Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā

4. радтабаалад̇т̇зраг̇аат̇ааван̣н̣анаа

4. Raṭṭhapālattheragāthāvaṇṇanā

басса жид̇д̇агад̇анд̇иаад̣̇игаа ааяасмад̇о радтабаалад̇т̇зрасса г̇аат̇аа. гаа уббад̇д̇и? аяам̣ гира бад̣̇умуд̇д̇арасса бхаг̇авад̇о уббад̇д̇ид̇о бурзд̇арамзва хам̣савад̇ийнаг̇арз г̇ахабад̇имахаасаалагулз ниб̣б̣ад̇д̇ид̇ваа ваяаббад̇д̇о бид̇у ажжаязна гхарааваасз бад̇идтид̇о рад̇анагодтааг̇аарагаммигзна д̣̇ассид̇ам̣ абаримаан̣ам̣ гулавам̣саануг̇ад̇ам̣ д̇ханам̣ д̣̇исваа ‘‘имам̣ зд̇д̇агам̣ д̇ханараасим̣ маяхам̣ бид̇уаяяагабаяяагаад̣̇аяо ад̇д̇анаа сад̣̇д̇хим̣ г̇ахзд̇ваа г̇анд̇ум̣ наасагким̣су, маяаа бана г̇ахзд̇ваа г̇анд̇ум̣ ваддад̇ий’’д̇и жинд̇зд̇ваа габан̣ад̣̇д̇хигаад̣̇ийнам̣ махаад̣̇аанам̣ ад̣̇ааси. со абхин̃н̃аалаабхим̣ згам̣ д̇аабасам̣ убадтаханд̇о д̇зна д̣̇звалогаад̇хибажжз нияож̇ид̇о яааваж̇ийвам̣ бун̃н̃аани гад̇ваа д̇ад̇о жуд̇о д̣̇звалогз ниб̣б̣ад̇д̇ид̇ваа д̣̇иб̣б̣асамбад̇д̇им̣ анубхаванд̇о д̇ад̇т̇а яаавад̇ааяугам̣ тад̇ваа д̇ад̇о жуд̇о мануссалогз бхиннам̣ радтам̣ санд̇хаарзд̇ум̣ самад̇т̇асса гуласса згабуд̇д̇аго худ̇ваа ниб̣б̣ад̇д̇и.

Passacittakatantiādikā āyasmato raṭṭhapālattherassa gāthā. Kā uppatti? Ayaṃ kira padumuttarassa bhagavato uppattito puretarameva haṃsavatīnagare gahapatimahāsālakule nibbattitvā vayappatto pitu accayena gharāvāse patiṭṭhito ratanakoṭṭhāgārakammikena dassitaṃ aparimāṇaṃ kulavaṃsānugataṃ dhanaṃ disvā ‘‘imaṃ ettakaṃ dhanarāsiṃ mayhaṃ pituayyakapayyakādayo attanā saddhiṃ gahetvā gantuṃ nāsakkhiṃsu, mayā pana gahetvā gantuṃ vaṭṭatī’’ti cintetvā kapaṇaddhikādīnaṃ mahādānaṃ adāsi. So abhiññālābhiṃ ekaṃ tāpasaṃ upaṭṭhahanto tena devalokādhipacce niyojito yāvajīvaṃ puññāni katvā tato cuto devaloke nibbattitvā dibbasampattiṃ anubhavanto tattha yāvatāyukaṃ ṭhatvā tato cuto manussaloke bhinnaṃ raṭṭhaṃ sandhāretuṃ samatthassa kulassa ekaputtako hutvā nibbatti.

д̇зна жа самаязна бад̣̇умуд̇д̇аро бхаг̇аваа логз уббаж̇ж̇ид̇ваа бавад̇д̇ид̇аварад̇хаммажагго взнзяяасад̇д̇з ниб̣б̣аанамахаанаг̇арасан̇каад̇ам̣ кзманд̇абхуумим̣ самбаабзси. ат̇а со гулабуд̇д̇о ануггамзна вин̃н̃уд̇ам̣ бад̇д̇о згад̣̇ивасам̣ убаасагзхи сад̣̇д̇хим̣ вихаарам̣ г̇анд̇ваа сад̇т̇аарам̣ д̇хаммам̣ д̣̇зсзнд̇ам̣ д̣̇исваа басаннажид̇д̇о барисабарияанд̇з нисийд̣̇и. д̇зна ко бана самаязна сад̇т̇аа згам̣ бхигкум̣ сад̣̇д̇хаабаб̣б̣аж̇ид̇аанам̣ аг̇г̇адтаанз табзси. д̇ам̣ д̣̇исваа со басаннамаанасо д̇ад̣̇ад̇т̇ааяа жид̇д̇ам̣ табзд̇ваа сад̇асахассабхигкубаривуд̇асса бхаг̇авад̇о махад̇аа саггаарзна сад̇д̇аахам̣ махаад̣̇аанам̣ бавад̇д̇зд̇ваа бан̣ид̇хаанам̣ агааси. сад̇т̇аа д̇асса ананд̇арааязна иж̇жханабхаавам̣ д̣̇исваа ‘‘анааг̇ад̇з г̇од̇амасса наама саммаасамб̣уд̣̇д̇хасса саасанз сад̣̇д̇хаабаб̣б̣аж̇ид̇аанам̣ аг̇г̇о бхависсад̇ий’’д̇и б̣яаагааси. со сад̇т̇аарам̣ бхигкусан̇гхан̃жа ванд̣̇ид̇ваа удтааяаасанаа баггаами. со д̇ад̇т̇а яаавад̇ааяугам̣ бун̃н̃аани гад̇ваа д̇ад̇о жавид̇ваа д̣̇звамануссзсу сам̣саранд̇о ид̇о д̣̇взнавуд̇з габбз пуссасса бхаг̇авад̇о гаалз сад̇т̇у взмаад̇игабхаад̇игзсу д̇ийсу рааж̇абуд̇д̇зсу сад̇т̇аарам̣ убадтаханд̇зсу д̇зсам̣ бун̃н̃агирияааяа гижжам̣ агааси.

Tena ca samayena padumuttaro bhagavā loke uppajjitvā pavattitavaradhammacakko veneyyasatte nibbānamahānagarasaṅkhātaṃ khemantabhūmiṃ sampāpesi. Atha so kulaputto anukkamena viññutaṃ patto ekadivasaṃ upāsakehi saddhiṃ vihāraṃ gantvā satthāraṃ dhammaṃ desentaṃ disvā pasannacitto parisapariyante nisīdi. Tena kho pana samayena satthā ekaṃ bhikkhuṃ saddhāpabbajitānaṃ aggaṭṭhāne ṭhapesi. Taṃ disvā so pasannamānaso tadatthāya cittaṃ ṭhapetvā satasahassabhikkhuparivutassa bhagavato mahatā sakkārena sattāhaṃ mahādānaṃ pavattetvā paṇidhānaṃ akāsi. Satthā tassa anantarāyena ijjhanabhāvaṃ disvā ‘‘anāgate gotamassa nāma sammāsambuddhassa sāsane saddhāpabbajitānaṃ aggo bhavissatī’’ti byākāsi. So satthāraṃ bhikkhusaṅghañca vanditvā uṭṭhāyāsanā pakkāmi. So tattha yāvatāyukaṃ puññāni katvā tato cavitvā devamanussesu saṃsaranto ito dvenavute kappe phussassa bhagavato kāle satthu vemātikabhātikesu tīsu rājaputtesu satthāraṃ upaṭṭhahantesu tesaṃ puññakiriyāya kiccaṃ akāsi.

звам̣ д̇ад̇т̇а д̇ад̇т̇а бхавз д̇ам̣ д̇ам̣ б̣ахум̣ гусалам̣ убажинид̇ваа суг̇ад̇ийсуязва сам̣саранд̇о имасмим̣ б̣уд̣̇д̇хуббаад̣̇з гурурадтз т̇уллагодтиганиг̇амз радтабааласздтино г̇зхз ниб̣б̣ад̇д̇и, д̇асса бхиннам̣ радтам̣ санд̇хаарзд̇ум̣ самад̇т̇з гулз ниб̣б̣ад̇д̇ад̇д̇аа радтабаалод̇и вам̣саануг̇ад̇амзва наамам̣ ахоси. со махад̇аа бариваарзна вад̣дханд̇о ануггамзна яоб̣б̣анабад̇д̇о маад̇аабид̇уухи бад̇ируубзна д̣̇аарзна сам̣яож̇ид̇о маханд̇з жа яасз бад̇идтаабид̇о д̣̇иб̣б̣асамбад̇д̇исад̣̇исам̣ самбад̇д̇им̣ бажжанубход̇и. ат̇а бхаг̇аваа гурурадтз ж̇анабад̣̇ажааригам̣ жаранд̇о т̇уллагодтигам̣ анубаабун̣и. д̇ам̣ суд̇ваа радтабаало гулабуд̇д̇о сад̇т̇аарам̣ убасан̇гамид̇ваа сад̇т̇у санд̇игз д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇угаамо сад̇д̇аахам̣ бхад̇д̇ажчзд̣̇ам̣ гад̇ваа гижчзна гасирзна маад̇аабид̇аро ануж̇аанаабзд̇ваа сад̇т̇аарам̣ убасан̇гамид̇ваа баб̣б̣аж̇ж̇ам̣ яаажид̇ваа сад̇т̇у аан̣ад̇д̇ияаа ан̃н̃ад̇арасса т̇зрасса санд̇игз баб̣б̣аж̇ид̇ваа яонисоманасигаарзна гаммам̣ гаронд̇о вибассанам̣ вад̣дхзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.2.97-111) –

