| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. ரத்திபுப்பி²யத்தே²ரஅபதா³னவண்ணனா
3. Rattipupphiyattheraapadānavaṇṇanā
மிக³லுத்³தோ³ புரே ஆஸிந்திஆதி³கங் ஆயஸ்மதோ ரத்திபுப்பி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே நேஸாத³குலே உப்பன்னோ மிக³வதா⁴ய அரஞ்ஞே விசரமானோ தஸ்ஸ காருஞ்ஞேன அரஞ்ஞே சரமானங் விபஸ்ஸிங் ப⁴க³வந்தங் தி³ஸ்வா பஸன்னமானஸோ புப்பி²தங் ரத்திகங் நாம புப்ப²ங் குடஜபுப்ப²ஞ்ச ஸஹ வண்டேன ஓசினித்வா ஸோமனஸ்ஸசித்தேன பூஜேஸி. ப⁴க³வா அனுமோத³னங் கத்வா பக்காமி.
Migaluddopure āsintiādikaṃ āyasmato rattipupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle nesādakule uppanno migavadhāya araññe vicaramāno tassa kāruññena araññe caramānaṃ vipassiṃ bhagavantaṃ disvā pasannamānaso pupphitaṃ rattikaṃ nāma pupphaṃ kuṭajapupphañca saha vaṇṭena ocinitvā somanassacittena pūjesi. Bhagavā anumodanaṃ katvā pakkāmi.
13. ஸோ தேனேவ புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ரதனத்தயே பஸன்னோ ஸத்து² த⁴ம்மதே³ஸனங் ஸுத்வா காமேஸு ஆதீ³னவங் தி³ஸ்வா பப்³ப³ஜித்வா நசிரஸ்ஸேவ அரஹத்தங் பத்தோ அத்தனோ புப்³ப³கம்மங் ஸரித்வா ‘‘நேஸாத³பூ⁴தேன மயா கதகுஸலங் ஸுந்த³ர’’ந்தி ஸோமனஸ்ஸஜாதோ புப்³ப³சரிதாபதா³னங் பகாஸெந்தோ மிக³லுத்³தோ³ புரே ஆஸிந்திஆதி³மாஹ. தத்த² மிகா³னங் லுத்³தோ³ ஸாஹஸிகோ மாரகோதி மிக³லுத்³தோ³, மிகே³ஸு வா லுத்³தோ³ லோபீ⁴தி மிக³லுத்³தோ³, நேஸாதோ³ ஆஸிங் புரேதி அத்தோ².
13. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto viññutaṃ patto ratanattaye pasanno satthu dhammadesanaṃ sutvā kāmesu ādīnavaṃ disvā pabbajitvā nacirasseva arahattaṃ patto attano pubbakammaṃ saritvā ‘‘nesādabhūtena mayā katakusalaṃ sundara’’nti somanassajāto pubbacaritāpadānaṃ pakāsento migaluddo pure āsintiādimāha. Tattha migānaṃ luddo sāhasiko mārakoti migaluddo, migesu vā luddo lobhīti migaluddo, nesādo āsiṃ pureti attho.
14. ரத்திகங் புப்பி²தங் தி³ஸ்வாதி பது³மபுப்பா²தீ³னி அனேகானி புப்பா²னி ஸூரியரங்ஸிஸம்ப²ஸ்ஸேன தி³வா புப்ப²ந்தி ரத்தியங் மகுளிதானி ஹொந்தி. ஜாதிஸுமனமல்லிகாதீ³னி அனேகானி புப்பா²னி பன ரத்தியங் புப்ப²ந்தி நோ தி³வா. தஸ்மா ரத்தியங் புப்ப²னதோ ரத்திபுப்ப²னாமகானி அனேகானி ஸுக³ந்த⁴புப்பா²னி ச குடஜபுப்பா²னி ச க³ஹெத்வா பூஜேஸிந்தி அத்தோ². ஸேஸங் உத்தானத்த²மேவாதி.
14.Rattikaṃ pupphitaṃ disvāti padumapupphādīni anekāni pupphāni sūriyaraṃsisamphassena divā pupphanti rattiyaṃ makuḷitāni honti. Jātisumanamallikādīni anekāni pupphāni pana rattiyaṃ pupphanti no divā. Tasmā rattiyaṃ pupphanato rattipupphanāmakāni anekāni sugandhapupphāni ca kuṭajapupphāni ca gahetvā pūjesinti attho. Sesaṃ uttānatthamevāti.
ரத்திபுப்பி²யத்தே²ரஅபதா³னவண்ணனா ஸமத்தா.
Rattipupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. ரத்திபுப்பி²யத்தே²ரஅபதா³னங் • 3. Rattipupphiyattheraapadānaṃ
