| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៨. អដ្ឋមវគ្គោ
8. Aṭṭhamavaggo
(៧៩) ៧. រូបធាតុយាអាយតនកថា
(79) 7. Rūpadhātuyāāyatanakathā
៥១៩. អត្ថិ សឡាយតនិកោ អត្តភាវោ រូបធាតុយាតិ? អាមន្តា។ អត្ថិ តត្ថ ឃានាយតនន្តិ? អាមន្តា។ អត្ថិ តត្ថ គន្ធាយតនន្តិ? ន ហេវំ វត្តព្ពេ…បេ.… អត្ថិ តត្ថ ជិវ្ហាយតនន្តិ? អាមន្តា ។ អត្ថិ តត្ថ រសាយតនន្តិ? ន ហេវំ វត្តព្ពេ…បេ.… អត្ថិ តត្ថ កាយាយតនន្តិ? អាមន្តា។ អត្ថិ តត្ថ ផោដ្ឋព្ពាយតនន្តិ? ន ហេវំ វត្តព្ពេ…បេ.…។
519. Atthi saḷāyataniko attabhāvo rūpadhātuyāti? Āmantā. Atthi tattha ghānāyatananti? Āmantā. Atthi tattha gandhāyatananti? Na hevaṃ vattabbe…pe… atthi tattha jivhāyatananti? Āmantā . Atthi tattha rasāyatananti? Na hevaṃ vattabbe…pe… atthi tattha kāyāyatananti? Āmantā. Atthi tattha phoṭṭhabbāyatananti? Na hevaṃ vattabbe…pe….
នត្ថិ តត្ថ គន្ធាយតនន្តិ? អាមន្តា។ នត្ថិ តត្ថ ឃានាយតនន្តិ? ន ហេវំ វត្តព្ពេ…បេ.… នត្ថិ តត្ថ រសាយតនន្តិ? អាមន្តា។ នត្ថិ តត្ថ ជិវ្ហាយតនន្តិ? ន ហេវំ វត្តព្ពេ…បេ.… នត្ថិ តត្ថ ផោដ្ឋព្ពាយតនន្តិ? អាមន្តា ។ នត្ថិ តត្ថ កាយាយតនន្តិ? ន ហេវំ វត្តព្ពេ…បេ.…។
Natthi tattha gandhāyatananti? Āmantā. Natthi tattha ghānāyatananti? Na hevaṃ vattabbe…pe… natthi tattha rasāyatananti? Āmantā. Natthi tattha jivhāyatananti? Na hevaṃ vattabbe…pe… natthi tattha phoṭṭhabbāyatananti? Āmantā . Natthi tattha kāyāyatananti? Na hevaṃ vattabbe…pe….
៥២០. អត្ថិ តត្ថ ចក្ខាយតនំ, អត្ថិ រូបាយតនន្តិ? អាមន្តា។ អត្ថិ តត្ថ ឃានាយតនំ, អត្ថិ គន្ធាយតនន្តិ? ន ហេវំ វត្តព្ពេ…បេ.… អត្ថិ តត្ថ ចក្ខាយតនំ, អត្ថិ រូបាយតនន្តិ? អាមន្តា។ អត្ថិ តត្ថ ជិវ្ហាយតនំ, អត្ថិ រសាយតនំ…បេ.… អត្ថិ តត្ថ កាយាយតនំ, អត្ថិ ផោដ្ឋព្ពាយតនន្តិ? ន ហេវំ វត្តព្ពេ…បេ.… អត្ថិ តត្ថ សោតាយតនំ, អត្ថិ សទ្ទាយតនំ…បេ.… អត្ថិ តត្ថ មនាយតនំ, អត្ថិ ធម្មាយតនន្តិ? អាមន្តា។ អត្ថិ តត្ថ ឃានាយតនំ, អត្ថិ គន្ធាយតនន្តិ? ន ហេវំ វត្តព្ពេ…បេ.… អត្ថិ តត្ថ មនាយតនំ, អត្ថិ ធម្មាយតនន្តិ? អាមន្តា។ អត្ថិ តត្ថ ជិវ្ហាយតនំ, អត្ថិ រសាយតនន្តិ…បេ.… អត្ថិ តត្ថ កាយាយតនំ, អត្ថិ ផោដ្ឋព្ពាយតនន្តិ? ន ហេវំ វត្តព្ពេ…បេ.…។
520. Atthi tattha cakkhāyatanaṃ, atthi rūpāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha cakkhāyatanaṃ, atthi rūpāyatananti? Āmantā. Atthi tattha jivhāyatanaṃ, atthi rasāyatanaṃ…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe… atthi tattha sotāyatanaṃ, atthi saddāyatanaṃ…pe… atthi tattha manāyatanaṃ, atthi dhammāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha manāyatanaṃ, atthi dhammāyatananti? Āmantā. Atthi tattha jivhāyatanaṃ, atthi rasāyatananti…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe….