Evaṃ tattha tattha bhave taṃ taṃ bahuṃ kusalaṃ upacinitvā sugatīsuyeva saṃsaranto imasmiṃ buddhuppāde kururaṭṭhe thullakoṭṭhikanigame raṭṭhapālaseṭṭhino gehe nibbatti, tassa bhinnaṃ raṭṭhaṃ sandhāretuṃ samatthe kule nibbattattā raṭṭhapāloti vaṃsānugatameva nāmaṃ ahosi. So mahatā parivārena vaḍḍhanto anukkamena yobbanapatto mātāpitūhi patirūpena dārena saṃyojito mahante ca yase patiṭṭhāpito dibbasampattisadisaṃ sampattiṃ paccanubhoti. Atha bhagavā kururaṭṭhe janapadacārikaṃ caranto thullakoṭṭhikaṃ anupāpuṇi. Taṃ sutvā raṭṭhapālo kulaputto satthāraṃ upasaṅkamitvā satthu santike dhammaṃ sutvā paṭiladdhasaddho pabbajitukāmo sattāhaṃ bhattacchedaṃ katvā kicchena kasirena mātāpitaro anujānāpetvā satthāraṃ upasaṅkamitvā pabbajjaṃ yācitvā satthu āṇattiyā aññatarassa therassa santike pabbajitvā yonisomanasikārena kammaṃ karonto vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 1.2.97-111) –

‘‘бад̣̇умуд̇д̇арасса бхаг̇авад̇о, логаж̇здтасса д̇аад̣̇ино;

‘‘Padumuttarassa bhagavato, lokajeṭṭhassa tādino;

варанааг̇о маяаа д̣̇инно, ийсаад̣̇анд̇о уруул̣хаваа.

Varanāgo mayā dinno, īsādanto urūḷhavā.

‘‘сзд̇ажчад̇д̇о басобхид̇о, сагаббано сахад̇т̇ибо;

‘‘Setacchatto pasobhito, sakappano sahatthipo;

аг̇гхаабзд̇ваана д̇ам̣ саб̣б̣ам̣, сан̇гхаараамам̣ агаараяим̣.

Agghāpetvāna taṃ sabbaṃ, saṅghārāmaṃ akārayiṃ.

‘‘жад̇убан̃н̃аасасахассаани, баасаад̣̇з гаараяим̣ ахам̣;

‘‘Catupaññāsasahassāni, pāsāde kārayiṃ ahaṃ;

махогхад̣̇аанам̣ гарид̇ваана, нияяаад̣̇зсим̣ махзсино.

Mahoghadānaṃ karitvāna, niyyādesiṃ mahesino.

‘‘анумод̣̇и махаавийро, саяамбхуу аг̇г̇абуг̇г̇ало;

‘‘Anumodi mahāvīro, sayambhū aggapuggalo;

саб̣б̣з ж̇анз хаасаяанд̇о, д̣̇зсзси амад̇ам̣ бад̣̇ам̣.

Sabbe jane hāsayanto, desesi amataṃ padaṃ.

‘‘д̇ам̣ мз б̣уд̣̇д̇хо вияаагааси, ж̇алаж̇уд̇д̇аранаамаго;

‘‘Taṃ me buddho viyākāsi, jalajuttaranāmako;

бхигкусан̇гхз нисийд̣̇ид̇ваа, имаа г̇аат̇аа абхаасат̇а.

Bhikkhusaṅghe nisīditvā, imā gāthā abhāsatha.

‘‘жад̇убан̃н̃аасасахассаани, баасаад̣̇з гаараяий аяам̣;

‘‘Catupaññāsasahassāni, pāsāde kārayī ayaṃ;

гат̇аяиссаами вибаагам̣, сун̣от̇а мама бхаасад̇о.

Kathayissāmi vipākaṃ, suṇotha mama bhāsato.

‘‘адтаарасасахассаани, гуудааг̇аараа бхависсарз;

‘‘Aṭṭhārasasahassāni, kūṭāgārā bhavissare;

б̣яамхуд̇д̇амамхи ниб̣б̣ад̇д̇аа, саб̣б̣асон̣н̣амаяаа жа д̇з.

Byamhuttamamhi nibbattā, sabbasoṇṇamayā ca te.

‘‘бан̃н̃аасагкад̇д̇ум̣ д̣̇звинд̣̇о, д̣̇звараж̇ж̇ам̣ гариссад̇и;

‘‘Paññāsakkhattuṃ devindo, devarajjaṃ karissati;

адтабан̃н̃аасагкад̇д̇ун̃жа, жаггавад̇д̇ий бхависсад̇и.

Aṭṭhapaññāsakkhattuñca, cakkavattī bhavissati.

‘‘габбасад̇асахассамхи, оггаагагуласамбхаво;

‘‘Kappasatasahassamhi, okkākakulasambhavo;

г̇од̇амо наама г̇од̇д̇зна, сад̇т̇аа логз бхависсад̇и.

Gotamo nāma gottena, satthā loke bhavissati.

‘‘д̣̇звалогаа жавид̇ваана, суггамуулзна жод̣̇ид̇о;

‘‘Devalokā cavitvāna, sukkamūlena codito;

ад̣дхз гулз махаабхог̇з, ниб̣б̣ад̇д̇иссад̇и д̇аавад̣̇з.

Aḍḍhe kule mahābhoge, nibbattissati tāvade.

‘‘со бажчаа баб̣б̣аж̇ид̇ваана, суггамуулзна жод̣̇ид̇о;

‘‘So pacchā pabbajitvāna, sukkamūlena codito;

радтабаалод̇и наамзна, хзссад̇и сад̇т̇у сааваго.

Raṭṭhapāloti nāmena, hessati satthu sāvako.

‘‘бад̇хаанабахид̇ад̇д̇о со, убасанд̇о нируубад̇хи;

‘‘Padhānapahitatto so, upasanto nirūpadhi;

саб̣б̣аасавз барин̃н̃ааяа, ниб̣б̣ааяиссад̇инаасаво.

Sabbāsave pariññāya, nibbāyissatināsavo.

‘‘удтааяа абхинигкамма, ж̇ахид̇аа бхог̇асамбад̣̇аа;

‘‘Uṭṭhāya abhinikkhamma, jahitā bhogasampadā;

кзл̣абин̣д̣зва бхог̇амхи, бзмам̣ маяхам̣ на виж̇ж̇ад̇и.

Kheḷapiṇḍeva bhogamhi, pemaṃ mayhaṃ na vijjati.

‘‘вийрияам̣ мз д̇хурад̇хораяхам̣, яог̇агкзмаад̇хивааханам̣;

‘‘Vīriyaṃ me dhuradhorayhaṃ, yogakkhemādhivāhanaṃ;

д̇хаарзми анд̇имам̣ д̣̇зхам̣, саммаасамб̣уд̣̇д̇хасаасанз.

Dhāremi antimaṃ dehaṃ, sammāsambuddhasāsane.

‘‘бадисамбхид̣̇аа жад̇ассо, вимогкааби жа адтимз;

‘‘Paṭisambhidā catasso, vimokkhāpi ca aṭṭhime;

чал̣абхин̃н̃аа сажчигад̇аа, гад̇ам̣ б̣уд̣̇д̇хасса саасана’’нд̇и.

Chaḷabhiññā sacchikatā, kataṃ buddhassa sāsana’’nti.

арахад̇д̇ам̣ бана бад̇ваа сад̇т̇аарам̣ ануж̇аанаабзд̇ваа маад̇аабид̇аро бассид̇ум̣ т̇уллагодтигам̣ г̇анд̇ваа, д̇ад̇т̇а сабад̣̇аанам̣ бин̣д̣ааяа жаранд̇о бид̇у нивзсанз аабхид̣̇осигам̣ гуммаасам̣ лабхид̇ваа д̇ам̣ амад̇ам̣ вияа барибхун̃ж̇анд̇о, бид̇араа ниманд̇ид̇о сваад̇анааяа ад̇хиваасзд̇ваа, д̣̇уд̇ияад̣̇ивасз бид̇у нивзсанз бин̣д̣абаад̇ам̣ барибхун̃ж̇ид̇ваа алан̇гад̇абадияад̇д̇з ид̇т̇ааг̇аараж̇анз убаг̇анд̇ваа ‘‘гийд̣̇исаа наама д̇аа, аяяабуд̇д̇а, ажчарааяо, яаасам̣ д̇вам̣ хзд̇у б̣рахмажарияам̣ жарасий’’д̇иаад̣̇ийни (ма. ни. 2.301) вад̇ваа, балобханагаммам̣ гаад̇ум̣ аарад̣̇д̇хз д̇асса ад̇хиббааяам̣ баривад̇д̇зд̇ваа анижжад̇аад̣̇ибадисам̣яуд̇д̇ам̣ д̇хаммам̣ гат̇знд̇о –

Arahattaṃ pana patvā satthāraṃ anujānāpetvā mātāpitaro passituṃ thullakoṭṭhikaṃ gantvā, tattha sapadānaṃ piṇḍāya caranto pitu nivesane ābhidosikaṃ kummāsaṃ labhitvā taṃ amataṃ viya paribhuñjanto, pitarā nimantito svātanāya adhivāsetvā, dutiyadivase pitu nivesane piṇḍapātaṃ paribhuñjitvā alaṅkatapaṭiyatte itthāgārajane upagantvā ‘‘kīdisā nāma tā, ayyaputta, accharāyo, yāsaṃ tvaṃ hetu brahmacariyaṃ carasī’’tiādīni (ma. ni. 2.301) vatvā, palobhanakammaṃ kātuṃ āraddhe tassa adhippāyaṃ parivattetvā aniccatādipaṭisaṃyuttaṃ dhammaṃ kathento –

769.

