| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༩. རཱུཔཾ ཀམྨནྟིཀཐཱཝཎྞནཱ
9. Rūpaṃ kammantikathāvaṇṇanā
༥༢༧-༥༣༧. ཨིདཱནི རཱུཔཾ ཀམྨནྟིཀཐཱ ནཱམ ཧོཏི། ཏཏྠ ཡེསཾ ཀཱཡཝཙཱིཝིཉྙཏྟིསངྑཱཏཾ རཱུཔམེཝ ཀཱཡཀམྨཾ ཝཙཱིཀམྨཾ ནཱམ, ཏཉྩ ཀུསལསམུཊྛཱནཾ ཀུསལཾ, ཨཀུསལསམུཊྛཱནཾ ཨཀུསལནྟི ལདྡྷི, སེཡྻཐཱཔི མཧིསཱསཀཱནཉྩེཝ སམྨིཏིཡཱནཉྩ; ཏེ སནྡྷཱཡ ཀུསལེན ཙིཏྟེན སམུཊྛིཏནྟི པུཙྪཱ སཀཝཱདིསྶ, པཊིཉྙཱ ཨིཏརསྶ། ཨཐ ནཾ སཙེ ཏཾ ཀུསལཾ, ཡྭཱཡཾ སཱརམྨཎཱདིབྷེདོ ཀུསལསྶ ལབྦྷཏི, ཨཏྠི ཏེ སོ ཏསྶཱཏི ཙོདེཏུཾ སཱརམྨཎནྟིཨཱདི ཨཱརདྡྷཾ། ཏཏྠ པཏྠནཱ པཎིདྷཱིཏི ཙེཏནཱཡེཝེཏཾ ཝེཝཙནཾ། ཀུསལཙེཏནཱཡེཝ ཧི པཀཔྤཡམཱནཱ པཏྠནཱཏི། པཀཔྤནཝསེན ཋིཏཏྟཱ པཎིདྷཱིཏི ཙ ཝུཙྩཏི། པརཏོ པན ཀུསལེན ཙིཏྟེན སམུཊྛིཏཱ ཝེདནཱ སཉྙཱ ཙེཏནཱ སདྡྷཱཏིཨཱདཱིསུ ཝེདནཱདཱིནཉྙེཝ ཙེཏྠ པཏྠནཱ པཎིདྷཱིཏི ལབྦྷཏི, ན ཙེཏནཱཡ། ཀསྨཱ? དྭིནྣཾ ཙེཏནཱནཾ ཨེཀཏོ ཨབྷཱཝཱ, སོཏཔཏིཏཏྟཱ པན ཨེཝཾ ཏནྟི གཏཱཏི ཝེདིཏབྦཱ། རཱུཔཱཡཏནནྟིཨཱདི པུརིམཝཱརེ ‘‘སབྦནྟཾ ཀུསལ’’ནྟི སཾཁིཏྟསྶ པབྷེདདསྶནཏྠཾ ཝུཏྟཾ ། སེསཱ སཾསནྡནནཡཱ, ཝཙཱིཀམྨཀཐཱ ‘‘ཨཀུསལེན ཙིཏྟེན སམུཊྛིཏ’’ནྟིཨཱདིཝིདྷཱནཉྩ སབྦཾ པཱལི༹ཨནུསཱརེནེཝ ཝེདིཏབྦཾ། ཨསུཙཱིཏི པནེཏྠ སུཀྐཾ ཨདྷིཔྤེཏཾ། སུཏྟསཱདྷནཾ ཨུཏྟཱནཏྠམེཝ།
527-537. Idāni rūpaṃ kammantikathā nāma hoti. Tattha yesaṃ kāyavacīviññattisaṅkhātaṃ rūpameva kāyakammaṃ vacīkammaṃ nāma, tañca kusalasamuṭṭhānaṃ kusalaṃ, akusalasamuṭṭhānaṃ akusalanti laddhi, seyyathāpi mahisāsakānañceva sammitiyānañca; te sandhāya kusalena cittena samuṭṭhitanti pucchā sakavādissa, paṭiññā itarassa. Atha naṃ sace taṃ kusalaṃ, yvāyaṃ sārammaṇādibhedo kusalassa labbhati, atthi te so tassāti codetuṃ sārammaṇantiādi āraddhaṃ. Tattha patthanā paṇidhīti cetanāyevetaṃ vevacanaṃ. Kusalacetanāyeva hi pakappayamānā patthanāti. Pakappanavasena ṭhitattā paṇidhīti ca vuccati. Parato pana kusalena cittena samuṭṭhitā vedanā saññā cetanā saddhātiādīsu vedanādīnaññeva cettha patthanā paṇidhīti labbhati, na cetanāya. Kasmā? Dvinnaṃ cetanānaṃ ekato abhāvā, sotapatitattā pana evaṃ tanti gatāti veditabbā. Rūpāyatanantiādi purimavāre ‘‘sabbantaṃ kusala’’nti saṃkhittassa pabhedadassanatthaṃ vuttaṃ . Sesā saṃsandananayā, vacīkammakathā ‘‘akusalena cittena samuṭṭhita’’ntiādividhānañca sabbaṃ pāḷianusāreneva veditabbaṃ. Asucīti panettha sukkaṃ adhippetaṃ. Suttasādhanaṃ uttānatthameva.
རཱུཔཾ ཀམྨནྟིཀཐཱཝཎྞནཱ།
Rūpaṃ kammantikathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༨༡) ༩. རཱུཔཾ ཀམྨནྟིཀཐཱ • (81) 9. Rūpaṃ kammantikathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༩. རཱུཔཾཀམྨནྟིཀཐཱཝཎྞནཱ • 9. Rūpaṃkammantikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༩. རཱུཔཾཀམྨནྟིཀཐཱཝཎྞནཱ • 9. Rūpaṃkammantikathāvaṇṇanā
