| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၈. အဋ္ဌမဝဂ္ဂော
8. Aṭṭhamavaggo
(၇၉) ၇. ရူပဓာတုယာအာယတနကထာ
(79) 7. Rūpadhātuyāāyatanakathā
၅၁၉. အတ္ထိ သဠာယတနိကော အတ္တဘာဝော ရူပဓာတုယာတိ? အာမန္တာ။ အတ္ထိ တတ္ထ ဃာနာယတနန္တိ? အာမန္တာ။ အတ္ထိ တတ္ထ ဂန္ဓာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ ဇိဝ္ဟာယတနန္တိ? အာမန္တာ ။ အတ္ထိ တတ္ထ ရသာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ ကာယာယတနန္တိ? အာမန္တာ။ အတ္ထိ တတ္ထ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။။
519. Atthi saḷāyataniko attabhāvo rūpadhātuyāti? Āmantā. Atthi tattha ghānāyatananti? Āmantā. Atthi tattha gandhāyatananti? Na hevaṃ vattabbe…pe… atthi tattha jivhāyatananti? Āmantā . Atthi tattha rasāyatananti? Na hevaṃ vattabbe…pe… atthi tattha kāyāyatananti? Āmantā. Atthi tattha phoṭṭhabbāyatananti? Na hevaṃ vattabbe…pe….
နတ္ထိ တတ္ထ ဂန္ဓာယတနန္တိ? အာမန္တာ။ နတ္ထိ တတ္ထ ဃာနာယတနန္တိ? န ဟေဝံ ဝတ္တဗ္ဗေ။ပေ.။ နတ္ထိ တတ္ထ ရသာယတနန္တိ? အာမန္တာ။ နတ္ထိ တတ္ထ ဇိဝ္ဟာယတနန္တိ? န ဟေဝံ ဝတ္တဗ္ဗေ။ပေ.။ နတ္ထိ တတ္ထ ဖောဋ္ဌဗ္ဗာယတနန္တိ? အာမန္တာ ။ နတ္ထိ တတ္ထ ကာယာယတနန္တိ? န ဟေဝံ ဝတ္တဗ္ဗေ။ပေ.။။
Natthi tattha gandhāyatananti? Āmantā. Natthi tattha ghānāyatananti? Na hevaṃ vattabbe…pe… natthi tattha rasāyatananti? Āmantā. Natthi tattha jivhāyatananti? Na hevaṃ vattabbe…pe… natthi tattha phoṭṭhabbāyatananti? Āmantā . Natthi tattha kāyāyatananti? Na hevaṃ vattabbe…pe….
၅၂၀. အတ္ထိ တတ္ထ စက္ခာယတနံ, အတ္ထိ ရူပာယတနန္တိ? အာမန္တာ။ အတ္ထိ တတ္ထ ဃာနာယတနံ, အတ္ထိ ဂန္ဓာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ စက္ခာယတနံ, အတ္ထိ ရူပာယတနန္တိ? အာမန္တာ။ အတ္ထိ တတ္ထ ဇိဝ္ဟာယတနံ, အတ္ထိ ရသာယတနံ။ပေ.။ အတ္ထိ တတ္ထ ကာယာယတနံ, အတ္ထိ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ သောတာယတနံ, အတ္ထိ သဒ္ဒာယတနံ။ပေ.။ အတ္ထိ တတ္ထ မနာယတနံ, အတ္ထိ ဓမ္မာယတနန္တိ? အာမန္တာ။ အတ္ထိ တတ္ထ ဃာနာယတနံ, အတ္ထိ ဂန္ဓာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ မနာယတနံ, အတ္ထိ ဓမ္မာယတနန္တိ? အာမန္တာ။ အတ္ထိ တတ္ထ ဇိဝ္ဟာယတနံ, အတ္ထိ ရသာယတနန္တိ။ပေ.။ အတ္ထိ တတ္ထ ကာယာယတနံ, အတ္ထိ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။။
520. Atthi tattha cakkhāyatanaṃ, atthi rūpāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha cakkhāyatanaṃ, atthi rūpāyatananti? Āmantā. Atthi tattha jivhāyatanaṃ, atthi rasāyatanaṃ…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe… atthi tattha sotāyatanaṃ, atthi saddāyatanaṃ…pe… atthi tattha manāyatanaṃ, atthi dhammāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha manāyatanaṃ, atthi dhammāyatananti? Āmantā. Atthi tattha jivhāyatanaṃ, atthi rasāyatananti…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe….
