| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೭. ರೇವತಬುದ್ಧವಂಸೋ
7. Revatabuddhavaṃso
೧.
1.
ಸುಮನಸ್ಸ ಅಪರೇನ, ರೇವತೋ ನಾಮ ನಾಯಕೋ।
Sumanassa aparena, revato nāma nāyako;
ಅನೂಪಮೋ ಅಸದಿಸೋ, ಅತುಲೋ ಉತ್ತಮೋ ಜಿನೋ॥
Anūpamo asadiso, atulo uttamo jino.
೨.
2.
ಸೋಪಿ ಧಮ್ಮಂ ಪಕಾಸೇಸಿ, ಬ್ರಹ್ಮುನಾ ಅಭಿಯಾಚಿತೋ।
Sopi dhammaṃ pakāsesi, brahmunā abhiyācito;
ಖನ್ಧಧಾತುವವತ್ಥಾನಂ, ಅಪ್ಪವತ್ತಂ ಭವಾಭವೇ॥
Khandhadhātuvavatthānaṃ, appavattaṃ bhavābhave.
೩.
3.
ತಸ್ಸಾಭಿಸಮಯಾ ತೀಣಿ, ಅಹೇಸುಂ ಧಮ್ಮದೇಸನೇ।
Tassābhisamayā tīṇi, ahesuṃ dhammadesane;
ಗಣನಾಯ ನ ವತ್ತಬ್ಬೋ, ಪಠಮಾಭಿಸಮಯೋ ಅಹು॥
Gaṇanāya na vattabbo, paṭhamābhisamayo ahu.
೪.
4.
ತದಾ ಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Tadā koṭisahassānaṃ, dutiyābhisamayo ahu.
೫.
5.
ಸತ್ತಾಹಂ ಪಟಿಸಲ್ಲಾನಾ, ವುಟ್ಠಹಿತ್ವಾ ನರಾಸಭೋ।
Sattāhaṃ paṭisallānā, vuṭṭhahitvā narāsabho;
ಕೋಟಿಸತಂ ನರಮರೂನಂ, ವಿನೇಸಿ ಉತ್ತಮೇ ಫಲೇ॥
Koṭisataṃ naramarūnaṃ, vinesi uttame phale.
೬.
6.
ಸನ್ನಿಪಾತಾ ತಯೋ ಆಸುಂ, ರೇವತಸ್ಸ ಮಹೇಸಿನೋ।
Sannipātā tayo āsuṃ, revatassa mahesino;
ಖೀಣಾಸವಾನಂ ವಿಮಲಾನಂ, ಸುವಿಮುತ್ತಾನ ತಾದಿನಂ॥
Khīṇāsavānaṃ vimalānaṃ, suvimuttāna tādinaṃ.
೭.
7.
ಅತಿಕ್ಕನ್ತಾ ಗಣನಪಥಂ, ಪಠಮಂ ಯೇ ಸಮಾಗತಾ।
Atikkantā gaṇanapathaṃ, paṭhamaṃ ye samāgatā;
ಕೋಟಿಸತಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ॥
Koṭisatasahassānaṃ, dutiyo āsi samāgamo.
೮.
8.
ಸೋ ತದಾ ಬ್ಯಾಧಿತೋ ಆಸಿ, ಪತ್ತೋ ಜೀವಿತಸಂಸಯಂ॥
So tadā byādhito āsi, patto jīvitasaṃsayaṃ.
೯.
9.
ತಸ್ಸ ಗಿಲಾನಪುಚ್ಛಾಯ, ಯೇ ತದಾ ಉಪಗತಾ ಮುನೀ।
Tassa gilānapucchāya, ye tadā upagatā munī;
ಕೋಟಿಸಹಸ್ಸಾ ಅರಹನ್ತೋ, ತತಿಯೋ ಆಸಿ ಸಮಾಗಮೋ॥
Koṭisahassā arahanto, tatiyo āsi samāgamo.
೧೦.
10.
