| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
রোজমল্লৰত্থুকথাৰণ্ণনা
Rojamallavatthukathāvaṇṇanā
৩০১. রোজৰত্থুম্হি ৰিহারোতি গন্ধকুটিং সন্ধায আহংসু। অতরমানোতি অতুরন্তো, সণিকং পদপ্পমাণট্ঠানে পদং নিক্খিপন্তো ৰত্তং কত্ৰা সুসম্মট্ঠং মুত্তাদলসিন্দুৰারসন্থরসদিসং ৰালিকং অৰিনাসেন্তোতি অত্থো। আল়িন্দন্তি পমুখং। উক্কাসিত্ৰাতি উক্কাসিতসদ্দং কত্ৰা। অগ্গল়ন্তি কৰাটং। আকোটেহীতি অগ্গনখেন ঈসকং কুঞ্চিকছিদ্দসমীপে কোটেহীতি ৰুত্তং হোতি। দ্ৰারং কির অতিউপরি অমনুস্সা, অতিহেট্ঠা তিরচ্ছানজাতিকা কোটেন্তি, তথা অকোটেত্ৰা মজ্ঝে ছিদ্দসমীপে মনুস্সা কোটেন্তি, ইদং দ্ৰারকোটকৰত্তন্তি দীপেন্তা ৰদন্তি। ৰিৰরি ভগৰা দ্ৰারন্তি ন ভগৰা উট্ঠায দ্ৰারং ৰিৰরি, ৰিৰরতূতি পন হত্থং পসারেসি। ততো ‘‘ভগৰা তুম্হেহি অনেকাসু কপ্পকোটীসু দানং দদমানেহি ন সহত্থা দ্ৰারৰিৰরণকম্মং কত’’ন্তি সযমেৰ দ্ৰারং ৰিৰটং। তং পন যস্মা ভগৰতো মনেন ৰিৰটং, তস্মা ‘‘ৰিৰরি ভগৰা দ্ৰার’’ন্তি ৰুত্তং।
301. Rojavatthumhi vihāroti gandhakuṭiṃ sandhāya āhaṃsu. Ataramānoti aturanto, saṇikaṃ padappamāṇaṭṭhāne padaṃ nikkhipanto vattaṃ katvā susammaṭṭhaṃ muttādalasinduvārasantharasadisaṃ vālikaṃ avināsentoti attho. Āḷindanti pamukhaṃ. Ukkāsitvāti ukkāsitasaddaṃ katvā. Aggaḷanti kavāṭaṃ. Ākoṭehīti agganakhena īsakaṃ kuñcikachiddasamīpe koṭehīti vuttaṃ hoti. Dvāraṃ kira atiupari amanussā, atiheṭṭhā tiracchānajātikā koṭenti, tathā akoṭetvā majjhe chiddasamīpe manussā koṭenti, idaṃ dvārakoṭakavattanti dīpentā vadanti. Vivaribhagavā dvāranti na bhagavā uṭṭhāya dvāraṃ vivari, vivaratūti pana hatthaṃ pasāresi. Tato ‘‘bhagavā tumhehi anekāsu kappakoṭīsu dānaṃ dadamānehi na sahatthā dvāravivaraṇakammaṃ kata’’nti sayameva dvāraṃ vivaṭaṃ. Taṃ pana yasmā bhagavato manena vivaṭaṃ, tasmā ‘‘vivari bhagavā dvāra’’nti vuttaṃ.
রোজমল্লৰত্থুকথাৰণ্ণনা নিট্ঠিতা।
Rojamallavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৮৩. রোজমল্লৰত্থু • 183. Rojamallavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / রোজমল্লাদিৰত্থুকথা • Rojamallādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রোজমল্লাদিৰত্থুকথাৰণ্ণনা • Rojamallādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮৩. রোজমল্লাদিৰত্থুকথা • 183. Rojamallādivatthukathā