‘‘басса жид̇д̇агад̇ам̣ б̣имб̣ам̣, аругааяам̣ самуссид̇ам̣;

‘‘Passa cittakataṃ bimbaṃ, arukāyaṃ samussitaṃ;

аад̇урам̣ б̣ахусан̇габбам̣, яасса над̇т̇и д̇хувам̣ тид̇и.

Āturaṃ bahusaṅkappaṃ, yassa natthi dhuvaṃ ṭhiti.

770.

‘‘басса жид̇д̇агад̇ам̣ руубам̣, ман̣инаа гун̣д̣алзна жа;

‘‘Passa cittakataṃ rūpaṃ, maṇinā kuṇḍalena ca;

адтим̣ д̇ажзна онад̣̇д̇хам̣, саха вад̇т̇зхи собхад̇и.

Aṭṭhiṃ tacena onaddhaṃ, saha vatthehi sobhati.

771.

‘‘алад̇д̇агагад̇аа баад̣̇аа, мукам̣ жун̣н̣агамагкид̇ам̣;

‘‘Alattakakatā pādā, mukhaṃ cuṇṇakamakkhitaṃ;

алам̣ б̣ааласса мохааяа, но жа баараг̇авзсино.

Alaṃ bālassa mohāya, no ca pāragavesino.

772.

‘‘адтаабад̣̇агад̇аа гзсаа, нзд̇д̇аа ан̃ж̇анамагкид̇аа;

‘‘Aṭṭhāpadakatā kesā, nettā añjanamakkhitā;

алам̣ б̣ааласса мохааяа, но жа баараг̇авзсино.

Alaṃ bālassa mohāya, no ca pāragavesino.

773.

‘‘ан̃ж̇анийва наваа жид̇д̇аа, бууд̇игааяо алан̇гад̇о;

‘‘Añjanīva navā cittā, pūtikāyo alaṅkato;

алам̣ б̣ааласса мохааяа, но жа баараг̇авзсино.

Alaṃ bālassa mohāya, no ca pāragavesino.

774.

‘‘од̣̇ахи миг̇аво баасам̣, наасад̣̇аа вааг̇урам̣ миг̇о;

‘‘Odahi migavo pāsaṃ, nāsadā vāguraṃ migo;

бхуд̇ваа ниваабам̣ г̇ажчаама, ганд̣̇анд̇з миг̇аб̣анд̇хагз.

Bhutvā nivāpaṃ gacchāma, kandante migabandhake.

775.

‘‘чинно баасо миг̇авасса, наасад̣̇аа вааг̇урам̣ миг̇о;

‘‘Chinno pāso migavassa, nāsadā vāguraṃ migo;

бхуд̇ваа ниваабам̣ г̇ажчаама, сожанд̇з миг̇алуд̣̇д̣̇агз’’д̇и. – имаа г̇аат̇аа абхааси;

Bhutvā nivāpaṃ gacchāma, socante migaluddake’’ti. – imā gāthā abhāsi;

д̇ад̇т̇а жид̇д̇агад̇анд̇и жид̇д̇ам̣ гад̇ам̣ жид̇д̇агад̇ам̣, вад̇т̇аабхаран̣амаалаад̣̇ийхи вижид̇д̇ам̣ гад̇анд̇и ад̇т̇о. б̣имб̣анд̇и д̣̇ийгхаад̣̇ибхаавзна яуд̇д̇адтаанзсу д̣̇ийгхаад̣̇ийхи ан̇г̇абажжан̇г̇зхи ман̣д̣ид̇ам̣ ад̇д̇абхаавам̣. аругааяанд̇и наваннам̣ ван̣амукаанам̣ ломагуубаанан̃жа васзна виссанд̣̇амаанаасужим̣, саб̣б̣асо жа арубхууд̇ам̣ ван̣абхууд̇ам̣ аруунам̣ ваа гааяам̣. самуссид̇анд̇и д̇ийхи адтисад̇зхи самуссид̇ам̣. аад̇уранд̇и саб̣б̣агаалам̣ ирияаабат̇анд̇араад̣̇ийхи барихарид̇аб̣б̣ад̇ааяа нижжам̣ г̇илаанам̣. б̣ахусан̇габбанд̇и б̣аалаж̇анзна абхууд̇ам̣ ааробзд̇ваа б̣ахуд̇хаа сан̇габбид̇аб̣б̣ам̣. яасса над̇т̇и д̇хувам̣ тид̇ийд̇и яасса гааяасса д̇хувабхааво тид̇исабхааво над̇т̇и, згам̣сад̇о бхзд̣̇анавигиран̣авид̣̇д̇хам̣санад̇хаммоязва. д̇ам̣ бассаад̇и самийбз тид̇ам̣ ж̇анам̣, ад̇д̇аанамзва ваа санд̇хааяа вад̣̇ад̇и.

Tattha cittakatanti cittaṃ kataṃ cittakataṃ, vatthābharaṇamālādīhi vicittaṃ katanti attho. Bimbanti dīghādibhāvena yuttaṭṭhānesu dīghādīhi aṅgapaccaṅgehi maṇḍitaṃ attabhāvaṃ. Arukāyanti navannaṃ vaṇamukhānaṃ lomakūpānañca vasena vissandamānaasuciṃ, sabbaso ca arubhūtaṃ vaṇabhūtaṃ arūnaṃ vā kāyaṃ. Samussitanti tīhi aṭṭhisatehi samussitaṃ. Āturanti sabbakālaṃ iriyāpathantarādīhi pariharitabbatāya niccaṃ gilānaṃ. Bahusaṅkappanti bālajanena abhūtaṃ āropetvā bahudhā saṅkappitabbaṃ. Yassa natthi dhuvaṃ ṭhitīti yassa kāyassa dhuvabhāvo ṭhitisabhāvo natthi, ekaṃsato bhedanavikiraṇaviddhaṃsanadhammoyeva. Taṃ passāti samīpe ṭhitaṃ janaṃ, attānameva vā sandhāya vadati.

руубанд̇и сарийрам̣. сарийрамби хи ‘‘адтин̃жа бадижжа, нхаарун̃жа бадижжа, мам̣сан̃жа бадижжа, жамман̃жа бадижжа, аагаасо бариваарид̇о ‘руубанд̇взва сан̇кам̣ г̇ажчад̇ий’’д̇иаад̣̇ийсу (ма. ни. 1.306) руубанд̇и вужжад̇и. ман̣инаа гун̣д̣алзна жаад̇и сийсуубаг̇аад̣̇иаабхаран̣аг̇ад̇зна ман̣инаа гун̣д̣алзна жид̇д̇агад̇ам̣. адтим̣ д̇ажзна онад̣̇д̇ханд̇и аллажаммзна барияонад̣̇д̇хам̣ ад̇ирзгад̇исад̇абабхзд̣̇ам̣ адтим̣ бассаад̇и яож̇анаа. гун̣д̣алзна жаад̇и жа-сад̣̇д̣̇зна сзсаабхаран̣аалан̇гаарз сан̇г̇ан̣хаад̇и. саха вад̇т̇зхи собхад̇ийд̇и д̇аяид̣̇ам̣ руубам̣ ман̣инаа жид̇д̇агад̇амби вад̇т̇зхи бадижчаад̣̇ид̇амзва собхад̇и, на абадижчаад̣̇ид̇анд̇и ад̇т̇о. яз бана ‘‘адтид̇ажзнаа’’д̇и батанд̇и, д̇зсам̣ адтид̇ажзнам̣ онад̣̇д̇хам̣ собхад̇и, онад̣̇д̇хад̇д̇аа адтид̇ажзнаад̇и ад̇т̇о.

