| Library / Tipiṭaka / ติปิฎก • Tipiṭaka / พุทฺธวํสปาฬิ • Buddhavaṃsapāḷi |
๗. เรวตพุทฺธวํโส
7. Revatabuddhavaṃso
๑.
1.
สุมนสฺส อปเรน, เรวโต นาม นายโก;
Sumanassa aparena, revato nāma nāyako;
อนูปโม อสทิโส, อตุโล อุตฺตโม ชิโนฯ
Anūpamo asadiso, atulo uttamo jino.
๒.
2.
โสปิ ธมฺมํ ปกาเสสิ, พฺรหฺมุนา อภิยาจิโต;
Sopi dhammaṃ pakāsesi, brahmunā abhiyācito;
ขนฺธธาตุววตฺถานํ, อปฺปวตฺตํ ภวาภเวฯ
Khandhadhātuvavatthānaṃ, appavattaṃ bhavābhave.
๓.
3.
ตสฺสาภิสมยา ตีณิ, อเหสุํ ธมฺมเทสเน;
Tassābhisamayā tīṇi, ahesuṃ dhammadesane;
คณนาย น วตฺตโพฺพ, ปฐมาภิสมโย อหุฯ
Gaṇanāya na vattabbo, paṭhamābhisamayo ahu.
๔.
4.
ตทา โกฎิสหสฺสานํ, ทุติยาภิสมโย อหุฯ
Tadā koṭisahassānaṃ, dutiyābhisamayo ahu.
๕.
5.
สตฺตาหํ ปฎิสลฺลานา, วุฎฺฐหิตฺวา นราสโภ;
Sattāhaṃ paṭisallānā, vuṭṭhahitvā narāsabho;
โกฎิสตํ นรมรูนํ, วิเนสิ อุตฺตเม ผเลฯ
Koṭisataṃ naramarūnaṃ, vinesi uttame phale.
๖.
6.
สนฺนิปาตา ตโย อาสุํ, เรวตสฺส มเหสิโน;
Sannipātā tayo āsuṃ, revatassa mahesino;
ขีณาสวานํ วิมลานํ, สุวิมุตฺตาน ตาทินํฯ
Khīṇāsavānaṃ vimalānaṃ, suvimuttāna tādinaṃ.
๗.
7.
อติกฺกนฺตา คณนปถํ, ปฐมํ เย สมาคตา;
Atikkantā gaṇanapathaṃ, paṭhamaṃ ye samāgatā;
โกฎิสตสหสฺสานํ, ทุติโย อาสิ สมาคโมฯ
Koṭisatasahassānaṃ, dutiyo āsi samāgamo.
๘.
8.
โส ตทา พฺยาธิโต อาสิ, ปโตฺต ชีวิตสํสยํฯ
So tadā byādhito āsi, patto jīvitasaṃsayaṃ.
๙.
9.
ตสฺส คิลานปุจฺฉาย, เย ตทา อุปคตา มุนี;
Tassa gilānapucchāya, ye tadā upagatā munī;
โกฎิสหสฺสา อรหโนฺต, ตติโย อาสิ สมาคโมฯ
Koṭisahassā arahanto, tatiyo āsi samāgamo.
๑๐.
10.
อหํ เตน สมเยน, อติเทโว นาม พฺราหฺมโณ;
Ahaṃ tena samayena, atidevo nāma brāhmaṇo;
อุปคนฺตฺวา เรวตํ พุทฺธํ, สรณํ ตสฺส คญฺฉหํฯ
Upagantvā revataṃ buddhaṃ, saraṇaṃ tassa gañchahaṃ.
๑๑.
11.
ตสฺส สีลํ สมาธิญฺจ, ปญฺญาคุณมนุตฺตมํ;
Tassa sīlaṃ samādhiñca, paññāguṇamanuttamaṃ;
โถมยิตฺวา ยถาถามํ, อุตฺตรียมทาสหํฯ
Thomayitvā yathāthāmaṃ, uttarīyamadāsahaṃ.
๑๒.
12.
โสปิ มํ พุโทฺธ พฺยากาสิ, เรวโต โลกนายโก;
Sopi maṃ buddho byākāsi, revato lokanāyako;
‘‘อปริเมยฺยิโต กเปฺป, อยํ พุโทฺธ ภวิสฺสติฯ
‘‘Aparimeyyito kappe, ayaṃ buddho bhavissati.
๑๓.
13.
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
‘‘Padhānaṃ padahitvāna…pe… hessāma sammukhā imaṃ’’.
๑๔.
14.
ตสฺสาปิ วจนํ สุตฺวา, ภิโยฺย จิตฺตํ ปสาทยิํ;
Tassāpi vacanaṃ sutvā, bhiyyo cittaṃ pasādayiṃ;
อุตฺตริํ วตมธิฎฺฐาสิํ, ทสปารมิปูริยาฯ
Uttariṃ vatamadhiṭṭhāsiṃ, dasapāramipūriyā.
๑๕.
15.
ตทาปิ ตํ พุทฺธธมฺมํ, สริตฺวา อนุพฺรูหยิํ;
Tadāpi taṃ buddhadhammaṃ, saritvā anubrūhayiṃ;
อาหริสฺสามิ ตํ ธมฺมํ, ยํ มยฺหํ อภิปตฺถิตํฯ
Āharissāmi taṃ dhammaṃ, yaṃ mayhaṃ abhipatthitaṃ.
