| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၆. သောဠသမဝဂ္ဂော
16. Soḷasamavaggo
(၁၆၄) ၉. ရူပံ ရူပာဝစရာရူပာဝစရန္တိကထာ
(164) 9. Rūpaṃ rūpāvacarārūpāvacarantikathā
၇၆၈. အတ္ထိ ရူပံ ရူပာဝစရန္တိ? အာမန္တာ။ သမာပတ္တေသိယံ ဥပပတ္တေသိယံ ဒိဋ္ဌဓမ္မသုခဝိဟာရံ, သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတံ သဟဇာတံ သံသဋ္ဌံ သမ္ပယုတ္တံ ဧကုပ္ပာဒံ ဧကနိရောဓံ ဧကဝတ္ထုကံ ဧကာရမ္မဏန္တိ? န ဟေဝံ ဝတ္တဗ္ဗေ။ပေ.။ နနု န သမာပတ္တေသိယံ န ဥပပတ္တေသိယံ န ဒိဋ္ဌဓမ္မသုခဝိဟာရံ, န သမာပတ္တေသိယေန စိတ္တေန န ဥပပတ္တေသိယေန စိတ္တေန န ဒိဋ္ဌဓမ္မသုခဝိဟာရေန စိတ္တေန သဟဂတံ သဟဇာတံ သံသဋ္ဌံ သမ္ပယုတ္တံ ဧကုပ္ပာဒံ ဧကနိရောဓံ ဧကဝတ္ထုကံ ဧကာရမ္မဏန္တိ? အာမန္တာ။ ဟဉ္စိ န သမာပတ္တေသိယံ န ဥပပတ္တေသိယံ န ဒိဋ္ဌဓမ္မသုခဝိဟာရံ, န သမာပတ္တေသိယေန စိတ္တေန။ပေ.။ ဧကာရမ္မဏံ, နော စ ဝတ ရေ ဝတ္တဗ္ဗေ – ‘‘အတ္ထိ ရူပံ ရူပာဝစရ’’န္တိ။
768. Atthi rūpaṃ rūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena na upapattesiyena cittena na diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Āmantā. Hañci na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena…pe… ekārammaṇaṃ, no ca vata re vattabbe – ‘‘atthi rūpaṃ rūpāvacara’’nti.
၇၆၉. အတ္ထိ ရူပံ အရူပာဝစရန္တိ? အာမန္တာ။ သမာပတ္တေသိယံ ဥပပတ္တေသိယံ ဒိဋ္ဌဓမ္မသုခဝိဟာရံ, သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတံ သဟဇာတံ သံသဋ္ဌံ သမ္ပယုတ္တံ ဧကုပ္ပာဒံ ဧကနိရောဓံ ဧကဝတ္ထုကံ ဧကာရမ္မဏန္တိ? န ဟေဝံ ဝတ္တဗ္ဗေ။ပေ.။ နနု န သမာပတ္တေသိယံ န ဥပပတ္တေသိယံ န ဒိဋ္ဌဓမ္မသုခဝိဟာရံ, န သမာပတ္တေသိယေန စိတ္တေန ။ပေ.။ ဧကာရမ္မဏန္တိ? အာမန္တာ။ ဟဉ္စိ န သမာပတ္တေသိယံ န ဥပပတ္တေသိယံ။ပေ.။ ဧကဝတ္ထုကံ ဧကာရမ္မဏံ, နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပာဝစရ’’န္တိ။
769. Atthi rūpaṃ arūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena …pe… ekārammaṇanti? Āmantā. Hañci na samāpattesiyaṃ na upapattesiyaṃ…pe… ekavatthukaṃ ekārammaṇaṃ, no ca vata re vattabbe – ‘‘atthi rūpaṃ arūpāvacara’’nti.
၇၇၀. န ဝတ္တဗ္ဗံ – ‘‘အတ္ထိ ရူပံ ရူပာဝစရံ, အတ္ထိ ရူပံ အရူပာဝစရ’’န္တိ? အာမန္တာ။ နနု ကာမာဝစရကမ္မသ္သ ကတတ္တာ ရူပံ ကာမာဝစရန္တိ? အာမန္တာ။ ဟဉ္စိ ကာမာဝစရကမ္မသ္သ ကတတ္တာ ရူပံ ကာမာဝစရံ , တေန ဝတ ရေ ဝတ္တဗ္ဗေ – ‘‘ရူပာဝစရကမ္မသ္သ ကတတ္တာ ရူပံ ရူပာဝစရံ, အရူပာဝစရကမ္မသ္သ ကတတ္တာ ရူပံ အရူပာဝစရ’’န္တိ။
770. Na vattabbaṃ – ‘‘atthi rūpaṃ rūpāvacaraṃ, atthi rūpaṃ arūpāvacara’’nti? Āmantā. Nanu kāmāvacarakammassa katattā rūpaṃ kāmāvacaranti? Āmantā. Hañci kāmāvacarakammassa katattā rūpaṃ kāmāvacaraṃ , tena vata re vattabbe – ‘‘rūpāvacarakammassa katattā rūpaṃ rūpāvacaraṃ, arūpāvacarakammassa katattā rūpaṃ arūpāvacara’’nti.
ရူပံ ရူပာဝစရာရူပာဝစရန္တိကထာ နိဋ္ဌိတာ။
Rūpaṃ rūpāvacarārūpāvacarantikathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၉. ရူပံ ရူပာဝစရာရူပာဝစရန္တိကထာဝဏ္ဏနာ • 9. Rūpaṃ rūpāvacarārūpāvacarantikathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၉. ရူပံရူပာဝစရာရူပာဝစရန္တိကထာဝဏ္ဏနာ • 9. Rūpaṃrūpāvacarārūpāvacarantikathāvaṇṇanā