ಅಹಂ ತೇನ ಸಮಯೇನ, ಅತಿದೇವೋ ನಾಮ ಬ್ರಾಹ್ಮಣೋ।
Ahaṃ tena samayena, atidevo nāma brāhmaṇo;
ಉಪಗನ್ತ್ವಾ ರೇವತಂ ಬುದ್ಧಂ, ಸರಣಂ ತಸ್ಸ ಗಞ್ಛಹಂ॥
Upagantvā revataṃ buddhaṃ, saraṇaṃ tassa gañchahaṃ.
೧೧.
11.
ತಸ್ಸ ಸೀಲಂ ಸಮಾಧಿಞ್ಚ, ಪಞ್ಞಾಗುಣಮನುತ್ತಮಂ।
Tassa sīlaṃ samādhiñca, paññāguṇamanuttamaṃ;
ಥೋಮಯಿತ್ವಾ ಯಥಾಥಾಮಂ, ಉತ್ತರೀಯಮದಾಸಹಂ॥
Thomayitvā yathāthāmaṃ, uttarīyamadāsahaṃ.
೧೨.
12.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ರೇವತೋ ಲೋಕನಾಯಕೋ।
Sopi maṃ buddho byākāsi, revato lokanāyako;
‘‘ಅಪರಿಮೇಯ್ಯಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Aparimeyyito kappe, ayaṃ buddho bhavissati.
೧೩.
13.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೪.
14.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೫.
15.
ತದಾಪಿ ತಂ ಬುದ್ಧಧಮ್ಮಂ, ಸರಿತ್ವಾ ಅನುಬ್ರೂಹಯಿಂ।
Tadāpi taṃ buddhadhammaṃ, saritvā anubrūhayiṃ;
ಆಹರಿಸ್ಸಾಮಿ ತಂ ಧಮ್ಮಂ, ಯಂ ಮಯ್ಹಂ ಅಭಿಪತ್ಥಿತಂ॥
Āharissāmi taṃ dhammaṃ, yaṃ mayhaṃ abhipatthitaṃ.
೧೬.
16.
ವಿಪುಲಾ ನಾಮ ಜನಿಕಾ, ರೇವತಸ್ಸ ಮಹೇಸಿನೋ॥
Vipulā nāma janikā, revatassa mahesino.
೧೭.
17.
ಸುದಸ್ಸನೋ ರತನಗ್ಘಿ, ಆವೇಳೋ ಚ ವಿಭೂಸಿತೋ।
Sudassano ratanagghi, āveḷo ca vibhūsito;
ಪುಞ್ಞಕಮ್ಮಾಭಿನಿಬ್ಬತ್ತಾ, ತಯೋ ಪಾಸಾದಮುತ್ತಮಾ॥
Puññakammābhinibbattā, tayo pāsādamuttamā.
೧೮.
18.
ತೇತ್ತಿಂಸ ಚ ಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Tettiṃsa ca sahassāni, nāriyo samalaṅkatā;
ಸುದಸ್ಸನಾ ನಾಮ ನಾರೀ, ವರುಣೋ ನಾಮ ಅತ್ರಜೋ॥
Sudassanā nāma nārī, varuṇo nāma atrajo.
೧೯.
19.
ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ।
Nimitte caturo disvā, rathayānena nikkhami;
ಅನೂನಸತ್ತಮಾಸಾನಿ, ಪಧಾನಂ ಪದಹೀ ಜಿನೋ॥
Anūnasattamāsāni, padhānaṃ padahī jino.
೨೦.
20.
ಬ್ರಹ್ಮುನಾ ಯಾಚಿತೋ ಸನ್ತೋ, ರೇವತೋ ಲೋಕನಾಯಕೋ।
Brahmunā yācito santo, revato lokanāyako;
ವತ್ತಿ ಚಕ್ಕಂ ಮಹಾವೀರೋ, ವರುಣಾರಾಮೇ ಸಿರೀಘರೇ॥
Vatti cakkaṃ mahāvīro, varuṇārāme sirīghare.
೨೧.
21.
