| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৭. রূপধাতুযা আযতনকথাৰণ্ণনা
7. Rūpadhātuyā āyatanakathāvaṇṇanā
৫১৯. ইদানি রূপধাতুযা আযতনকথা নাম হোতি। তত্থ যেসং ‘‘রূপী মনোমযো সব্বঙ্গপচ্চঙ্গী অহীনিন্দ্রিযো’’তি (দী॰ নি॰ ১.৮৭) সুত্তং নিস্সায ব্রহ্মকাযিকানং ঘানাদিনিমিত্তানিপি আযতনানেৰাতি কপ্পেত্ৰা সল়াযতনিকো তেসং অত্তভাৰোতি লদ্ধি, সেয্যথাপি অন্ধকানঞ্চেৰ সম্মিতিযানঞ্চ; তে সন্ধায সল়াযতনিকোতি পুচ্ছা সকৰাদিস্স, লদ্ধিৰসেন পটিঞ্ঞা ইতরস্স। অথ নং যং তত্থ আযতনং নত্থি, তস্স ৰসেন চোদেতুং অত্থি তত্থ ঘানাযতনন্তিআদি আরদ্ধং। ততো পরৰাদী যং তত্থ অজ্ঝত্তিকানং তিণ্ণং আযতনানং ঘানাদিকং সণ্ঠাননিমিত্তং তদেৰ আযতনন্তি লদ্ধিযা পটিজানাতি। বাহিরানং গন্ধাযতনাদীনং ৰসেন পুট্ঠো ঘানপ্পসাদাদযো তত্থ ন ইচ্ছতি, তস্মা তেসং গোচরং পটিসেধেন্তো পটিক্খিপতি। পটিলোমপঞ্হসংসন্দনপঞ্হেসুপি ইমিনাৰুপাযেন অত্থো ৰেদিতব্বো।
519. Idāni rūpadhātuyā āyatanakathā nāma hoti. Tattha yesaṃ ‘‘rūpī manomayo sabbaṅgapaccaṅgī ahīnindriyo’’ti (dī. ni. 1.87) suttaṃ nissāya brahmakāyikānaṃ ghānādinimittānipi āyatanānevāti kappetvā saḷāyataniko tesaṃ attabhāvoti laddhi, seyyathāpi andhakānañceva sammitiyānañca; te sandhāya saḷāyatanikoti pucchā sakavādissa, laddhivasena paṭiññā itarassa. Atha naṃ yaṃ tattha āyatanaṃ natthi, tassa vasena codetuṃ atthi tattha ghānāyatanantiādi āraddhaṃ. Tato paravādī yaṃ tattha ajjhattikānaṃ tiṇṇaṃ āyatanānaṃ ghānādikaṃ saṇṭhānanimittaṃ tadeva āyatananti laddhiyā paṭijānāti. Bāhirānaṃ gandhāyatanādīnaṃ vasena puṭṭho ghānappasādādayo tattha na icchati, tasmā tesaṃ gocaraṃ paṭisedhento paṭikkhipati. Paṭilomapañhasaṃsandanapañhesupi imināvupāyena attho veditabbo.
৫২১. অত্থি তত্থ ঘানাযতনং অত্থি গন্ধাযতনং তেন ঘানেন তং গন্ধং ঘাযতীতি তস্মিংযেৰ পরসমযে একচ্চে আচরিযে সন্ধায ৰুত্তং। তে কির তত্থ ছ অজ্ঝত্তিকানি আযতনানি পরিপুণ্ণানি ইচ্ছন্তি, আযতনেন চ নাম সকিচ্চকেন ভৰিতব্বন্তি তেহি ঘানাদীহি তে গন্ধাদযো ঘাযন্তি সাযন্তি ফুসন্তীতিপি ইচ্ছন্তি। তং লদ্ধিং সন্ধায পরৰাদী আমন্তাতি পটিজানাতি।
521. Atthi tattha ghānāyatanaṃ atthi gandhāyatanaṃ tena ghānena taṃ gandhaṃ ghāyatīti tasmiṃyeva parasamaye ekacce ācariye sandhāya vuttaṃ. Te kira tattha cha ajjhattikāni āyatanāni paripuṇṇāni icchanti, āyatanena ca nāma sakiccakena bhavitabbanti tehi ghānādīhi te gandhādayo ghāyanti sāyanti phusantītipi icchanti. Taṃ laddhiṃ sandhāya paravādī āmantāti paṭijānāti.
৫২২. অত্থি তত্থ মূলগন্ধোতিআদীনি পন পুট্ঠো অত্থিভাৰং সাধেতুং অসক্কোন্তো পটিক্খিপতি। ননু অত্থি তত্থ ঘাননিমিত্তন্তিআদি সণ্ঠানমত্তস্সেৰ সাধকং, ন আযতনস্স, তস্মা উদাহটম্পি অনুদাহটসদিসমেৰাতি।
522. Atthitattha mūlagandhotiādīni pana puṭṭho atthibhāvaṃ sādhetuṃ asakkonto paṭikkhipati. Nanu atthi tatthaghānanimittantiādi saṇṭhānamattasseva sādhakaṃ, na āyatanassa, tasmā udāhaṭampi anudāhaṭasadisamevāti.
রূপধাতুযা আযতনকথাৰণ্ণনা।
Rūpadhātuyā āyatanakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৭৯) ৭. রূপধাতুযাআযতনকথা • (79) 7. Rūpadhātuyāāyatanakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. রূপধাতুযাআযতনকথাৰণ্ণনা • 7. Rūpadhātuyāāyatanakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. রূপধাতুযাআযতনকথাৰণ্ণনা • 7. Rūpadhātuyāāyatanakathāvaṇṇanā
