| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. রূপং কম্মন্তিকথাৰণ্ণনা
9. Rūpaṃ kammantikathāvaṇṇanā
৫২৭-৫৩৭. ইদানি রূপং কম্মন্তিকথা নাম হোতি। তত্থ যেসং কাযৰচীৰিঞ্ঞত্তিসঙ্খাতং রূপমেৰ কাযকম্মং ৰচীকম্মং নাম, তঞ্চ কুসলসমুট্ঠানং কুসলং, অকুসলসমুট্ঠানং অকুসলন্তি লদ্ধি, সেয্যথাপি মহিসাসকানঞ্চেৰ সম্মিতিযানঞ্চ; তে সন্ধায কুসলেন চিত্তেন সমুট্ঠিতন্তি পুচ্ছা সকৰাদিস্স, পটিঞ্ঞা ইতরস্স। অথ নং সচে তং কুসলং, য্ৰাযং সারম্মণাদিভেদো কুসলস্স লব্ভতি, অত্থি তে সো তস্সাতি চোদেতুং সারম্মণন্তিআদি আরদ্ধং। তত্থ পত্থনা পণিধীতি চেতনাযেৰেতং ৰেৰচনং। কুসলচেতনাযেৰ হি পকপ্পযমানা পত্থনাতি। পকপ্পনৰসেন ঠিতত্তা পণিধীতি চ ৰুচ্চতি। পরতো পন কুসলেন চিত্তেন সমুট্ঠিতা ৰেদনা সঞ্ঞা চেতনা সদ্ধাতিআদীসু ৰেদনাদীনঞ্ঞেৰ চেত্থ পত্থনা পণিধীতি লব্ভতি, ন চেতনায। কস্মা? দ্ৰিন্নং চেতনানং একতো অভাৰা, সোতপতিতত্তা পন এৰং তন্তি গতাতি ৰেদিতব্বা। রূপাযতনন্তিআদি পুরিমৰারে ‘‘সব্বন্তং কুসল’’ন্তি সংখিত্তস্স পভেদদস্সনত্থং ৰুত্তং । সেসা সংসন্দননযা, ৰচীকম্মকথা ‘‘অকুসলেন চিত্তেন সমুট্ঠিত’’ন্তিআদিৰিধানঞ্চ সব্বং পাল়িঅনুসারেনেৰ ৰেদিতব্বং। অসুচীতি পনেত্থ সুক্কং অধিপ্পেতং। সুত্তসাধনং উত্তানত্থমেৰ।
527-537. Idāni rūpaṃ kammantikathā nāma hoti. Tattha yesaṃ kāyavacīviññattisaṅkhātaṃ rūpameva kāyakammaṃ vacīkammaṃ nāma, tañca kusalasamuṭṭhānaṃ kusalaṃ, akusalasamuṭṭhānaṃ akusalanti laddhi, seyyathāpi mahisāsakānañceva sammitiyānañca; te sandhāya kusalena cittena samuṭṭhitanti pucchā sakavādissa, paṭiññā itarassa. Atha naṃ sace taṃ kusalaṃ, yvāyaṃ sārammaṇādibhedo kusalassa labbhati, atthi te so tassāti codetuṃ sārammaṇantiādi āraddhaṃ. Tattha patthanā paṇidhīti cetanāyevetaṃ vevacanaṃ. Kusalacetanāyeva hi pakappayamānā patthanāti. Pakappanavasena ṭhitattā paṇidhīti ca vuccati. Parato pana kusalena cittena samuṭṭhitā vedanā saññā cetanā saddhātiādīsu vedanādīnaññeva cettha patthanā paṇidhīti labbhati, na cetanāya. Kasmā? Dvinnaṃ cetanānaṃ ekato abhāvā, sotapatitattā pana evaṃ tanti gatāti veditabbā. Rūpāyatanantiādi purimavāre ‘‘sabbantaṃ kusala’’nti saṃkhittassa pabhedadassanatthaṃ vuttaṃ . Sesā saṃsandananayā, vacīkammakathā ‘‘akusalena cittena samuṭṭhita’’ntiādividhānañca sabbaṃ pāḷianusāreneva veditabbaṃ. Asucīti panettha sukkaṃ adhippetaṃ. Suttasādhanaṃ uttānatthameva.
রূপং কম্মন্তিকথাৰণ্ণনা।
Rūpaṃ kammantikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৮১) ৯. রূপং কম্মন্তিকথা • (81) 9. Rūpaṃ kammantikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. রূপংকম্মন্তিকথাৰণ্ণনা • 9. Rūpaṃkammantikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. রূপংকম্মন্তিকথাৰণ্ণনা • 9. Rūpaṃkammantikathāvaṇṇanā