ವರುಣೋ ಬ್ರಹ್ಮದೇವೋ ಚ, ಅಹೇಸುಂ ಅಗ್ಗಸಾವಕಾ।
Varuṇo brahmadevo ca, ahesuṃ aggasāvakā;
ಸಮ್ಭವೋ ನಾಮುಪಟ್ಠಾಕೋ, ರೇವತಸ್ಸ ಮಹೇಸಿನೋ॥
Sambhavo nāmupaṭṭhāko, revatassa mahesino.
೨೨.
22.
ಭದ್ದಾ ಚೇವ ಸುಭದ್ದಾ ಚ, ಅಹೇಸುಂ ಅಗ್ಗಸಾವಿಕಾ।
Bhaddā ceva subhaddā ca, ahesuṃ aggasāvikā;
ಸೋಪಿ ಬುದ್ಧೋ ಅಸಮಸಮೋ, ನಾಗಮೂಲೇ ಅಬುಜ್ಝಥ॥
Sopi buddho asamasamo, nāgamūle abujjhatha.
೨೩.
23.
ಪದುಮೋ ಕುಞ್ಜರೋ ಚೇವ, ಅಹೇಸುಂ ಅಗ್ಗುಪಟ್ಠಿಕಾ।
Padumo kuñjaro ceva, ahesuṃ aggupaṭṭhikā;
ಸಿರೀಮಾ ಚೇವ ಯಸವತೀ, ಅಹೇಸುಂ ಅಗ್ಗುಪಟ್ಠಿಕಾ॥
Sirīmā ceva yasavatī, ahesuṃ aggupaṭṭhikā.
೨೪.
24.
ಉಚ್ಚತ್ತನೇನ ಸೋ ಬುದ್ಧೋ, ಅಸೀತಿಹತ್ಥಮುಗ್ಗತೋ।
Uccattanena so buddho, asītihatthamuggato;
ಓಭಾಸೇತಿ ದಿಸಾ ಸಬ್ಬಾ, ಇನ್ದಕೇತುವ ಉಗ್ಗತೋ॥
Obhāseti disā sabbā, indaketuva uggato.
೨೫.
25.
ತಸ್ಸ ಸರೀರೇ ನಿಬ್ಬತ್ತಾ, ಪಭಾಮಾಲಾ ಅನುತ್ತರಾ।
Tassa sarīre nibbattā, pabhāmālā anuttarā;
ದಿವಾ ವಾ ಯದಿ ವಾ ರತ್ತಿಂ, ಸಮನ್ತಾ ಫರತಿ ಯೋಜನಂ॥
Divā vā yadi vā rattiṃ, samantā pharati yojanaṃ.
೨೬.
26.
ಸಟ್ಠಿವಸ್ಸಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
Saṭṭhivassasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೭.
27.
ದಸ್ಸಯಿತ್ವಾ ಬುದ್ಧಬಲಂ, ಅಮತಂ ಲೋಕೇ ಪಕಾಸಯಂ।
Dassayitvā buddhabalaṃ, amataṃ loke pakāsayaṃ;
ನಿಬ್ಬಾಯಿ ಅನುಪಾದಾನೋ, ಯಥಗ್ಗುಪಾದಾನಸಙ್ಖಯಾ॥
Nibbāyi anupādāno, yathaggupādānasaṅkhayā.
೨೮.
28.
ಸೋ ಚ ಕಾಯೋ ರತನನಿಭೋ, ಸೋ ಚ ಧಮ್ಮೋ ಅಸಾದಿಸೋ।
So ca kāyo ratananibho, so ca dhammo asādiso;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೨೯.
29.
ರೇವತೋ ಯಸಧರೋ ಬುದ್ಧೋ, ನಿಬ್ಬುತೋ ಸೋ ಮಹಾಪುರೇ।
Revato yasadharo buddho, nibbuto so mahāpure;
ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ॥
Dhātuvitthārikaṃ āsi, tesu tesu padesatoti.
ರೇವತಸ್ಸ ಭಗವತೋ ವಂಸೋ ಪಞ್ಚಮೋ।
Revatassa bhagavato vaṃso pañcamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೭. ರೇವತಬುದ್ಧವಂಸವಣ್ಣನಾ • 7. Revatabuddhavaṃsavaṇṇanā