Rūpanti sarīraṃ. Sarīrampi hi ‘‘aṭṭhiñca paṭicca, nhāruñca paṭicca, maṃsañca paṭicca, cammañca paṭicca, ākāso parivārito ‘rūpantveva saṅkhaṃ gacchatī’’tiādīsu (ma. ni. 1.306) rūpanti vuccati. Maṇinā kuṇḍalena cāti sīsūpagādiābharaṇagatena maṇinā kuṇḍalena cittakataṃ. Aṭṭhiṃ tacena onaddhanti allacammena pariyonaddhaṃ atirekatisatapabhedaṃ aṭṭhiṃ passāti yojanā. Kuṇḍalena cāti ca-saddena sesābharaṇālaṅkāre saṅgaṇhāti. Saha vatthehi sobhatīti tayidaṃ rūpaṃ maṇinā cittakatampi vatthehi paṭicchāditameva sobhati, na apaṭicchāditanti attho. Ye pana ‘‘aṭṭhitacenā’’ti paṭhanti, tesaṃ aṭṭhitacenaṃ onaddhaṃ sobhati, onaddhattā aṭṭhitacenāti attho.

алад̇д̇агагад̇аад̇и алад̇д̇агзна гад̇аран̃ж̇анаа лаакааяа сам̣ран̃ж̇ид̇аа. баад̣̇аад̇и жаран̣аа. мукам̣ жун̣н̣агамагкид̇анд̇и мукам̣ жун̣н̣агзна магкид̇ам̣, яам̣ ман̣д̣анамануяуд̇д̇аа саасабагаггзна мукабийл̣агаад̣̇ийни харид̇ваа лон̣амад̇д̇игааяа д̣̇удталохид̇ам̣ харид̇ваа мукажун̣н̣агавилзбанам̣ гаронд̇и, д̇ам̣ санд̇хааяа вуд̇д̇ам̣. аланд̇и б̣ааласса анд̇хабут̇уж̇ж̇анасса но жа баараг̇авзсино ваддаабхирад̇асса мохааяа саммоханааяа самад̇т̇ам̣ д̇асса жид̇д̇ам̣ мохзд̇ум̣ барияад̇д̇ам̣, баараг̇авзсино бана виваддаабхирад̇асса но алам̣ на барияад̇д̇ам̣.

Alattakakatāti alattakena katarañjanā lākhāya saṃrañjitā. Pādāti caraṇā. Mukhaṃ cuṇṇakamakkhitanti mukhaṃ cuṇṇakena makkhitaṃ, yaṃ maṇḍanamanuyuttā sāsapakakkena mukhapīḷakādīni haritvā loṇamattikāya duṭṭhalohitaṃ haritvā mukhacuṇṇakavilepanaṃ karonti, taṃ sandhāya vuttaṃ. Alanti bālassa andhaputhujjanassa noca pāragavesino vaṭṭābhiratassa mohāya sammohanāya samatthaṃ tassa cittaṃ mohetuṃ pariyattaṃ, pāragavesino pana vivaṭṭābhiratassa no alaṃ na pariyattaṃ.

адтаабад̣̇агад̇аад̇и адтабад̣̇аагаарзна гад̇аа сан̃жид̇аа буримабхааг̇з гзсз габбзд̇ваа налаадасса бадижчаад̣̇анавасзна гад̇аа гзсаражанаа адтабад̣̇ам̣ наама, яам̣ ‘‘алага’’нд̇иби вужжад̇и. нзд̇д̇аа ан̃ж̇анамагкид̇аад̇и убхоби наяанаани анд̇о д̣̇вийсу анд̇зсу жа яат̇аа ан̃ж̇анажчааяаа д̣̇иссад̇и, звам̣ ан̃ж̇ид̇ан̃ж̇анаани.

Aṭṭhāpadakatāti aṭṭhapadākārena katā sañcitā purimabhāge kese kappetvā nalāṭassa paṭicchādanavasena katā kesaracanā aṭṭhapadaṃ nāma, yaṃ ‘‘alaka’’ntipi vuccati. Nettā añjanamakkhitāti ubhopi nayanāni anto dvīsu antesu ca yathā añjanacchāyā dissati, evaṃ añjitañjanāni.

ан̃ж̇анийва наваа жид̇д̇аа, бууд̇игааяо алан̇гад̇од̇и яат̇аа ан̃ж̇аний ан̃ж̇ананаал̣игаа наваа абхинаваа маалаагаммамагарад̣̇анд̇аад̣̇ивасзна жид̇д̇аа б̣ахи мадтаа уж̇ж̇алаа д̣̇ассанийяаа, анд̇о бана на д̣̇ассанийяаа ход̇и, звамзва д̇аасам̣ гааяо нхаанаб̣бхан̃ж̇анавад̇т̇аалан̇гаарзхи алан̇гад̇о б̣ахи уж̇ж̇ало, анд̇о бана бууд̇и наанаббагаараасужийхи бхарид̇о д̇идтад̇ийд̇и ад̇т̇о.

Añjanīva navā cittā, pūtikāyo alaṅkatoti yathā añjanī añjananāḷikā navā abhinavā mālākammamakaradantādivasena cittā bahi maṭṭhā ujjalā dassanīyā, anto pana na dassanīyā hoti, evameva tāsaṃ kāyo nhānabbhañjanavatthālaṅkārehi alaṅkato bahi ujjalo, anto pana pūti nānappakāraasucīhi bharito tiṭṭhatīti attho.

од̣̇ахийд̇и од̣д̣зси. миг̇авод̇и, миг̇алуд̣̇д̣̇аго. баасанд̇и, д̣̇ан̣д̣авааг̇урам̣. наасад̣̇аад̇и на сан̇гхаддзси. вааг̇уранд̇и баасам̣. ниваабанд̇и миг̇аанам̣ каад̣̇анад̇т̇ааяа кид̇д̇ам̣ д̇ин̣аад̣̇игхаасам̣. убамаа ко аяам̣ т̇зрзна гад̇аа ад̇т̇асса вин̃н̃аабанааяа. аяан̃хзд̇т̇а ад̇т̇о – яат̇аа миг̇аанам̣ мааран̣ад̇т̇ааяа д̣̇ан̣д̣авааг̇урам̣ од̣д̣зд̇ваа д̇ад̇т̇а ниваабам̣ вигирияа миг̇алуд̣̇д̣̇агз нилийнз тид̇з д̇ад̇т̇зго ж̇авабараггамасамбанно чзго миг̇о баасам̣ апусанд̇о зва яат̇аасукам̣ ниваабам̣ каад̣̇ид̇ваа, ‘‘ван̃жзси вад̇а миг̇о’’д̇и миг̇алуд̣̇д̣̇агз вираванд̇з зва г̇ажчад̇и. абаро миг̇о б̣алаваа чзго ж̇авасамбаннова д̇ад̇т̇а г̇анд̇ваа ниваабам̣ каад̣̇ид̇ваа д̇ад̇т̇а д̇ад̇т̇а баасам̣ чинд̣̇ид̇ваа, ‘‘ван̃жзси вад̇а миг̇о, баасо чинно’’д̇и миг̇алуд̣̇д̣̇агз сожанд̇з зва г̇ажчад̇и, звам̣ маяамби буб̣б̣з бут̇уж̇ж̇анагаалз маад̇аабид̇уухи аасаж̇ж̇анад̇т̇ааяа нияяаад̣̇ид̇з бхог̇з бхун̃ж̇ид̇ваа д̇ад̇т̇а д̇ад̇т̇а асаж̇ж̇амаанаа нигканд̇аа. ид̣̇аани бана саб̣б̣асо чиннагилзсаа абаасаа худ̇ваа тид̇аа, д̇зхи д̣̇иннабхож̇анам̣ бхун̃ж̇ид̇ваа д̇зсу сожанд̇зсу зва г̇ажчаамаад̇и.

Odahīti oḍḍesi. Migavoti, migaluddako. Pāsanti, daṇḍavāguraṃ. Nāsadāti na saṅghaṭṭesi. Vāguranti pāsaṃ. Nivāpanti migānaṃ khādanatthāya khittaṃ tiṇādighāsaṃ. Upamā kho ayaṃ therena katā atthassa viññāpanāya. Ayañhettha attho – yathā migānaṃ māraṇatthāya daṇḍavāguraṃ oḍḍetvā tattha nivāpaṃ vikiriya migaluddake nilīne ṭhite tattheko javaparakkamasampanno cheko migo pāsaṃ aphusanto eva yathāsukhaṃ nivāpaṃ khāditvā, ‘‘vañcesi vata migo’’ti migaluddake viravante eva gacchati. Aparo migo balavā cheko javasampannova tattha gantvā nivāpaṃ khāditvā tattha tattha pāsaṃ chinditvā, ‘‘vañcesi vata migo, pāso chinno’’ti migaluddake socante eva gacchati, evaṃ mayampi pubbe puthujjanakāle mātāpitūhi āsajjanatthāya niyyādite bhoge bhuñjitvā tattha tattha asajjamānā nikkhantā. Idāni pana sabbaso chinnakilesā apāsā hutvā ṭhitā, tehi dinnabhojanaṃ bhuñjitvā tesu socantesu eva gacchāmāti.

