| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. රුණ්‌ණසුත්‌තවණ්‌ණනා
5. Ruṇṇasuttavaṇṇanā
108. පඤ්‌චමං අත්‌ථුප්‌පත්‌තියා නික්‌ඛිත්‌තං. කතරාය අත්‌ථුප්‌පත්‌තියා? ඡබ්‌බග්‌ගියානං අනාචාරෙ. තෙ කිර ගායන්‌තා නච්‌චන්‌තා හසන්‌තා විචරිංසු. භික්‌ඛූ දසබලස්‌ස ආරොචයිංසු. සත්‌ථා තෙ පක්‌කොසාපෙත්‌වා තෙසං ඔවාදත්‌ථාය ඉදං සුත්‌තං ආරභි. තත්‌ථ රුණ්‌ණන්‌ති රොදිතං. උම්‌මත්‌තකන්‌ති උම්‌මත්‌තකකිරියා. කොමාරකන්‌ති කුමාරකෙහි කත්‌තබ්‌බකිච්‌චං. දන්‌තවිදංසකහසිතන්‌ති දන්‌තෙ දස්‌සෙත්‌වා පාණිං පහරන්‌තානං මහාසද්‌දෙන හසිතං. සෙතුඝාතො ගීතෙති ගීතෙ වො පච්‌චයඝාතො හොතු, සහෙතුකං ගීතං පජහථාති දීපෙති. නච්‌චෙපි එසෙව නයො. අලන්‌ති යුත්‌තං. ධම්‌මප්‌පමොදිතානං සතන්‌ති එත්‌ථ ධම්‌මො වුච්‌චති කාරණං, කෙනචිදෙව කාරණෙන පමුදිතානං සන්‌තානං. සිතං සිතමත්‌තායාති තස්‌මිං සිතකාරණෙ සති යං සිතං කරොථ, තං වො සිතමත්‌තාය අග්‌ගදන්‌තෙ දස්‌සෙත්‌වා පහට්‌ඨාකාරමත්‌තදස්‌සනායයෙව යුත්‌තන්‌ති වුත්‌තං හොති.
108. Pañcamaṃ atthuppattiyā nikkhittaṃ. Katarāya atthuppattiyā? Chabbaggiyānaṃ anācāre. Te kira gāyantā naccantā hasantā vicariṃsu. Bhikkhū dasabalassa ārocayiṃsu. Satthā te pakkosāpetvā tesaṃ ovādatthāya idaṃ suttaṃ ārabhi. Tattha ruṇṇanti roditaṃ. Ummattakanti ummattakakiriyā. Komārakanti kumārakehi kattabbakiccaṃ. Dantavidaṃsakahasitanti dante dassetvā pāṇiṃ paharantānaṃ mahāsaddena hasitaṃ. Setughāto gīteti gīte vo paccayaghāto hotu, sahetukaṃ gītaṃ pajahathāti dīpeti. Naccepi eseva nayo. Alanti yuttaṃ. Dhammappamoditānaṃ satanti ettha dhammo vuccati kāraṇaṃ, kenacideva kāraṇena pamuditānaṃ santānaṃ. Sitaṃ sitamattāyāti tasmiṃ sitakāraṇe sati yaṃ sitaṃ karotha, taṃ vo sitamattāya aggadante dassetvā pahaṭṭhākāramattadassanāyayeva yuttanti vuttaṃ hoti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. රුණ්‌ණසුත්‌තං • 5. Ruṇṇasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-9. සමණබ්‍රාහ්‌මණසුත්‌තාදිවණ්‌ණනා • 4-9. Samaṇabrāhmaṇasuttādivaṇṇanā