អត្ថិ តត្ថ ឃានាយតនំ, នត្ថិ គន្ធាយតនន្តិ? អាមន្តា ។ អត្ថិ តត្ថ ចក្ខាយតនំ, នត្ថិ រូបាយតនន្តិ? ន ហេវំ វត្តព្ពេ…បេ.… អត្ថិ តត្ថ ឃានាយតនំ, នត្ថិ គន្ធាយតនន្តិ? អាមន្តា។ អត្ថិ តត្ថ សោតាយតនំ, នត្ថិ សទ្ទាយតនំ…បេ.… អត្ថិ តត្ថ មនាយតនំ, នត្ថិ ធម្មាយតនន្តិ? ន ហេវំ វត្តព្ពេ…បេ.… អត្ថិ តត្ថ ជិវ្ហាយតនំ, នត្ថិ រសាយតនំ…បេ.… អត្ថិ តត្ថ កាយាយតនំ, នត្ថិ ផោដ្ឋព្ពាយតនន្តិ? អាមន្តា។ អត្ថិ តត្ថ ចក្ខាយតនំ, នត្ថិ រូបាយតនន្តិ? ន ហេវំ វត្តព្ពេ…បេ.… អត្ថិ តត្ថ កាយាយតនំ, នត្ថិ ផោដ្ឋព្ពាយតនន្តិ? អាមន្តា។ អត្ថិ តត្ថ សោតាយតនំ, នត្ថិ សទ្ទាយតនំ …បេ.… អត្ថិ តត្ថ មនាយតនំ, នត្ថិ ធម្មាយតនន្តិ? ន ហេវំ វត្តព្ពេ…បេ.…។
Atthi tattha ghānāyatanaṃ, natthi gandhāyatananti? Āmantā . Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha ghānāyatanaṃ, natthi gandhāyatananti? Āmantā. Atthi tattha sotāyatanaṃ, natthi saddāyatanaṃ…pe… atthi tattha manāyatanaṃ, natthi dhammāyatananti? Na hevaṃ vattabbe…pe… atthi tattha jivhāyatanaṃ, natthi rasāyatanaṃ…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha sotāyatanaṃ, natthi saddāyatanaṃ …pe… atthi tattha manāyatanaṃ, natthi dhammāyatananti? Na hevaṃ vattabbe…pe….
