| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൮. അട്ഠമവഗ്ഗോ
8. Aṭṭhamavaggo
(൭൯) ൭. രൂപധാതുയാആയതനകഥാ
(79) 7. Rūpadhātuyāāyatanakathā
൫൧൯. അത്ഥി സളായതനികോ അത്തഭാവോ രൂപധാതുയാതി? ആമന്താ. അത്ഥി തത്ഥ ഘാനായതനന്തി? ആമന്താ. അത്ഥി തത്ഥ ഗന്ധായതനന്തി? ന ഹേവം വത്തബ്ബേ…പേ॰… അത്ഥി തത്ഥ ജിവ്ഹായതനന്തി? ആമന്താ . അത്ഥി തത്ഥ രസായതനന്തി? ന ഹേവം വത്തബ്ബേ…പേ॰… അത്ഥി തത്ഥ കായായതനന്തി? ആമന്താ. അത്ഥി തത്ഥ ഫോട്ഠബ്ബായതനന്തി? ന ഹേവം വത്തബ്ബേ…പേ॰….
519. Atthi saḷāyataniko attabhāvo rūpadhātuyāti? Āmantā. Atthi tattha ghānāyatananti? Āmantā. Atthi tattha gandhāyatananti? Na hevaṃ vattabbe…pe… atthi tattha jivhāyatananti? Āmantā . Atthi tattha rasāyatananti? Na hevaṃ vattabbe…pe… atthi tattha kāyāyatananti? Āmantā. Atthi tattha phoṭṭhabbāyatananti? Na hevaṃ vattabbe…pe….
നത്ഥി തത്ഥ ഗന്ധായതനന്തി? ആമന്താ. നത്ഥി തത്ഥ ഘാനായതനന്തി? ന ഹേവം വത്തബ്ബേ…പേ॰… നത്ഥി തത്ഥ രസായതനന്തി? ആമന്താ. നത്ഥി തത്ഥ ജിവ്ഹായതനന്തി? ന ഹേവം വത്തബ്ബേ…പേ॰… നത്ഥി തത്ഥ ഫോട്ഠബ്ബായതനന്തി? ആമന്താ . നത്ഥി തത്ഥ കായായതനന്തി? ന ഹേവം വത്തബ്ബേ…പേ॰….
Natthi tattha gandhāyatananti? Āmantā. Natthi tattha ghānāyatananti? Na hevaṃ vattabbe…pe… natthi tattha rasāyatananti? Āmantā. Natthi tattha jivhāyatananti? Na hevaṃ vattabbe…pe… natthi tattha phoṭṭhabbāyatananti? Āmantā . Natthi tattha kāyāyatananti? Na hevaṃ vattabbe…pe….
൫൨൦. അത്ഥി തത്ഥ ചക്ഖായതനം, അത്ഥി രൂപായതനന്തി? ആമന്താ. അത്ഥി തത്ഥ ഘാനായതനം, അത്ഥി ഗന്ധായതനന്തി? ന ഹേവം വത്തബ്ബേ…പേ॰… അത്ഥി തത്ഥ ചക്ഖായതനം, അത്ഥി രൂപായതനന്തി? ആമന്താ. അത്ഥി തത്ഥ ജിവ്ഹായതനം, അത്ഥി രസായതനം…പേ॰… അത്ഥി തത്ഥ കായായതനം, അത്ഥി ഫോട്ഠബ്ബായതനന്തി? ന ഹേവം വത്തബ്ബേ…പേ॰… അത്ഥി തത്ഥ സോതായതനം, അത്ഥി സദ്ദായതനം…പേ॰… അത്ഥി തത്ഥ മനായതനം, അത്ഥി ധമ്മായതനന്തി? ആമന്താ. അത്ഥി തത്ഥ ഘാനായതനം, അത്ഥി ഗന്ധായതനന്തി? ന ഹേവം വത്തബ്ബേ…പേ॰… അത്ഥി തത്ഥ മനായതനം, അത്ഥി ധമ്മായതനന്തി? ആമന്താ. അത്ഥി തത്ഥ ജിവ്ഹായതനം, അത്ഥി രസായതനന്തി…പേ॰… അത്ഥി തത്ഥ കായായതനം, അത്ഥി ഫോട്ഠബ്ബായതനന്തി? ന ഹേവം വത്തബ്ബേ…പേ॰….
