhā upari ca sannissitaṃ. Niccāturanti abhiṇhappaṭipīḷitaṃ, sadā dukkhitaṃ vā. Bahusaṅkappanti rāgavatthubhāvena abhijanehi hāvabhāvavilāsavasena, āmisavasena ca soṇasiṅgālādīhi bahūhi saṅkappetabbaṃ. Ṭhitīti avaṭṭhānaṃ avipariṇāmo natthi. Tenāha – ‘‘bhijjanadhammatāva niyatā’’ti, parissavabhāvāpatti ceva vināsapatti ca ekantikāti attho.
চিত্তকতম্পীতি গন্ধাদীহি চিত্তকতম্পি। রূপন্তি সরীরং।
Cittakatampīti gandhādīhi cittakatampi. Rūpanti sarīraṃ.
অলত্তককতাতি পিণ্ডিঅলত্তকেন সুৰণ্ণকতা। তেনাহ ‘‘অলত্তকেন রঞ্জিতা’’তি। চুণ্ণকমক্খিতন্তি দোসনীহরণেহি তাপদহনাদীহি কতাভিসঙ্খারমুখং গোরোচনাদীহি ওভাসনকচুণ্ণেহি মক্খিতং, তেনাহ ‘‘সাসপকক্কেনা’’তিআদি।
Alattakakatāti piṇḍialattakena suvaṇṇakatā. Tenāha ‘‘alattakena rañjitā’’ti. Cuṇṇakamakkhitanti dosanīharaṇehi tāpadahanādīhi katābhisaṅkhāramukhaṃ gorocanādīhi obhāsanakacuṇṇehi makkhitaṃ, tenāha ‘‘sāsapakakkenā’’tiādi.
রসোদকেনাতি সরলনিয্যাসরসমিস্সেন উদকেন। আৰত্তনপরিৰত্তে কত্ৰাতি আৰত্তনপরিৰত্তনৰসেন নতে কত্ৰা। অট্ঠপদকরচনাযাতি ভিত্তিকূটদ্ধচন্দাদিৰিভাগায অট্ঠপদকরচনায।
Rasodakenāti saralaniyyāsarasamissena udakena. Āvattanaparivatte katvāti āvattanaparivattanavasena nate katvā. Aṭṭhapadakaracanāyāti bhittikūṭaddhacandādivibhāgāya aṭṭhapadakaracanāya.
ৰিরৰমানেতি ‘‘অযং পলাযতি, গণ্হ গণ্হা’’তি ৰিরৰমানে। হিরঞ্ঞসুৰণ্ণওরোধেতি ৰত্তব্বং।
Viravamāneti ‘‘ayaṃ palāyati, gaṇha gaṇhā’’ti viravamāne. Hiraññasuvaṇṇaorodheti vattabbaṃ.
৩০৩. উস্সিতায উস্সিতাযাতি কুলৰিভৰবাহুসচ্চপঞ্ঞাসম্পত্তিযা উগ্গতায উগ্গতায। অভিলক্খিতো উল়ারভাৰেন।
303.Ussitāya ussitāyāti kulavibhavabāhusaccapaññāsampattiyā uggatāya uggatāya. Abhilakkhito uḷārabhāvena.