៥២១. អត្ថិ តត្ថ ចក្ខាយតនំ អត្ថិ រូបាយតនំ, តេន ចក្ខុនា តំ រូបំ បស្សតីតិ? អាមន្តា។ អត្ថិ តត្ថ ឃានាយតនំ អត្ថិ គន្ធាយតនំ, តេន ឃានេន តំ គន្ធំ ឃាយតីតិ? ន ហេវំ វត្តព្ពេ…បេ.… អត្ថិ តត្ថ ចក្ខាយតនំ អត្ថិ រូបាយតនំ, តេន ចក្ខុនា តំ រូបំ បស្សតីតិ? អាមន្តា។ អត្ថិ តត្ថ ជិវ្ហាយតនំ អត្ថិ រសាយតនំ, តាយ ជិវ្ហាយ តំ រសំ សាយតិ…បេ.… អត្ថិ តត្ថ កាយាយតនំ អត្ថិ ផោដ្ឋព្ពាយតនំ, តេន កាយេន តំ ផោដ្ឋព្ពំ ផុសតីតិ? ន ហេវំ វត្តព្ពេ…បេ.…។
521. Atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyati…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
អត្ថិ តត្ថ សោតាយតនំ អត្ថិ សទ្ទាយតនំ…បេ.… អត្ថិ តត្ថ មនាយតនំ អត្ថិ ធម្មាយតនំ, តេន មនេន តំ ធម្មំ វិជានាតីតិ? អាមន្តា។ អត្ថិ តត្ថ ឃានាយតនំ អត្ថិ គន្ធាយតនំ, តេន ឃានេន តំ គន្ធំ ឃាយតីតិ? ន ហេវំ វត្តព្ពេ…បេ.… អត្ថិ តត្ថ មនាយតនំ អត្ថិ ធម្មាយតនំ, តេន មនេន តំ ធម្មំ វិជានាតីតិ? អាមន្តា។ អត្ថិ តត្ថ ជិវ្ហាយតនំ អត្ថិ រសាយតនំ…បេ.… អត្ថិ តត្ថ កាយាយតនំ អត្ថិ ផោដ្ឋព្ពាយតនំ, តេន កាយេន តំ ផោដ្ឋព្ពំ ផុសតីតិ? ន ហេវំ វត្តព្ពេ…បេ.…។
Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
អត្ថិ តត្ថ ឃានាយតនំ អត្ថិ គន្ធាយតនំ, ន ច តេន ឃានេន តំ គន្ធំ ឃាយតីតិ? អាមន្តា។ អត្ថិ តត្ថ ចក្ខាយតនំ អត្ថិ រូបាយតនំ, ន ច តេន ចក្ខុនា តំ រូបំ បស្សតីតិ? ន ហេវំ វត្តព្ពេ…បេ.… អត្ថិ តត្ថ ឃានាយតនំ អត្ថិ គន្ធាយតនំ, ន ច តេន ឃានេន តំ គន្ធំ ឃាយតីតិ? អាមន្តា។ អត្ថិ តត្ថ សោតាយតនំ អត្ថិ សទ្ទាយតនំ…បេ.… អត្ថិ តត្ថ មនាយតនំ អត្ថិ ធម្មាយតនំ, ន ច តេន មនេន តំ ធម្មំ វិជានាតីតិ? ន ហេវំ វត្តព្ពេ…បេ.…។
Atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha cakkhāyatanaṃ atthi rūpāyatanaṃ, na ca tena cakkhunā taṃ rūpaṃ passatīti? Na hevaṃ vattabbe…pe… atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
អត្ថិ តត្ថ ជិវ្ហាយតនំ អត្ថិ រសាយតនំ…បេ.… អត្ថិ តត្ថ កាយាយតនំ អត្ថិ ផោដ្ឋព្ពាយតនំ, ន ច តេន កាយេន តំ ផោដ្ឋព្ពំ ផុសតីតិ? អាមន្តា។ អត្ថិ តត្ថ សោតាយតនំ អត្ថិ សទ្ទាយតនំ…បេ.… អត្ថិ តត្ថ មនាយតនំ អត្ថិ ធម្មាយតនំ, ន ច តេន មនេន តំ ធម្មំ វិជានាតីតិ? ន ហេវំ វត្តព្ពេ…បេ.…។
Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, na ca tena kāyena taṃ phoṭṭhabbaṃ phusatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
៥២២. អត្ថិ តត្ថ ឃានាយតនំ អត្ថិ គន្ធាយតនំ, តេន ឃានេន តំ គន្ធំ ឃាយតីតិ? អាមន្តា។ អត្ថិ តត្ថ មូលគន្ធោ សារគន្ធោ តចគន្ធោ បត្តគន្ធោ បុប្ផគន្ធោ ផលគន្ធោ អាមគន្ធោ វិស្សគន្ធោ សុគន្ធោ ទុគ្គន្ធោតិ? ន ហេវំ វត្តព្ពេ…បេ.…។
522. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Āmantā. Atthi tattha mūlagandho sāragandho tacagandho pattagandho pupphagandho phalagandho āmagandho vissagandho sugandho duggandhoti? Na hevaṃ vattabbe…pe….
