| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
16. සොළසමවග්‌ගො
16. Soḷasamavaggo
(163) 8. රූපං විපාකොතිකථා
(163) 8. Rūpaṃ vipākotikathā
765. රූපං විපාකොති? ආමන්‌තා. රූපං සුඛවෙදනියං දුක්‌ඛවෙදනියං අදුක්‌ඛමසුඛවෙදනියං , සුඛාය වෙදනාය සම්‌පයුත්‌තං, දුක්‌ඛාය වෙදනාය සම්‌පයුත්‌තං, අදුක්‌ඛමසුඛාය වෙදනාය සම්‌පයුත්‌තං, ඵස්‌සෙන සම්‌පයුත්‌තං…පෙ.… චිත්‌තෙන සම්‌පයුත්‌තං, සාරම්‌මණං, අත්‌ථි තස්‌ස ආවට්‌ටනා…පෙ.… පණිධීති? න හෙවං වත්‌තබ්‌බෙ…පෙ.… නනු න සුඛවෙදනියං න දුක්‌ඛවෙදනියං…පෙ.… අනාරම්‌මණං, නත්‌ථි තස්‌ස ආවට්‌ටනා…පෙ.… පණිධීති? ආමන්‌තා. හඤ්‌චි න සුඛවෙදනියං න දුක්‌ඛවෙදනියං…පෙ.… අනාරම්‌මණං, නත්‌ථි තස්‌ස ආවට්‌ටනා…පෙ.… පණිධි, නො ච වත රෙ වත්‌තබ්‌බෙ – ‘‘රූපං විපාකො’’ති.
765. Rūpaṃ vipākoti? Āmantā. Rūpaṃ sukhavedaniyaṃ dukkhavedaniyaṃ adukkhamasukhavedaniyaṃ , sukhāya vedanāya sampayuttaṃ, dukkhāya vedanāya sampayuttaṃ, adukkhamasukhāya vedanāya sampayuttaṃ, phassena sampayuttaṃ…pe… cittena sampayuttaṃ, sārammaṇaṃ, atthi tassa āvaṭṭanā…pe… paṇidhīti? Na hevaṃ vattabbe…pe… nanu na sukhavedaniyaṃ na dukkhavedaniyaṃ…pe… anārammaṇaṃ, natthi tassa āvaṭṭanā…pe… paṇidhīti? Āmantā. Hañci na sukhavedaniyaṃ na dukkhavedaniyaṃ…pe… anārammaṇaṃ, natthi tassa āvaṭṭanā…pe… paṇidhi, no ca vata re vattabbe – ‘‘rūpaṃ vipāko’’ti.
766. ඵස්‌සො විපාකො, ඵස්‌සො සුඛවෙදනියො දුක්‌ඛවෙදනියො…පෙ.… සාරම්‌මණො , අත්‌ථි තස්‌ස ආවට්‌ටනා…පෙ.… පණිධීති? ආමන්‌තා. රූපං විපාකො, රූපං සුඛවෙදනියං දුක්‌ඛවෙදනියං…පෙ.… සාරම්‌මණං, අත්‌ථි තස්‌ස ආවට්‌ටනා…පෙ.… පණිධීති? න හෙවං වත්‌තබ්‌බෙ…පෙ.….
766. Phasso vipāko, phasso sukhavedaniyo dukkhavedaniyo…pe… sārammaṇo , atthi tassa āvaṭṭanā…pe… paṇidhīti? Āmantā. Rūpaṃ vipāko, rūpaṃ sukhavedaniyaṃ dukkhavedaniyaṃ…pe… sārammaṇaṃ, atthi tassa āvaṭṭanā…pe… paṇidhīti? Na hevaṃ vattabbe…pe….
රූපං විපාකො , රූපං න සුඛවෙදනියං න දුක්‌ඛවෙදනියං…පෙ.… අනාරම්‌මණං, නත්‌ථි තස්‌ස ආවට්‌ටනා…පෙ.… පණිධීති? ආමන්‌තා. ඵස්‌සො විපාකො, ඵස්‌සො න සුඛවෙදනියො න දුක්‌ඛවෙදනියො…පෙ.… අනාරම්‌මණො, නත්‌ථි තස්‌ස ආවට්‌ටනා…පෙ.… පණිධීති? න හෙවං වත්‌තබ්‌බෙ…පෙ.….
Rūpaṃ vipāko , rūpaṃ na sukhavedaniyaṃ na dukkhavedaniyaṃ…pe… anārammaṇaṃ, natthi tassa āvaṭṭanā…pe… paṇidhīti? Āmantā. Phasso vipāko, phasso na sukhavedaniyo na dukkhavedaniyo…pe… anārammaṇo, natthi tassa āvaṭṭanā…pe… paṇidhīti? Na hevaṃ vattabbe…pe….
767. න වත්‌තබ්‌බං – ‘‘රූපං විපාකො’’ති? ආමන්‌තා. නනු කම්‌මස්‌ස කතත්‌තා උප්‌පන්‌නා චිත්‌තචෙතසිකා ධම්‌මා විපාකොති? ආමන්‌තා. හඤ්‌චි කම්‌මස්‌ස කතත්‌තා උප්‌පන්‌නා චිත්‌තචෙතසිකා ධම්‌මා විපාකො, තෙන වත රෙ වත්‌තබ්‌බෙ – ‘‘කම්‌මස්‌ස කතත්‌තා උප්‌පන්‌නං රූපං විපාකො’’ති.
767. Na vattabbaṃ – ‘‘rūpaṃ vipāko’’ti? Āmantā. Nanu kammassa katattā uppannā cittacetasikā dhammā vipākoti? Āmantā. Hañci kammassa katattā uppannā cittacetasikā dhammā vipāko, tena vata re vattabbe – ‘‘kammassa katattā uppannaṃ rūpaṃ vipāko’’ti.
රූපං විපාකොතිකථා නිට්‌ඨිතා.
Rūpaṃ vipākotikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 8. රූපං විපාකොතිකථාවණ්‌ණනා • 8. Rūpaṃ vipākotikathāvaṇṇanā
