| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. ரூபதா⁴துயா ஆயதனகதா²வண்ணனா
7. Rūpadhātuyā āyatanakathāvaṇṇanā
519. இதா³னி ரூபதா⁴துயா ஆயதனகதா² நாம ஹோதி. தத்த² யேஸங் ‘‘ரூபீ மனோமயோ ஸப்³ப³ங்க³பச்சங்கீ³ அஹீனிந்த்³ரியோ’’தி (தீ³॰ நி॰ 1.87) ஸுத்தங் நிஸ்ஸாய ப்³ரஹ்மகாயிகானங் கா⁴னாதி³னிமித்தானிபி ஆயதனானேவாதி கப்பெத்வா ஸளாயதனிகோ தேஸங் அத்தபா⁴வோதி லத்³தி⁴, ஸெய்யதா²பி அந்த⁴கானஞ்சேவ ஸம்மிதியானஞ்ச; தே ஸந்தா⁴ய ஸளாயதனிகோதி புச்சா² ஸகவாதி³ஸ்ஸ, லத்³தி⁴வஸேன படிஞ்ஞா இதரஸ்ஸ. அத² நங் யங் தத்த² ஆயதனங் நத்தி², தஸ்ஸ வஸேன சோதே³துங் அத்தி² தத்த² கா⁴னாயதனந்திஆதி³ ஆரத்³த⁴ங். ததோ பரவாதீ³ யங் தத்த² அஜ்ஜ²த்திகானங் திண்ணங் ஆயதனானங் கா⁴னாதி³கங் ஸண்டா²னநிமித்தங் ததே³வ ஆயதனந்தி லத்³தி⁴யா படிஜானாதி. பா³ஹிரானங் க³ந்தா⁴யதனாதீ³னங் வஸேன புட்டோ² கா⁴னப்பஸாதா³த³யோ தத்த² ந இச்ச²தி, தஸ்மா தேஸங் கோ³சரங் படிஸேதெ⁴ந்தோ படிக்கி²பதி. படிலோமபஞ்ஹஸங்ஸந்த³னபஞ்ஹேஸுபி இமினாவுபாயேன அத்தோ² வேதி³தப்³போ³.
519. Idāni rūpadhātuyā āyatanakathā nāma hoti. Tattha yesaṃ ‘‘rūpī manomayo sabbaṅgapaccaṅgī ahīnindriyo’’ti (dī. ni. 1.87) suttaṃ nissāya brahmakāyikānaṃ ghānādinimittānipi āyatanānevāti kappetvā saḷāyataniko tesaṃ attabhāvoti laddhi, seyyathāpi andhakānañceva sammitiyānañca; te sandhāya saḷāyatanikoti pucchā sakavādissa, laddhivasena paṭiññā itarassa. Atha naṃ yaṃ tattha āyatanaṃ natthi, tassa vasena codetuṃ atthi tattha ghānāyatanantiādi āraddhaṃ. Tato paravādī yaṃ tattha ajjhattikānaṃ tiṇṇaṃ āyatanānaṃ ghānādikaṃ saṇṭhānanimittaṃ tadeva āyatananti laddhiyā paṭijānāti. Bāhirānaṃ gandhāyatanādīnaṃ vasena puṭṭho ghānappasādādayo tattha na icchati, tasmā tesaṃ gocaraṃ paṭisedhento paṭikkhipati. Paṭilomapañhasaṃsandanapañhesupi imināvupāyena attho veditabbo.
521. அத்தி² தத்த² கா⁴னாயதனங் அத்தி² க³ந்தா⁴யதனங் தேன கா⁴னேன தங் க³ந்த⁴ங் கா⁴யதீதி தஸ்மிங்யேவ பரஸமயே ஏகச்சே ஆசரியே ஸந்தா⁴ய வுத்தங். தே கிர தத்த² ச² அஜ்ஜ²த்திகானி ஆயதனானி பரிபுண்ணானி இச்ச²ந்தி, ஆயதனேன ச நாம ஸகிச்சகேன ப⁴விதப்³ப³ந்தி தேஹி கா⁴னாதீ³ஹி தே க³ந்தா⁴த³யோ கா⁴யந்தி ஸாயந்தி பு²ஸந்தீதிபி இச்ச²ந்தி. தங் லத்³தி⁴ங் ஸந்தா⁴ய பரவாதீ³ ஆமந்தாதி படிஜானாதி.
521. Atthi tattha ghānāyatanaṃ atthi gandhāyatanaṃ tena ghānena taṃ gandhaṃ ghāyatīti tasmiṃyeva parasamaye ekacce ācariye sandhāya vuttaṃ. Te kira tattha cha ajjhattikāni āyatanāni paripuṇṇāni icchanti, āyatanena ca nāma sakiccakena bhavitabbanti tehi ghānādīhi te gandhādayo ghāyanti sāyanti phusantītipi icchanti. Taṃ laddhiṃ sandhāya paravādī āmantāti paṭijānāti.
522. அத்தி² தத்த² மூலக³ந்தோ⁴திஆதீ³னி பன புட்டோ² அத்தி²பா⁴வங் ஸாதே⁴துங் அஸக்கொந்தோ படிக்கி²பதி. நனு அத்தி² தத்த² கா⁴னநிமித்தந்திஆதி³ ஸண்டா²னமத்தஸ்ஸேவ ஸாத⁴கங், ந ஆயதனஸ்ஸ, தஸ்மா உதா³ஹடம்பி அனுதா³ஹடஸதி³ஸமேவாதி.
522. Atthitattha mūlagandhotiādīni pana puṭṭho atthibhāvaṃ sādhetuṃ asakkonto paṭikkhipati. Nanu atthi tatthaghānanimittantiādi saṇṭhānamattasseva sādhakaṃ, na āyatanassa, tasmā udāhaṭampi anudāhaṭasadisamevāti.
ரூபதா⁴துயா ஆயதனகதா²வண்ணனா.
Rūpadhātuyā āyatanakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (79) 7. ரூபதா⁴துயாஆயதனகதா² • (79) 7. Rūpadhātuyāāyatanakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. ரூபதா⁴துயாஆயதனகதா²வண்ணனா • 7. Rūpadhātuyāāyatanakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. ரூபதா⁴துயாஆயதனகதா²வண்ணனா • 7. Rūpadhātuyāāyatanakathāvaṇṇanā
