Library / Tipiṭaka / ਤਿਪਿਟਕ • Tipiṭaka / ਜਾਤਕ-ਅਟ੍ਠਕਥਾ • Jātaka-aṭṭhakathā

    [੨੭੭] ੭. ਰੋਮਕਜਾਤਕવਣ੍ਣਨਾ

    [277] 7. Romakajātakavaṇṇanā

    વਸ੍ਸਾਨਿ ਪਞ੍ਞਾਸ ਸਮਾਧਿਕਾਨੀਤਿ ਇਦਂ ਸਤ੍ਥਾ વੇਲ਼ੁવਨੇ વਿਹਰਨ੍ਤੋ ਭਗવਤੋ વਧਾਯ ਪਰਿਸਕ੍ਕਨਂ ਆਰਬ੍ਭ ਕਥੇਸਿ। ਪਚ੍ਚੁਪ੍ਪਨ੍ਨવਤ੍ਥੁ ਉਤ੍ਤਾਨਮੇવ।

    Vassānipaññāsa samādhikānīti idaṃ satthā veḷuvane viharanto bhagavato vadhāya parisakkanaṃ ārabbha kathesi. Paccuppannavatthu uttānameva.

    ਅਤੀਤੇ ਪਨ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਪਾਰਾવਤੋ ਹੁਤ੍વਾ ਬਹੁਪਾਰਾવਤਪਰਿવੁਤੋ ਅਰਞ੍ਞੇ ਪਬ੍ਬਤਗੁਹਾਯਂ વਾਸਂ ਕਪ੍ਪੇਸਿ। ਅਞ੍ਞਤਰੋਪਿ ਖੋ ਤਾਪਸੋ ਸੀਲਸਮ੍ਪਨ੍ਨੋ ਤੇਸਂ ਪਾਰਾવਤਾਨਂ વਸਨਟ੍ਠਾਨਤੋ ਅવਿਦੂਰੇ ਏਕਂ ਪਚ੍ਚਨ੍ਤਗਾਮਂ ਉਪਨਿਸ੍ਸਾਯ ਅਸ੍ਸਮਪਦਂ ਮਾਪੇਤ੍વਾ ਪਬ੍ਬਤਗੁਹਾਯਂ વਾਸਂ ਕਪ੍ਪੇਸਿ। ਬੋਧਿਸਤ੍ਤੋ ਅਨ੍ਤਰਨ੍ਤਰਾ ਤਸ੍ਸ ਸਨ੍ਤਿਕਂ ਆਗਨ੍ਤ੍વਾ ਸੋਤਬ੍ਬਯੁਤ੍ਤਕਂ ਸੁਣਾਤਿ। ਤਾਪਸੋ ਤਤ੍ਥ ਚਿਰਂ વਸਿਤ੍વਾ ਪਕ੍ਕਾਮਿ, ਅਥਞ੍ਞੋ ਕੂਟਜਟਿਲੋ ਆਗਨ੍ਤ੍વਾ ਤਤ੍ਥ વਾਸਂ ਕਪ੍ਪੇਸਿ। ਬੋਧਿਸਤ੍ਤੋ ਪਾਰਾવਤਪਰਿવੁਤੋ ਤਂ ਉਪਸਙ੍ਕਮਿਤ੍વਾ વਨ੍ਦਿਤ੍વਾ ਪਟਿਸਨ੍ਥਾਰਂ ਕਤ੍વਾ ਅਸ੍ਸਮਪਦੇ વਿਚਰਿਤ੍વਾ ਗਿਰਿਕਨ੍ਦਰਸਮੀਪੇ ਗੋਚਰਂ ਗਹੇਤ੍વਾ ਸਾਯਂ ਅਤ੍ਤਨੋ વਸਨਟ੍ਠਾਨਂ ਗਚ੍ਛਤਿ। ਕੂਟਤਾਪਸੋ ਤਤ੍ਥ ਅਤਿਰੇਕਪਣ੍ਣਾਸવਸ੍ਸਾਨਿ વਸਿ।

    Atīte pana bārāṇasiyaṃ brahmadatte rajjaṃ kārente bodhisatto pārāvato hutvā bahupārāvataparivuto araññe pabbataguhāyaṃ vāsaṃ kappesi. Aññataropi kho tāpaso sīlasampanno tesaṃ pārāvatānaṃ vasanaṭṭhānato avidūre ekaṃ paccantagāmaṃ upanissāya assamapadaṃ māpetvā pabbataguhāyaṃ vāsaṃ kappesi. Bodhisatto antarantarā tassa santikaṃ āgantvā sotabbayuttakaṃ suṇāti. Tāpaso tattha ciraṃ vasitvā pakkāmi, athañño kūṭajaṭilo āgantvā tattha vāsaṃ kappesi. Bodhisatto pārāvataparivuto taṃ upasaṅkamitvā vanditvā paṭisanthāraṃ katvā assamapade vicaritvā girikandarasamīpe gocaraṃ gahetvā sāyaṃ attano vasanaṭṭhānaṃ gacchati. Kūṭatāpaso tattha atirekapaṇṇāsavassāni vasi.