๑๖.
16.
วิปุลา นาม ชนิกา, เรวตสฺส มเหสิโนฯ
Vipulā nāma janikā, revatassa mahesino.
๑๗.
17.
สุทสฺสโน รตนคฺฆิ, อาเวโฬ จ วิภูสิโต;
Sudassano ratanagghi, āveḷo ca vibhūsito;
ปุญฺญกมฺมาภินิพฺพตฺตา, ตโย ปาสาทมุตฺตมาฯ
Puññakammābhinibbattā, tayo pāsādamuttamā.
๑๘.
18.
เตตฺติํส จ สหสฺสานิ, นาริโย สมลงฺกตา;
Tettiṃsa ca sahassāni, nāriyo samalaṅkatā;
สุทสฺสนา นาม นารี, วรุโณ นาม อตฺรโชฯ
Sudassanā nāma nārī, varuṇo nāma atrajo.
๑๙.
19.
นิมิเตฺต จตุโร ทิสฺวา, รถยาเนน นิกฺขมิ;
Nimitte caturo disvā, rathayānena nikkhami;
อนูนสตฺตมาสานิ, ปธานํ ปทหี ชิโนฯ
Anūnasattamāsāni, padhānaṃ padahī jino.
๒๐.
20.
พฺรหฺมุนา ยาจิโต สโนฺต, เรวโต โลกนายโก;
Brahmunā yācito santo, revato lokanāyako;
วตฺติ จกฺกํ มหาวีโร, วรุณาราเม สิรีฆเรฯ
Vatti cakkaṃ mahāvīro, varuṇārāme sirīghare.
๒๑.
21.
วรุโณ พฺรหฺมเทโว จ, อเหสุํ อคฺคสาวกา;
Varuṇo brahmadevo ca, ahesuṃ aggasāvakā;
สมฺภโว นามุปฎฺฐาโก, เรวตสฺส มเหสิโนฯ
Sambhavo nāmupaṭṭhāko, revatassa mahesino.
๒๒.
22.
ภทฺทา เจว สุภทฺทา จ, อเหสุํ อคฺคสาวิกา;
Bhaddā ceva subhaddā ca, ahesuṃ aggasāvikā;
โสปิ พุโทฺธ อสมสโม, นาคมูเล อพุชฺฌถฯ
Sopi buddho asamasamo, nāgamūle abujjhatha.
๒๓.
23.
ปทุโม กุญฺชโร เจว, อเหสุํ อคฺคุปฎฺฐิกา;
Padumo kuñjaro ceva, ahesuṃ aggupaṭṭhikā;
สิรีมา เจว ยสวตี, อเหสุํ อคฺคุปฎฺฐิกาฯ
Sirīmā ceva yasavatī, ahesuṃ aggupaṭṭhikā.
๒๔.
24.
อุจฺจตฺตเนน โส พุโทฺธ, อสีติหตฺถมุคฺคโต;
Uccattanena so buddho, asītihatthamuggato;
โอภาเสติ ทิสา สพฺพา, อินฺทเกตุว อุคฺคโตฯ
Obhāseti disā sabbā, indaketuva uggato.
๒๕.
25.
ตสฺส สรีเร นิพฺพตฺตา, ปภามาลา อนุตฺตรา;
Tassa sarīre nibbattā, pabhāmālā anuttarā;
ทิวา วา ยทิ วา รตฺติํ, สมนฺตา ผรติ โยชนํฯ
Divā vā yadi vā rattiṃ, samantā pharati yojanaṃ.
๒๖.
26.
สฎฺฐิวสฺสสหสฺสานิ, อายุ วิชฺชติ ตาวเท;
Saṭṭhivassasahassāni, āyu vijjati tāvade;
ตาวตา ติฎฺฐมาโน โส, ตาเรสิ ชนตํ พหุํฯ
Tāvatā tiṭṭhamāno so, tāresi janataṃ bahuṃ.
๒๗.
27.
ทสฺสยิตฺวา พุทฺธพลํ, อมตํ โลเก ปกาสยํ;
Dassayitvā buddhabalaṃ, amataṃ loke pakāsayaṃ;
นิพฺพายิ อนุปาทาโน, ยถคฺคุปาทานสงฺขยาฯ
Nibbāyi anupādāno, yathaggupādānasaṅkhayā.
๒๘.
28.
โส จ กาโย รตนนิโภ, โส จ ธโมฺม อสาทิโส;
So ca kāyo ratananibho, so ca dhammo asādiso;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
Sabbaṃ tamantarahitaṃ, nanu rittā sabbasaṅkhārā.
๒๙.
29.
เรวโต ยสธโร พุโทฺธ, นิพฺพุโต โส มหาปุเร;
Revato yasadharo buddho, nibbuto so mahāpure;
ธาตุวิตฺถาริกํ อาสิ, เตสุ เตสุ ปเทสโตติฯ
Dhātuvitthārikaṃ āsi, tesu tesu padesatoti.
เรวตสฺส ภควโต วํโส ปญฺจโมฯ
Revatassa bhagavato vaṃso pañcamo.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / พุทฺธวํส-อฎฺฐกถา • Buddhavaṃsa-aṭṭhakathā / ๗. เรวตพุทฺธวํสวณฺณนา • 7. Revatabuddhavaṃsavaṇṇanā
