| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
៧. រេវតពុទ្ធវំសោ
7. Revatabuddhavaṃso
១.
1.
សុមនស្ស អបរេន, រេវតោ នាម នាយកោ;
Sumanassa aparena, revato nāma nāyako;
អនូបមោ អសទិសោ, អតុលោ ឧត្តមោ ជិនោ។
Anūpamo asadiso, atulo uttamo jino.
២.
2.
សោបិ ធម្មំ បកាសេសិ, ព្រហ្មុនា អភិយាចិតោ;
Sopi dhammaṃ pakāsesi, brahmunā abhiyācito;
ខន្ធធាតុវវត្ថានំ, អប្បវត្តំ ភវាភវេ។
Khandhadhātuvavatthānaṃ, appavattaṃ bhavābhave.
៣.
3.
តស្សាភិសមយា តីណិ, អហេសុំ ធម្មទេសនេ;
Tassābhisamayā tīṇi, ahesuṃ dhammadesane;
គណនាយ ន វត្តព្ពោ, បឋមាភិសមយោ អហុ។
Gaṇanāya na vattabbo, paṭhamābhisamayo ahu.
៤.
4.
តទា កោដិសហស្សានំ, ទុតិយាភិសមយោ អហុ។
Tadā koṭisahassānaṃ, dutiyābhisamayo ahu.
៥.
5.
សត្តាហំ បដិសល្លានា, វុដ្ឋហិត្វា នរាសភោ;
Sattāhaṃ paṭisallānā, vuṭṭhahitvā narāsabho;
កោដិសតំ នរមរូនំ, វិនេសិ ឧត្តមេ ផលេ។
Koṭisataṃ naramarūnaṃ, vinesi uttame phale.
៦.
6.
សន្និបាតា តយោ អាសុំ, រេវតស្ស មហេសិនោ;
Sannipātā tayo āsuṃ, revatassa mahesino;
ខីណាសវានំ វិមលានំ, សុវិមុត្តាន តាទិនំ។
Khīṇāsavānaṃ vimalānaṃ, suvimuttāna tādinaṃ.
៧.
7.
អតិក្កន្តា គណនបថំ, បឋមំ យេ សមាគតា;
Atikkantā gaṇanapathaṃ, paṭhamaṃ ye samāgatā;
កោដិសតសហស្សានំ, ទុតិយោ អាសិ សមាគមោ។
Koṭisatasahassānaṃ, dutiyo āsi samāgamo.
៨.
8.
សោ តទា ព្យាធិតោ អាសិ, បត្តោ ជីវិតសំសយំ។
So tadā byādhito āsi, patto jīvitasaṃsayaṃ.
៩.
9.
តស្ស គិលានបុច្ឆាយ, យេ តទា ឧបគតា មុនី;
Tassa gilānapucchāya, ye tadā upagatā munī;
កោដិសហស្សា អរហន្តោ, តតិយោ អាសិ សមាគមោ។
Koṭisahassā arahanto, tatiyo āsi samāgamo.
១០.
10.
អហំ តេន សមយេន, អតិទេវោ នាម ព្រាហ្មណោ;
Ahaṃ tena samayena, atidevo nāma brāhmaṇo;
ឧបគន្ត្វា រេវតំ ពុទ្ធំ, សរណំ តស្ស គញ្ឆហំ។
Upagantvā revataṃ buddhaṃ, saraṇaṃ tassa gañchahaṃ.
១១.
11.
តស្ស សីលំ សមាធិញ្ច, បញ្ញាគុណមនុត្តមំ;
Tassa sīlaṃ samādhiñca, paññāguṇamanuttamaṃ;
ថោមយិត្វា យថាថាមំ, ឧត្តរីយមទាសហំ។
Thomayitvā yathāthāmaṃ, uttarīyamadāsahaṃ.
១២.
12.
សោបិ មំ ពុទ្ធោ ព្យាកាសិ, រេវតោ លោកនាយកោ;
Sopi maṃ buddho byākāsi, revato lokanāyako;
‘‘អបរិមេយ្យិតោ កប្បេ, អយំ ពុទ្ធោ ភវិស្សតិ។
‘‘Aparimeyyito kappe, ayaṃ buddho bhavissati.
១៣.
13.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៤.
14.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៥.
15.
តទាបិ តំ ពុទ្ធធម្មំ, សរិត្វា អនុព្រូហយិំ;
Tadāpi taṃ buddhadhammaṃ, saritvā anubrūhayiṃ;
អាហរិស្សាមិ តំ ធម្មំ, យំ មយ្ហំ អភិបត្ថិតំ។
Āharissāmi taṃ dhammaṃ, yaṃ mayhaṃ abhipatthitaṃ.
១៦.
16.
វិបុលា នាម ជនិកា, រេវតស្ស មហេសិនោ។
Vipulā nāma janikā, revatassa mahesino.
១៧.
17.
