| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ரூபஸுத்தங்
2. Rūpasuttaṃ
303. ஸாவத்தி²னிதா³னங். ‘‘ரூபா, பி⁴க்க²வே, அனிச்சா விபரிணாமினோ அஞ்ஞதா²பா⁴வினோ; ஸத்³தா³ அனிச்சா விபரிணாமினோ அஞ்ஞதா²பா⁴வினோ; க³ந்தா⁴ அனிச்சா விபரிணாமினோ அஞ்ஞதா²பா⁴வினோ ; ரஸா அனிச்சா விபரிணாமினோ அஞ்ஞதா²பா⁴வினோ; பொ²ட்ட²ப்³பா³ அனிச்சா விபரிணாமினோ அஞ்ஞதா²பா⁴வினோ; த⁴ம்மா அனிச்சா விபரிணாமினோ அஞ்ஞதா²பா⁴வினோ. யோ , பி⁴க்க²வே, இமே த⁴ம்மே ஏவங் ஸத்³த³ஹதி அதி⁴முச்சதி, அயங் வுச்சதி ஸத்³தா⁴னுஸாரீ, ஓக்கந்தோ ஸம்மத்தனியாமங், ஸப்புரிஸபூ⁴மிங் ஓக்கந்தோ, வீதிவத்தோ புது²ஜ்ஜனபூ⁴மிங்; அப⁴ப்³போ³ தங் கம்மங் காதுங், யங் கம்மங் கத்வா நிரயங் வா திரச்சா²னயோனிங் வா பெத்திவிஸயங் வா உபபஜ்ஜெய்ய; அப⁴ப்³போ³ ச தாவ காலங் காதுங் யாவ ந ஸோதாபத்திப²லங் ஸச்சி²கரோதி’’.
303. Sāvatthinidānaṃ. ‘‘Rūpā, bhikkhave, aniccā vipariṇāmino aññathābhāvino; saddā aniccā vipariṇāmino aññathābhāvino; gandhā aniccā vipariṇāmino aññathābhāvino ; rasā aniccā vipariṇāmino aññathābhāvino; phoṭṭhabbā aniccā vipariṇāmino aññathābhāvino; dhammā aniccā vipariṇāmino aññathābhāvino. Yo , bhikkhave, ime dhamme evaṃ saddahati adhimuccati, ayaṃ vuccati saddhānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’’.
‘‘யஸ்ஸ கோ², பி⁴க்க²வே, இமே த⁴ம்மா ஏவங் பஞ்ஞாய மத்தஸோ நிஜ்ஜா²னங் க²மந்தி, அயங் வுச்சதி – ‘த⁴ம்மானுஸாரீ, ஓக்கந்தோ ஸம்மத்தனியாமங், ஸப்புரிஸபூ⁴மிங் ஓக்கந்தோ, வீதிவத்தோ புது²ஜ்ஜனபூ⁴மிங்; அப⁴ப்³போ³ தங் கம்மங் காதுங், யங் கம்மங் கத்வா நிரயங் வா திரச்சா²னயோனிங் வா பெத்திவிஸயங் வா உபபஜ்ஜெய்ய; அப⁴ப்³போ³ ச தாவ காலங் காதுங் யாவ ந ஸோதாபத்திப²லங் ஸச்சி²கரோதி’. யோ, பி⁴க்க²வே, இமே த⁴ம்மே ஏவங் பஜானாதி ஏவங் பஸ்ஸதி, அயங் வுச்சதி – ‘ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’’தி. து³தியங்.
‘‘Yassa kho, bhikkhave, ime dhammā evaṃ paññāya mattaso nijjhānaṃ khamanti, ayaṃ vuccati – ‘dhammānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’. Yo, bhikkhave, ime dhamme evaṃ pajānāti evaṃ passati, ayaṃ vuccati – ‘sotāpanno avinipātadhammo niyato sambodhiparāyano’’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-10. சக்கு²ஸுத்தாதி³வண்ணனா • 1-10. Cakkhusuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-10. சக்கு²ஸுத்தாதி³வண்ணனா • 1-10. Cakkhusuttādivaṇṇanā
