| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
8. අට්‌ඨමවග්‌ගො
8. Aṭṭhamavaggo
(79) 7. රූපධාතුයාආයතනකථා
(79) 7. Rūpadhātuyāāyatanakathā
519. අත්‌ථි සළායතනිකො අත්‌තභාවො රූපධාතුයාති? ආමන්‌තා. අත්‌ථි තත්‌ථ ඝානායතනන්‌ති? ආමන්‌තා. අත්‌ථි තත්‌ථ ගන්‌ධායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ ජිව්‌හායතනන්‌ති? ආමන්‌තා . අත්‌ථි තත්‌ථ රසායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ කායායතනන්‌ති? ආමන්‌තා. අත්‌ථි තත්‌ථ ඵොට්‌ඨබ්‌බායතනන්‌ති? න හෙවං වත්‌තබ්‌බෙ…පෙ.….
519. Atthi saḷāyataniko attabhāvo rūpadhātuyāti? Āmantā. Atthi tattha ghānāyatananti? Āmantā. Atthi tattha gandhāyatananti? Na hevaṃ vattabbe…pe… atthi tattha jivhāyatananti? Āmantā . Atthi tattha rasāyatananti? Na hevaṃ vattabbe…pe… atthi tattha kāyāyatananti? Āmantā. Atthi tattha phoṭṭhabbāyatananti? Na hevaṃ vattabbe…pe….
නත්‌ථි තත්‌ථ ගන්‌ධායතනන්‌ති? ආමන්‌තා. නත්‌ථි තත්‌ථ ඝානායතනන්‌ති? න හෙවං වත්‌තබ්‌බෙ…පෙ.… නත්‌ථි තත්‌ථ රසායතනන්‌ති? ආමන්‌තා. නත්‌ථි තත්‌ථ ජිව්‌හායතනන්‌ති? න හෙවං වත්‌තබ්‌බෙ…පෙ.… නත්‌ථි තත්‌ථ ඵොට්‌ඨබ්‌බායතනන්‌ති? ආමන්‌තා . නත්‌ථි තත්‌ථ කායායතනන්‌ති? න හෙවං වත්‌තබ්‌බෙ…පෙ.….
Natthi tattha gandhāyatananti? Āmantā. Natthi tattha ghānāyatananti? Na hevaṃ vattabbe…pe… natthi tattha rasāyatananti? Āmantā. Natthi tattha jivhāyatananti? Na hevaṃ vattabbe…pe… natthi tattha phoṭṭhabbāyatananti? Āmantā . Natthi tattha kāyāyatananti? Na hevaṃ vattabbe…pe….
520. අත්‌ථි තත්‌ථ චක්‌ඛායතනං, අත්‌ථි රූපායතනන්‌ති? ආමන්‌තා. අත්‌ථි තත්‌ථ ඝානායතනං, අත්‌ථි ගන්‌ධායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ චක්‌ඛායතනං, අත්‌ථි රූපායතනන්‌ති? ආමන්‌තා. අත්‌ථි තත්‌ථ ජිව්‌හායතනං, අත්‌ථි රසායතනං…පෙ.… අත්‌ථි තත්‌ථ කායායතනං, අත්‌ථි ඵොට්‌ඨබ්‌බායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ සොතායතනං, අත්‌ථි සද්‌දායතනං…පෙ.… අත්‌ථි තත්‌ථ මනායතනං, අත්‌ථි ධම්‌මායතනන්‌ති? ආමන්‌තා. අත්‌ථි තත්‌ථ ඝානායතනං, අත්‌ථි ගන්‌ධායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ මනායතනං, අත්‌ථි ධම්‌මායතනන්‌ති? ආමන්‌තා. අත්‌ථි තත්‌ථ ජිව්‌හායතනං, අත්‌ථි රසායතනන්‌ති…පෙ.… අත්‌ථි තත්‌ථ කායායතනං, අත්‌ථි ඵොට්‌ඨබ්‌බායතනන්‌ති? න හෙවං වත්‌තබ්‌බෙ…පෙ.….
