| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৬. সোল়সমৰগ্গো
16. Soḷasamavaggo
(১৬৪) ৯. রূপং রূপাৰচরারূপাৰচরন্তিকথা
(164) 9. Rūpaṃ rūpāvacarārūpāvacarantikathā
৭৬৮. অত্থি রূপং রূপাৰচরন্তি? আমন্তা। সমাপত্তেসিযং উপপত্তেসিযং দিট্ঠধম্মসুখৰিহারং, সমাপত্তেসিযেন চিত্তেন উপপত্তেসিযেন চিত্তেন দিট্ঠধম্মসুখৰিহারেন চিত্তেন সহগতং সহজাতং সংসট্ঠং সম্পযুত্তং একুপ্পাদং একনিরোধং একৰত্থুকং একারম্মণন্তি? ন হেৰং ৰত্তব্বে…পে॰… ননু ন সমাপত্তেসিযং ন উপপত্তেসিযং ন দিট্ঠধম্মসুখৰিহারং, ন সমাপত্তেসিযেন চিত্তেন ন উপপত্তেসিযেন চিত্তেন ন দিট্ঠধম্মসুখৰিহারেন চিত্তেন সহগতং সহজাতং সংসট্ঠং সম্পযুত্তং একুপ্পাদং একনিরোধং একৰত্থুকং একারম্মণন্তি? আমন্তা। হঞ্চি ন সমাপত্তেসিযং ন উপপত্তেসিযং ন দিট্ঠধম্মসুখৰিহারং, ন সমাপত্তেসিযেন চিত্তেন…পে॰… একারম্মণং, নো চ ৰত রে ৰত্তব্বে – ‘‘অত্থি রূপং রূপাৰচর’’ন্তি।
768. Atthi rūpaṃ rūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena na upapattesiyena cittena na diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Āmantā. Hañci na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena…pe… ekārammaṇaṃ, no ca vata re vattabbe – ‘‘atthi rūpaṃ rūpāvacara’’nti.
৭৬৯. অত্থি রূপং অরূপাৰচরন্তি? আমন্তা। সমাপত্তেসিযং উপপত্তেসিযং দিট্ঠধম্মসুখৰিহারং, সমাপত্তেসিযেন চিত্তেন উপপত্তেসিযেন চিত্তেন দিট্ঠধম্মসুখৰিহারেন চিত্তেন সহগতং সহজাতং সংসট্ঠং সম্পযুত্তং একুপ্পাদং একনিরোধং একৰত্থুকং একারম্মণন্তি? ন হেৰং ৰত্তব্বে…পে॰… ননু ন সমাপত্তেসিযং ন উপপত্তেসিযং ন দিট্ঠধম্মসুখৰিহারং, ন সমাপত্তেসিযেন চিত্তেন …পে॰… একারম্মণন্তি? আমন্তা। হঞ্চি ন সমাপত্তেসিযং ন উপপত্তেসিযং…পে॰… একৰত্থুকং একারম্মণং, নো চ ৰত রে ৰত্তব্বে – ‘‘অত্থি রূপং অরূপাৰচর’’ন্তি।
769. Atthi rūpaṃ arūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena …pe… ekārammaṇanti? Āmantā. Hañci na samāpattesiyaṃ na upapattesiyaṃ…pe… ekavatthukaṃ ekārammaṇaṃ, no ca vata re vattabbe – ‘‘atthi rūpaṃ arūpāvacara’’nti.
৭৭০. ন ৰত্তব্বং – ‘‘অত্থি রূপং রূপাৰচরং, অত্থি রূপং অরূপাৰচর’’ন্তি? আমন্তা। ননু কামাৰচরকম্মস্স কতত্তা রূপং কামাৰচরন্তি? আমন্তা। হঞ্চি কামাৰচরকম্মস্স কতত্তা রূপং কামাৰচরং , তেন ৰত রে ৰত্তব্বে – ‘‘রূপাৰচরকম্মস্স কতত্তা রূপং রূপাৰচরং, অরূপাৰচরকম্মস্স কতত্তা রূপং অরূপাৰচর’’ন্তি।
770. Na vattabbaṃ – ‘‘atthi rūpaṃ rūpāvacaraṃ, atthi rūpaṃ arūpāvacara’’nti? Āmantā. Nanu kāmāvacarakammassa katattā rūpaṃ kāmāvacaranti? Āmantā. Hañci kāmāvacarakammassa katattā rūpaṃ kāmāvacaraṃ , tena vata re vattabbe – ‘‘rūpāvacarakammassa katattā rūpaṃ rūpāvacaraṃ, arūpāvacarakammassa katattā rūpaṃ arūpāvacara’’nti.
রূপং রূপাৰচরারূপাৰচরন্তিকথা নিট্ঠিতা।
Rūpaṃ rūpāvacarārūpāvacarantikathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৯. রূপং রূপাৰচরারূপাৰচরন্তিকথাৰণ্ণনা • 9. Rūpaṃ rūpāvacarārūpāvacarantikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. রূপংরূপাৰচরারূপাৰচরন্তিকথাৰণ্ণনা • 9. Rūpaṃrūpāvacarārūpāvacarantikathāvaṇṇanā
