| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫-৬. রোহিতস্সসুত্তাদিৰণ্ণনা
5-6. Rohitassasuttādivaṇṇanā
৪৫-৪৬. পঞ্চমে (সং॰ নি॰ টী॰ ১.১.১০৭) একোকাসেতি চক্কৰাল়স্স পরিযন্তসঞ্ঞিতে একস্মিং ওকাসে। ভুম্মন্তি ‘‘যত্থা’’তি ইদং ভুম্মৰচনং। সামঞ্ঞতো ৰুত্তম্পি ‘‘সো লোকস্স অন্তো’’তি ৰচনতো ৰিসিট্ঠৰিসযমেৰ হোতি। ‘‘ন জাযতি, ন মীযতী’’তি ৰত্ৰা পুন ‘‘ন চৰতি, ন উপপজ্জতী’’তি কস্মা ৰুত্তন্তি আহ ‘‘ইদং অপরাপরং…পে॰… গহিত’’ন্তি। পদগমনেনাতি পদসা গমনেন। সত্থা সঙ্খারলোকস্স অন্তং সন্ধায ৰদতি উপরি সব্বানি পকাসেতুকামো। সঙ্খারলোকস্স হি অন্তো নিব্বানং।
45-46. Pañcame (saṃ. ni. ṭī. 1.1.107) ekokāseti cakkavāḷassa pariyantasaññite ekasmiṃ okāse. Bhummanti ‘‘yatthā’’ti idaṃ bhummavacanaṃ. Sāmaññato vuttampi ‘‘so lokassa anto’’ti vacanato visiṭṭhavisayameva hoti. ‘‘Na jāyati, na mīyatī’’ti vatvā puna ‘‘na cavati, na upapajjatī’’ti kasmā vuttanti āha ‘‘idaṃ aparāparaṃ…pe… gahita’’nti. Padagamanenāti padasā gamanena. Satthā saṅkhāralokassa antaṃ sandhāya vadati upari sabbāni pakāsetukāmo. Saṅkhāralokassa hi anto nibbānaṃ.
দল়্হং থিরং ধনু এতস্সাতি দল়্হধন্ৰা, সো এৰ ‘‘দল়্হধম্মা’’তি ৰুত্তো। তেনাহ ‘‘দল়্হধনূ’’তি। উত্তমপ্পমাণং নাম সহস্সথামধনু। ধনুগ্গণ্হনসিপ্পচিত্তকতায ধনুগ্গহো, ন ধনুগ্গহণমত্তেনাতি আহ ‘‘ধনুগ্গহোতি ধনুআচরিযো’’তি। ‘‘ধনুগ্গহো’’তি ৰত্ৰা ‘‘সিক্খিতো’’তি ৰুত্তে ধনুসিক্খায সিক্খিতোতি ৰিঞ্ঞাযতি। সিক্খা চ এত্তকেন কালেন সিক্খন্তস্স উক্কংসগতা হোতীতি আহ ‘‘দ্ৰাদস ৰস্সানি ধনুসিপ্পং সিক্খিতো’’তি। উসভপ্পমাণেতি ৰীসতি যট্ঠিযো উসভং, তস্মিং উসভপ্পমাণে পদেসে। ৰালগ্গন্তি ৰালকোটিং। কতহত্থোতি পরিচিতহত্থো। কতসরক্খেপোতি থিরলক্খে চ চললক্খে চ পরেসং দস্সনৰসেন সরক্খেপস্স কতাপী। তেনাহ ‘‘দস্সিতসিপ্পো’’তি, ‘‘কতযোগ্গো’’তি কেচি। অসন্তি এতেনাতি অসনং, কণ্ডো। তালচ্ছাদিন্তি তালচ্ছাযং। সা পন রতনমত্তা ৰিদত্থিচতুরঙ্গুলা।
Daḷhaṃ thiraṃ dhanu etassāti daḷhadhanvā, so eva ‘‘daḷhadhammā’’ti vutto. Tenāha ‘‘daḷhadhanū’’ti. Uttamappamāṇaṃ nāma sahassathāmadhanu. Dhanuggaṇhanasippacittakatāya dhanuggaho, na dhanuggahaṇamattenāti āha ‘‘dhanuggahoti dhanuācariyo’’ti. ‘‘Dhanuggaho’’ti vatvā ‘‘sikkhito’’ti vutte dhanusikkhāya sikkhitoti viññāyati. Sikkhā ca ettakena kālena sikkhantassa ukkaṃsagatā hotīti āha ‘‘dvādasa vassāni dhanusippaṃ sikkhito’’ti. Usabhappamāṇeti vīsati yaṭṭhiyo usabhaṃ, tasmiṃ usabhappamāṇe padese. Vālagganti vālakoṭiṃ. Katahatthoti paricitahattho. Katasarakkhepoti thiralakkhe ca calalakkhe ca paresaṃ dassanavasena sarakkhepassa katāpī. Tenāha ‘‘dassitasippo’’ti, ‘‘katayoggo’’ti keci. Asanti etenāti asanaṃ, kaṇḍo. Tālacchādinti tālacchāyaṃ. Sā pana ratanamattā vidatthicaturaṅgulā.