520. Atthi tattha cakkhāyatanaṃ, atthi rūpāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha cakkhāyatanaṃ, atthi rūpāyatananti? Āmantā. Atthi tattha jivhāyatanaṃ, atthi rasāyatanaṃ…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe… atthi tattha sotāyatanaṃ, atthi saddāyatanaṃ…pe… atthi tattha manāyatanaṃ, atthi dhammāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha manāyatanaṃ, atthi dhammāyatananti? Āmantā. Atthi tattha jivhāyatanaṃ, atthi rasāyatananti…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe….
അത്ഥി തത്ഥ ഘാനായതനം, നത്ഥി ഗന്ധായതനന്തി? ആമന്താ . അത്ഥി തത്ഥ ചക്ഖായതനം, നത്ഥി രൂപായതനന്തി? ന ഹേവം വത്തബ്ബേ…പേ॰… അത്ഥി തത്ഥ ഘാനായതനം, നത്ഥി ഗന്ധായതനന്തി? ആമന്താ. അത്ഥി തത്ഥ സോതായതനം, നത്ഥി സദ്ദായതനം…പേ॰… അത്ഥി തത്ഥ മനായതനം, നത്ഥി ധമ്മായതനന്തി? ന ഹേവം വത്തബ്ബേ…പേ॰… അത്ഥി തത്ഥ ജിവ്ഹായതനം, നത്ഥി രസായതനം…പേ॰… അത്ഥി തത്ഥ കായായതനം, നത്ഥി ഫോട്ഠബ്ബായതനന്തി? ആമന്താ. അത്ഥി തത്ഥ ചക്ഖായതനം, നത്ഥി രൂപായതനന്തി? ന ഹേവം വത്തബ്ബേ…പേ॰… അത്ഥി തത്ഥ കായായതനം, നത്ഥി ഫോട്ഠബ്ബായതനന്തി? ആമന്താ. അത്ഥി തത്ഥ സോതായതനം, നത്ഥി സദ്ദായതനം …പേ॰… അത്ഥി തത്ഥ മനായതനം, നത്ഥി ധമ്മായതനന്തി? ന ഹേവം വത്തബ്ബേ…പേ॰….
Atthi tattha ghānāyatanaṃ, natthi gandhāyatananti? Āmantā . Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha ghānāyatanaṃ, natthi gandhāyatananti? Āmantā. Atthi tattha sotāyatanaṃ, natthi saddāyatanaṃ…pe… atthi tattha manāyatanaṃ, natthi dhammāyatananti? Na hevaṃ vattabbe…pe… atthi tattha jivhāyatanaṃ, natthi rasāyatanaṃ…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha sotāyatanaṃ, natthi saddāyatanaṃ …pe… atthi tattha manāyatanaṃ, natthi dhammāyatananti? Na hevaṃ vattabbe…pe….
൫൨൧. അത്ഥി തത്ഥ ചക്ഖായതനം അത്ഥി രൂപായതനം, തേന ചക്ഖുനാ തം രൂപം പസ്സതീതി? ആമന്താ. അത്ഥി തത്ഥ ഘാനായതനം അത്ഥി ഗന്ധായതനം, തേന ഘാനേന തം ഗന്ധം ഘായതീതി? ന ഹേവം വത്തബ്ബേ…പേ॰… അത്ഥി തത്ഥ ചക്ഖായതനം അത്ഥി രൂപായതനം, തേന ചക്ഖുനാ തം രൂപം പസ്സതീതി? ആമന്താ. അത്ഥി തത്ഥ ജിവ്ഹായതനം അത്ഥി രസായതനം, തായ ജിവ്ഹായ തം രസം സായതി…പേ॰… അത്ഥി തത്ഥ കായായതനം അത്ഥി ഫോട്ഠബ്ബായതനം, തേന കായേന തം ഫോട്ഠബ്ബം ഫുസതീതി? ന ഹേവം വത്തബ്ബേ…പേ॰….
521. Atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyati…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
അത്ഥി തത്ഥ സോതായതനം അത്ഥി സദ്ദായതനം…പേ॰… അത്ഥി തത്ഥ മനായതനം അത്ഥി ധമ്മായതനം, തേന മനേന തം ധമ്മം വിജാനാതീതി? ആമന്താ. അത്ഥി തത്ഥ ഘാനായതനം അത്ഥി ഗന്ധായതനം, തേന ഘാനേന തം ഗന്ധം ഘായതീതി? ന ഹേവം വത്തബ്ബേ…പേ॰… അത്ഥി തത്ഥ മനായതനം അത്ഥി ധമ്മായതനം, തേന മനേന തം ധമ്മം വിജാനാതീതി? ആമന്താ. അത്ഥി തത്ഥ ജിവ്ഹായതനം അത്ഥി രസായതനം…പേ॰… അത്ഥി തത്ഥ കായായതനം അത്ഥി ഫോട്ഠബ്ബായതനം, തേന കായേന തം ഫോട്ഠബ്ബം ഫുസതീതി? ന ഹേവം വത്തബ്ബേ…പേ॰….
Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
അത്ഥി തത്ഥ ഘാനായതനം അത്ഥി ഗന്ധായതനം, ന ച തേന ഘാനേന തം ഗന്ധം ഘായതീതി? ആമന്താ. അത്ഥി തത്ഥ ചക്ഖായതനം അത്ഥി രൂപായതനം, ന ച തേന ചക്ഖുനാ തം രൂപം പസ്സതീതി? ന ഹേവം വത്തബ്ബേ…പേ॰… അത്ഥി തത്ഥ ഘാനായതനം അത്ഥി ഗന്ധായതനം, ന ച തേന ഘാനേന തം ഗന്ധം ഘായതീതി? ആമന്താ. അത്ഥി തത്ഥ സോതായതനം അത്ഥി സദ്ദായതനം…പേ॰… അത്ഥി തത്ഥ മനായതനം അത്ഥി ധമ്മായതനം, ന ച തേന മനേന തം ധമ്മം വിജാനാതീതി? ന ഹേവം വത്തബ്ബേ…പേ॰….
Atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha cakkhāyatanaṃ atthi rūpāyatanaṃ, na ca tena cakkhunā taṃ rūpaṃ passatīti? Na hevaṃ vattabbe…pe… atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
അത്ഥി തത്ഥ ജിവ്ഹായതനം അത്ഥി രസായതനം…പേ॰… അത്ഥി തത്ഥ കായായതനം അത്ഥി ഫോട്ഠബ്ബായതനം, ന ച തേന കായേന തം ഫോട്ഠബ്ബം ഫുസതീതി? ആമന്താ. അത്ഥി തത്ഥ സോതായതനം അത്ഥി സദ്ദായതനം…പേ॰… അത്ഥി തത്ഥ മനായതനം അത്ഥി ധമ്മായതനം, ന ച തേന മനേന തം ധമ്മം വിജാനാതീതി? ന ഹേവം വത്തബ്ബേ…പേ॰….
Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, na ca tena kāyena taṃ phoṭṭhabbaṃ phusatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
൫൨൨. അത്ഥി തത്ഥ ഘാനായതനം അത്ഥി ഗന്ധായതനം, തേന ഘാനേന തം ഗന്ധം ഘായതീതി? ആമന്താ. അത്ഥി തത്ഥ മൂലഗന്ധോ സാരഗന്ധോ തചഗന്ധോ പത്തഗന്ധോ പുപ്ഫഗന്ധോ ഫലഗന്ധോ ആമഗന്ധോ വിസ്സഗന്ധോ സുഗന്ധോ ദുഗ്ഗന്ധോതി? ന ഹേവം വത്തബ്ബേ…പേ॰….
522. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Āmantā. Atthi tattha mūlagandho sāragandho tacagandho pattagandho pupphagandho phalagandho āmagandho vissagandho sugandho duggandhoti? Na hevaṃ vattabbe…pe….
അത്ഥി തത്ഥ ജിവ്ഹായതനം അത്ഥി രസായതനം, തായ ജിവ്ഹായ തം രസം സായതീതി? ആമന്താ. അത്ഥി തത്ഥ മൂലരസോ ഖന്ധരസോ തചരസോ പത്തരസോ പുപ്ഫരസോ ഫലരസോ അമ്ബിലം മധുരം തിത്തകം കടുകം ലോണിയം ഖാരിയം ലമ്ബിലം കസാവോ സാദു അസാദൂതി? ന ഹേവം വത്തബ്ബേ…പേ॰….
Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyatīti? Āmantā. Atthi tattha mūlaraso khandharaso tacaraso pattaraso puppharaso phalaraso ambilaṃ madhuraṃ tittakaṃ kaṭukaṃ loṇiyaṃ khāriyaṃ lambilaṃ kasāvo sādu asādūti? Na hevaṃ vattabbe…pe….
അത്ഥി തത്ഥ കായായതനം അത്ഥി ഫോട്ഠബ്ബായതനം, തേന കായേന തം ഫോട്ഠബ്ബം ഫുസതീതി? ആമന്താ. അത്ഥി തത്ഥ കക്ഖളം മുദുകം സണ്ഹം ഫരുസം സുഖസമ്ഫസ്സം ദുക്ഖസമ്ഫസ്സം ഗരുകം ലഹുകന്തി? ന ഹേവം വത്തബ്ബേ…പേ॰….
Atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Āmantā. Atthi tattha kakkhaḷaṃ mudukaṃ saṇhaṃ pharusaṃ sukhasamphassaṃ dukkhasamphassaṃ garukaṃ lahukanti? Na hevaṃ vattabbe…pe….
൫൨൩. ന വത്തബ്ബം – ‘‘സളായതനികോ അത്തഭാവോ രൂപധാതുയാ’’തി? ആമന്താ. നനു അത്ഥി തത്ഥ ഘാനനിമിത്തം ജിവ്ഹാനിമിത്തം കായനിമിത്തന്തി? ആമന്താ. ഹഞ്ചി അത്ഥി തത്ഥ ഘാനനിമിത്തം ജിവ്ഹാനിമിത്തം കായനിമിത്തം, തേന വത രേ വത്തബ്ബേ – ‘‘സളായതനികോ അത്തഭാവോ രൂപധാതുയാ’’തി.
523. Na vattabbaṃ – ‘‘saḷāyataniko attabhāvo rūpadhātuyā’’ti? Āmantā. Nanu atthi tattha ghānanimittaṃ jivhānimittaṃ kāyanimittanti? Āmantā. Hañci atthi tattha ghānanimittaṃ jivhānimittaṃ kāyanimittaṃ, tena vata re vattabbe – ‘‘saḷāyataniko attabhāvo rūpadhātuyā’’ti.
രൂപധാതുയാ ആയതനകഥാ നിട്ഠിതാ.
Rūpadhātuyā āyatanakathā niṭṭhitā.
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൭. രൂപധാതുയാ ആയതനകഥാവണ്ണനാ • 7. Rūpadhātuyā āyatanakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൭. രൂപധാതുയാആയതനകഥാവണ്ണനാ • 7. Rūpadhātuyāāyatanakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൭. രൂപധാതുയാആയതനകഥാവണ്ണനാ • 7. Rūpadhātuyāāyatanakathāvaṇṇanā