520. Atthi tattha cakkhāyatanaṃ, atthi rūpāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha cakkhāyatanaṃ, atthi rūpāyatananti? Āmantā. Atthi tattha jivhāyatanaṃ, atthi rasāyatanaṃ…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe… atthi tattha sotāyatanaṃ, atthi saddāyatanaṃ…pe… atthi tattha manāyatanaṃ, atthi dhammāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha manāyatanaṃ, atthi dhammāyatananti? Āmantā. Atthi tattha jivhāyatanaṃ, atthi rasāyatananti…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe….
අත්‌ථි තත්‌ථ ඝානායතනං, නත්‌ථි ගන්‌ධායතනන්‌ති? ආමන්‌තා . අත්‌ථි තත්‌ථ චක්‌ඛායතනං, නත්‌ථි රූපායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ ඝානායතනං, නත්‌ථි ගන්‌ධායතනන්‌ති? ආමන්‌තා. අත්‌ථි තත්‌ථ සොතායතනං, නත්‌ථි සද්‌දායතනං…පෙ.… අත්‌ථි තත්‌ථ මනායතනං, නත්‌ථි ධම්‌මායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ ජිව්‌හායතනං, නත්‌ථි රසායතනං…පෙ.… අත්‌ථි තත්‌ථ කායායතනං, නත්‌ථි ඵොට්‌ඨබ්‌බායතනන්‌ති? ආමන්‌තා. අත්‌ථි තත්‌ථ චක්‌ඛායතනං, නත්‌ථි රූපායතනන්‌ති? න හෙවං වත්‌තබ්‌බෙ…පෙ.… අත්‌ථි තත්‌ථ කායායතනං, නත්‌ථි ඵොට්‌ඨබ්‌බායතනන්‌ති? ආමන්‌තා. අත්‌ථි තත්‌ථ සොතායතනං, නත්‌ථි සද්‌දායතනං …පෙ.… අත්‌ථි තත්‌ථ මනායතනං, නත්‌ථි ධම්‌මායතනන්‌ති? න හෙවං වත්‌තබ්‌බෙ…පෙ.….
Atthi tattha ghānāyatanaṃ, natthi gandhāyatananti? Āmantā . Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha ghānāyatanaṃ, natthi gandhāyatananti? Āmantā. Atthi tattha sotāyatanaṃ, natthi saddāyatanaṃ…pe… atthi tattha manāyatanaṃ, natthi dhammāyatananti? Na hevaṃ vattabbe…pe… atthi tattha jivhāyatanaṃ, natthi rasāyatanaṃ…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha sotāyatanaṃ, natthi saddāyatanaṃ …pe… atthi tattha manāyatanaṃ, natthi dhammāyatananti? Na hevaṃ vattabbe…pe….
521. අත්‌ථි තත්‌ථ චක්‌ඛායතනං අත්‌ථි රූපායතනං, තෙන චක්‌ඛුනා තං රූපං පස්‌සතීති? ආමන්‌තා. අත්‌ථි තත්‌ථ ඝානායතනං අත්‌ථි ගන්‌ධායතනං, තෙන ඝානෙන තං ගන්‌ධං ඝායතීති? න හෙවං වත්‌තබ්‌බෙ…පෙ.… අත්‌ථි තත්‌ථ චක්‌ඛායතනං අත්‌ථි රූපායතනං, තෙන චක්‌ඛුනා තං රූපං පස්‌සතීති? ආමන්‌තා. අත්‌ථි තත්‌ථ ජිව්‌හායතනං අත්‌ථි රසායතනං, තාය ජිව්‌හාය තං රසං සායති…පෙ.… අත්‌ථි තත්‌ථ කායායතනං අත්‌ථි ඵොට්‌ඨබ්‌බායතනං, තෙන කායෙන තං ඵොට්‌ඨබ්‌බං ඵුසතීති? න හෙවං වත්‌තබ්‌බෙ…පෙ.….
521. Atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyati…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
අත්‌ථි තත්‌ථ සොතායතනං අත්‌ථි සද්‌දායතනං…පෙ.… අත්‌ථි තත්‌ථ මනායතනං අත්‌ථි ධම්‌මායතනං, තෙන මනෙන තං ධම්‌මං විජානාතීති? ආමන්‌තා. අත්‌ථි තත්‌ථ ඝානායතනං අත්‌ථි ගන්‌ධායතනං, තෙන ඝානෙන තං ගන්‌ධං ඝායතීති? න හෙවං වත්‌තබ්‌බෙ…පෙ.… අත්‌ථි තත්‌ථ මනායතනං අත්‌ථි ධම්‌මායතනං, තෙන මනෙන තං ධම්‌මං විජානාතීති? ආමන්‌තා. අත්‌ථි තත්‌ථ ජිව්‌හායතනං අත්‌ථි රසායතනං…පෙ.… අත්‌ථි තත්‌ථ කායායතනං අත්‌ථි ඵොට්‌ඨබ්‌බායතනං, තෙන කායෙන තං ඵොට්‌ඨබ්‌බං ඵුසතීති? න හෙවං වත්‌තබ්‌බෙ…පෙ.….
Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
අත්‌ථි තත්‌ථ ඝානායතනං අත්‌ථි ගන්‌ධායතනං, න ච තෙන ඝානෙන තං ගන්‌ධං ඝායතීති? ආමන්‌තා. අත්‌ථි තත්‌ථ චක්‌ඛායතනං අත්‌ථි රූපායතනං, න ච තෙන චක්‌ඛුනා තං රූපං පස්‌සතීති? න හෙවං වත්‌තබ්‌බෙ…පෙ.… අත්‌ථි තත්‌ථ ඝානායතනං අත්‌ථි ගන්‌ධායතනං, න ච තෙන ඝානෙන තං ගන්‌ධං ඝායතීති? ආමන්‌තා. අත්‌ථි තත්‌ථ සොතායතනං අත්‌ථි සද්‌දායතනං…පෙ.… අත්‌ථි තත්‌ථ මනායතනං අත්‌ථි ධම්‌මායතනං, න ච තෙන මනෙන තං ධම්‌මං විජානාතීති? න හෙවං වත්‌තබ්‌බෙ…පෙ.….
Atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha cakkhāyatanaṃ atthi rūpāyatanaṃ, na ca tena cakkhunā taṃ rūpaṃ passatīti? Na hevaṃ vattabbe…pe… atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
අත්‌ථි තත්‌ථ ජිව්‌හායතනං අත්‌ථි රසායතනං…පෙ.… අත්‌ථි තත්‌ථ කායායතනං අත්‌ථි ඵොට්‌ඨබ්‌බායතනං, න ච තෙන කායෙන තං ඵොට්‌ඨබ්‌බං ඵුසතීති? ආමන්‌තා. අත්‌ථි තත්‌ථ සොතායතනං අත්‌ථි සද්‌දායතනං…පෙ.… අත්‌ථි තත්‌ථ මනායතනං අත්‌ථි ධම්‌මායතනං, න ච තෙන මනෙන තං ධම්‌මං විජානාතීති? න හෙවං වත්‌තබ්‌බෙ…පෙ.….
Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, na ca tena kāyena taṃ phoṭṭhabbaṃ phusatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
522. අත්‌ථි තත්‌ථ ඝානායතනං අත්‌ථි ගන්‌ධායතනං, තෙන ඝානෙන තං ගන්‌ධං ඝායතීති? ආමන්‌තා. අත්‌ථි තත්‌ථ මූලගන්‌ධො සාරගන්‌ධො තචගන්‌ධො පත්‌තගන්‌ධො පුප්‌ඵගන්‌ධො ඵලගන්‌ධො ආමගන්‌ධො විස්‌සගන්‌ධො සුගන්‌ධො දුග්‌ගන්‌ධොති? න හෙවං වත්‌තබ්‌බෙ…පෙ.….
522. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Āmantā. Atthi tattha mūlagandho sāragandho tacagandho pattagandho pupphagandho phalagandho āmagandho vissagandho sugandho duggandhoti? Na hevaṃ vattabbe…pe….
අත්‌ථි තත්‌ථ ජිව්‌හායතනං අත්‌ථි රසායතනං, තාය ජිව්‌හාය තං රසං සායතීති? ආමන්‌තා. අත්‌ථි තත්‌ථ මූලරසො ඛන්‌ධරසො තචරසො පත්‌තරසො පුප්‌ඵරසො ඵලරසො අම්‌බිලං මධුරං තිත්‌තකං කටුකං ලොණියං ඛාරියං ලම්‌බිලං කසාවො සාදු අසාදූති? න හෙවං වත්‌තබ්‌බෙ…පෙ.….
Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyatīti? Āmantā. Atthi tattha mūlaraso khandharaso tacaraso pattaraso puppharaso phalaraso ambilaṃ madhuraṃ tittakaṃ kaṭukaṃ loṇiyaṃ khāriyaṃ lambilaṃ kasāvo sādu asādūti? Na hevaṃ vattabbe…pe….
අත්‌ථි තත්‌ථ කායායතනං අත්‌ථි ඵොට්‌ඨබ්‌බායතනං, තෙන කායෙන තං ඵොට්‌ඨබ්‌බං ඵුසතීති? ආමන්‌තා. අත්‌ථි තත්‌ථ කක්‌ඛළං මුදුකං සණ්‌හං ඵරුසං සුඛසම්‌ඵස්‌සං දුක්‌ඛසම්‌ඵස්‌සං ගරුකං ලහුකන්‌ති? න හෙවං වත්‌තබ්‌බෙ…පෙ.….
Atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Āmantā. Atthi tattha kakkhaḷaṃ mudukaṃ saṇhaṃ pharusaṃ sukhasamphassaṃ dukkhasamphassaṃ garukaṃ lahukanti? Na hevaṃ vattabbe…pe….
523. න වත්‌තබ්‌බං – ‘‘සළායතනිකො අත්‌තභාවො රූපධාතුයා’’ති? ආමන්‌තා. නනු අත්‌ථි තත්‌ථ ඝානනිමිත්‌තං ජිව්‌හානිමිත්‌තං කායනිමිත්‌තන්‌ති? ආමන්‌තා. හඤ්‌චි අත්‌ථි තත්‌ථ ඝානනිමිත්‌තං ජිව්‌හානිමිත්‌තං කායනිමිත්‌තං, තෙන වත රෙ වත්‌තබ්‌බෙ – ‘‘සළායතනිකො අත්‌තභාවො රූපධාතුයා’’ති.
523. Na vattabbaṃ – ‘‘saḷāyataniko attabhāvo rūpadhātuyā’’ti? Āmantā. Nanu atthi tattha ghānanimittaṃ jivhānimittaṃ kāyanimittanti? Āmantā. Hañci atthi tattha ghānanimittaṃ jivhānimittaṃ kāyanimittaṃ, tena vata re vattabbe – ‘‘saḷāyataniko attabhāvo rūpadhātuyā’’ti.
රූපධාතුයා ආයතනකථා නිට්‌ඨිතා.
Rūpadhātuyā āyatanakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 7. රූපධාතුයා ආයතනකථාවණ්‌ණනා • 7. Rūpadhātuyā āyatanakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. රූපධාතුයාආයතනකථාවණ්‌ණනා • 7. Rūpadhātuyāāyatanakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. රූපධාතුයාආයතනකථාවණ්‌ණනා • 7. Rūpadhātuyāāyatanakathāvaṇṇanā