পুরত্থিমা সমুদ্দাতি একস্মিং চক্কৰাল়ে পুরত্থিমা সমুদ্দা। সমুদ্দসীসেন পুরত্থিমচক্কৰাল়মুখৰট্টিং ৰদতি। পচ্ছিমসমুদ্দোতি এত্থাপি এসেৰ নযো। নিপ্পপঞ্চতন্তি অদন্তকারিতং। সম্পত্তেতি তাদিসেন জৰেন গচ্ছন্তেন সম্পত্তে। অনোতত্তেতি এত্থাপি ‘‘সম্পত্তে’’তি পদং আনেত্ৰা সম্বন্ধো, তথা ‘‘নাগলতাদন্তকট্ঠ’’ন্তি এত্থাপি। তদাতি যদা সো লোকন্তগৰেসকো অহোসি, তদা। দীঘাযুককালোতি অনেকৰস্সসহস্সাযুককালো। চক্কৰাল়লোকস্সাতি সামঞ্ঞৰসেন একৰচনং, চক্কৰাল়লোকানন্তি অত্থো। ইমস্মিংযেৰ চক্কৰাল়ে নিব্বত্তিপুব্বপরিচযসিদ্ধায নিকন্তিযা।
Puratthimā samuddāti ekasmiṃ cakkavāḷe puratthimā samuddā. Samuddasīsena puratthimacakkavāḷamukhavaṭṭiṃ vadati. Pacchimasamuddoti etthāpi eseva nayo. Nippapañcatanti adantakāritaṃ. Sampatteti tādisena javena gacchantena sampatte. Anotatteti etthāpi ‘‘sampatte’’ti padaṃ ānetvā sambandho, tathā ‘‘nāgalatādantakaṭṭha’’nti etthāpi. Tadāti yadā so lokantagavesako ahosi, tadā. Dīghāyukakāloti anekavassasahassāyukakālo. Cakkavāḷalokassāti sāmaññavasena ekavacanaṃ, cakkavāḷalokānanti attho. Imasmiṃyeva cakkavāḷe nibbattipubbaparicayasiddhāya nikantiyā.
সসঞ্ঞিম্হি সমনকেতি ন রূপধম্মমত্তকে, অথ খো পঞ্চক্খন্ধসমুদাযেতি দস্সেতি। সমিতপাপোতি সমুচ্ছিন্নসংকিলেসধম্মো। ছট্ঠং উত্তানমেৰ।
Sasaññimhi samanaketi na rūpadhammamattake, atha kho pañcakkhandhasamudāyeti dasseti. Samitapāpoti samucchinnasaṃkilesadhammo. Chaṭṭhaṃ uttānameva.
রোহিতস্সসুত্তাদিৰণ্ণনা নিট্ঠিতা।
Rohitassasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৫. রোহিতস্সসুত্তং • 5. Rohitassasuttaṃ
৬. দুতিযরোহিতস্সসুত্তং • 6. Dutiyarohitassasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. রোহিতস্সসুত্তৰণ্ণনা • 5. Rohitassasuttavaṇṇanā