    ਅਥਸ੍ਸ ਏਕਦਿવਸਂ ਪਚ੍ਚਨ੍ਤਗਾਮવਾਸਿਨੋ ਮਨੁਸ੍ਸਾ ਪਾਰਾવਤਮਂਸਂ ਅਭਿਸਙ੍ਖਰਿਤ੍વਾ ਅਦਂਸੁ। ਸੋ ਤਤ੍ਥ ਰਸਤਣ੍ਹਾਯ ਬਜ੍ਝਿਤ੍વਾ ‘‘ਕਿਂ ਮਂਸਂ ਨਾਮੇਤ’’ਨ੍ਤਿ ਪੁਚ੍ਛਿਤ੍વਾ ‘‘ਪਾਰਾવਤਮਂਸ’’ਨ੍ਤਿ ਸੁਤ੍વਾ ਚਿਨ੍ਤੇਸਿ – ‘‘ਮਯ੍ਹਂ ਅਸ੍ਸਮਪਦਂ ਬਹੂ ਪਾਰਾવਤਾ ਆਗਚ੍ਛਨ੍ਤਿ, ਤੇ ਮਾਰੇਤ੍વਾ ਮਂਸਂ ਖਾਦਿਤੁਂ વਟ੍ਟਤੀ’’ਤਿ। ਸੋ ਤਣ੍ਡੁਲਸਪ੍ਪਿਦਧਿਖੀਰਮਰਿਚਾਦੀਨਿ ਆਹਰਿਤ੍વਾ ਏਕਮਨ੍ਤੇ ਠਪੇਤ੍વਾ ਮੁਗ੍ਗਰਂ ਚੀવਰਕਣ੍ਣੇਨ ਪਟਿਚ੍ਛਾਦੇਤ੍વਾ ਪਾਰਾવਤਾਨਂ ਆਗਮਨਂ ਓਲੋਕੇਨ੍ਤੋ ਪਣ੍ਣਸਾਲਦ੍વਾਰੇ ਨਿਸੀਦਿ। ਬੋਧਿਸਤ੍ਤੋ ਪਾਰਾવਤਪਰਿવੁਤੋ ਆਗਨ੍ਤ੍વਾ ਤਸ੍ਸ ਕੂਟਜਟਿਲਸ੍ਸ ਦੁਟ੍ਠਕਿਰਿਯਂ ਓਲੋਕੇਤ੍વਾ ‘‘ਅਯਂ ਦੁਟ੍ਠਤਾਪਸੋ ਅਞ੍ਞੇਨਾਕਾਰੇਨ ਨਿਸਿਨ੍ਨੋ, ਕਚ੍ਚਿ ਨੁ ਖੋ ਅਮ੍ਹਾਕਂ ਸਮਾਨਜਾਤੀਨਂ ਮਂਸਂ ਖਾਦਿ, ਪਰਿਗਣ੍ਹਿਸ੍ਸਾਮਿ ਨ’’ਨ੍ਤਿ ਅਨੁવਾਤੇ ਠਤ੍વਾ ਤਸ੍ਸ ਸਰੀਰਗਨ੍ਧਂ ਘਾਯਿਤ੍વਾ ‘‘ਅਯਂ ਅਮ੍ਹੇ ਮਾਰੇਤ੍વਾ ਮਂਸਂ ਖਾਦਿਤੁਕਾਮੋ, ਨ ਤਸ੍ਸ ਸਨ੍ਤਿਕਂ ਗਨ੍ਤੁਂ વਟ੍ਟਤੀ’’ਤਿ ਪਾਰਾવਤੇ ਆਦਾਯ ਪਟਿਕ੍ਕਮਿਤ੍વਾ ਚਰਿ। ਤਾਪਸੋ ਤਂ ਅਨਾਗਚ੍ਛਨ੍ਤਂ ਦਿਸ੍વਾ ‘‘ਮਧੁਰਕਥਂ ਤੇਹਿ ਸਦ੍ਧਿਂ ਕਥੇਤ੍વਾ વਿਸ੍ਸਾਸੇਨ ਉਪਗਤੇ ਮਾਰੇਤ੍વਾ ਮਂਸਂ ਖਾਦਿਤੁਂ વਟ੍ਟਤੀ’’ਤਿ ਚਿਨ੍ਤੇਤ੍વਾ ਪੁਰਿਮਾ ਦ੍વੇ ਗਾਥਾ ਅવੋਚ –