အတ္ထိ တတ္ထ ဃာနာယတနံ, နတ္ထိ ဂန္ဓာယတနန္တိ? အာမန္တာ ။ အတ္ထိ တတ္ထ စက္ခာယတနံ, နတ္ထိ ရူပာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ ဃာနာယတနံ, နတ္ထိ ဂန္ဓာယတနန္တိ? အာမန္တာ။ အတ္ထိ တတ္ထ သောတာယတနံ, နတ္ထိ သဒ္ဒာယတနံ။ပေ.။ အတ္ထိ တတ္ထ မနာယတနံ, နတ္ထိ ဓမ္မာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ ဇိဝ္ဟာယတနံ, နတ္ထိ ရသာယတနံ။ပေ.။ အတ္ထိ တတ္ထ ကာယာယတနံ, နတ္ထိ ဖောဋ္ဌဗ္ဗာယတနန္တိ? အာမန္တာ။ အတ္ထိ တတ္ထ စက္ခာယတနံ, နတ္ထိ ရူပာယတနန္တိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ ကာယာယတနံ, နတ္ထိ ဖောဋ္ဌဗ္ဗာယတနန္တိ? အာမန္တာ။ အတ္ထိ တတ္ထ သောတာယတနံ, နတ္ထိ သဒ္ဒာယတနံ ။ပေ.။ အတ္ထိ တတ္ထ မနာယတနံ, နတ္ထိ ဓမ္မာယတနန္တိ? န ဟေဝံ ဝတ္တဗ္ဗေ။ပေ.။။
Atthi tattha ghānāyatanaṃ, natthi gandhāyatananti? Āmantā . Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha ghānāyatanaṃ, natthi gandhāyatananti? Āmantā. Atthi tattha sotāyatanaṃ, natthi saddāyatanaṃ…pe… atthi tattha manāyatanaṃ, natthi dhammāyatananti? Na hevaṃ vattabbe…pe… atthi tattha jivhāyatanaṃ, natthi rasāyatanaṃ…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha sotāyatanaṃ, natthi saddāyatanaṃ …pe… atthi tattha manāyatanaṃ, natthi dhammāyatananti? Na hevaṃ vattabbe…pe….
၅၂၁. အတ္ထိ တတ္ထ စက္ခာယတနံ အတ္ထိ ရူပာယတနံ, တေန စက္ခုနာ တံ ရူပံ ပသ္သတီတိ? အာမန္တာ။ အတ္ထိ တတ္ထ ဃာနာယတနံ အတ္ထိ ဂန္ဓာယတနံ, တေန ဃာနေန တံ ဂန္ဓံ ဃာယတီတိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ စက္ခာယတနံ အတ္ထိ ရူပာယတနံ, တေန စက္ခုနာ တံ ရူပံ ပသ္သတီတိ? အာမန္တာ။ အတ္ထိ တတ္ထ ဇိဝ္ဟာယတနံ အတ္ထိ ရသာယတနံ, တာယ ဇိဝ္ဟာယ တံ ရသံ သာယတိ။ပေ.။ အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ, တေန ကာယေန တံ ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ.။။
521. Atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyati…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
အတ္ထိ တတ္ထ သောတာယတနံ အတ္ထိ သဒ္ဒာယတနံ။ပေ.။ အတ္ထိ တတ္ထ မနာယတနံ အတ္ထိ ဓမ္မာယတနံ, တေန မနေန တံ ဓမ္မံ ဝိဇာနာတီတိ? အာမန္တာ။ အတ္ထိ တတ္ထ ဃာနာယတနံ အတ္ထိ ဂန္ဓာယတနံ, တေန ဃာနေန တံ ဂန္ဓံ ဃာယတီတိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ မနာယတနံ အတ္ထိ ဓမ္မာယတနံ, တေန မနေန တံ ဓမ္မံ ဝိဇာနာတီတိ? အာမန္တာ။ အတ္ထိ တတ္ထ ဇိဝ္ဟာယတနံ အတ္ထိ ရသာယတနံ။ပေ.။ အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ, တေန ကာယေန တံ ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ.။။
Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
အတ္ထိ တတ္ထ ဃာနာယတနံ အတ္ထိ ဂန္ဓာယတနံ, န စ တေန ဃာနေန တံ ဂန္ဓံ ဃာယတီတိ? အာမန္တာ။ အတ္ထိ တတ္ထ စက္ခာယတနံ အတ္ထိ ရူပာယတနံ, န စ တေန စက္ခုနာ တံ ရူပံ ပသ္သတီတိ? န ဟေဝံ ဝတ္တဗ္ဗေ။ပေ.။ အတ္ထိ တတ္ထ ဃာနာယတနံ အတ္ထိ ဂန္ဓာယတနံ, န စ တေန ဃာနေန တံ ဂန္ဓံ ဃာယတီတိ? အာမန္တာ။ အတ္ထိ တတ္ထ သောတာယတနံ အတ္ထိ သဒ္ဒာယတနံ။ပေ.။ အတ္ထိ တတ္ထ မနာယတနံ အတ္ထိ ဓမ္မာယတနံ, န စ တေန မနေန တံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha cakkhāyatanaṃ atthi rūpāyatanaṃ, na ca tena cakkhunā taṃ rūpaṃ passatīti? Na hevaṃ vattabbe…pe… atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
အတ္ထိ တတ္ထ ဇိဝ္ဟာယတနံ အတ္ထိ ရသာယတနံ။ပေ.။ အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ, န စ တေန ကာယေန တံ ဖောဋ္ဌဗ္ဗံ ဖုသတီတိ? အာမန္တာ။ အတ္ထိ တတ္ထ သောတာယတနံ အတ္ထိ သဒ္ဒာယတနံ။ပေ.။ အတ္ထိ တတ္ထ မနာယတနံ အတ္ထိ ဓမ္မာယတနံ, န စ တေန မနေန တံ ဓမ္မံ ဝိဇာနာတီတိ? န ဟေဝံ ဝတ္တဗ္ဗေ။ပေ.။။
Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, na ca tena kāyena taṃ phoṭṭhabbaṃ phusatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
၅၂၂. အတ္ထိ တတ္ထ ဃာနာယတနံ အတ္ထိ ဂန္ဓာယတနံ, တေန ဃာနေန တံ ဂန္ဓံ ဃာယတီတိ? အာမန္တာ။ အတ္ထိ တတ္ထ မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမဂန္ဓော ဝိသ္သဂန္ဓော သုဂန္ဓော ဒုဂ္ဂန္ဓောတိ? န ဟေဝံ ဝတ္တဗ္ဗေ။ပေ.။။
522. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Āmantā. Atthi tattha mūlagandho sāragandho tacagandho pattagandho pupphagandho phalagandho āmagandho vissagandho sugandho duggandhoti? Na hevaṃ vattabbe…pe….
