| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১৮৩. রোজমল্লাদিৰত্থুকথা
183. Rojamallādivatthukathā
৩০১. সঙ্করমকংসূতি এত্থ সঙ্করসদ্দস্স যুদ্ধত্থাদীসু পৰত্তনতো ইধ পটিঞ্ঞাতত্থেতি দস্সেন্তো আহ ‘‘কতিকমকংসূ’’তি। কতিকন্তি পটিঞ্ঞাতসঙ্খাতং কতিকং। উল়ারং খোতি এত্থ উল়ারসদ্দো সেট্ঠৰাচকো। সেট্ঠন্তি চ সুন্দরমেৰাতি আহ ‘‘সুন্দরং খো তে ইদ’’ন্তি। তেতি তুয্হং। ‘‘বহুকতো’’তি পদস্স কতবহুমানোতি অত্থং দস্সেন্তো আহ ‘‘পসাদবহুমানেনা’’তি। ‘‘পিট্ঠমযংখাদনীয’’ন্তি ইমিনা পিট্ঠখাদনীযন্তি এত্থ মযসদ্দলোপং দস্সেতি।
301.Saṅkaramakaṃsūti ettha saṅkarasaddassa yuddhatthādīsu pavattanato idha paṭiññātattheti dassento āha ‘‘katikamakaṃsū’’ti. Katikanti paṭiññātasaṅkhātaṃ katikaṃ. Uḷāraṃ khoti ettha uḷārasaddo seṭṭhavācako. Seṭṭhanti ca sundaramevāti āha ‘‘sundaraṃ kho te ida’’nti. Teti tuyhaṃ. ‘‘Bahukato’’ti padassa katabahumānoti atthaṃ dassento āha ‘‘pasādabahumānenā’’ti. ‘‘Piṭṭhamayaṃkhādanīya’’nti iminā piṭṭhakhādanīyanti ettha mayasaddalopaṃ dasseti.
৩০৩. পটিভানেয্যকাতি এত্থ পটিভানে নিযুত্তা পটিভানেয্যকাতি দস্সেন্তো আহ ‘‘পটিভানসম্পন্না’’তি। ‘‘নিদ্দোসসিপ্পা’’তি ইমিনা পরিযোদাতসিপ্পাতি এত্থ পরিসমন্ততো ওদাতং সিপ্পং এতেসন্তি পরিযোদাতসিপ্পাতি অত্থং দস্সেতি। সিপ্পত্থিকেহি সিযতি সেৰিযতীতি সিপ্পং, সিপ্পিকানং হিতায সেতি পৰত্ততীতি ৰা সিপ্পং, ওট্ঠজো পঠমক্খরো। নাল়িযাৰাপকেনাতি পদস্স দ্ৰন্দভাৰং দস্সেন্তো আহ ‘‘নাল়িযা চেৰ আৰাপকেন চা’’তি। ইমিনা যকারো পদসন্ধিমত্তোতি দস্সেতি। ‘‘নাল়িযা ৰা পসিব্বকেনা’’তিপি পাঠো, সো অপাঠোযেৰ। কো আৰাপকো নামাতি আহ ‘‘আৰাপকো নাম যত্থা’’তিআদি। তত্থ যত্থাতি যস্মিং থৰিকে। ইমিনা আহরিত্ৰা যথালদ্ধং ৰপন্তি পক্খিপন্তি এত্থাতি আৰাপকোতি ৰচনত্থং দস্সেতি। ৰপ বীজনিক্খেপেতি ধাতুপাঠেসু (সদ্দনীতিধাতুমালাযং ১৫ পকারন্তধাতু) ৰুত্তং। ইধ পন পক্খিপনেতি দট্ঠব্বো। তেন ৰুত্তং ‘‘পক্খিপন্তী’’তি। পরিহরিতুমেৰাতি পরিগ্গহেত্ৰা হরিতুমেৰ। ৰেতনন্তি ভতিং। যোতি ভিক্খু। তং ৰাতি পরিহরিতখুরভণ্ডং ৰা। অঞ্ঞং ৰাতি অঞ্ঞস্স সন্তকং ৰা।
303.Paṭibhāneyyakāti ettha paṭibhāne niyuttā paṭibhāneyyakāti dassento āha ‘‘paṭibhānasampannā’’ti. ‘‘Niddosasippā’’ti iminā pariyodātasippāti ettha parisamantato odātaṃ sippaṃ etesanti pariyodātasippāti atthaṃ dasseti. Sippatthikehi siyati seviyatīti sippaṃ, sippikānaṃ hitāya seti pavattatīti vā sippaṃ, oṭṭhajo paṭhamakkharo. Nāḷiyāvāpakenāti padassa dvandabhāvaṃ dassento āha ‘‘nāḷiyā ceva āvāpakena cā’’ti. Iminā yakāro padasandhimattoti dasseti. ‘‘Nāḷiyā vā pasibbakenā’’tipi pāṭho, so apāṭhoyeva. Ko āvāpako nāmāti āha ‘‘āvāpako nāma yatthā’’tiādi. Tattha yatthāti yasmiṃ thavike. Iminā āharitvā yathāladdhaṃ vapanti pakkhipanti etthāti āvāpakoti vacanatthaṃ dasseti. Vapa bījanikkhepeti dhātupāṭhesu (saddanītidhātumālāyaṃ 15 pakārantadhātu) vuttaṃ. Idha pana pakkhipaneti daṭṭhabbo. Tena vuttaṃ ‘‘pakkhipantī’’ti. Pariharitumevāti pariggahetvā haritumeva. Vetananti bhatiṃ. Yoti bhikkhu. Taṃ vāti pariharitakhurabhaṇḍaṃ vā. Aññaṃ vāti aññassa santakaṃ vā.
৩০৪. ইদন্তি দসমভাগদানং। দস কোট্ঠাসেতি দস পটিৰীসে।
304.Idanti dasamabhāgadānaṃ. Dasa koṭṭhāseti dasa paṭivīse.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৮৩. রোজমল্লৰত্থু • 183. Rojamallavatthu
১৮৪. ৰুড্ঢপব্বজিতৰত্থু • 184. Vuḍḍhapabbajitavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / রোজমল্লাদিৰত্থুকথা • Rojamallādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
রোজমল্লৰত্থুকথাৰণ্ণনা • Rojamallavatthukathāvaṇṇanā
ৰুড্ঢপব্বজিতৰত্থুকথাৰণ্ণনা • Vuḍḍhapabbajitavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রোজমল্লাদিৰত্থুকথাৰণ্ণনা • Rojamallādivatthukathāvaṇṇanā