    Athassa ekadivasaṃ paccantagāmavāsino manussā pārāvatamaṃsaṃ abhisaṅkharitvā adaṃsu. So tattha rasataṇhāya bajjhitvā ‘‘kiṃ maṃsaṃ nāmeta’’nti pucchitvā ‘‘pārāvatamaṃsa’’nti sutvā cintesi – ‘‘mayhaṃ assamapadaṃ bahū pārāvatā āgacchanti, te māretvā maṃsaṃ khādituṃ vaṭṭatī’’ti. So taṇḍulasappidadhikhīramaricādīni āharitvā ekamante ṭhapetvā muggaraṃ cīvarakaṇṇena paṭicchādetvā pārāvatānaṃ āgamanaṃ olokento paṇṇasāladvāre nisīdi. Bodhisatto pārāvataparivuto āgantvā tassa kūṭajaṭilassa duṭṭhakiriyaṃ oloketvā ‘‘ayaṃ duṭṭhatāpaso aññenākārena nisinno, kacci nu kho amhākaṃ samānajātīnaṃ maṃsaṃ khādi, parigaṇhissāmi na’’nti anuvāte ṭhatvā tassa sarīragandhaṃ ghāyitvā ‘‘ayaṃ amhe māretvā maṃsaṃ khāditukāmo, na tassa santikaṃ gantuṃ vaṭṭatī’’ti pārāvate ādāya paṭikkamitvā cari. Tāpaso taṃ anāgacchantaṃ disvā ‘‘madhurakathaṃ tehi saddhiṃ kathetvā vissāsena upagate māretvā maṃsaṃ khādituṃ vaṭṭatī’’ti cintetvā purimā dve gāthā avoca –

    ੭੯.

    79.

    ‘‘વਸ੍ਸਾਨਿ ਪਞ੍ਞਾਸ ਸਮਾਧਿਕਾਨਿ, વਸਿਮ੍ਹ ਸੇਲਸ੍ਸ ਗੁਹਾਯ ਰੋਮਕ।

    ‘‘Vassāni paññāsa samādhikāni, vasimha selassa guhāya romaka;

    ਅਸਙ੍ਕਮਾਨਾ ਅਭਿਨਿਬ੍ਬੁਤਤ੍ਤਾ, ਹਤ੍ਥਤ੍ਤਮਾਯਨ੍ਤਿ ਮਮਣ੍ਡਜਾ ਪੁਰੇ॥

    Asaṅkamānā abhinibbutattā, hatthattamāyanti mamaṇḍajā pure.

    ੮੦.

    80.

    ‘‘ਤੇਦਾਨਿ વਕ੍ਕਙ੍ਗ ਕਿਮਤ੍ਥਮੁਸ੍ਸੁਕਾ, ਭਜਨ੍ਤਿ ਅਞ੍ਞਂ ਗਿਰਿਕਨ੍ਦਰਂ ਦਿਜਾ।

    ‘‘Tedāni vakkaṅga kimatthamussukā, bhajanti aññaṃ girikandaraṃ dijā;

    ਨ ਨੂਨ ਮਞ੍ਞਨ੍ਤਿ ਮਮਂ ਯਥਾ ਪੁਰੇ, ਚਿਰਪ੍ਪવੁਤ੍ਥਾ ਅਥ વਾ ਨ ਤੇ ਇਮੇ’’ਤਿ॥

    Na nūna maññanti mamaṃ yathā pure, cirappavutthā atha vā na te ime’’ti.