អត្ថិ តត្ថ ជិវ្ហាយតនំ អត្ថិ រសាយតនំ, តាយ ជិវ្ហាយ តំ រសំ សាយតីតិ? អាមន្តា។ អត្ថិ តត្ថ មូលរសោ ខន្ធរសោ តចរសោ បត្តរសោ បុប្ផរសោ ផលរសោ អម្ពិលំ មធុរំ តិត្តកំ កដុកំ លោណិយំ ខារិយំ លម្ពិលំ កសាវោ សាទុ អសាទូតិ? ន ហេវំ វត្តព្ពេ…បេ.…។
Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyatīti? Āmantā. Atthi tattha mūlaraso khandharaso tacaraso pattaraso puppharaso phalaraso ambilaṃ madhuraṃ tittakaṃ kaṭukaṃ loṇiyaṃ khāriyaṃ lambilaṃ kasāvo sādu asādūti? Na hevaṃ vattabbe…pe….
អត្ថិ តត្ថ កាយាយតនំ អត្ថិ ផោដ្ឋព្ពាយតនំ, តេន កាយេន តំ ផោដ្ឋព្ពំ ផុសតីតិ? អាមន្តា។ អត្ថិ តត្ថ កក្ខឡំ មុទុកំ សណ្ហំ ផរុសំ សុខសម្ផស្សំ ទុក្ខសម្ផស្សំ គរុកំ លហុកន្តិ? ន ហេវំ វត្តព្ពេ…បេ.…។
Atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Āmantā. Atthi tattha kakkhaḷaṃ mudukaṃ saṇhaṃ pharusaṃ sukhasamphassaṃ dukkhasamphassaṃ garukaṃ lahukanti? Na hevaṃ vattabbe…pe….
៥២៣. ន វត្តព្ពំ – ‘‘សឡាយតនិកោ អត្តភាវោ រូបធាតុយា’’តិ? អាមន្តា។ ននុ អត្ថិ តត្ថ ឃាននិមិត្តំ ជិវ្ហានិមិត្តំ កាយនិមិត្តន្តិ? អាមន្តា។ ហញ្ចិ អត្ថិ តត្ថ ឃាននិមិត្តំ ជិវ្ហានិមិត្តំ កាយនិមិត្តំ, តេន វត រេ វត្តព្ពេ – ‘‘សឡាយតនិកោ អត្តភាវោ រូបធាតុយា’’តិ។
523. Na vattabbaṃ – ‘‘saḷāyataniko attabhāvo rūpadhātuyā’’ti? Āmantā. Nanu atthi tattha ghānanimittaṃ jivhānimittaṃ kāyanimittanti? Āmantā. Hañci atthi tattha ghānanimittaṃ jivhānimittaṃ kāyanimittaṃ, tena vata re vattabbe – ‘‘saḷāyataniko attabhāvo rūpadhātuyā’’ti.
រូបធាតុយា អាយតនកថា និដ្ឋិតា។
Rūpadhātuyā āyatanakathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៧. រូបធាតុយា អាយតនកថាវណ្ណនា • 7. Rūpadhātuyā āyatanakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៧. រូបធាតុយាអាយតនកថាវណ្ណនា • 7. Rūpadhātuyāāyatanakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៧. រូបធាតុយាអាយតនកថាវណ្ណនា • 7. Rūpadhātuyāāyatanakathāvaṇṇanā