звам̣ т̇зро миг̇алуд̣̇д̣̇агам̣ вияа маад̇аабид̇аро, хиран̃н̃асуван̣н̣ам̣ ид̇т̇ааг̇ааран̃жа вааг̇ураж̇аалам̣ вияа, ад̇д̇анаа буб̣б̣з бхуд̇д̇абхог̇з жа ид̣̇аани бхуд̇д̇абхож̇анан̃жа ниваабад̇ин̣ам̣ вияа, ад̇д̇аанам̣ махаамиг̇ам̣ вияа жа гад̇ваа д̣̇ассзд̇и. имаа г̇аат̇аа вад̇ваа взхаасам̣ аб̣бхуг̇г̇анд̇ваа ран̃н̃о гораб̣яасса миг̇ааж̇инауяяаанз ман̇г̇аласилаабаддз нисийд̣̇и. т̇зрасса гира бид̇аа сад̇д̇асу д̣̇ваарагодтагзсу аг̇г̇ал̣ам̣ д̣̇аабзд̇ваа маллз аан̣аабзси ‘‘нигкамид̇ум̣ маа д̣̇зт̇а, гаасааяаани абанзд̇ваа сзд̇агаани ниваасзт̇аа’’д̇и, д̇асмаа т̇зро аагаасзна аг̇амааси. ат̇а рааж̇аа гораб̣яо т̇зрасса д̇ад̇т̇а нисиннабхаавам̣ суд̇ваа д̇ам̣ убасан̇гамид̇ваа саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа ‘‘ид̇ха, бхо радтабаала, баб̣б̣аж̇анд̇о б̣яаад̇хибаариж̇ун̃н̃ам̣ ваа ж̇араабхог̇ан̃аад̇ибаариж̇ун̃н̃ам̣ ваа бад̇д̇о баб̣б̣аж̇ад̇и. д̇вам̣ бана гин̃жиби баариж̇ун̃н̃ам̣ анубаг̇ад̇о зва гасмаа баб̣б̣аж̇ид̇о’’д̇и бужчи. ат̇асса т̇зро, ‘‘убанияяад̇и лого ад̣̇д̇хуво, ад̇аан̣о лого анабхиссаро, ассаго лого саб̣б̣ам̣ бахааяа г̇аманийяам̣, ууно лого ад̇ид̇д̇о д̇ан̣хаад̣̇аасо’’д̇и (ма. ни. 2.305) имзсам̣ жад̇уннам̣ д̇хаммуд̣̇д̣̇зсаанам̣ ад̇д̇аанам̣ вивид̇д̇абхаавам̣ гат̇зд̇ваа д̇ассаа д̣̇зсанааяа ануг̇ийд̇им̣ гат̇знд̇о –

Evaṃ thero migaluddakaṃ viya mātāpitaro, hiraññasuvaṇṇaṃ itthāgārañca vāgurajālaṃ viya, attanā pubbe bhuttabhoge ca idāni bhuttabhojanañca nivāpatiṇaṃ viya, attānaṃ mahāmigaṃ viya ca katvā dasseti. Imā gāthā vatvā vehāsaṃ abbhuggantvā rañño korabyassa migājinauyyāne maṅgalasilāpaṭṭe nisīdi. Therassa kira pitā sattasu dvārakoṭṭhakesu aggaḷaṃ dāpetvā malle āṇāpesi ‘‘nikkhamituṃ mā detha, kāsāyāni apanetvā setakāni nivāsethā’’ti, tasmā thero ākāsena agamāsi. Atha rājā korabyo therassa tattha nisinnabhāvaṃ sutvā taṃ upasaṅkamitvā sammodanīyaṃ kathaṃ sāraṇīyaṃ vītisāretvā ‘‘idha, bho raṭṭhapāla, pabbajanto byādhipārijuññaṃ vā jarābhogañātipārijuññaṃ vā patto pabbajati. Tvaṃ pana kiñcipi pārijuññaṃ anupagato eva kasmā pabbajito’’ti pucchi. Athassa thero, ‘‘upaniyyati loko addhuvo, atāṇo loko anabhissaro, assako loko sabbaṃ pahāya gamanīyaṃ, ūno loko atitto taṇhādāso’’ti (ma. ni. 2.305) imesaṃ catunnaṃ dhammuddesānaṃ attānaṃ vivittabhāvaṃ kathetvā tassā desanāya anugītiṃ kathento –

776.

‘‘бассаами логз сад̇ханз мануссз, лад̣̇д̇хаана вид̇д̇ам̣ на д̣̇ад̣̇анд̇и мохаа;

‘‘Passāmi loke sadhane manusse, laddhāna vittaṃ na dadanti mohā;

луд̣̇д̇хаа д̇ханам̣ саннижаяам̣ гаронд̇и, бхияяова гаамз абхибад̇т̇аяанд̇и.

Luddhā dhanaṃ sannicayaṃ karonti, bhiyyova kāme abhipatthayanti.

777.

‘‘рааж̇аа басаяхаббат̇авим̣ виж̇зд̇ваа, сасааг̇аранд̇ам̣ махимаавасанд̇о;

‘‘Rājā pasayhappathaviṃ vijetvā, sasāgarantaṃ mahimāvasanto;

орам̣ самуд̣̇д̣̇асса ад̇ид̇д̇аруубо, баарам̣ самуд̣̇д̣̇ассаби бад̇т̇аязт̇а.

Oraṃ samuddassa atittarūpo, pāraṃ samuddassapi patthayetha.

778.

‘‘рааж̇аа жа ан̃н̃з жа б̣ахуу мануссаа, авийд̇ад̇ан̣хаа маран̣ам̣ убзнд̇и;

‘‘Rājā ca aññe ca bahū manussā, avītataṇhā maraṇaṃ upenti;

уунаава худ̇ваана ж̇аханд̇и д̣̇зхам̣, гаамзхи логамхи на хад̇т̇и д̇ид̇д̇и.

Ūnāva hutvāna jahanti dehaṃ, kāmehi lokamhi na hatthi titti.

779.

‘‘ганд̣̇анд̇и нам̣ н̃аад̇ий багирияа гзсз, ‘ахо вад̇аа но амараа’д̇и жааху;

‘‘Kandanti naṃ ñātī pakiriya kese, ‘aho vatā no amarā’ti cāhu;

вад̇т̇зна нам̣ бааруд̇ам̣ нийхарид̇ваа, жид̇ам̣ самод̇хааяа д̇ад̇о д̣аханд̇и.

Vatthena naṃ pārutaṃ nīharitvā, citaṃ samodhāya tato ḍahanti.

780.

‘‘со д̣аяхад̇и суулзхи д̇уж̇ж̇амаано, згзна вад̇т̇зна бахааяа бхог̇з;

‘‘So ḍayhati sūlehi tujjamāno, ekena vatthena pahāya bhoge;

на мийяамаанасса бхаванд̇и д̇аан̣аа, н̃аад̇ий жа мид̇д̇аа ат̇а ваа сахааяаа.

Na mīyamānassa bhavanti tāṇā, ñātī ca mittā atha vā sahāyā.

781.

‘‘д̣̇ааяаад̣̇агаа д̇асса д̇ханам̣ харанд̇и, сад̇д̇о бана г̇ажчад̇и язнагаммам̣;

‘‘Dāyādakā tassa dhanaṃ haranti, satto pana gacchati yenakammaṃ;

на мийяамаанам̣ д̇ханаманвзд̇и гин̃жи, буд̇д̇аа жа д̣̇аараа жа д̇ханан̃жа радтам̣.

Na mīyamānaṃ dhanamanveti kiñci, puttā ca dārā ca dhanañca raṭṭhaṃ.

782.

‘‘на д̣̇ийгхамааяум̣ лабхад̇з д̇ханзна, на жааби вид̇д̇зна ж̇арам̣ виханд̇и;

‘‘Na dīghamāyuṃ labhate dhanena, na cāpi vittena jaraṃ vihanti;

аббам̣ хид̣̇ам̣ ж̇ийвид̇амааху д̇хийраа, асассад̇ам̣ виббарин̣аамад̇хаммам̣.

Appaṃ hidaṃ jīvitamāhu dhīrā, asassataṃ vippariṇāmadhammaṃ.

783.

‘‘ад̣дхаа д̣̇алид̣̇д̣̇аа жа пусанд̇и пассам̣, б̣аало жа д̇хийро жа д̇ат̇зва пудто;

‘‘Aḍḍhā daliddā ca phusanti phassaṃ, bālo ca dhīro ca tatheva phuṭṭho;

б̣аало хи б̣ааляаа вад̇хид̇ова сзд̇и, д̇хийро жа но взд̇хад̇и пассапудто.

Bālo hi bālyā vadhitova seti, dhīro ca no vedhati phassaphuṭṭho.

784.

‘‘д̇асмаа хи бан̃н̃аава д̇ханзна сзяяаа, яааяа восаанамид̇хаад̇хиг̇ажчад̇и;

‘‘Tasmā hi paññāva dhanena seyyā, yāya vosānamidhādhigacchati;

аб̣яосид̇ад̇д̇аа хи бхаваабхавзсу, баабаани гаммаани гарод̇и мохаа.

Abyositattā hi bhavābhavesu, pāpāni kammāni karoti mohā.

785.

‘‘убзд̇и г̇аб̣бхан̃жа баран̃жа логам̣, сам̣саарамаабаж̇ж̇а барамбарааяа;

‘‘Upeti gabbhañca parañca lokaṃ, saṃsāramāpajja paramparāya;

д̇ассаббабан̃н̃о абхисад̣̇д̣̇аханд̇о, убзд̇и г̇аб̣бхан̃жа баран̃жа логам̣.

Tassappapañño abhisaddahanto, upeti gabbhañca parañca lokaṃ.

