| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৬. রোহিতস্সসুত্তৰণ্ণনা
6. Rohitassasuttavaṇṇanā
১০৭. ছট্ঠে যত্থাতি চক্কৰাল়লোকস্স একোকাসে ভুম্মং। ন চৰতি ন উপপজ্জতীতি ইদং অপরাপরং চুতিপটিসন্ধিৰসেন গহিতং। গমনেনাতি পদগমনেন। নাহং তং লোকস্স অন্তন্তি সত্থা সঙ্খারলোকস্স অন্তং সন্ধায ৰদতি। ঞাতেয্যন্তিআদীসু ঞাতব্বং, দট্ঠব্বং, পত্তব্বন্তি অত্থো।
107. Chaṭṭhe yatthāti cakkavāḷalokassa ekokāse bhummaṃ. Na cavati na upapajjatīti idaṃ aparāparaṃ cutipaṭisandhivasena gahitaṃ. Gamanenāti padagamanena. Nāhaṃ taṃ lokassa antanti satthā saṅkhāralokassa antaṃ sandhāya vadati. Ñāteyyantiādīsu ñātabbaṃ, daṭṭhabbaṃ, pattabbanti attho.
ইতি দেৰপুত্তেন চক্কৰাল়লোকস্স অন্তো পুচ্ছিতো, সত্থারা সঙ্খারলোকস্স কথিতো। সো পন অত্তনো পঞ্হেন সদ্ধিং সত্থু ব্যাকরণং সমেতীতি সঞ্ঞায পসংসন্তো অচ্ছরিযন্তিআদিমাহ।
Iti devaputtena cakkavāḷalokassa anto pucchito, satthārā saṅkhāralokassa kathito. So pana attano pañhena saddhiṃ satthu byākaraṇaṃ sametīti saññāya pasaṃsanto acchariyantiādimāha.
দল়্হধম্মোতি দল়্হধনু, উত্তমপ্পমাণেন ধনুনা সমন্নাগতো। ধনুগ্গহোতি ধনুআচরিযো। সুসিক্খিতোতি দস দ্ৰাদস ৰস্সানি ধনুসিপ্পং সিক্খিতো। কতহত্থোতি উসভপ্পমাণেপি ৰালগ্গং ৰিজ্ঝিতুং সমত্থভাৰেন কতহত্থো। কতূপাসনোতি কতসরক্খেপো দস্সিতসিপ্পো। অসনেনাতি কণ্ডেন। অতিপাতেয্যাতি অতিক্কমেয্য। যাৰতা সো তালচ্ছাযং অতিক্কমেয্য, তাৰতা কালেন একচক্কৰাল়ং অতিক্কমামীতি অত্তনো জৰসম্পত্তিং দস্সেতি।
Daḷhadhammoti daḷhadhanu, uttamappamāṇena dhanunā samannāgato. Dhanuggahoti dhanuācariyo. Susikkhitoti dasa dvādasa vassāni dhanusippaṃ sikkhito. Katahatthoti usabhappamāṇepi vālaggaṃ vijjhituṃ samatthabhāvena katahattho. Katūpāsanoti katasarakkhepo dassitasippo. Asanenāti kaṇḍena. Atipāteyyāti atikkameyya. Yāvatā so tālacchāyaṃ atikkameyya, tāvatā kālena ekacakkavāḷaṃ atikkamāmīti attano javasampattiṃ dasseti.
পুরত্থিমা সমুদ্দা পচ্ছিমোতি যথা পুরত্থিমসমুদ্দা পচ্ছিমসমুদ্দো দূরে, এৰং মে দূরে পদৰীতিহারো অহোসীতি ৰদতি। সো কির পাচীনচক্কৰাল়মুখৰট্টিযং ঠিতো পাদং পসারেত্ৰা পচ্ছিমচক্কৰাল়মুখৰট্টিযং অক্কমতি, পুন দুতিযং পাদং পসারেত্ৰা পরচক্কৰাল়মুখৰট্টিযং অক্কমতি। ইচ্ছাগতন্তি ইচ্ছা এৰ। অঞ্ঞত্রেৰাতি নিপ্পপঞ্চতং দস্সেতি। ভিক্খাচারকালে কিরেস নাগলতাদন্তকট্ঠং খাদিত্ৰা অনোতত্তে মুখং ধোৰিত্ৰা কালে সম্পত্তে উত্তরকুরুম্হি পিণ্ডায চরিত্ৰা চক্কৰাল়মুখৰট্টিযং নিসিন্নো ভত্তকিচ্চং করোতি, তত্থ মুহুত্তং ৰিস্সমিত্ৰা পুন জৰতি। ৰস্সসতাযুকোতি তদা দীঘাযুককালো হোতি, অযং পন ৰস্সসতাৰসিট্ঠে আযুম্হি গমনং আরভি। ৰস্সসতজীৰীতি তং ৰস্সসতং অনন্তরাযেন জীৰন্তো। অন্তরাৰ কালঙ্কতোতি চক্কৰাল়লোকস্স অন্তং অপ্পত্ৰা অন্তরাৰ মতো। সো পন তত্থ কালং কত্ৰাপি আগন্ত্ৰা ইমস্মিংযেৰ চক্কৰাল়ে নিব্বত্তি। অপ্পত্ৰাতি সঙ্খারলোকস্স অন্তং অপ্পত্ৰা। দুক্খস্সাতি ৰট্টদুক্খস্স। অন্তকিরিযন্তি পরিযন্তকরণং। কল়েৰরেতি অত্তভাৰে। সসঞ্ঞিম্হি সমনকেতি সসঞ্ঞে সচিত্তে। লোকন্তি দুক্খসচ্চং। লোকসমুদযন্তি সমুদযসচ্চং। লোকনিরোধন্তি নিরোধসচ্চং। পটিপদন্তি মগ্গসচ্চং। ইতি – ‘‘নাহং, আৰুসো, ইমানি চত্তারি সচ্চানি তিণকট্ঠাদীসু পঞ্ঞপেমি , ইমস্মিং পন চাতুমহাভূতিকে কাযস্মিং যেৰ পঞ্ঞপেমী’’তি দস্সেতি। সমিতাৰীতি সমিতপাপো। নাসীসতীতি ন পত্থেতি। ছট্ঠং।
Puratthimā samuddā pacchimoti yathā puratthimasamuddā pacchimasamuddo dūre, evaṃ me dūre padavītihāro ahosīti vadati. So kira pācīnacakkavāḷamukhavaṭṭiyaṃ ṭhito pādaṃ pasāretvā pacchimacakkavāḷamukhavaṭṭiyaṃ akkamati, puna dutiyaṃ pādaṃ pasāretvā paracakkavāḷamukhavaṭṭiyaṃ akkamati. Icchāgatanti icchā eva. Aññatrevāti nippapañcataṃ dasseti. Bhikkhācārakāle kiresa nāgalatādantakaṭṭhaṃ khāditvā anotatte mukhaṃ dhovitvā kāle sampatte uttarakurumhi piṇḍāya caritvā cakkavāḷamukhavaṭṭiyaṃ nisinno bhattakiccaṃ karoti, tattha muhuttaṃ vissamitvā puna javati. Vassasatāyukoti tadā dīghāyukakālo hoti, ayaṃ pana vassasatāvasiṭṭhe āyumhi gamanaṃ ārabhi. Vassasatajīvīti taṃ vassasataṃ anantarāyena jīvanto. Antarāva kālaṅkatoti cakkavāḷalokassa antaṃ appatvā antarāva mato. So pana tattha kālaṃ katvāpi āgantvā imasmiṃyeva cakkavāḷe nibbatti. Appatvāti saṅkhāralokassa antaṃ appatvā. Dukkhassāti vaṭṭadukkhassa. Antakiriyanti pariyantakaraṇaṃ. Kaḷevareti attabhāve. Sasaññimhi samanaketi sasaññe sacitte. Lokanti dukkhasaccaṃ. Lokasamudayanti samudayasaccaṃ. Lokanirodhanti nirodhasaccaṃ. Paṭipadanti maggasaccaṃ. Iti – ‘‘nāhaṃ, āvuso, imāni cattāri saccāni tiṇakaṭṭhādīsu paññapemi , imasmiṃ pana cātumahābhūtike kāyasmiṃ yeva paññapemī’’ti dasseti. Samitāvīti samitapāpo. Nāsīsatīti na pattheti. Chaṭṭhaṃ.
১০৮-১০৯. সত্তমট্ঠমানি ৰুত্তত্থানেৰ। সত্তমং, অট্ঠমং।
108-109. Sattamaṭṭhamāni vuttatthāneva. Sattamaṃ, aṭṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৬. রোহিতস্সসুত্তং • 6. Rohitassasuttaṃ
৭. নন্দসুত্তং • 7. Nandasuttaṃ
৮. নন্দিৰিসালসুত্তং • 8. Nandivisālasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā)
৬. রোহিতস্সসুত্তৰণ্ণনা • 6. Rohitassasuttavaṇṇanā
৭-৮. নন্দসুত্তনন্দিৰিসালসুত্তৰণ্ণনা • 7-8. Nandasuttanandivisālasuttavaṇṇanā
