| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. රුක්‌ඛසුත්‌තං
9. Rukkhasuttaṃ
220. ‘‘සන්‌ති, භික්‌ඛවෙ, මහාරුක්‌ඛා අණුබීජා මහාකායා රුක්‌ඛානං අජ්‌ඣාරුහා, යෙහි රුක්‌ඛා අජ්‌ඣාරූළ්‌හා ඔභග්‌ගවිභග්‌ගා විපතිතා සෙන්‌ති. කතමෙ ච තෙ, භික්‌ඛවෙ, මහාරුක්‌ඛා අණුබීජා මහාකායා රුක්‌ඛානං අජ්‌ඣාරුහා, යෙහි රුක්‌ඛා අජ්‌ඣාරූළ්‌හා ඔභග්‌ගවිභග්‌ගා විපතිතා සෙන්‌ති 1? අස්‌සත්‌ථො, නිග්‍රොධො, පිලක්‌ඛො, උදුම්‌බරො, කච්‌ඡකො, කපිත්‌ථනො – ඉමෙ ඛො තෙ, භික්‌ඛවෙ, මහාරුක්‌ඛා අණුබීජා මහාකායා රුක්‌ඛානං අජ්‌ඣාරුහා, යෙහි රුක්‌ඛා අජ්‌ඣාරූළ්‌හා ඔභග්‌ගවිභග්‌ගා විපතිතා සෙන්‌ති. එවමෙව ඛො, භික්‌ඛවෙ, ඉධෙකච්‌චො කුලපුත්‌තො යාදිසකෙ කාමෙ ඔහාය අගාරස්‌මා අනගාරියං පබ්‌බජිතො හොති, සො තාදිසකෙහි කාමෙහි තතො වා පාපිට්‌ඨතරෙහි ඔභග්‌ගවිභග්‌ගො විපතිතො සෙති.
220. ‘‘Santi, bhikkhave, mahārukkhā aṇubījā mahākāyā rukkhānaṃ ajjhāruhā, yehi rukkhā ajjhārūḷhā obhaggavibhaggā vipatitā senti. Katame ca te, bhikkhave, mahārukkhā aṇubījā mahākāyā rukkhānaṃ ajjhāruhā, yehi rukkhā ajjhārūḷhā obhaggavibhaggā vipatitā senti 2? Assattho, nigrodho, pilakkho, udumbaro, kacchako, kapitthano – ime kho te, bhikkhave, mahārukkhā aṇubījā mahākāyā rukkhānaṃ ajjhāruhā, yehi rukkhā ajjhārūḷhā obhaggavibhaggā vipatitā senti. Evameva kho, bhikkhave, idhekacco kulaputto yādisake kāme ohāya agārasmā anagāriyaṃ pabbajito hoti, so tādisakehi kāmehi tato vā pāpiṭṭhatarehi obhaggavibhaggo vipatito seti.
‘‘පඤ්‌චිමෙ, භික්‌ඛවෙ, ආවරණා නීවරණා චෙතසො අජ්‌ඣාරුහා පඤ්‌ඤාය දුබ්‌බලීකරණා. කතමෙ පඤ්‌ච? කාමච්‌ඡන්‌දො, භික්‌ඛවෙ, ආවරණො නීවරණො චෙතසො අජ්‌ඣාරුහො පඤ්‌ඤාය දුබ්‌බලීකරණො. බ්‍යාපාදො, භික්‌ඛවෙ, ආවරණො නීවරණො චෙතසො අජ්‌ඣාරුහො පඤ්‌ඤාය දුබ්‌බලීකරණො. ථිනමිද්‌ධං, භික්‌ඛවෙ, ආවරණං නීවරණං චෙතසො අජ්‌ඣාරුහං පඤ්‌ඤාය දුබ්‌බලීකරණං. උද්‌ධච්‌චකුක්‌කුච්‌චං, භික්‌ඛවෙ, ආවරණං නීවරණං චෙතසො අජ්‌ඣාරුහං පඤ්‌ඤාය දුබ්‌බලීකරණං. විචිකිච්‌ඡා, භික්‌ඛවෙ, ආවරණා නීවරණා චෙතසො අජ්‌ඣාරුහා පඤ්‌ඤාය දුබ්‌බලීකරණා. ඉමෙ ඛො, භික්‌ඛවෙ , පඤ්‌ච ආවරණා නීවරණා චෙතසො අජ්‌ඣාරුහා පඤ්‌ඤාය දුබ්‌බලීකරණා.
‘‘Pañcime, bhikkhave, āvaraṇā nīvaraṇā cetaso ajjhāruhā paññāya dubbalīkaraṇā. Katame pañca? Kāmacchando, bhikkhave, āvaraṇo nīvaraṇo cetaso ajjhāruho paññāya dubbalīkaraṇo. Byāpādo, bhikkhave, āvaraṇo nīvaraṇo cetaso ajjhāruho paññāya dubbalīkaraṇo. Thinamiddhaṃ, bhikkhave, āvaraṇaṃ nīvaraṇaṃ cetaso ajjhāruhaṃ paññāya dubbalīkaraṇaṃ. Uddhaccakukkuccaṃ, bhikkhave, āvaraṇaṃ nīvaraṇaṃ cetaso ajjhāruhaṃ paññāya dubbalīkaraṇaṃ. Vicikicchā, bhikkhave, āvaraṇā nīvaraṇā cetaso ajjhāruhā paññāya dubbalīkaraṇā. Ime kho, bhikkhave , pañca āvaraṇā nīvaraṇā cetaso ajjhāruhā paññāya dubbalīkaraṇā.
‘‘සත්‌තිමෙ , භික්‌ඛවෙ, බොජ්‌ඣඞ්‌ගා අනාවරණා අනීවරණා චෙතසො අනජ්‌ඣාරුහා භාවිතා බහුලීකතා විජ්‌ජාවිමුත්‌තිඵලසච්‌ඡිකිරියාය සංවත්‌තන්‌ති. කතමෙ සත්‌ත? සතිසම්‌බොජ්‌ඣඞ්‌ගො, භික්‌ඛවෙ, අනාවරණො අනීවරණො චෙතසො අනජ්‌ඣාරුහො භාවිතො බහුලීකතො විජ්‌ජාවිමුත්‌තිඵලසච්‌ඡිකිරියාය සංවත්‌තති…පෙ.… උපෙක්‌ඛාසම්‌බොජ්‌ඣඞ්‌ගො, භික්‌ඛවෙ, අනාවරණො අනීවරණො චෙතසො අනජ්‌ඣාරුහො භාවිතො බහුලීකතො විජ්‌ජාවිමුත්‌තිඵලසච්‌ඡිකිරියාය සංවත්‌තති. ඉමෙ ඛො, භික්‌ඛවෙ, සත්‌ත බොජ්‌ඣඞ්‌ගා අනාවරණා අනීවරණා චෙතසො අනජ්‌ඣාරුහා භාවිතා බහුලීකතා විජ්‌ජාවිමුත්‌තිඵලසච්‌ඡිකිරියාය සංවත්‌තන්‌තී’’ති. නවමං.
‘‘Sattime , bhikkhave, bojjhaṅgā anāvaraṇā anīvaraṇā cetaso anajjhāruhā bhāvitā bahulīkatā vijjāvimuttiphalasacchikiriyāya saṃvattanti. Katame satta? Satisambojjhaṅgo, bhikkhave, anāvaraṇo anīvaraṇo cetaso anajjhāruho bhāvito bahulīkato vijjāvimuttiphalasacchikiriyāya saṃvattati…pe… upekkhāsambojjhaṅgo, bhikkhave, anāvaraṇo anīvaraṇo cetaso anajjhāruho bhāvito bahulīkato vijjāvimuttiphalasacchikiriyāya saṃvattati. Ime kho, bhikkhave, satta bojjhaṅgā anāvaraṇā anīvaraṇā cetaso anajjhāruhā bhāvitā bahulīkatā vijjāvimuttiphalasacchikiriyāya saṃvattantī’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. රුක්‌ඛසුත්‌තවණ්‌ණනා • 9. Rukkhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. රුක්‌ඛසුත්‌තවණ්‌ණනා • 9. Rukkhasuttavaṇṇanā
