| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ரோஜமல்லாதி³வத்து²கதா²
Rojamallādivatthukathā
301-2. ரோஜவத்து² உத்தானத்த²மேவ. தத்த² ஸங்கரங் அகங்ஸூதி கதிகங் அகங்ஸு. உளாரங் கோ² தே இத³ந்தி ஸுந்த³ரங் கோ² தே இத³ங். நாஹங் ப⁴ந்தே ஆனந்த³ ப³ஹுகதோதி நாஹங் பு³த்³தா⁴தி³க³தபஸாத³ப³ஹுமானேன இதா⁴க³தோதி த³ஸ்ஸேதி. ஸப்³ப³ஞ்ச டா³கந்தி ஸப்பிஆதீ³ஹி பக்கங் வா அபக்கங் வா யங்கிஞ்சி டா³கங். பிட்ட²கா²த³னீயந்தி பிட்ட²மயங் கா²த³னீயங்; ரோஜோ கிர இத³ங் உப⁴யம்பி ஸதஸஹஸ்ஸங் வயங் கத்வா படியாதா³பேஸி.
301-2. Rojavatthu uttānatthameva. Tattha saṅkaraṃ akaṃsūti katikaṃ akaṃsu. Uḷāraṃ kho te idanti sundaraṃ kho te idaṃ. Nāhaṃ bhante ānanda bahukatoti nāhaṃ buddhādigatapasādabahumānena idhāgatoti dasseti. Sabbañca ḍākanti sappiādīhi pakkaṃ vā apakkaṃ vā yaṃkiñci ḍākaṃ. Piṭṭhakhādanīyanti piṭṭhamayaṃ khādanīyaṃ; rojo kira idaṃ ubhayampi satasahassaṃ vayaṃ katvā paṭiyādāpesi.
303. மஞ்ஜுகாதி மது⁴ரவசனா. படிபா⁴னெய்யகாதி ஸகே ஸிப்பே படிபா⁴னஸம்பன்னா. த³க்கா²தி சே²கா, அனலஸா வா. பரியோதா³தஸிப்பாதி நித்³தோ³ஸஸிப்பா. நாளியாவாபகேனாதி நாளியா ச ஆவாபகேன ச. ஆவாபகோ நாம யத்த² லத்³த⁴ங் லத்³த⁴ங் ஆவபந்தி, பக்கி²பந்தீதி வுத்தங் ஹோதி. ந ச பி⁴க்க²வே நஹாபிதபுப்³பே³ன கு²ரப⁴ண்ட³ந்தி எத்த² க³ஹெத்வா பரிஹரிதுமேவ ந வட்டதி, அஞ்ஞஸ்ஸ ஸந்தகேன கேஸே சே²தே³துங் வட்டதி. ஸசே வேதனங் க³ஹெத்வா சி²ந்த³தி, ந வட்டதி. யோ அனஹாபிதபுப்³போ³ தஸ்ஸ பரிஹரிதும்பி வட்டதி, தங் வா அஞ்ஞங் வா க³ஹெத்வா கேஸே சே²தே³தும்பி வட்டதி.
303.Mañjukāti madhuravacanā. Paṭibhāneyyakāti sake sippe paṭibhānasampannā. Dakkhāti chekā, analasā vā. Pariyodātasippāti niddosasippā. Nāḷiyāvāpakenāti nāḷiyā ca āvāpakena ca. Āvāpako nāma yattha laddhaṃ laddhaṃ āvapanti, pakkhipantīti vuttaṃ hoti. Na ca bhikkhave nahāpitapubbena khurabhaṇḍanti ettha gahetvā pariharitumeva na vaṭṭati, aññassa santakena kese chedetuṃ vaṭṭati. Sace vetanaṃ gahetvā chindati, na vaṭṭati. Yo anahāpitapubbo tassa pariharitumpi vaṭṭati, taṃ vā aññaṃ vā gahetvā kese chedetumpi vaṭṭati.
304. பா⁴க³ங் த³த்வாதி த³ஸமபா⁴க³ங் த³த்வா; இத³ங் கிர ஜம்பு³தீ³பே போராணகசாரித்தங், தஸ்மா த³ஸகொட்டா²ஸே கத்வா ஏகோ கொட்டா²ஸோ பூ⁴மிஸாமிகானங் தா³தப்³போ³.
304.Bhāgaṃ datvāti dasamabhāgaṃ datvā; idaṃ kira jambudīpe porāṇakacārittaṃ, tasmā dasakoṭṭhāse katvā eko koṭṭhāso bhūmisāmikānaṃ dātabbo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
183. ரோஜமல்லவத்து² • 183. Rojamallavatthu
184. வுட்³ட⁴பப்³ப³ஜிதவத்து² • 184. Vuḍḍhapabbajitavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
ரோஜமல்லவத்து²கதா²வண்ணனா • Rojamallavatthukathāvaṇṇanā
வுட்³ட⁴பப்³ப³ஜிதவத்து²கதா²வண்ணனா • Vuḍḍhapabbajitavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ரோஜமல்லாதி³வத்து²கதா²வண்ணனா • Rojamallādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 183. ரோஜமல்லாதி³வத்து²கதா² • 183. Rojamallādivatthukathā
