| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. රුක්‌ඛසුත්‌තං
4. Rukkhasuttaṃ
152. ‘‘සෙය්‍යථාපි, භික්‌ඛවෙ, රුක්‌ඛො පාචීනනින්‌නො පාචීනපොණො පාචීනපබ්‌භාරො. සො මූලච්‌ඡින්‌නො 1 කතමෙන පපතෙය්‍යා’’ති? ‘‘යෙන , භන්‌තෙ, නින්‌නො යෙන පොණො යෙන පබ්‌භාරො’’ති. ‘‘එවමෙව ඛො, භික්‌ඛවෙ, භික්‌ඛු අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො නිබ්‌බානනින්‌නො හොති නිබ්‌බානපොණො නිබ්‌බානපබ්‌භාරො. කථඤ්‌ච, භික්‌ඛවෙ, භික්‌ඛු අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො නිබ්‌බානනින්‌නො හොති නිබ්‌බානපොණො නිබ්‌බානපබ්‌භාරො? ඉධ, භික්‌ඛවෙ, භික්‌ඛු සම්‌මාදිට්‌ඨිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… සම්‌මාසමාධිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… එවං ඛො, භික්‌ඛවෙ, භික්‌ඛු අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො නිබ්‌බානනින්‌නො හොති නිබ්‌බානපොණො නිබ්‌බානපබ්‌භාරො’’ති. චතුත්‌ථං.
152. ‘‘Seyyathāpi, bhikkhave, rukkho pācīnaninno pācīnapoṇo pācīnapabbhāro. So mūlacchinno 2 katamena papateyyā’’ti? ‘‘Yena , bhante, ninno yena poṇo yena pabbhāro’’ti. ‘‘Evameva kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro’’ti. Catutthaṃ.
Footnotes:
