| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. ရုဏ္ဏသုတ္တဝဏ္ဏနာ
5. Ruṇṇasuttavaṇṇanā
၁၀၈. ပဉ္စမံ အတ္ထုပ္ပတ္တိယာ နိက္ခိတ္တံ။ ကတရာယ အတ္ထုပ္ပတ္တိယာ? ဆဗ္ဗဂ္ဂိယာနံ အနာစာရေ။ တေ ကိရ ဂာယန္တာ နစ္စန္တာ ဟသန္တာ ဝိစရိံသု။ ဘိက္ခူ ဒသဗလသ္သ အာရောစယိံသု။ သတ္ထာ တေ ပက္ကောသာပေတ္ဝာ တေသံ ဩဝာဒတ္ထာယ ဣဒံ သုတ္တံ အာရဘိ။ တတ္ထ ရုဏ္ဏန္တိ ရောဒိတံ။ ဥမ္မတ္တကန္တိ ဥမ္မတ္တကကိရိယာ။ ကောမာရကန္တိ ကုမာရကေဟိ ကတ္တဗ္ဗကိစ္စံ။ ဒန္တဝိဒံသကဟသိတန္တိ ဒန္တေ ဒသ္သေတ္ဝာ ပာဏိံ ပဟရန္တာနံ မဟာသဒ္ဒေန ဟသိတံ။ သေတုဃာတော ဂီတေတိ ဂီတေ ဝော ပစ္စယဃာတော ဟောတု, သဟေတုကံ ဂီတံ ပဇဟထာတိ ဒီပေတိ။ နစ္စေပိ ဧသေဝ နယော။ အလန္တိ ယုတ္တံ။ ဓမ္မပ္ပမောဒိတာနံ သတန္တိ ဧတ္ထ ဓမ္မော ဝုစ္စတိ ကာရဏံ, ကေနစိဒေဝ ကာရဏေန ပမုဒိတာနံ သန္တာနံ။ သိတံ သိတမတ္တာယာတိ တသ္မိံ သိတကာရဏေ သတိ ယံ သိတံ ကရောထ, တံ ဝော သိတမတ္တာယ အဂ္ဂဒန္တေ ဒသ္သေတ္ဝာ ပဟဋ္ဌာကာရမတ္တဒသ္သနာယယေဝ ယုတ္တန္တိ ဝုတ္တံ ဟောတိ။
108. Pañcamaṃ atthuppattiyā nikkhittaṃ. Katarāya atthuppattiyā? Chabbaggiyānaṃ anācāre. Te kira gāyantā naccantā hasantā vicariṃsu. Bhikkhū dasabalassa ārocayiṃsu. Satthā te pakkosāpetvā tesaṃ ovādatthāya idaṃ suttaṃ ārabhi. Tattha ruṇṇanti roditaṃ. Ummattakanti ummattakakiriyā. Komārakanti kumārakehi kattabbakiccaṃ. Dantavidaṃsakahasitanti dante dassetvā pāṇiṃ paharantānaṃ mahāsaddena hasitaṃ. Setughāto gīteti gīte vo paccayaghāto hotu, sahetukaṃ gītaṃ pajahathāti dīpeti. Naccepi eseva nayo. Alanti yuttaṃ. Dhammappamoditānaṃ satanti ettha dhammo vuccati kāraṇaṃ, kenacideva kāraṇena pamuditānaṃ santānaṃ. Sitaṃ sitamattāyāti tasmiṃ sitakāraṇe sati yaṃ sitaṃ karotha, taṃ vo sitamattāya aggadante dassetvā pahaṭṭhākāramattadassanāyayeva yuttanti vuttaṃ hoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ရုဏ္ဏသုတ္တံ • 5. Ruṇṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၄-၉. သမဏဗ္ရာဟ္မဏသုတ္တာဒိဝဏ္ဏနာ • 4-9. Samaṇabrāhmaṇasuttādivaṇṇanā