৩০৪. পরিজুঞ্ঞানীতি পরিহানানি। যে ব্যাধিনা অভিভূতা সত্তা জিণ্ণকপ্পা ৰযোহানিসত্তা ৰিয হোন্তি, ততো নিৰত্তেন্তো ‘‘জরাজিণ্ণো’’তি আহ। ৰযোৰুড্ঢো, ন সীলাদিৰুড্ঢো। মহত্তং লাতি গণ্হাতীতি মহল্লকো, জাতিযা মহল্লকো, ন ৰিভৰাদিনাতি জাতিমহল্লকো । দ্ৰত্তিরাজপরিৰত্তসঙ্খাতং অদ্ধানং কালং গতো ৰীতিৰত্তোতি অদ্ধগতো। তথা চ পঠমৰযং মজ্ঝিমৰযঞ্চ অতীতো হোতীতি আহ ‘‘অদ্ধানং অতিক্কন্তো’’তি। জিণ্ণাদিপদেহি পঠমৰযমজ্ঝিমৰযস্স বোধিতত্তা অনুপ্পত্ততাৰিসিট্ঠো ৰয-সদ্দো ওসানৰযৰিসযোতি আহ ‘‘পচ্ছিমৰযং অনুপ্পত্তো’’তি।
304.Parijuññānīti parihānāni. Ye byādhinā abhibhūtā sattā jiṇṇakappā vayohānisattā viya honti, tato nivattento ‘‘jarājiṇṇo’’ti āha. Vayovuḍḍho, na sīlādivuḍḍho. Mahattaṃ lāti gaṇhātīti mahallako, jātiyā mahallako, na vibhavādināti jātimahallako. Dvattirājaparivattasaṅkhātaṃ addhānaṃ kālaṃ gato vītivattoti addhagato. Tathā ca paṭhamavayaṃ majjhimavayañca atīto hotīti āha ‘‘addhānaṃ atikkanto’’ti. Jiṇṇādipadehi paṭhamavayamajjhimavayassa bodhitattā anuppattatāvisiṭṭho vaya-saddo osānavayavisayoti āha ‘‘pacchimavayaṃ anuppatto’’ti.
‘‘অপ্পিচ্ছো, অপ্পডংসমকসৰাতাতপসরীসপসম্ফস্সো’’তি (অ॰ নি॰ ১০.১১) এৰমাদীসু ৰিয অপ্প-সদ্দো অভাৰত্থোতি অধিপ্পাযেনাহ ‘‘অপ্পাবাধোতি অরোগো, অপ্পাতঙ্কোতি নিদ্দুক্খো’’তি। অপ্পত্থো ৰা ইধ, তত্থাপি অপ্প-সদ্দো দট্ঠব্বো। এৰঞ্হি ‘‘যো হি, গহপতি, ইমং পূতিকাযং পরিহরন্তো মুহুত্তম্পি আরোগ্যং পটিজানেয্য কিমঞ্ঞত্র বাল্যা’’তি (সং॰ নি॰ ৩.১) সুত্তপদং সমত্থিতং হোতি। ৰিপচ্চনং ৰিপাকো, সো এৰ ৰেপাকো। সমো ৰেপাকো এতিস্সা অত্থীতি সমৰেপাকিনী, তায। তেনেৰ সমৰেপাকিনিভাৰেন সব্বম্পি সম্মদেৰ গণ্হাতি ধারেতীতি গহণী। গহণিসম্পত্তিযা হি যথাভুত্তআহারো সম্মদেৰ জীরন্তো সরীরে তিট্ঠতি, নো অঞ্ঞথা ভুত্তভুত্তো আহারো জীরতি গহণিযা তিক্খভাৰেন। তথেৰ তিট্ঠতীতি ভুত্তাকারেনেৰ তিট্ঠতি গহণিযা মন্দভাৰতো। ভত্তচ্ছন্দো উপ্পজ্জতেৰ ভুত্তআহারস্স সম্মা পরিণামং গতত্তা। তেনেৰাতি সমৰেপাকিনিভাৰেনেৰ। পত্তানং ভোগানং পরিক্খিযমানং ন সহসা একজ্ঝংযেৰ পরিক্খযং গচ্ছন্তি, অথ খো অনুক্কমেন, তথা ঞাতযোপীতি আহ ‘‘অনুপুব্বেনা’’তি। ছাতকভযাদিনাতি আদি-সদ্দেন ব্যাধিভযাদিং সঙ্গণ্হাতি।