    ਤਤ੍ਥ ਸਮਾਧਿਕਾਨੀਤਿ ਸਮਅਧਿਕਾਨਿ। ਰੋਮਕਾਤਿ ਰੁਮਾਯ ਉਪ੍ਪਨ੍ਨ, ਸੁਧੋਤਪવਾਲ਼ੇਨ ਸਮਾਨવਣ੍ਣਨੇਤ੍ਤਪਾਦਤਾਯ ਬੋਧਿਸਤ੍ਤਂ ਪਾਰਾવਤਂ ਆਲਪਤਿ। ਅਸਙ੍ਕਮਾਨਾਤਿ ਏવਂ ਅਤਿਰੇਕਪਞ੍ਞਾਸવਸ੍ਸਾਨਿ ਇਮਿਸ੍ਸਾ ਪਬ੍ਬਤਗੁਹਾਯ વਸਨ੍ਤੇਸੁ ਅਮ੍ਹੇਸੁ ਏਤੇ ਅਣ੍ਡਜਾ ਏਕਦਿવਸਮ੍ਪਿ ਮਯਿ ਆਸਙ੍ਕਂ ਅਕਤ੍વਾ ਅਭਿਨਿਬ੍ਬੁਤਚਿਤ੍ਤਾવ ਹੁਤ੍વਾ ਪੁਬ੍ਬੇ ਮਮ ਹਤ੍ਥਤ੍ਤਂ ਹਤ੍ਥਪ੍ਪਸਾਰਣੋਕਾਸਂ ਆਗਚ੍ਛਨ੍ਤੀਤਿ ਅਤ੍ਥੋ।

    Tattha samādhikānīti samaadhikāni. Romakāti rumāya uppanna, sudhotapavāḷena samānavaṇṇanettapādatāya bodhisattaṃ pārāvataṃ ālapati. Asaṅkamānāti evaṃ atirekapaññāsavassāni imissā pabbataguhāya vasantesu amhesu ete aṇḍajā ekadivasampi mayi āsaṅkaṃ akatvā abhinibbutacittāva hutvā pubbe mama hatthattaṃ hatthappasāraṇokāsaṃ āgacchantīti attho.

    ਤੇਦਾਨੀਤਿ ਤੇ ਇਦਾਨਿ। વਕ੍ਕਙ੍ਗਾਤਿ ਬੋਧਿਸਤ੍ਤਂ ਆਲਪਤਿ, ਸਬ੍ਬੇਪਿ ਪਨ ਪਕ੍ਖਿਨੋ ਉਪ੍ਪਤਨਕਾਲੇ ਗੀવਂ વਕ੍ਕਂ ਕਤ੍વਾ ਉਪ੍ਪਤਨਤੋ ‘‘વਕ੍ਕਙ੍ਗਾ’’ਤਿ વੁਚ੍ਚਨ੍ਤਿ। ਕਿਮਤ੍ਥਨ੍ਤਿ ਕਿਂਕਾਰਣਂ ਸਮ੍ਪਸ੍ਸਮਾਨਾ? ਉਸ੍ਸੁਕਾਤਿ ਉਕ੍ਕਣ੍ਠਿਤਰੂਪਾ ਹੁਤ੍વਾ। ਗਿਰਿਕਨ੍ਦਰਨ੍ਤਿ ਗਿਰਿਤੋ ਅਞ੍ਞਂ ਪਬ੍ਬਤਕਨ੍ਦਰਂ। ਯਥਾ ਪੁਰੇਤਿ ਯਥਾ ਪੁਬ੍ਬੇ ਏਤੇ ਪਕ੍ਖਿਨੋ ਮਂ ਗਰੁਂ ਕਤ੍વਾ ਪਿਯਂ ਕਤ੍વਾ ਮਞ੍ਞਨ੍ਤਿ, ਤਥਾ ਇਦਾਨਿ ਨ ਨੂਨ ਮਞ੍ਞਨ੍ਤਿ, ਪੁਬ੍ਬੇ ਇਧ ਨਿવੁਤ੍ਥਤਾਪਸੋ ਅਞ੍ਞੋ, ਅਯਂ ਅਞ੍ਞੋ, ਏવਂ ਮਞ੍ਞੇ ਏਤੇ ਮਂ ਮਞ੍ਞਨ੍ਤੀਤਿ ਦੀਪੇਤਿ। ਚਿਰਪ੍ਪવੁਤ੍ਥਾ ਅਥ વਾ ਨ ਤੇ ਇਮੇਤਿ ਕਿਂ ਨੁ ਖੋ ਇਮੇ ਚਿਰਂ વਿਪ੍ਪવਸਿਤ੍વਾ ਦੀਘਸ੍ਸ ਅਦ੍ਧੁਨੋ ਅਚ੍ਚਯੇਨ ਆਗਤਤ੍ਤਾ ਮਂ ‘‘ਸੋਯੇવ ਅਯ’’ਨ੍ਤਿ ਨ ਸਞ੍ਜਾਨਨ੍ਤਿ, ਉਦਾਹੁ ਯੇ ਅਮ੍ਹੇਸੁ ਅਭਿਨਿਬ੍ਬੁਤਚਿਤ੍ਤਾ, ਨ ਤੇ ਇਮੇ, ਅਞ੍ਞੇવ ਆਗਨ੍ਤੁਕਪਕ੍ਖਿਨੋ, ਇਮੇ ਕੇਨ ਮਂ ਨ ਉਪਸਙ੍ਕਮਨ੍ਤੀਤਿ ਪੁਚ੍ਛਤਿ।

