| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. ரோஹிதஸ்ஸஸுத்தவண்ணனா
6. Rohitassasuttavaṇṇanā
107. ச²ட்டே² யத்தா²தி சக்கவாளலோகஸ்ஸ ஏகோகாஸே பு⁴ம்மங். ந சவதி ந உபபஜ்ஜதீதி இத³ங் அபராபரங் சுதிபடிஸந்தி⁴வஸேன க³ஹிதங். க³மனேனாதி பத³க³மனேன. நாஹங் தங் லோகஸ்ஸ அந்தந்தி ஸத்தா² ஸங்கா²ரலோகஸ்ஸ அந்தங் ஸந்தா⁴ய வத³தி. ஞாதெய்யந்திஆதீ³ஸு ஞாதப்³ப³ங், த³ட்ட²ப்³ப³ங், பத்தப்³ப³ந்தி அத்தோ².
107. Chaṭṭhe yatthāti cakkavāḷalokassa ekokāse bhummaṃ. Na cavati na upapajjatīti idaṃ aparāparaṃ cutipaṭisandhivasena gahitaṃ. Gamanenāti padagamanena. Nāhaṃ taṃ lokassa antanti satthā saṅkhāralokassa antaṃ sandhāya vadati. Ñāteyyantiādīsu ñātabbaṃ, daṭṭhabbaṃ, pattabbanti attho.
இதி தே³வபுத்தேன சக்கவாளலோகஸ்ஸ அந்தோ புச்சி²தோ, ஸத்தா²ரா ஸங்கா²ரலோகஸ்ஸ கதி²தோ. ஸோ பன அத்தனோ பஞ்ஹேன ஸத்³தி⁴ங் ஸத்து² ப்³யாகரணங் ஸமேதீதி ஸஞ்ஞாய பஸங்ஸந்தோ அச்ச²ரியந்திஆதி³மாஹ.
Iti devaputtena cakkavāḷalokassa anto pucchito, satthārā saṅkhāralokassa kathito. So pana attano pañhena saddhiṃ satthu byākaraṇaṃ sametīti saññāya pasaṃsanto acchariyantiādimāha.
த³ள்ஹத⁴ம்மோதி த³ள்ஹத⁴னு, உத்தமப்பமாணேன த⁴னுனா ஸமன்னாக³தோ. த⁴னுக்³க³ஹோதி த⁴னுஆசரியோ. ஸுஸிக்கி²தோதி த³ஸ த்³வாத³ஸ வஸ்ஸானி த⁴னுஸிப்பங் ஸிக்கி²தோ. கதஹத்தோ²தி உஸப⁴ப்பமாணேபி வாலக்³க³ங் விஜ்ஜி²துங் ஸமத்த²பா⁴வேன கதஹத்தோ². கதூபாஸனோதி கதஸரக்கே²போ த³ஸ்ஸிதஸிப்போ. அஸனேனாதி கண்டே³ன. அதிபாதெய்யாதி அதிக்கமெய்ய. யாவதா ஸோ தாலச்சா²யங் அதிக்கமெய்ய, தாவதா காலேன ஏகசக்கவாளங் அதிக்கமாமீதி அத்தனோ ஜவஸம்பத்திங் த³ஸ்ஸேதி.
Daḷhadhammoti daḷhadhanu, uttamappamāṇena dhanunā samannāgato. Dhanuggahoti dhanuācariyo. Susikkhitoti dasa dvādasa vassāni dhanusippaṃ sikkhito. Katahatthoti usabhappamāṇepi vālaggaṃ vijjhituṃ samatthabhāvena katahattho. Katūpāsanoti katasarakkhepo dassitasippo. Asanenāti kaṇḍena. Atipāteyyāti atikkameyya. Yāvatā so tālacchāyaṃ atikkameyya, tāvatā kālena ekacakkavāḷaṃ atikkamāmīti attano javasampattiṃ dasseti.