‘‘Appiccho, appaḍaṃsamakasavātātapasarīsapasamphasso’’ti (a. ni. 10.11) evamādīsu viya appa-saddo abhāvatthoti adhippāyenāha ‘‘appābādhoti arogo, appātaṅkoti niddukkho’’ti. Appattho vā idha, tatthāpi appa-saddo daṭṭhabbo. Evañhi ‘‘yo hi, gahapati, imaṃ pūtikāyaṃ pariharanto muhuttampi ārogyaṃ paṭijāneyya kimaññatra bālyā’’ti (saṃ. ni. 3.1) suttapadaṃ samatthitaṃ hoti. Vipaccanaṃ vipāko, so eva vepāko. Samo vepāko etissā atthīti samavepākinī, tāya. Teneva samavepākinibhāvena sabbampi sammadeva gaṇhāti dhāretīti gahaṇī. Gahaṇisampattiyā hi yathābhuttaāhāro sammadeva jīranto sarīre tiṭṭhati, no aññathā bhuttabhutto āhāro jīrati gahaṇiyā tikkhabhāvena. Tatheva tiṭṭhatīti bhuttākāreneva tiṭṭhati gahaṇiyā mandabhāvato. Bhattacchando uppajjateva bhuttaāhārassa sammā pariṇāmaṃ gatattā. Tenevāti samavepākinibhāveneva. Pattānaṃ bhogānaṃ parikkhiyamānaṃ na sahasā ekajjhaṃyeva parikkhayaṃ gacchanti, atha kho anukkamena, tathā ñātayopīti āha ‘‘anupubbenā’’ti. Chātakabhayādināti ādi-saddena byādhibhayādiṃ saṅgaṇhāti.
৩০৫. উদ্দেসসীসেন নিদ্দেসো গহিতোতি আহ ‘‘ধম্মনিদ্দেসা উদ্দিট্ঠা’’তি। যস্মা ৰা যে ধম্মা উদ্দিসিতব্বট্ঠেন ‘‘উদ্দেসা’’তি ৰুচ্চন্তি। তেৰ ধম্মা নিদ্দিসিতব্বট্ঠেন নিদ্দেসাতি ‘‘ধম্মনিদ্দেসা উদ্দিট্ঠা’’তি অত্থো ৰুত্তো। অথ ৰা যে ধম্মা অনিচ্চতাদিৰিভাৰনৰসেন উদ্ধং উদ্ধং দেসেস্সন্তি, তে ধম্মা তথেৰ নিস্সেসতো দেসেস্সন্তীতি এৰং উদ্দেসনিদ্দেসপদানং অনত্থন্তরতা ৰেদিতব্বা। তত্থাতি জরামরণসন্তিকে। অদ্ধুৰোতি নিদ্ধুৰো ন থিরো, অনিচ্চোতি অত্থো। তেনাহ ‘‘ধুৰট্ঠানৰিরহিতো’’তি, অজাতাভূতাসঙ্খতধুৰভাৰকারণৰিৰিত্তোতি অত্থো। উপনীয্যতীতি ৰা জরামরণেন লোকো সম্মা নীযতি, তস্মা অদ্ধুৰোতি এৰমেত্থ অত্থো দট্ঠব্বো। তাযিতুন্তি জাতিআদিব্যসনতো রক্খিতুং সমত্থেন ইস্সরেন অত্তনা ৰিরহিতোতি। ‘‘ইমং লোকং ইতো ৰট্টদুক্খতো মোচেস্সামি, জরাব্যাধিমরণানং তং অধিভৰিতুং ন দস্সামী’’তি এৰং অভিসরতীতি অভিস্সরণং, লোকস্স সুখস্স দাতা হিতস্স ৰিধাতা কোচি ইস্সরো, তদভাৰতো আহ ‘‘অনভিস্সরোতি অসরণো’’তি। নিস্সকো মমাযিতব্বৰত্থুঅভাৰতো, তেনাহ ‘‘সকভণ্ডৰিরহিতো’’তিআদি। তণ্হায ৰসে জাতো তণ্হায ৰিজিতোতি কত্ৰা ‘‘তণ্হায দাসো’’তি ৰুত্তং।
305. Uddesasīsena niddeso gahitoti āha ‘‘dhammaniddesā uddiṭṭhā’’ti. Yasmā vā ye dhammā uddisitabbaṭṭhena ‘‘uddesā’’ti vuccanti. Teva dhammā niddisitabbaṭṭhena niddesāti ‘‘dhammaniddesā uddiṭṭhā’’ti attho vutto. Atha vā ye dhammā aniccatādivibhāvanavasena uddhaṃ uddhaṃ desessanti, te dhammā tatheva nissesato desessantīti evaṃ uddesaniddesapadānaṃ anatthantaratā veditabbā. Tatthāti jarāmaraṇasantike. Addhuvoti niddhuvo na thiro, aniccoti attho. Tenāha ‘‘dhuvaṭṭhānavirahito’’ti, ajātābhūtāsaṅkhatadhuvabhāvakāraṇavivittoti attho. Upanīyyatīti vā jarāmaraṇena loko sammā nīyati, tasmā addhuvoti evamettha attho daṭṭhabbo. Tāyitunti jātiādibyasanato rakkhituṃ samatthena issarena attanā virahitoti. ‘‘Imaṃ lokaṃ ito vaṭṭadukkhato mocessāmi, jarābyādhimaraṇānaṃ taṃ adhibhavituṃ na dassāmī’’ti evaṃ abhisaratīti abhissaraṇaṃ, lokassa sukhassa dātā hitassa vidhātā koci issaro, tadabhāvato āha ‘‘anabhissaroti asaraṇo’’ti. Nissako mamāyitabbavatthuabhāvato, tenāha ‘‘sakabhaṇḍavirahito’’tiādi. Taṇhāya vase jāto taṇhāya vijitoti katvā ‘‘taṇhāya dāso’’ti vuttaṃ.
৩০৬. হত্থিৰিসযত্তা হত্থিসন্নিস্সিতত্তা ৰা হত্থিসিপ্পং ‘‘হত্থী’’তি গহিতন্তি আহ – ‘‘হত্থিস্মিন্তি হত্থিসিপ্পে’’তি, সেসপদেসুপি এসেৰ নযো। সাতিসযং ঊরুবলং এতস্স অত্থীতি ঊরুবলীতি আহ – ‘‘ঊরুবলসম্পন্নো’’তি, তমেৰত্থং পাকটং কত্ৰা দস্সেতুং ‘‘যস্স হী’’তিআদি ৰুত্তং। অভিন্নং পরসেনং ভিন্দতো ভিন্নং সকসেনং সন্ধারযতো উপত্থম্ভযতো। বাহুবলীতি এত্থাপি ‘‘যস্স হি ফলকঞ্চ আৰুধঞ্চ গহেত্ৰা’’তিআদিনা অত্থো ৰত্তব্বো, ইধ পন পরহত্থগতং রজ্জং আহরিতুং বাহুবলন্তি যোজনা। যথা হি ‘‘ঊরুবলী’’তি এত্থাপি বাহুবলং অনামসিত্ৰা অত্থো, এৰং ‘‘বাহুবলী’’তি এত্থ ঊরুবলং অনামসিত্ৰা অত্থো ৰেদিতব্বো, আহিতো অহংমানো এত্থাতি অত্তা, অত্তভাৰো। অলং সমত্থো অত্তা এতস্সাতি অলমত্থোতি আহ ‘‘সমত্থঅত্তভাৰো’’তি।
306. Hatthivisayattā hatthisannissitattā vā hatthisippaṃ ‘‘hatthī’’ti gahitanti āha – ‘‘hatthisminti hatthisippe’’ti, sesapadesupi eseva nayo. Sātisayaṃ ūrubalaṃ etassa atthīti ūrubalīti āha – ‘‘ūrubalasampanno’’ti, tamevatthaṃ pākaṭaṃ katvā dassetuṃ ‘‘yassa hī’’tiādi vuttaṃ. Abhinnaṃ parasenaṃ bhindato bhinnaṃ sakasenaṃ sandhārayato upatthambhayato. Bāhubalīti etthāpi ‘‘yassa hi phalakañca āvudhañca gahetvā’’tiādinā attho vattabbo, idha pana parahatthagataṃ rajjaṃ āharituṃ bāhubalanti yojanā. Yathā hi ‘‘ūrubalī’’ti etthāpi bāhubalaṃ anāmasitvā attho, evaṃ ‘‘bāhubalī’’ti ettha ūrubalaṃ anāmasitvā attho veditabbo, āhito ahaṃmāno etthāti attā, attabhāvo. Alaṃ samattho attā etassāti alamatthoti āha ‘‘samatthaattabhāvo’’ti.
পরিযোধাযাতি ৰা পরিতো আরক্খং ওদহিত্ৰা। ‘‘সংৰিজ্জন্তে খো, ভো রট্ঠপাল, ইমস্মিং রাজকুলে হত্থিকাযাপি…পে॰… ৰত্তিস্সন্তী’’তি ইদম্পি সো রাজা উপরি ধম্মুদ্দেসস্স কারণং আহরন্তো আহ।
Pariyodhāyāti vā parito ārakkhaṃ odahitvā. ‘‘Saṃvijjante kho, bho raṭṭhapāla, imasmiṃ rājakule hatthikāyāpi…pe… vattissantī’’ti idampi so rājā upari dhammuddesassa kāraṇaṃ āharanto āha.
ৰুত্তস্সেৰ অনু পচ্ছা গাযনৰসেন কথনং অনুগীতি। তা পন গাথা ধম্মুদ্দেসানং দেসনানুপুব্বিং অনাদিযিত্ৰাপি যথারহং সঙ্গণ্হনৰসেন অনুগীতাতি আহ ‘‘চতুন্নং ধম্মুদ্দেসানং অনুগীতি’’ন্তি।
Vuttasseva anu pacchā gāyanavasena kathanaṃ anugīti. Tā pana gāthā dhammuddesānaṃ desanānupubbiṃ anādiyitvāpi yathārahaṃ saṅgaṇhanavasena anugītāti āha ‘‘catunnaṃ dhammuddesānaṃ anugīti’’nti.
৩০৭. একন্তি একজাতিযং। ৰত্থুকামকিলেসকামা ৰিসযভেদেন ভিন্দিত্ৰা তথা ৰুত্তাতি দট্ঠব্বো।
307.Ekanti ekajātiyaṃ. Vatthukāmakilesakāmā visayabhedena bhinditvā tathā vuttāti daṭṭhabbo.
সাগরন্তেনাতি সাগরপরিযন্তেন।
Sāgarantenāti sāgarapariyantena.
অহো ৰতাতি সোচনে নিপাতো, ‘‘অহো ৰত পাপং কতং মযা’’তিআদীসু ৰিয। অমরাতিআদীসু আহূতি কথেন্তি। মতং উদ্দিস্স ‘‘অম্হ’’ন্তি ৰত্তব্বে সোকৰসেন ‘‘অমর’’ন্তি ৰুচ্চতি।
Aho vatāti socane nipāto, ‘‘aho vata pāpaṃ kataṃ mayā’’tiādīsu viya. Amarātiādīsu āhūti kathenti. Mataṃ uddissa ‘‘amha’’nti vattabbe sokavasena ‘‘amara’’nti vuccati.
ৰোসানন্তি নিট্ঠং, পরিযোসানন্তি অত্থো। সাৰাতি পঞ্ঞা এৰ। ধনতোতি সব্বধনতো। উত্তমতরা সেট্ঠা, তেনেৰাহ ‘‘পঞ্ঞাজীৰিং জীৰিতমাহু সেট্ঠ’’ন্তি (সং॰ নি॰ ১.২৪৬; সু॰ নি॰ ১৮৪)।
Vosānanti niṭṭhaṃ, pariyosānanti attho. Sāvāti paññā eva. Dhanatoti sabbadhanato. Uttamatarā seṭṭhā, tenevāha ‘‘paññājīviṃ jīvitamāhu seṭṭha’’nti (saṃ. ni. 1.246; su. ni. 184).
তেসু পাপং করোন্তেসু সত্তেসু, নিদ্ধারণে চেতং ভুম্মৰচনং। পরম্পরাযাতি অত্তভাৰপরম্পরায। সংসারং আপজ্জিত্ৰাতি ভৰাদীসু সংসারস্স আপজ্জনহেতুং আপজ্জন্তো পরলোকং উপেতি, পরলোকং উপেন্তোৰ বহুৰিধদুক্খসঙ্খাতং গব্ভঞ্চ উপেতি। তাদিসস্সাতি তথারূপস্স গব্ভৰাসদুক্খাদীনং অধিট্ঠানভূতস্স অপ্পপঞ্ঞস্স অঞ্ঞো অপ্পপঞ্ঞো চ অভিসদ্দহন্তো হিতসুখাৰহন্তি পত্তিযাযন্তো।
Tesu pāpaṃ karontesu sattesu, niddhāraṇe cetaṃ bhummavacanaṃ. Paramparāyāti attabhāvaparamparāya. Saṃsāraṃ āpajjitvāti bhavādīsu saṃsārassa āpajjanahetuṃ āpajjanto paralokaṃ upeti, paralokaṃ upentova bahuvidhadukkhasaṅkhātaṃ gabbhañca upeti. Tādisassāti tathārūpassa gabbhavāsadukkhādīnaṃ adhiṭṭhānabhūtassa appapaññassa añño appapañño ca abhisaddahanto hitasukhāvahanti pattiyāyanto.
‘‘পাপধম্মো’’তি ৰুত্তত্তা তাদিসস্স পরলোকো নাম দুগ্গতি এৰাতি আহ ‘‘পরম্হি অপাযলোকে’’তি।
‘‘Pāpadhammo’’ti vuttattā tādisassa paraloko nāma duggati evāti āha ‘‘paramhi apāyaloke’’ti.
ৰিৰিধরূপেনাতি রূপসদ্দাদিৰসেন তত্থপি পণীততরাদিৰসেন বহুৰিধরূপেন।
Vividharūpenāti rūpasaddādivasena tatthapi paṇītatarādivasena bahuvidharūpena.
সামঞ্ঞমেৰাতি সমণভাৰো এৰ সেয্যো। এত্থ চ আদিতো দ্ৰীহি গাথাহি চতুত্থো ধম্মুদ্দেসো অনুগীতো। চতুত্থগাথায ততিযো। পঞ্চমগাথায দুতিযো। ছট্ঠগাথায দুতিযততিযা। সত্তমগাথায পঠমো ধম্মুদ্দেসো অনুগীতো, অট্ঠমাদীহি পৰত্তিনিৰত্তীসু কামেসু নেক্খম্মে চ যথারহং আদীনৰানিসংসং ৰিভাৰেত্ৰা অত্তনো পব্বজ্জকারণং পরমতো দস্সেন্তো যথাৰুত্তধম্মুদ্দেসং নিগমেতি, তেন ৰুত্তং ‘‘তা পন গাথা ধম্মুদ্দেসানং দেসনানুপুব্বিং অনাদিযিত্ৰাপি যথারহং সঙ্গণ্হনৰসেন অনুগীতা’’তি। সেসং সুৰিঞ্ঞেয্যমেৰ।
Sāmaññamevāti samaṇabhāvo eva seyyo. Ettha ca ādito dvīhi gāthāhi catuttho dhammuddeso anugīto. Catutthagāthāya tatiyo. Pañcamagāthāya dutiyo. Chaṭṭhagāthāya dutiyatatiyā. Sattamagāthāya paṭhamo dhammuddeso anugīto, aṭṭhamādīhi pavattinivattīsu kāmesu nekkhamme ca yathārahaṃ ādīnavānisaṃsaṃ vibhāvetvā attano pabbajjakāraṇaṃ paramato dassento yathāvuttadhammuddesaṃ nigameti, tena vuttaṃ ‘‘tā pana gāthā dhammuddesānaṃ desanānupubbiṃ anādiyitvāpi yathārahaṃ saṅgaṇhanavasena anugītā’’ti. Sesaṃ suviññeyyameva.
রট্ঠপালসুত্তৰণ্ণনায লীনত্থপ্পকাসনা সমত্তা।
Raṭṭhapālasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ২. রট্ঠপালসুত্তং • 2. Raṭṭhapālasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ২. রট্ঠপালসুত্তৰণ্ণনা • 2. Raṭṭhapālasuttavaṇṇanā