    Tedānīti te idāni. Vakkaṅgāti bodhisattaṃ ālapati, sabbepi pana pakkhino uppatanakāle gīvaṃ vakkaṃ katvā uppatanato ‘‘vakkaṅgā’’ti vuccanti. Kimatthanti kiṃkāraṇaṃ sampassamānā? Ussukāti ukkaṇṭhitarūpā hutvā. Girikandaranti girito aññaṃ pabbatakandaraṃ. Yathā pureti yathā pubbe ete pakkhino maṃ garuṃ katvā piyaṃ katvā maññanti, tathā idāni na nūna maññanti, pubbe idha nivutthatāpaso añño, ayaṃ añño, evaṃ maññe ete maṃ maññantīti dīpeti. Cirappavutthā atha vā na te imeti kiṃ nu kho ime ciraṃ vippavasitvā dīghassa addhuno accayena āgatattā maṃ ‘‘soyeva aya’’nti na sañjānanti, udāhu ye amhesu abhinibbutacittā, na te ime, aññeva āgantukapakkhino, ime kena maṃ na upasaṅkamantīti pucchati.

    ਤਂ ਸੁਤ੍વਾ ਬੋਧਿਸਤ੍ਤੋ ਪਕ੍ਕਮਿਤ੍વਾ ਠਿਤੋવ ਤਤਿਯਂ ਗਾਥਮਾਹ –

    Taṃ sutvā bodhisatto pakkamitvā ṭhitova tatiyaṃ gāthamāha –

    ੮੧.

    81.

    ‘‘ਜਾਨਾਮ ਤਂ ਨ ਮਯਂ ਸਮ੍ਪਮੂਲ਼੍ਹਾ, ਸੋਯੇવ ਤ੍વਂ ਤੇ ਮਯਮਸ੍ਮ ਨਾਞ੍ਞੇ।

    ‘‘Jānāma taṃ na mayaṃ sampamūḷhā, soyeva tvaṃ te mayamasma nāññe;

    ਚਿਤ੍ਤਞ੍ਚ ਤੇ ਅਸ੍ਮਿਂ ਜਨੇ ਪਦੁਟ੍ਠਂ, ਆਜੀવਿਕਾ ਤੇਨ ਤਮੁਤ੍ਤਸਾਮਾ’’ਤਿ॥

    Cittañca te asmiṃ jane paduṭṭhaṃ, ājīvikā tena tamuttasāmā’’ti.

    ਤਤ੍ਥ ਨ ਮਯਂ ਸਮ੍ਪਮੂਲ਼੍ਹਾਤਿ ਮਯਂ ਮੂਲ਼੍ਹਾ ਪਮਤ੍ਤਾ ਨ ਹੋਮ। ਚਿਤ੍ਤਞ੍ਚ ਤੇ ਅਸ੍ਮਿਂ ਜਨੇ ਪਦੁਟ੍ਠਨ੍ਤਿ ਤ੍વਂ, ਸੋਯੇવ ਮਯਮ੍ਪਿ ਤੇਯੇવ, ਨ ਤਂ ਸਞ੍ਜਾਨਾਮ, ਅਪਿਚ ਖੋ ਪਨ ਤવ ਚਿਤ੍ਤਂ ਅਸ੍ਮਿਂ ਜਨੇ ਪਦੁਟ੍ਠਂ ਅਮ੍ਹੇ ਮਾਰੇਤੁਂ ਉਪ੍ਪਨ੍ਨਂ। ਆਜੀવਿਕਾਤਿ ਆਜੀવਹੇਤੁ ਪਬ੍ਬਜਿਤ ਪਦੁਟ੍ਠਤਾਪਸ। ਤੇਨ ਤਮੁਤ੍ਤਸਾਮਾਤਿ ਤੇਨ ਕਾਰਣੇਨ ਤਂ ਉਤ੍ਤਸਾਮ ਭਾਯਾਮ ਨ ਉਪਸਙ੍ਕਮਾਮ।