786.

‘‘жоро яат̇аа санд̇химукз г̇ахийд̇о, сагаммунаа хан̃н̃ад̇и баабад̇хаммо;

‘‘Coro yathā sandhimukhe gahīto, sakammunā haññati pāpadhammo;

звам̣ баж̇аа бзжжа барамхи логз, сагаммунаа хан̃н̃ад̇и баабад̇хаммо.

Evaṃ pajā pecca paramhi loke, sakammunā haññati pāpadhammo.

787.

‘‘гаамаа хи жид̇раа мад̇хураа манорамаа, вируубаруубзна мат̇знд̇и жид̇д̇ам̣;

‘‘Kāmā hi citrā madhurā manoramā, virūparūpena mathenti cittaṃ;

аад̣̇ийнавам̣ гаамаг̇ун̣зсу д̣̇исваа, д̇асмаа ахам̣ баб̣б̣аж̇ид̇омхи рааж̇а.

Ādīnavaṃ kāmaguṇesu disvā, tasmā ahaṃ pabbajitomhi rāja.

788.

‘‘д̣̇умабпалаанийва бад̇анд̇и маан̣аваа, д̣̇ахараа жа вуд̣дхаа жа сарийрабхзд̣̇аа;

‘‘Dumapphalānīva patanti māṇavā, daharā ca vuḍḍhā ca sarīrabhedā;

зд̇амби д̣̇исваа баб̣б̣аж̇ид̇омхи рааж̇а, абан̣н̣агам̣ сааман̃н̃амзва сзяяо.

Etampi disvā pabbajitomhi rāja, apaṇṇakaṃ sāmaññameva seyyo.

789.

‘‘сад̣̇д̇хааяаахам̣ баб̣б̣аж̇ид̇о, убзд̇о ж̇инасаасанз;

‘‘Saddhāyāhaṃ pabbajito, upeto jinasāsane;

аван̃жхаа маяхам̣ баб̣б̣аж̇ж̇аа, анан̣о бхун̃ж̇аами бхож̇анам̣.

Avañjhā mayhaṃ pabbajjā, anaṇo bhuñjāmi bhojanaṃ.

790.

‘‘гаамз аад̣̇ид̇д̇ад̇о д̣̇исваа, ж̇аад̇аруубаани сад̇т̇ад̇о;

‘‘Kāme ādittato disvā, jātarūpāni satthato;

г̇аб̣бхавогганд̇ид̇о д̣̇угкам̣, нираязсу махаб̣бхаяам̣.

Gabbhavokkantito dukkhaṃ, nirayesu mahabbhayaṃ.

791.

‘‘зд̇амаад̣̇ийнавам̣ н̃ад̇ваа, сам̣взг̇ам̣ алабхим̣ д̇ад̣̇аа;

‘‘Etamādīnavaṃ ñatvā, saṃvegaṃ alabhiṃ tadā;

сохам̣ вид̣̇д̇хо д̇ад̣̇аа санд̇о, самбад̇д̇о аасавагкаяам̣.

Sohaṃ viddho tadā santo, sampatto āsavakkhayaṃ.

792.

‘‘барижин̣н̣о маяаа сад̇т̇аа, гад̇ам̣ б̣уд̣̇д̇хасса саасанам̣;

‘‘Pariciṇṇo mayā satthā, kataṃ buddhassa sāsanaṃ;

охид̇о г̇аруго бхааро, бхаванзд̇д̇и самуухад̇аа.

Ohito garuko bhāro, bhavanetti samūhatā.

793.

‘‘яассад̇т̇ааяа баб̣б̣аж̇ид̇о, аг̇аарасмаанаг̇аарияам̣;

‘‘Yassatthāya pabbajito, agārasmānagāriyaṃ;

со мз ад̇т̇о ануббад̇д̇о, саб̣б̣асам̣яож̇анагкаяо’’д̇и. – имаа г̇аат̇аа авожа;

So me attho anuppatto, sabbasaṃyojanakkhayo’’ti. – imā gāthā avoca;

д̇ад̇т̇а бассаами логзд̇и ахам̣, махаарааж̇а, имасмим̣ логз сад̇ханз д̇ханасамбаннз ад̣дхз мануссз бассаами, д̇з бана лад̣̇д̇хаана вид̇д̇ам̣ д̇ханам̣ лабхид̇ваа бхог̇асамбад̇д̇ияам̣ тид̇аа саман̣аб̣раахман̣аад̣̇ийсу гассажи гин̃жиби на д̣̇ад̣̇анд̇и. гасмаа? мохаа гаммассагад̇аабан̃н̃ааяа абхаавад̇о. луд̣̇д̇хаа лобхаабхибхууд̇аа яат̇аалад̣̇д̇хам̣ д̇ханам̣ саннижаяам̣ саб̣б̣асо нижзд̇аб̣б̣ам̣ нид̇хзд̇аб̣б̣ам̣ гаронд̇и. бхияяова яат̇аад̇хиг̇ад̇агаамад̇о убари гаамз гаамаг̇ун̣з ‘‘д̇ат̇аахам̣ зд̣̇исз жа бхог̇з бадилабхзяяа’’нд̇и абхибад̇т̇аяанд̇и бажжаасийсанд̇и д̇аж̇ж̇ан̃жа вааяаамам̣ гаронд̇и.

Tattha passāmi loketi ahaṃ, mahārāja, imasmiṃ loke sadhane dhanasampanne aḍḍhe manusse passāmi, te pana laddhāna vittaṃ dhanaṃ labhitvā bhogasampattiyaṃ ṭhitā samaṇabrāhmaṇādīsu kassaci kiñcipi na dadanti. Kasmā? Mohā kammassakatāpaññāya abhāvato. Luddhā lobhābhibhūtā yathāladdhaṃ dhanaṃ sannicayaṃ sabbaso nicetabbaṃ nidhetabbaṃ karonti. Bhiyyova yathādhigatakāmato upari kāme kāmaguṇe ‘‘tathāhaṃ edise ca bhoge paṭilabheyya’’nti abhipatthayanti paccāsīsanti tajjañca vāyāmaṃ karonti.

бхияяо гаамабад̇т̇анааяа уд̣̇аахаран̣ам̣ д̣̇ассзнд̇о ‘‘рааж̇аа’’д̇иаад̣̇имааха. д̇ад̇т̇а басаяхаббат̇авим̣ виж̇зд̇ваад̇и ад̇д̇ано вам̣саануг̇ад̇ам̣ бат̇авим̣ б̣алаггаарзна абхивиж̇ияа. аавасанд̇од̇и басаасзнд̇о. орам̣ самуд̣̇д̣̇ассаад̇и анавасзсам̣ самуд̣̇д̣̇асса орабхааг̇ам̣ лабхид̇вааби д̇зна ад̇ид̇д̇аруубо баарам̣ самуд̣̇д̣̇асса д̣̇ийбанд̇арамби бад̇т̇аязяяа.

Bhiyyo kāmapatthanāya udāharaṇaṃ dassento ‘‘rājā’’tiādimāha. Tattha pasayhappathaviṃ vijetvāti attano vaṃsānugataṃ pathaviṃ balakkārena abhivijiya. Āvasantoti pasāsento. Oraṃ samuddassāti anavasesaṃ samuddassa orabhāgaṃ labhitvāpi tena atittarūpo pāraṃ samuddassa dīpantarampi patthayeyya.

авийд̇ад̇ан̣хаад̇и авиг̇ад̇ад̇ан̣хаа. уунааваад̇и абарибун̣н̣аманорат̇аава. гаамзхи логамхи на хад̇т̇и д̇ид̇д̇ийд̇и д̇ан̣хаавибаннаанам̣ имасмим̣ логз вад̇т̇угаамзхи д̇ид̇д̇и наама над̇т̇и.

Avītataṇhāti avigatataṇhā. Ūnāvāti aparipuṇṇamanorathāva. Kāmehi lokamhi na hatthi tittīti taṇhāvipannānaṃ imasmiṃ loke vatthukāmehi titti nāma natthi.

ганд̣̇анд̇и нанд̇и мад̇абурисам̣ уд̣̇д̣̇исса д̇асса г̇ун̣з гид̇д̇знд̇аа ганд̣̇анам̣ гаронд̇и. ахо вад̇аа но амараад̇и жаахууд̇и ахо вад̇а амхаагам̣ н̃аад̇ий амараа сияунд̇и жа гат̇знд̇и, г̇аат̇аасукад̇т̇ан̃хзд̇т̇а вад̇аа-ид̇и д̣̇ийгхам̣ гад̇ваа вуд̇д̇ам̣.

Kandanti nanti matapurisaṃ uddissa tassa guṇe kittentā kandanaṃ karonti. Aho vatā no amarāti cāhūti aho vata amhākaṃ ñātī amarā siyunti ca kathenti, gāthāsukhatthañhettha vatā-iti dīghaṃ katvā vuttaṃ.

со д̣аяхад̇и суулзхи д̇уж̇ж̇амаанод̇и со мад̇асад̇д̇о чавад̣аахагзхи саммаа жхаабзд̇ум̣ суулзхи д̇уж̇ж̇амаано. д̇аан̣аад̇и барид̇д̇аан̣агараа.