အတ္ထိ တတ္ထ ဇိဝ္ဟာယတနံ အတ္ထိ ရသာယတနံ, တာယ ဇိဝ္ဟာယ တံ ရသံ သာယတီတိ? အာမန္တာ။ အတ္ထိ တတ္ထ မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိယံ ခာရိယံ လမ္ဗိလံ ကသာဝော သာဒု အသာဒူတိ? န ဟေဝံ ဝတ္တဗ္ဗေ။ပေ.။။
Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyatīti? Āmantā. Atthi tattha mūlaraso khandharaso tacaraso pattaraso puppharaso phalaraso ambilaṃ madhuraṃ tittakaṃ kaṭukaṃ loṇiyaṃ khāriyaṃ lambilaṃ kasāvo sādu asādūti? Na hevaṃ vattabbe…pe….
အတ္ထိ တတ္ထ ကာယာယတနံ အတ္ထိ ဖောဋ္ဌဗ္ဗာယတနံ, တေန ကာယေန တံ ဖောဋ္ဌဗ္ဗံ ဖုသတီတိ? အာမန္တာ။ အတ္ထိ တတ္ထ ကက္ခဠံ မုဒုကံ သဏ္ဟံ ဖရုသံ သုခသမ္ဖသ္သံ ဒုက္ခသမ္ဖသ္သံ ဂရုကံ လဟုကန္တိ? န ဟေဝံ ဝတ္တဗ္ဗေ။ပေ.။။
Atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Āmantā. Atthi tattha kakkhaḷaṃ mudukaṃ saṇhaṃ pharusaṃ sukhasamphassaṃ dukkhasamphassaṃ garukaṃ lahukanti? Na hevaṃ vattabbe…pe….
၅၂၃. န ဝတ္တဗ္ဗံ – ‘‘သဠာယတနိကော အတ္တဘာဝော ရူပဓာတုယာ’’တိ? အာမန္တာ။ နနု အတ္ထိ တတ္ထ ဃာနနိမိတ္တံ ဇိဝ္ဟာနိမိတ္တံ ကာယနိမိတ္တန္တိ? အာမန္တာ။ ဟဉ္စိ အတ္ထိ တတ္ထ ဃာနနိမိတ္တံ ဇိဝ္ဟာနိမိတ္တံ ကာယနိမိတ္တံ, တေန ဝတ ရေ ဝတ္တဗ္ဗေ – ‘‘သဠာယတနိကော အတ္တဘာဝော ရူပဓာတုယာ’’တိ။
523. Na vattabbaṃ – ‘‘saḷāyataniko attabhāvo rūpadhātuyā’’ti? Āmantā. Nanu atthi tattha ghānanimittaṃ jivhānimittaṃ kāyanimittanti? Āmantā. Hañci atthi tattha ghānanimittaṃ jivhānimittaṃ kāyanimittaṃ, tena vata re vattabbe – ‘‘saḷāyataniko attabhāvo rūpadhātuyā’’ti.
ရူပဓာတုယာ အာယတနကထာ နိဋ္ဌိတာ။
Rūpadhātuyā āyatanakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၇. ရူပဓာတုယာ အာယတနကထာဝဏ္ဏနာ • 7. Rūpadhātuyā āyatanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၇. ရူပဓာတုယာအာယတနကထာဝဏ္ဏနာ • 7. Rūpadhātuyāāyatanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. ရူပဓာတုယာအာယတနကထာဝဏ္ဏနာ • 7. Rūpadhātuyāāyatanakathāvaṇṇanā
