| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
9. ரூபங் கம்மந்திகதா²வண்ணனா
9. Rūpaṃ kammantikathāvaṇṇanā
527-537. இதா³னி ரூபங் கம்மந்திகதா² நாம ஹோதி. தத்த² யேஸங் காயவசீவிஞ்ஞத்திஸங்கா²தங் ரூபமேவ காயகம்மங் வசீகம்மங் நாம, தஞ்ச குஸலஸமுட்டா²னங் குஸலங், அகுஸலஸமுட்டா²னங் அகுஸலந்தி லத்³தி⁴, ஸெய்யதா²பி மஹிஸாஸகானஞ்சேவ ஸம்மிதியானஞ்ச; தே ஸந்தா⁴ய குஸலேன சித்தேன ஸமுட்டி²தந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ஸசே தங் குஸலங், ய்வாயங் ஸாரம்மணாதி³பே⁴தோ³ குஸலஸ்ஸ லப்³ப⁴தி, அத்தி² தே ஸோ தஸ்ஸாதி சோதே³துங் ஸாரம்மணந்திஆதி³ ஆரத்³த⁴ங். தத்த² பத்த²னா பணிதீ⁴தி சேதனாயேவேதங் வேவசனங். குஸலசேதனாயேவ ஹி பகப்பயமானா பத்த²னாதி. பகப்பனவஸேன டி²தத்தா பணிதீ⁴தி ச வுச்சதி. பரதோ பன குஸலேன சித்தேன ஸமுட்டி²தா வேத³னா ஸஞ்ஞா சேதனா ஸத்³தா⁴திஆதீ³ஸு வேத³னாதீ³னஞ்ஞேவ செத்த² பத்த²னா பணிதீ⁴தி லப்³ப⁴தி, ந சேதனாய. கஸ்மா? த்³வின்னங் சேதனானங் ஏகதோ அபா⁴வா, ஸோதபதிதத்தா பன ஏவங் தந்தி க³தாதி வேதி³தப்³பா³. ரூபாயதனந்திஆதி³ புரிமவாரே ‘‘ஸப்³ப³ந்தங் குஸல’’ந்தி ஸங்கி²த்தஸ்ஸ பபே⁴த³த³ஸ்ஸனத்த²ங் வுத்தங் . ஸேஸா ஸங்ஸந்த³னநயா, வசீகம்மகதா² ‘‘அகுஸலேன சித்தேன ஸமுட்டி²த’’ந்திஆதி³விதா⁴னஞ்ச ஸப்³ப³ங் பாளிஅனுஸாரேனேவ வேதி³தப்³ப³ங். அஸுசீதி பனெத்த² ஸுக்கங் அதி⁴ப்பேதங். ஸுத்தஸாத⁴னங் உத்தானத்த²மேவ.
527-537. Idāni rūpaṃ kammantikathā nāma hoti. Tattha yesaṃ kāyavacīviññattisaṅkhātaṃ rūpameva kāyakammaṃ vacīkammaṃ nāma, tañca kusalasamuṭṭhānaṃ kusalaṃ, akusalasamuṭṭhānaṃ akusalanti laddhi, seyyathāpi mahisāsakānañceva sammitiyānañca; te sandhāya kusalena cittena samuṭṭhitanti pucchā sakavādissa, paṭiññā itarassa. Atha naṃ sace taṃ kusalaṃ, yvāyaṃ sārammaṇādibhedo kusalassa labbhati, atthi te so tassāti codetuṃ sārammaṇantiādi āraddhaṃ. Tattha patthanā paṇidhīti cetanāyevetaṃ vevacanaṃ. Kusalacetanāyeva hi pakappayamānā patthanāti. Pakappanavasena ṭhitattā paṇidhīti ca vuccati. Parato pana kusalena cittena samuṭṭhitā vedanā saññā cetanā saddhātiādīsu vedanādīnaññeva cettha patthanā paṇidhīti labbhati, na cetanāya. Kasmā? Dvinnaṃ cetanānaṃ ekato abhāvā, sotapatitattā pana evaṃ tanti gatāti veditabbā. Rūpāyatanantiādi purimavāre ‘‘sabbantaṃ kusala’’nti saṃkhittassa pabhedadassanatthaṃ vuttaṃ . Sesā saṃsandananayā, vacīkammakathā ‘‘akusalena cittena samuṭṭhita’’ntiādividhānañca sabbaṃ pāḷianusāreneva veditabbaṃ. Asucīti panettha sukkaṃ adhippetaṃ. Suttasādhanaṃ uttānatthameva.
ரூபங் கம்மந்திகதா²வண்ணனா.
Rūpaṃ kammantikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (81) 9. ரூபங் கம்மந்திகதா² • (81) 9. Rūpaṃ kammantikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. ரூபங்கம்மந்திகதா²வண்ணனா • 9. Rūpaṃkammantikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 9. ரூபங்கம்மந்திகதா²வண்ணனா • 9. Rūpaṃkammantikathāvaṇṇanā