សុទស្សនោ រតនគ្ឃិ, អាវេឡោ ច វិភូសិតោ;
Sudassano ratanagghi, āveḷo ca vibhūsito;
បុញ្ញកម្មាភិនិព្ពត្តា, តយោ បាសាទមុត្តមា។
Puññakammābhinibbattā, tayo pāsādamuttamā.
១៨.
18.
តេត្តិំស ច សហស្សានិ, នារិយោ សមលង្កតា;
Tettiṃsa ca sahassāni, nāriyo samalaṅkatā;
សុទស្សនា នាម នារី, វរុណោ នាម អត្រជោ។
Sudassanā nāma nārī, varuṇo nāma atrajo.
១៩.
19.
និមិត្តេ ចតុរោ ទិស្វា, រថយានេន និក្ខមិ;
Nimitte caturo disvā, rathayānena nikkhami;
អនូនសត្តមាសានិ, បធានំ បទហី ជិនោ។
Anūnasattamāsāni, padhānaṃ padahī jino.
២០.
20.
ព្រហ្មុនា យាចិតោ សន្តោ, រេវតោ លោកនាយកោ;
Brahmunā yācito santo, revato lokanāyako;
វត្តិ ចក្កំ មហាវីរោ, វរុណារាមេ សិរីឃរេ។
Vatti cakkaṃ mahāvīro, varuṇārāme sirīghare.
២១.
21.
វរុណោ ព្រហ្មទេវោ ច, អហេសុំ អគ្គសាវកា;
Varuṇo brahmadevo ca, ahesuṃ aggasāvakā;
សម្ភវោ នាមុបដ្ឋាកោ, រេវតស្ស មហេសិនោ។
Sambhavo nāmupaṭṭhāko, revatassa mahesino.
២២.
22.
ភទ្ទា ចេវ សុភទ្ទា ច, អហេសុំ អគ្គសាវិកា;
Bhaddā ceva subhaddā ca, ahesuṃ aggasāvikā;
សោបិ ពុទ្ធោ អសមសមោ, នាគមូលេ អពុជ្ឈថ។
Sopi buddho asamasamo, nāgamūle abujjhatha.
២៣.
23.
បទុមោ កុញ្ជរោ ចេវ, អហេសុំ អគ្គុបដ្ឋិកា;
Padumo kuñjaro ceva, ahesuṃ aggupaṭṭhikā;
សិរីមា ចេវ យសវតី, អហេសុំ អគ្គុបដ្ឋិកា។
Sirīmā ceva yasavatī, ahesuṃ aggupaṭṭhikā.
២៤.
24.
ឧច្ចត្តនេន សោ ពុទ្ធោ, អសីតិហត្ថមុគ្គតោ;
Uccattanena so buddho, asītihatthamuggato;
ឱភាសេតិ ទិសា សព្ពា, ឥន្ទកេតុវ ឧគ្គតោ។
Obhāseti disā sabbā, indaketuva uggato.
២៥.
25.
តស្ស សរីរេ និព្ពត្តា, បភាមាលា អនុត្តរា;
Tassa sarīre nibbattā, pabhāmālā anuttarā;
ទិវា វា យទិ វា រត្តិំ, សមន្តា ផរតិ យោជនំ។
Divā vā yadi vā rattiṃ, samantā pharati yojanaṃ.
២៦.
26.
សដ្ឋិវស្សសហស្សានិ, អាយុ វិជ្ជតិ តាវទេ;
Saṭṭhivassasahassāni, āyu vijjati tāvade;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៧.
27.
ទស្សយិត្វា ពុទ្ធពលំ, អមតំ លោកេ បកាសយំ;
Dassayitvā buddhabalaṃ, amataṃ loke pakāsayaṃ;
និព្ពាយិ អនុបាទានោ, យថគ្គុបាទានសង្ខយា។
Nibbāyi anupādāno, yathaggupādānasaṅkhayā.
២៨.
28.
សោ ច កាយោ រតននិភោ, សោ ច ធម្មោ អសាទិសោ;
So ca kāyo ratananibho, so ca dhammo asādiso;
សព្ពំ តមន្តរហិតំ, ននុ រិត្តា សព្ពសង្ខារា។
Sabbaṃ tamantarahitaṃ, nanu rittā sabbasaṅkhārā.
២៩.
29.
រេវតោ យសធរោ ពុទ្ធោ, និព្ពុតោ សោ មហាបុរេ;
Revato yasadharo buddho, nibbuto so mahāpure;
ធាតុវិត្ថារិកំ អាសិ, តេសុ តេសុ បទេសតោតិ។
Dhātuvitthārikaṃ āsi, tesu tesu padesatoti.
រេវតស្ស ភគវតោ វំសោ បញ្ចមោ។
Revatassa bhagavato vaṃso pañcamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ៧. រេវតពុទ្ធវំសវណ្ណនា • 7. Revatabuddhavaṃsavaṇṇanā