So ḍayhati sūlehi tujjamānoti so matasatto chavaḍāhakehi sammā jhāpetuṃ sūlehi tujjamāno. Tāṇāti parittāṇakarā.

язнагамманд̇и яат̇аагаммам̣. д̇хананд̇и д̇ханааяид̇аб̣б̣ам̣ яам̣гин̃жи вад̇т̇у. буна д̇хананд̇и хиран̃н̃асуван̣н̣ам̣ санд̇хааяа вад̣̇ад̇и.

Yenakammanti yathākammaṃ. Dhananti dhanāyitabbaṃ yaṃkiñci vatthu. Puna dhananti hiraññasuvaṇṇaṃ sandhāya vadati.

‘‘на д̣̇ийгхамааяу’’нд̇иаад̣̇инаа гаамаг̇ун̣асса ж̇арааяа жа бадигаараабхаавам̣ вад̇ваа буна д̇асса зганд̇игабхаавам̣ д̣̇ассзд̇ум̣ ‘‘аббам̣ хий’’д̇иаад̣̇и вуд̇д̇ам̣. пусанд̇ийд̇и анидтапассам̣ пусанд̇и баабун̣анд̇и, д̇ад̇т̇а ад̣дхад̣̇алид̣̇д̣̇ад̇аа агааран̣анд̇и д̣̇ассзд̇и. пассам̣ б̣аало жа д̇хийро жа д̇ат̇зва пудтод̇и яат̇аа б̣аало идтаанидтасампассам̣ пудто, д̇ат̇зва д̇хийро идтаанидтапассам̣ пудто ход̇и, на зд̇т̇а б̣аалабан̣д̣ид̇аанам̣ гожи висзсо. аяам̣ бана висзсо, б̣аало хи б̣ааляаа вад̇хид̇ова сзд̇ийд̇и б̣аалабуг̇г̇ало гзнажи д̣̇угкад̇хаммзна пудто сожанд̇о гиламанд̇о урад̇д̇аал̣им̣ ганд̣̇анд̇о б̣аалабхаавзна вад̇хид̇о бийл̣ид̇ова худ̇ваа сзд̇и саяад̇и. ид̇о жид̇о жа аавадданд̇о вивадданд̇о вирод̇хзнд̇о взд̇хад̇и пассапудтод̇и д̇хийро бана бан̣д̣ид̇о д̣̇угкасампассзна сампудто на взд̇хад̇и гамбанамад̇д̇амби д̇асса на ход̇ийд̇и.

‘‘Na dīghamāyu’’ntiādinā kāmaguṇassa jarāya ca paṭikārābhāvaṃ vatvā puna tassa ekantikabhāvaṃ dassetuṃ ‘‘appaṃ hī’’tiādi vuttaṃ. Phusantīti aniṭṭhaphassaṃ phusanti pāpuṇanti, tattha aḍḍhadaliddatā akāraṇanti dasseti. Phassaṃ bālo ca dhīro ca tatheva phuṭṭhoti yathā bālo iṭṭhāniṭṭhasamphassaṃ phuṭṭho, tatheva dhīro iṭṭhāniṭṭhaphassaṃ phuṭṭho hoti, na ettha bālapaṇḍitānaṃ koci viseso. Ayaṃ pana viseso, bālo hi bālyā vadhitova setīti bālapuggalo kenaci dukkhadhammena phuṭṭho socanto kilamanto urattāḷiṃ kandanto bālabhāvena vadhito pīḷitova hutvā seti sayati. Ito cito ca āvaṭṭanto vivaṭṭanto virodhento vedhati phassaphuṭṭhoti dhīro pana paṇḍito dukkhasamphassena samphuṭṭho na vedhati kampanamattampi tassa na hotīti.

д̇асмаад̇и яасмаа б̣аалабан̣д̣ид̇аанам̣ логад̇хаммз зд̣̇исий бавад̇д̇и, д̇асмаа хи бан̃н̃аава д̇ханзна сзяяаа, яааяа восаанамид̇хаад̇хиг̇ажчад̇ийд̇и бан̃н̃аава д̇ханад̇о баасам̣сад̇араа, яааяа бан̃н̃ааяа восаанам̣ бхавасса барияосаанабхууд̇ам̣ ниб̣б̣аанам̣ ад̇хиг̇ажчад̇и. аб̣яосид̇ад̇д̇аа хийд̇и анад̇хиг̇ад̇анидтад̇д̇аа. бхаваабхавзсууд̇и маханд̇аамаханд̇зсу бхавзсу.

Tasmāti yasmā bālapaṇḍitānaṃ lokadhamme edisī pavatti, tasmā hi paññāva dhanena seyyā, yāya vosānamidhādhigacchatīti paññāva dhanato pāsaṃsatarā, yāya paññāya vosānaṃ bhavassa pariyosānabhūtaṃ nibbānaṃ adhigacchati. Abyositattā hīti anadhigataniṭṭhattā. Bhavābhavesūti mahantāmahantesu bhavesu.

убзд̇и г̇аб̣бхан̃жа баран̃жа логам̣, сам̣саарамаабаж̇ж̇а барамбарааяаад̇и яо баабаани гад̇ваа абараабарам̣ сам̣саран̣амаабаж̇ж̇ид̇ваа убзд̇и г̇аб̣бхан̃жа баран̃жа логам̣ г̇аб̣бхасзяяааяа баралогуббад̇д̇ияаа жа на мужжад̇и, д̇асса баабагаммагаарино буг̇г̇аласса гирияам̣ абхисад̣̇д̣̇аханд̇о ‘‘ад̇д̇аа жа мз ход̇ий’’д̇и бад̇д̇ияааяанд̇о ан̃н̃оби аббабан̃н̃о б̣аало яат̇аа бадибаж̇ж̇ид̇ваа убзд̇и г̇аб̣бхан̃жа баран̃жа логам̣, на д̇ад̇о баримужжад̇и.

Upeti gabbhañca parañca lokaṃ, saṃsāramāpajja paramparāyāti yo pāpāni katvā aparāparaṃ saṃsaraṇamāpajjitvā upeti gabbhañca parañca lokaṃ gabbhaseyyāya paralokuppattiyā ca na muccati, tassa pāpakammakārino puggalassa kiriyaṃ abhisaddahanto ‘‘attā ca me hotī’’ti pattiyāyanto aññopi appapañño bālo yathā paṭipajjitvā upeti gabbhañca parañca lokaṃ, na tato parimuccati.

жоро яат̇аад̇и яат̇аа жоро баабад̇хаммо гхарасанд̇хим̣ чинд̣̇анд̇о санд̇химукз аарагкагабурисзхи г̇ахид̇о сагаммунаа д̇зна ад̇д̇ано санд̇хижчзд̣̇агаммунаа гааран̣абхууд̇зна гасаад̣̇ийхи д̇аал̣анаад̣̇ивасзна хан̃н̃ад̇и рааж̇абурисзхи б̣аад̇хияяад̇и б̣аж̇жхад̇и жа. звам̣ баж̇аад̇и звамаяам̣ сад̇д̇алого ид̇ха баабаани гарид̇ваа бзжжа бад̇ваа д̇зна гаммунаа барамхи логз нираяаад̣̇ийсу хан̃н̃ад̇и, бан̃жавид̇хаб̣анд̇ханагаммагааран̣аад̣̇ивасзна б̣аад̇хияяад̇и.

Coro yathāti yathā coro pāpadhammo gharasandhiṃ chindanto sandhimukhe ārakkhakapurisehi gahito sakammunā tena attano sandhicchedakammunā kāraṇabhūtena kasādīhi tāḷanādivasena haññati rājapurisehi bādhiyyati bajjhati ca. Evaṃ pajāti evamayaṃ sattaloko idha pāpāni karitvā pecca patvā tena kammunā paramhi loke nirayādīsu haññati, pañcavidhabandhanakammakāraṇādivasena bādhiyyati.

