| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၅. ရူပဓာတုကထာဝဏ္ဏနာ
5. Rūpadhātukathāvaṇṇanā
၅၁၅-၅၁၆. ဣဒာနိ ရူပဓာတုကထာ နာမ ဟောတိ။ တတ္ထ ‘‘ရူပိနော ဓမ္မာ ရူပဓာတု နာမာ’’တိ ယေသံ လဒ္ဓိ, သေယ္ယထာပိ အန္ဓကာနံ; တေ သန္ဓာယ ရူပိနောတိ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ သကဝာဒီ ယသ္မာ ရူပဓာတု နာမ ရူပဘဝော, န ရူပမတ္တမေဝ, တသ္မာ တေနတ္ထေန စောဒေတုံ ရူပဓာတူတိအာဒိမာဟ။ တံ သဗ္ဗံ ကာမဂုဏကထာယံ ဝုတ္တနယေနေဝ ဝေဒိတဗ္ဗံ။ သာဝ ကာမဓာတူတိ ပုဋ္ဌော ဘူမိပရိစ္ဆေဒေန ဝိရောဓံ ပသ္သမာနော ပဋိက္ခိပတိ။ ပုန ဒဠ္ဟံ ကတ္ဝာ ပုဋ္ဌော အတ္တနော လဒ္ဓိဝသေန ပဋိဇာနာတိ။ ဧဝံ သန္တေ ပန ဒ္ဝီဟိ ဘဝေဟိ သမန္နာဂတတာ အာပဇ္ဇတိ, တေန တံ သကဝာဒီ ကာမဘဝေန စာတိ အာဒိမာဟ။ ဣတရော ဧကသ္သ ဒ္ဝီဟိ သမန္နာဂတာဘာဝတော ပဋိက္ခိပတီတိ။
515-516. Idāni rūpadhātukathā nāma hoti. Tattha ‘‘rūpino dhammā rūpadhātu nāmā’’ti yesaṃ laddhi, seyyathāpi andhakānaṃ; te sandhāya rūpinoti pucchā sakavādissa, paṭiññā itarassa. Atha naṃ sakavādī yasmā rūpadhātu nāma rūpabhavo, na rūpamattameva, tasmā tenatthena codetuṃ rūpadhātūtiādimāha. Taṃ sabbaṃ kāmaguṇakathāyaṃ vuttanayeneva veditabbaṃ. Sāva kāmadhātūti puṭṭho bhūmiparicchedena virodhaṃ passamāno paṭikkhipati. Puna daḷhaṃ katvā puṭṭho attano laddhivasena paṭijānāti. Evaṃ sante pana dvīhi bhavehi samannāgatatā āpajjati, tena taṃ sakavādī kāmabhavena cāti ādimāha. Itaro ekassa dvīhi samannāgatābhāvato paṭikkhipatīti.
ရူပဓာတုကထာဝဏ္ဏနာ။
Rūpadhātukathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၇၇) ၅. ရူပဓာတုကထာ • (77) 5. Rūpadhātukathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၅. ရူပဓာတုကထာဝဏ္ဏနာ • 5. Rūpadhātukathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၅. ရူပဓာတုကထာဝဏ္ဏနာ • 5. Rūpadhātukathāvaṇṇanā
