| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
16. සොළසමවග්‌ගො
16. Soḷasamavaggo
(164) 9. රූපං රූපාවචරාරූපාවචරන්‌තිකථා
(164) 9. Rūpaṃ rūpāvacarārūpāvacarantikathā
768. අත්‌ථි රූපං රූපාවචරන්‌ති? ආමන්‌තා. සමාපත්‌තෙසියං උපපත්‌තෙසියං දිට්‌ඨධම්‌මසුඛවිහාරං, සමාපත්‌තෙසියෙන චිත්‌තෙන උපපත්‌තෙසියෙන චිත්‌තෙන දිට්‌ඨධම්‌මසුඛවිහාරෙන චිත්‌තෙන සහගතං සහජාතං සංසට්‌ඨං සම්‌පයුත්‌තං එකුප්‌පාදං එකනිරොධං එකවත්‌ථුකං එකාරම්‌මණන්‌ති? න හෙවං වත්‌තබ්‌බෙ…පෙ.… නනු න සමාපත්‌තෙසියං න උපපත්‌තෙසියං න දිට්‌ඨධම්‌මසුඛවිහාරං, න සමාපත්‌තෙසියෙන චිත්‌තෙන න උපපත්‌තෙසියෙන චිත්‌තෙන න දිට්‌ඨධම්‌මසුඛවිහාරෙන චිත්‌තෙන සහගතං සහජාතං සංසට්‌ඨං සම්‌පයුත්‌තං එකුප්‌පාදං එකනිරොධං එකවත්‌ථුකං එකාරම්‌මණන්‌ති? ආමන්‌තා. හඤ්‌චි න සමාපත්‌තෙසියං න උපපත්‌තෙසියං න දිට්‌ඨධම්‌මසුඛවිහාරං, න සමාපත්‌තෙසියෙන චිත්‌තෙන…පෙ.… එකාරම්‌මණං, නො ච වත රෙ වත්‌තබ්‌බෙ – ‘‘අත්‌ථි රූපං රූපාවචර’’න්‌ති.
768. Atthi rūpaṃ rūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena na upapattesiyena cittena na diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Āmantā. Hañci na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena…pe… ekārammaṇaṃ, no ca vata re vattabbe – ‘‘atthi rūpaṃ rūpāvacara’’nti.
769. අත්‌ථි රූපං අරූපාවචරන්‌ති? ආමන්‌තා. සමාපත්‌තෙසියං උපපත්‌තෙසියං දිට්‌ඨධම්‌මසුඛවිහාරං, සමාපත්‌තෙසියෙන චිත්‌තෙන උපපත්‌තෙසියෙන චිත්‌තෙන දිට්‌ඨධම්‌මසුඛවිහාරෙන චිත්‌තෙන සහගතං සහජාතං සංසට්‌ඨං සම්‌පයුත්‌තං එකුප්‌පාදං එකනිරොධං එකවත්‌ථුකං එකාරම්‌මණන්‌ති? න හෙවං වත්‌තබ්‌බෙ…පෙ.… නනු න සමාපත්‌තෙසියං න උපපත්‌තෙසියං න දිට්‌ඨධම්‌මසුඛවිහාරං, න සමාපත්‌තෙසියෙන චිත්‌තෙන …පෙ.… එකාරම්‌මණන්‌ති? ආමන්‌තා. හඤ්‌චි න සමාපත්‌තෙසියං න උපපත්‌තෙසියං…පෙ.… එකවත්‌ථුකං එකාරම්‌මණං, නො ච වත රෙ වත්‌තබ්‌බෙ – ‘‘අත්‌ථි රූපං අරූපාවචර’’න්‌ති.
769. Atthi rūpaṃ arūpāvacaranti? Āmantā. Samāpattesiyaṃ upapattesiyaṃ diṭṭhadhammasukhavihāraṃ, samāpattesiyena cittena upapattesiyena cittena diṭṭhadhammasukhavihārena cittena sahagataṃ sahajātaṃ saṃsaṭṭhaṃ sampayuttaṃ ekuppādaṃ ekanirodhaṃ ekavatthukaṃ ekārammaṇanti? Na hevaṃ vattabbe…pe… nanu na samāpattesiyaṃ na upapattesiyaṃ na diṭṭhadhammasukhavihāraṃ, na samāpattesiyena cittena …pe… ekārammaṇanti? Āmantā. Hañci na samāpattesiyaṃ na upapattesiyaṃ…pe… ekavatthukaṃ ekārammaṇaṃ, no ca vata re vattabbe – ‘‘atthi rūpaṃ arūpāvacara’’nti.
770. න වත්‌තබ්‌බං – ‘‘අත්‌ථි රූපං රූපාවචරං, අත්‌ථි රූපං අරූපාවචර’’න්‌ති? ආමන්‌තා. නනු කාමාවචරකම්‌මස්‌ස කතත්‌තා රූපං කාමාවචරන්‌ති? ආමන්‌තා. හඤ්‌චි කාමාවචරකම්‌මස්‌ස කතත්‌තා රූපං කාමාවචරං , තෙන වත රෙ වත්‌තබ්‌බෙ – ‘‘රූපාවචරකම්‌මස්‌ස කතත්‌තා රූපං රූපාවචරං, අරූපාවචරකම්‌මස්‌ස කතත්‌තා රූපං අරූපාවචර’’න්‌ති.
770. Na vattabbaṃ – ‘‘atthi rūpaṃ rūpāvacaraṃ, atthi rūpaṃ arūpāvacara’’nti? Āmantā. Nanu kāmāvacarakammassa katattā rūpaṃ kāmāvacaranti? Āmantā. Hañci kāmāvacarakammassa katattā rūpaṃ kāmāvacaraṃ , tena vata re vattabbe – ‘‘rūpāvacarakammassa katattā rūpaṃ rūpāvacaraṃ, arūpāvacarakammassa katattā rūpaṃ arūpāvacara’’nti.
රූපං රූපාවචරාරූපාවචරන්‌තිකථා නිට්‌ඨිතා.
Rūpaṃ rūpāvacarārūpāvacarantikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 9. රූපං රූපාවචරාරූපාවචරන්‌තිකථාවණ්‌ණනා • 9. Rūpaṃ rūpāvacarārūpāvacarantikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 9. රූපංරූපාවචරාරූපාවචරන්‌තිකථාවණ්‌ණනා • 9. Rūpaṃrūpāvacarārūpāvacarantikathāvaṇṇanā