புரத்தி²மா ஸமுத்³தா³ பச்சி²மோதி யதா² புரத்தி²மஸமுத்³தா³ பச்சி²மஸமுத்³தோ³ தூ³ரே, ஏவங் மே தூ³ரே பத³வீதிஹாரோ அஹோஸீதி வத³தி. ஸோ கிர பாசீனசக்கவாளமுக²வட்டியங் டி²தோ பாத³ங் பஸாரெத்வா பச்சி²மசக்கவாளமுக²வட்டியங் அக்கமதி, புன து³தியங் பாத³ங் பஸாரெத்வா பரசக்கவாளமுக²வட்டியங் அக்கமதி. இச்சா²க³தந்தி இச்சா² ஏவ. அஞ்ஞத்ரேவாதி நிப்பபஞ்சதங் த³ஸ்ஸேதி. பி⁴க்கா²சாரகாலே கிரேஸ நாக³லதாத³ந்தகட்ட²ங் கா²தி³த்வா அனோதத்தே முக²ங் தோ⁴வித்வா காலே ஸம்பத்தே உத்தரகுரும்ஹி பிண்டா³ய சரித்வா சக்கவாளமுக²வட்டியங் நிஸின்னோ ப⁴த்தகிச்சங் கரோதி, தத்த² முஹுத்தங் விஸ்ஸமித்வா புன ஜவதி. வஸ்ஸஸதாயுகோதி ததா³ தீ³கா⁴யுககாலோ ஹோதி, அயங் பன வஸ்ஸஸதாவஸிட்டே² ஆயும்ஹி க³மனங் ஆரபி⁴. வஸ்ஸஸதஜீவீதி தங் வஸ்ஸஸதங் அனந்தராயேன ஜீவந்தோ. அந்தராவ காலங்கதோதி சக்கவாளலோகஸ்ஸ அந்தங் அப்பத்வா அந்தராவ மதோ. ஸோ பன தத்த² காலங் கத்வாபி ஆக³ந்த்வா இமஸ்மிங்யேவ சக்கவாளே நிப்³ப³த்தி. அப்பத்வாதி ஸங்கா²ரலோகஸ்ஸ அந்தங் அப்பத்வா. து³க்க²ஸ்ஸாதி வட்டது³க்க²ஸ்ஸ. அந்தகிரியந்தி பரியந்தகரணங். களேவரேதி அத்தபா⁴வே. ஸஸஞ்ஞிம்ஹி ஸமனகேதி ஸஸஞ்ஞே ஸசித்தே. லோகந்தி து³க்க²ஸச்சங். லோகஸமுத³யந்தி ஸமுத³யஸச்சங். லோகனிரோத⁴ந்தி நிரோத⁴ஸச்சங். படிபத³ந்தி மக்³க³ஸச்சங். இதி – ‘‘நாஹங், ஆவுஸோ, இமானி சத்தாரி ஸச்சானி திணகட்டா²தீ³ஸு பஞ்ஞபேமி , இமஸ்மிங் பன சாதுமஹாபூ⁴திகே காயஸ்மிங் யேவ பஞ்ஞபேமீ’’தி த³ஸ்ஸேதி. ஸமிதாவீதி ஸமிதபாபோ. நாஸீஸதீதி ந பத்தே²தி. ச²ட்ட²ங்.
Puratthimā samuddā pacchimoti yathā puratthimasamuddā pacchimasamuddo dūre, evaṃ me dūre padavītihāro ahosīti vadati. So kira pācīnacakkavāḷamukhavaṭṭiyaṃ ṭhito pādaṃ pasāretvā pacchimacakkavāḷamukhavaṭṭiyaṃ akkamati, puna dutiyaṃ pādaṃ pasāretvā paracakkavāḷamukhavaṭṭiyaṃ akkamati. Icchāgatanti icchā eva. Aññatrevāti nippapañcataṃ dasseti. Bhikkhācārakāle kiresa nāgalatādantakaṭṭhaṃ khāditvā anotatte mukhaṃ dhovitvā kāle sampatte uttarakurumhi piṇḍāya caritvā cakkavāḷamukhavaṭṭiyaṃ nisinno bhattakiccaṃ karoti, tattha muhuttaṃ vissamitvā puna javati. Vassasatāyukoti tadā dīghāyukakālo hoti, ayaṃ pana vassasatāvasiṭṭhe āyumhi gamanaṃ ārabhi. Vassasatajīvīti taṃ vassasataṃ anantarāyena jīvanto. Antarāva kālaṅkatoti cakkavāḷalokassa antaṃ appatvā antarāva mato. So pana tattha kālaṃ katvāpi āgantvā imasmiṃyeva cakkavāḷe nibbatti. Appatvāti saṅkhāralokassa antaṃ appatvā. Dukkhassāti vaṭṭadukkhassa. Antakiriyanti pariyantakaraṇaṃ. Kaḷevareti attabhāve. Sasaññimhi samanaketi sasaññe sacitte. Lokanti dukkhasaccaṃ. Lokasamudayanti samudayasaccaṃ. Lokanirodhanti nirodhasaccaṃ. Paṭipadanti maggasaccaṃ. Iti – ‘‘nāhaṃ, āvuso, imāni cattāri saccāni tiṇakaṭṭhādīsu paññapemi , imasmiṃ pana cātumahābhūtike kāyasmiṃ yeva paññapemī’’ti dasseti. Samitāvīti samitapāpo. Nāsīsatīti na pattheti. Chaṭṭhaṃ.
108-109. ஸத்தமட்ட²மானி வுத்தத்தா²னேவ. ஸத்தமங், அட்ட²மங்.
108-109. Sattamaṭṭhamāni vuttatthāneva. Sattamaṃ, aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
6. ரோஹிதஸ்ஸஸுத்தங் • 6. Rohitassasuttaṃ
7. நந்த³ஸுத்தங் • 7. Nandasuttaṃ
8. நந்தி³விஸாலஸுத்தங் • 8. Nandivisālasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā)
6. ரோஹிதஸ்ஸஸுத்தவண்ணனா • 6. Rohitassasuttavaṇṇanā
7-8. நந்த³ஸுத்தனந்தி³விஸாலஸுத்தவண்ணனா • 7-8. Nandasuttanandivisālasuttavaṇṇanā
