| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. রত্তিপুপ্ফিযত্থেরঅপদানৰণ্ণনা
3. Rattipupphiyattheraapadānavaṇṇanā
মিগলুদ্দো পুরে আসিন্তিআদিকং আযস্মতো রত্তিপুপ্ফিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে নেসাদকুলে উপ্পন্নো মিগৰধায অরঞ্ঞে ৰিচরমানো তস্স কারুঞ্ঞেন অরঞ্ঞে চরমানং ৰিপস্সিং ভগৰন্তং দিস্ৰা পসন্নমানসো পুপ্ফিতং রত্তিকং নাম পুপ্ফং কুটজপুপ্ফঞ্চ সহ ৰণ্টেন ওচিনিত্ৰা সোমনস্সচিত্তেন পূজেসি। ভগৰা অনুমোদনং কত্ৰা পক্কামি।
Migaluddopure āsintiādikaṃ āyasmato rattipupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle nesādakule uppanno migavadhāya araññe vicaramāno tassa kāruññena araññe caramānaṃ vipassiṃ bhagavantaṃ disvā pasannamānaso pupphitaṃ rattikaṃ nāma pupphaṃ kuṭajapupphañca saha vaṇṭena ocinitvā somanassacittena pūjesi. Bhagavā anumodanaṃ katvā pakkāmi.
১৩. সো তেনেৰ পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো রতনত্তযে পসন্নো সত্থু ধম্মদেসনং সুত্ৰা কামেসু আদীনৰং দিস্ৰা পব্বজিত্ৰা নচিরস্সেৰ অরহত্তং পত্তো অত্তনো পুব্বকম্মং সরিত্ৰা ‘‘নেসাদভূতেন মযা কতকুসলং সুন্দর’’ন্তি সোমনস্সজাতো পুব্বচরিতাপদানং পকাসেন্তো মিগলুদ্দো পুরে আসিন্তিআদিমাহ। তত্থ মিগানং লুদ্দো সাহসিকো মারকোতি মিগলুদ্দো, মিগেসু ৰা লুদ্দো লোভীতি মিগলুদ্দো, নেসাদো আসিং পুরেতি অত্থো।
13. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto viññutaṃ patto ratanattaye pasanno satthu dhammadesanaṃ sutvā kāmesu ādīnavaṃ disvā pabbajitvā nacirasseva arahattaṃ patto attano pubbakammaṃ saritvā ‘‘nesādabhūtena mayā katakusalaṃ sundara’’nti somanassajāto pubbacaritāpadānaṃ pakāsento migaluddo pure āsintiādimāha. Tattha migānaṃ luddo sāhasiko mārakoti migaluddo, migesu vā luddo lobhīti migaluddo, nesādo āsiṃ pureti attho.
১৪. রত্তিকং পুপ্ফিতং দিস্ৰাতি পদুমপুপ্ফাদীনি অনেকানি পুপ্ফানি সূরিযরংসিসম্ফস্সেন দিৰা পুপ্ফন্তি রত্তিযং মকুল়িতানি হোন্তি। জাতিসুমনমল্লিকাদীনি অনেকানি পুপ্ফানি পন রত্তিযং পুপ্ফন্তি নো দিৰা। তস্মা রত্তিযং পুপ্ফনতো রত্তিপুপ্ফনামকানি অনেকানি সুগন্ধপুপ্ফানি চ কুটজপুপ্ফানি চ গহেত্ৰা পূজেসিন্তি অত্থো। সেসং উত্তানত্থমেৰাতি।
14.Rattikaṃ pupphitaṃ disvāti padumapupphādīni anekāni pupphāni sūriyaraṃsisamphassena divā pupphanti rattiyaṃ makuḷitāni honti. Jātisumanamallikādīni anekāni pupphāni pana rattiyaṃ pupphanti no divā. Tasmā rattiyaṃ pupphanato rattipupphanāmakāni anekāni sugandhapupphāni ca kuṭajapupphāni ca gahetvā pūjesinti attho. Sesaṃ uttānatthamevāti.
রত্তিপুপ্ফিযত্থেরঅপদানৰণ্ণনা সমত্তা।
Rattipupphiyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. রত্তিপুপ্ফিযত্থেরঅপদানং • 3. Rattipupphiyattheraapadānaṃ