звамзд̇аахи згаад̣̇асахи г̇аат̇аахи яат̇аарахам̣ жад̇д̇ааро д̇хаммуд̣̇д̣̇зсз багаасзд̇ваа ид̣̇аани гаамзсу сам̣саарз жа аад̣̇ийнавам̣ д̣̇исваа сад̣̇д̇хааяа ад̇д̇ано баб̣б̣аж̇ид̇абхаавам̣ баб̣б̣аж̇ид̇агижжасса жа мад̇т̇агаббад̇д̇им̣ вибхаавзнд̇о ‘‘гаамаа хий’’д̇иаад̣̇имааха. д̇ад̇т̇а гаамаад̇и вад̇т̇угаамаа манаабияаа руубаад̣̇аяо д̇хаммаа, гилзсагаамаа саб̣б̣зби рааг̇аббабхзд̣̇аа. ид̇ха бана вад̇т̇угаамаа взд̣̇ид̇аб̣б̣аа. д̇з хи руубаад̣̇ивасзна анзгаббагаарад̇ааяа жид̇раа. логассаад̣̇авасзна идтаагаарад̇ааяа мад̇хураа. б̣аалабут̇уж̇ж̇анаанам̣ манам̣ рамзнд̇ийд̇и манорамаа. вируубаруубзнаад̇и вивид̇харуубзна, анзгавид̇хасабхаавзнаад̇и ад̇т̇о. д̇з хи руубаад̣̇ивасзна жид̇раа, нийлаад̣̇ивасзна вивид̇харуубаа. звам̣ д̇зна вируубаруубзна д̇ат̇аа д̇ат̇аа ассаад̣̇ам̣ д̣̇ассзд̇ваа мат̇знд̇и жид̇д̇ам̣ баб̣б̣аж̇ж̇ааяа абхирамид̇ум̣ на д̣̇знд̇ийд̇и иминаа аббассаад̣̇аб̣ахуд̣̇угкад̇аад̣̇инаа аад̣̇ийнавам̣ гаамаг̇ун̣зсу д̣̇исваа д̇асмаа д̇ам̣нимид̇д̇ам̣ ахам̣ баб̣б̣аж̇ид̇о амхи. д̣̇умабпалаани баггагаалз абарибаггагаалз жа яад̇т̇а гад̇т̇ажи баруубаггамад̇о сарасад̇о ваа бад̇анд̇и, звам̣ сад̇д̇аа д̣̇ахараа жа вуд̣дхаа жа сарийрасса бхзд̣̇аа бад̇анд̇иязва. зд̇амби д̣̇исваад̇и звам̣ анижжад̇амби бан̃н̃аажагкунаа д̣̇исваа, на гзвалам̣ аббассаад̣̇ад̇аад̣̇ид̇ааяа аад̣̇ийнавамзваад̇и ад̇хиббааяо. абан̣н̣аганд̇и авирад̣̇д̇ханагам̣ сааман̃н̃амзва саман̣абхаавова сзяяо уд̇д̇арид̇аро.

Evametāhi ekādasahi gāthāhi yathārahaṃ cattāro dhammuddese pakāsetvā idāni kāmesu saṃsāre ca ādīnavaṃ disvā saddhāya attano pabbajitabhāvaṃ pabbajitakiccassa ca matthakappattiṃ vibhāvento ‘‘kāmā hī’’tiādimāha. Tattha kāmāti vatthukāmā manāpiyā rūpādayo dhammā, kilesakāmā sabbepi rāgappabhedā. Idha pana vatthukāmā veditabbā. Te hi rūpādivasena anekappakāratāya citrā. Lokassādavasena iṭṭhākāratāya madhurā. Bālaputhujjanānaṃ manaṃ ramentīti manoramā. Virūparūpenāti vividharūpena, anekavidhasabhāvenāti attho. Te hi rūpādivasena citrā, nīlādivasena vividharūpā. Evaṃ tena virūparūpena tathā tathā assādaṃ dassetvā mathenti cittaṃ pabbajjāya abhiramituṃ na dentīti iminā appassādabahudukkhatādinā ādīnavaṃ kāmaguṇesu disvā tasmā taṃnimittaṃ ahaṃ pabbajito amhi. Dumapphalāni pakkakāle aparipakkakāle ca yattha katthaci parūpakkamato sarasato vā patanti, evaṃ sattā daharā ca vuḍḍhā ca sarīrassa bhedā patantiyeva. Etampi disvāti evaṃ aniccatampi paññācakkhunā disvā, na kevalaṃ appassādatāditāya ādīnavamevāti adhippāyo. Apaṇṇakanti aviraddhanakaṃ sāmaññameva samaṇabhāvova seyyo uttaritaro.

сад̣̇д̇хааяаад̇и гаммам̣ гаммапалам̣ б̣уд̣̇д̇хасуб̣уд̣̇д̇хад̇ам̣ д̇хаммасуд̇хаммад̇ам̣ сан̇гхасуббадибад̇д̇ин̃жа сад̣̇д̣̇ахид̇ваа. убзд̇о ж̇инасаасанзд̇и сад̇т̇у саасанз саммаабадибад̇д̇им̣ убаг̇ад̇о. аван̃жхаа маяхам̣ баб̣б̣аж̇ж̇аа арахад̇д̇асса ад̇хиг̇ад̇ад̇д̇аа. д̇ад̇о зва анан̣о бхун̃ж̇аами бхож̇анам̣ ниггилзсавасзна саамибхаавад̇о саамибарибхог̇зна барибхун̃ж̇анад̇о.

Saddhāyāti kammaṃ kammaphalaṃ buddhasubuddhataṃ dhammasudhammataṃ saṅghasuppaṭipattiñca saddahitvā. Upetojinasāsaneti satthu sāsane sammāpaṭipattiṃ upagato. Avañjhā mayhaṃ pabbajjā arahattassa adhigatattā. Tato eva anaṇo bhuñjāmi bhojanaṃ nikkilesavasena sāmibhāvato sāmiparibhogena paribhuñjanato.

гаамз аад̣̇ид̇д̇ад̇о д̣̇исваад̇и вад̇т̇угаамз гилзсагаамз жа згаад̣̇асахи аг̇г̇ийхи аад̣̇ид̇д̇абхаавад̇о д̣̇исваа. ж̇аад̇аруубаани сад̇т̇ад̇од̇и гад̇аагад̇аббабхзд̣̇аа саб̣б̣асуван̣н̣авигад̇ияо анад̇т̇аавахад̇ааяа нисид̇асад̇т̇ад̇о. г̇аб̣бхавогганд̇ид̇о д̣̇угканд̇и г̇аб̣бхавогганд̇ид̇о бадтааяа саб̣б̣асам̣саарабавад̇д̇ид̣̇угкам̣. нираязсу махаб̣бхаяанд̇и сауссад̣̇зсу адтасу махаанираязсу лаб̣бхамаанам̣ махаабхаяан̃жа саб̣б̣ад̇т̇а д̣̇исваад̇и яож̇анаа.

Kāme ādittato disvāti vatthukāme kilesakāme ca ekādasahi aggīhi ādittabhāvato disvā. Jātarūpāni satthatoti katākatappabhedā sabbasuvaṇṇavikatiyo anatthāvahatāya nisitasatthato. Gabbhavokkantito dukkhanti gabbhavokkantito paṭṭhāya sabbasaṃsārapavattidukkhaṃ. Nirayesu mahabbhayanti saussadesu aṭṭhasu mahānirayesu labbhamānaṃ mahābhayañca sabbattha disvāti yojanā.

зд̇амаад̣̇ийнавам̣ н̃ад̇ваад̇и зд̇ам̣ гаамаанам̣ аад̣̇ид̇д̇ад̇аад̣̇им̣ сам̣саарз аад̣̇ийнавам̣ д̣̇осам̣ н̃ад̇ваа. сам̣взг̇ам̣ алабхим̣ д̇ад̣̇аад̇и д̇асмим̣ сад̇т̇у санд̇игз д̇хаммасса суд̇агаалз бхаваад̣̇игз сам̣взг̇ам̣ алад̇т̇ам̣. вид̣̇д̇хо д̇ад̣̇аа санд̇од̇и д̇асмим̣ г̇ахадтагаалз рааг̇асаллаад̣̇ийхи вид̣̇д̇хо самаано ид̣̇аани сад̇т̇у саасанам̣ ааг̇амма самбад̇д̇о аасавагкаяам̣, вид̣̇д̇хо ваа жад̇д̇аари сажжаани, бадивид̣̇д̇ход̇и ад̇т̇о. сзсам̣ анд̇аранд̇араад̣̇ийсу вуд̇д̇ад̇д̇аа сувин̃н̃зяяамзва.

Etamādīnavaṃ ñatvāti etaṃ kāmānaṃ ādittatādiṃ saṃsāre ādīnavaṃ dosaṃ ñatvā. Saṃvegaṃ alabhiṃ tadāti tasmiṃ satthu santike dhammassa sutakāle bhavādike saṃvegaṃ alatthaṃ. Viddho tadā santoti tasmiṃ gahaṭṭhakāle rāgasallādīhi viddho samāno idāni satthu sāsanaṃ āgamma sampatto āsavakkhayaṃ, viddho vā cattāri saccāni, paṭividdhoti attho. Sesaṃ antarantarādīsu vuttattā suviññeyyameva.

звам̣ т̇зро ран̃н̃о гораб̣яасса д̇хаммам̣ д̣̇зсзд̇ваа сад̇т̇у санд̇игамзва г̇ад̇о. сад̇т̇аа жа абарабхааг̇з арияаг̇ан̣амаж̇жхз нисинно т̇зрам̣ сад̣̇д̇хаабаб̣б̣аж̇ид̇аанам̣ аг̇г̇адтаанз табзсийд̇и.

Evaṃ thero rañño korabyassa dhammaṃ desetvā satthu santikameva gato. Satthā ca aparabhāge ariyagaṇamajjhe nisinno theraṃ saddhāpabbajitānaṃ aggaṭṭhāne ṭhapesīti.

радтабаалад̇т̇зраг̇аат̇ааван̣н̣анаа нидтид̇аа.

Raṭṭhapālattheragāthāvaṇṇanā niṭṭhitā.

Next: 5. маалугяабуд̇д̇ад̇т̇зраг̇аат̇ааван̣н̣анаа • 5. Mālukyaputtattheragāthāvaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 4. радтабаалад̇т̇зраг̇аат̇аа • 4. Raṭṭhapālattheragāthā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact