| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. ரோஹிதஸ்ஸஸுத்தங்
6. Rohitassasuttaṃ
107. ஸாவத்தி²னிதா³னங். ஏகமந்தங் டி²தோ கோ² ரோஹிதஸ்ஸோ தே³வபுத்தோ ப⁴க³வந்தங் ஏதத³வோச – ‘‘யத்த² நு கோ², ப⁴ந்தே, ந ஜாயதி ந ஜீயதி ந மீயதி 1 ந சவதி ந உபபஜ்ஜதி, ஸக்கா நு கோ² ஸோ, ப⁴ந்தே, க³மனேன லோகஸ்ஸ அந்தோ ஞாதுங் வா த³ட்டு²ங் வா பாபுணிதுங் வா’’தி? ‘‘யத்த² கோ², ஆவுஸோ, ந ஜாயதி ந ஜீயதி ந மீயதி ந சவதி ந உபபஜ்ஜதி, நாஹங் தங் க³மனேன லோகஸ்ஸ அந்தங் ஞாதெய்யங் த³ட்டெ²ய்யங் பத்தெய்யந்தி வதா³மீ’’தி.
107. Sāvatthinidānaṃ. Ekamantaṃ ṭhito kho rohitasso devaputto bhagavantaṃ etadavoca – ‘‘yattha nu kho, bhante, na jāyati na jīyati na mīyati 2 na cavati na upapajjati, sakkā nu kho so, bhante, gamanena lokassa anto ñātuṃ vā daṭṭhuṃ vā pāpuṇituṃ vā’’ti? ‘‘Yattha kho, āvuso, na jāyati na jīyati na mīyati na cavati na upapajjati, nāhaṃ taṃ gamanena lokassa antaṃ ñāteyyaṃ daṭṭheyyaṃ patteyyanti vadāmī’’ti.
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! யாவஸுபா⁴ஸிதமித³ங், ப⁴ந்தே, ப⁴க³வதா – ‘யத்த² கோ², ஆவுஸோ, ந ஜாயதி ந ஜீயதி ந மீயதி ந சவதி ந உபபஜ்ஜதி, நாஹங் தங் க³மனேன லோகஸ்ஸ அந்தங் ஞாதெய்யங் த³ட்டெ²ய்யங் பத்தெய்யந்தி வதா³மீ’தி.
‘‘Acchariyaṃ, bhante, abbhutaṃ, bhante! Yāvasubhāsitamidaṃ, bhante, bhagavatā – ‘yattha kho, āvuso, na jāyati na jīyati na mīyati na cavati na upapajjati, nāhaṃ taṃ gamanena lokassa antaṃ ñāteyyaṃ daṭṭheyyaṃ patteyyanti vadāmī’ti.
‘‘பூ⁴தபுப்³பா³ஹங், ப⁴ந்தே, ரோஹிதஸ்ஸோ நாம இஸி அஹோஸிங் போ⁴ஜபுத்தோ இத்³தி⁴மா வேஹாஸங்க³மோ. தஸ்ஸ மய்ஹங், ப⁴ந்தே, ஏவரூபோ ஜவோ அஹோஸி; ஸெய்யதா²பி நாம த³ள்ஹத⁴ம்மா 3 த⁴னுக்³க³ஹோ ஸுஸிக்கி²தோ கதஹத்தோ² கதயொக்³கோ³ கதூபாஸனோ லஹுகேன அஸனேன அப்பகஸிரேனேவ திரியங் தாலச்சா²யங் அதிபாதெய்ய. தஸ்ஸ மய்ஹங், ப⁴ந்தே, ஏவரூபோ பத³வீதிஹாரோ அஹோஸி; ஸெய்யதா²பி நாம புரத்தி²மா ஸமுத்³தா³ பச்சி²மோ ஸமுத்³தோ³. தஸ்ஸ மய்ஹங், ப⁴ந்தே, ஏவரூபங் இச்சா²க³தங் உப்பஜ்ஜி – ‘அஹங் க³மனேன லோகஸ்ஸ அந்தங் பாபுணிஸ்ஸாமீ’தி. ஸோ க்²வாஹங், ப⁴ந்தே, ஏவரூபேன ஜவேன ஸமன்னாக³தோ ஏவரூபேன ச பத³வீதிஹாரேன அஞ்ஞத்ரேவ அஸித-பீத-கா²யித-ஸாயிதா அஞ்ஞத்ர உச்சார-பஸ்ஸாவகம்மா அஞ்ஞத்ர நித்³தா³கிலமத²படிவினோத³னா வஸ்ஸஸதாயுகோ வஸ்ஸஸதஜீவீ வஸ்ஸஸதங் க³ந்த்வா அப்பத்வாவ லோகஸ்ஸ அந்தங் அந்தராவ காலங்கதோ.
‘‘Bhūtapubbāhaṃ, bhante, rohitasso nāma isi ahosiṃ bhojaputto iddhimā vehāsaṅgamo. Tassa mayhaṃ, bhante, evarūpo javo ahosi; seyyathāpi nāma daḷhadhammā 4 dhanuggaho susikkhito katahattho katayoggo katūpāsano lahukena asanena appakasireneva tiriyaṃ tālacchāyaṃ atipāteyya. Tassa mayhaṃ, bhante, evarūpo padavītihāro ahosi; seyyathāpi nāma puratthimā samuddā pacchimo samuddo. Tassa mayhaṃ, bhante, evarūpaṃ icchāgataṃ uppajji – ‘ahaṃ gamanena lokassa antaṃ pāpuṇissāmī’ti. So khvāhaṃ, bhante, evarūpena javena samannāgato evarūpena ca padavītihārena aññatreva asita-pīta-khāyita-sāyitā aññatra uccāra-passāvakammā aññatra niddākilamathapaṭivinodanā vassasatāyuko vassasatajīvī vassasataṃ gantvā appatvāva lokassa antaṃ antarāva kālaṅkato.
‘‘அச்ச²ரியங், ப⁴ந்தே, அப்³பு⁴தங், ப⁴ந்தே! யாவஸுபா⁴ஸிதமித³ங், ப⁴ந்தே, ப⁴க³வதா – ‘யத்த² கோ², ஆவுஸோ, ந ஜாயதி ந ஜீயதி ந மீயதி ந சவதி ந உபபஜ்ஜதி, நாஹங் தங் க³மனேன லோகஸ்ஸ அந்தங் ஞாதெய்யங் த³ட்டெ²ய்யங் பத்தெய்யந்தி வதா³மீ’’’தி.
‘‘Acchariyaṃ, bhante, abbhutaṃ, bhante! Yāvasubhāsitamidaṃ, bhante, bhagavatā – ‘yattha kho, āvuso, na jāyati na jīyati na mīyati na cavati na upapajjati, nāhaṃ taṃ gamanena lokassa antaṃ ñāteyyaṃ daṭṭheyyaṃ patteyyanti vadāmī’’’ti.
‘‘ந கோ² பனாஹங், ஆவுஸோ, அப்பத்வா லோகஸ்ஸ அந்தங் து³க்க²ஸ்ஸ அந்தகிரியங் வதா³மி. அபி ச க்²வாஹங், ஆவுஸோ, இமஸ்மிங்யேவ ப்³யாமமத்தே களேவரே ஸஸஞ்ஞிம்ஹி ஸமனகே லோகஞ்ச பஞ்ஞபேமி லோகஸமுத³யஞ்ச லோகனிரோத⁴ஞ்ச லோகனிரோத⁴கா³மினிஞ்ச படிபத³ந்தி.
‘‘Na kho panāhaṃ, āvuso, appatvā lokassa antaṃ dukkhassa antakiriyaṃ vadāmi. Api ca khvāhaṃ, āvuso, imasmiṃyeva byāmamatte kaḷevare sasaññimhi samanake lokañca paññapemi lokasamudayañca lokanirodhañca lokanirodhagāminiñca paṭipadanti.
‘‘க³மனேன ந பத்தப்³போ³, லோகஸ்ஸந்தோ குதா³சனங்;
‘‘Gamanena na pattabbo, lokassanto kudācanaṃ;
ந ச அப்பத்வா லோகந்தங், து³க்கா² அத்தி² பமோசனங்.
Na ca appatvā lokantaṃ, dukkhā atthi pamocanaṃ.
‘‘தஸ்மா ஹவே லோகவிதூ³ ஸுமேதோ⁴,
‘‘Tasmā have lokavidū sumedho,
லோகந்தகூ³ வுஸிதப்³ரஹ்மசரியோ;
Lokantagū vusitabrahmacariyo;
லோகஸ்ஸ அந்தங் ஸமிதாவி ஞத்வா,
Lokassa antaṃ samitāvi ñatvā,
நாஸீஸதி லோகமிமங் பரஞ்சா’’தி.
Nāsīsati lokamimaṃ parañcā’’ti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. ரோஹிதஸ்ஸஸுத்தவண்ணனா • 6. Rohitassasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ரோஹிதஸ்ஸஸுத்தவண்ணனா • 6. Rohitassasuttavaṇṇanā