    Tattha na mayaṃ sampamūḷhāti mayaṃ mūḷhā pamattā na homa. Cittañca te asmiṃ jane paduṭṭhanti tvaṃ, soyeva mayampi teyeva, na taṃ sañjānāma, apica kho pana tava cittaṃ asmiṃ jane paduṭṭhaṃ amhe māretuṃ uppannaṃ. Ājīvikāti ājīvahetu pabbajita paduṭṭhatāpasa. Tena tamuttasāmāti tena kāraṇena taṃ uttasāma bhāyāma na upasaṅkamāma.

    ਕੂਟਤਾਪਸੋ ‘‘ਞਾਤੋ ਅਹਂ ਇਮੇਹੀ’’ਤਿ ਮੁਗ੍ਗਰਂ ਖਿਪਿਤ੍વਾ વਿਰਜ੍ਝਿਤ੍વਾ ‘‘ਗਚ੍ਛ ਤਾવ ਤ੍વਂ વਿਰਦ੍ਧੋਮ੍ਹੀ’’ਤਿ ਆਹ। ਅਥ ਨਂ ਬੋਧਿਸਤ੍ਤੋ ‘‘ਮਂ ਤਾવ વਿਰਦ੍ਧੋਸਿ, ਚਤ੍ਤਾਰੋ ਪਨ ਅਪਾਯੇ ਨ વਿਰਜ੍ਝਸਿ। ਸਚੇ ਇਧ વਸਿਸ੍ਸਸਿ, ਗਾਮવਾਸੀਨਂ ‘ਚੋਰੋ ਅਯ’ਨ੍ਤਿ ਆਚਿਕ੍ਖਿਤ੍વਾ ਤਂ ਗਾਹਾਪੇਸ੍ਸਾਮਿ ਸੀਘਂ ਪਲਾਯਸ੍ਸੂ’’ਤਿ ਤਂ ਤਜ੍ਜੇਤ੍વਾ ਪਕ੍ਕਾਮਿ। ਕੂਟਜਟਿਲੋ ਤਤ੍ਥ વਸਿਤੁਂ ਨਾਸਕ੍ਖਿ, ਅਞ੍ਞਤ੍ਥ ਅਗਮਾਸਿ।

    Kūṭatāpaso ‘‘ñāto ahaṃ imehī’’ti muggaraṃ khipitvā virajjhitvā ‘‘gaccha tāva tvaṃ viraddhomhī’’ti āha. Atha naṃ bodhisatto ‘‘maṃ tāva viraddhosi, cattāro pana apāye na virajjhasi. Sace idha vasissasi, gāmavāsīnaṃ ‘coro aya’nti ācikkhitvā taṃ gāhāpessāmi sīghaṃ palāyassū’’ti taṃ tajjetvā pakkāmi. Kūṭajaṭilo tattha vasituṃ nāsakkhi, aññattha agamāsi.

    ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍વਾ ਸਚ੍ਚਾਨਿ ਪਕਾਸੇਤ੍વਾ ਜਾਤਕਂ ਸਮੋਧਾਨੇਸਿ – ‘‘ਤਦਾ ਕੂਟਤਾਪਸੋ ਦੇવਦਤ੍ਤੋ ਅਹੋਸਿ, ਪੁਰਿਮੋ ਸੀਲવਨ੍ਤਤਾਪਸੋ ਸਾਰਿਪੁਤ੍ਤੋ, ਪਾਰਾવਤਜੇਟ੍ਠਕੋ ਪਨ ਅਹਮੇવ ਅਹੋਸਿ’’ਨ੍ਤਿ।

    Satthā imaṃ dhammadesanaṃ āharitvā saccāni pakāsetvā jātakaṃ samodhānesi – ‘‘tadā kūṭatāpaso devadatto ahosi, purimo sīlavantatāpaso sāriputto, pārāvatajeṭṭhako pana ahameva ahosi’’nti.

    ਰੋਮਕਜਾਤਕવਣ੍ਣਨਾ ਸਤ੍ਤਮਾ।

    Romakajātakavaṇṇanā sattamā.







    Related texts:



    ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਜਾਤਕਪਾਲ਼ਿ • Jātakapāḷi / ੨੭੭. ਰੋਮਕਜਾਤਕਂ • 277. Romakajātakaṃ


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact