| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂. ရူပံမဂ္ဂောတိကထာဝဏ္ဏနာ
2. Rūpaṃmaggotikathāvaṇṇanā
၅၇၃-၅၇၅. ဣဒာနိ ရူပံ မဂ္ဂောတိကထာ နာမ ဟောတိ။ တတ္ထ ယေသံ ‘‘သမ္မာဝာစာကမ္မန္တာဇီဝာ ရူပ’’န္တိ လဒ္ဓိ, သေယ္ယထာပိ မဟိသာသကသမ္မိတိယမဟာသံဃိကာနံ; တေ သန္ဓာယ မဂ္ဂသမင္ဂိသ္သာတိ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ ‘‘ယဒိ တေ သမ္မာဝာစာဒယော ရူပံ, န ဝိရတိယော, ယထာ သမ္မာဒိဋ္ဌာဒိမဂ္ဂော သာရမ္မဏာဒိသဘာဝော, ဧဝံ တမ္ပိ ရူပံ သိယာ’’တိ စောဒေတုံ သာရမ္မဏောတိအာဒိမာဟ။ တတ္ထ ပဋိက္ခေပော စ ပဋိညာ စ ပရဝာဒိနော လဒ္ဓိအနုရူပေန ဝေဒိတဗ္ဗာ။ သေသမေတ္ထ ဥတ္တာနတ္ထမေဝာတိ။
573-575. Idāni rūpaṃ maggotikathā nāma hoti. Tattha yesaṃ ‘‘sammāvācākammantājīvā rūpa’’nti laddhi, seyyathāpi mahisāsakasammitiyamahāsaṃghikānaṃ; te sandhāya maggasamaṅgissāti pucchā sakavādissa, paṭiññā itarassa. Atha naṃ ‘‘yadi te sammāvācādayo rūpaṃ, na viratiyo, yathā sammādiṭṭhādimaggo sārammaṇādisabhāvo, evaṃ tampi rūpaṃ siyā’’ti codetuṃ sārammaṇotiādimāha. Tattha paṭikkhepo ca paṭiññā ca paravādino laddhianurūpena veditabbā. Sesamettha uttānatthamevāti.
ရူပံ မဂ္ဂောတိကထာဝဏ္ဏနာ။
Rūpaṃ maggotikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၉၆) ၂. ရူပံ မဂ္ဂောတိကထာ • (96) 2. Rūpaṃ maggotikathā
