| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. ரூபஸுத்தவண்ணனா
5. Rūpasuttavaṇṇanā
65. பஞ்சமே பமினோதி உளாரதாதி³விஸேஸங் ஏதேனாதி பமாணங், ருபகாயோ பமாணங் ஏதஸ்ஸாதி ரூபப்பமாணோ. ததோ ஏவ ரூபே பஸன்னோதி ரூபப்பஸன்னோ. கோ⁴ஸோதி செத்த² து²திகோ⁴ஸோ. லூக²ந்தி பச்சயலூக²தா. த⁴ம்மாதி ஸீலாத³யோ கு³ணத⁴ம்மா அதி⁴ப்பேதா. இமேஸங் பன சதுன்னங் புக்³க³லானங் நானாகரணங் பாளியங்யேவ ஆக³தங். வுத்தஞ்ஹேதங் –
65. Pañcame paminoti uḷāratādivisesaṃ etenāti pamāṇaṃ, rupakāyo pamāṇaṃ etassāti rūpappamāṇo. Tato eva rūpe pasannoti rūpappasanno. Ghosoti cettha thutighoso. Lūkhanti paccayalūkhatā. Dhammāti sīlādayo guṇadhammā adhippetā. Imesaṃ pana catunnaṃ puggalānaṃ nānākaraṇaṃ pāḷiyaṃyeva āgataṃ. Vuttañhetaṃ –
‘‘கதமோ ச புக்³க³லோ ரூபப்பமாணோ ரூபப்பஸன்னோ? இதே⁴கச்சோ புக்³க³லோ ஆரோஹங் வா பஸ்ஸித்வா பரிணாஹங் வா பஸ்ஸித்வா ஸண்டா²னங் வா பஸ்ஸித்வா பாரிபூரிங் வா பஸ்ஸித்வா தத்த² பமாணங் க³ஹெத்வா பஸாத³ங் ஜனேதி. அயங் வுச்சதி புக்³க³லோ ரூபப்பமாணோ ரூபப்பஸன்னோ.
‘‘Katamo ca puggalo rūpappamāṇo rūpappasanno? Idhekacco puggalo ārohaṃ vā passitvā pariṇāhaṃ vā passitvā saṇṭhānaṃ vā passitvā pāripūriṃ vā passitvā tattha pamāṇaṃ gahetvā pasādaṃ janeti. Ayaṃ vuccati puggalo rūpappamāṇo rūpappasanno.
‘‘கதமோ ச புக்³க³லோ கோ⁴ஸப்பமாணோ கோ⁴ஸப்பஸன்னோ? இதே⁴கச்சோ புக்³க³லோ பரவண்ணனாய பரதோ²மனாய பரபஸங்ஸனாய பரவண்ணஹாரிகாய தத்த² பமாணங் க³ஹெத்வா பஸாத³ங் ஜனேதி. அயங் வுச்சதி புக்³க³லோ கோ⁴ஸப்பமாணோ கோ⁴ஸப்பஸன்னோ.
‘‘Katamo ca puggalo ghosappamāṇo ghosappasanno? Idhekacco puggalo paravaṇṇanāya parathomanāya parapasaṃsanāya paravaṇṇahārikāya tattha pamāṇaṃ gahetvā pasādaṃ janeti. Ayaṃ vuccati puggalo ghosappamāṇo ghosappasanno.
‘‘கதமோ ச புக்³க³லோ லூக²ப்பமாணோ லூக²ப்பஸன்னோ? இதே⁴கச்சோ புக்³க³லோ சீவரலூக²ங் வா பஸ்ஸித்வா பத்தலூக²ங் வா பஸ்ஸித்வா ஸேனாஸனலூக²ங் வா பஸ்ஸித்வா விவித⁴ங் வா து³க்கரகாரிகங் பஸ்ஸித்வா தத்த² பமாணங் க³ஹெத்வா பஸாத³ங் ஜனேதி. அயங் வுச்சதி புக்³க³லோ லூக²ப்பமாணோ லூக²ப்பஸன்னோ.
‘‘Katamo ca puggalo lūkhappamāṇo lūkhappasanno? Idhekacco puggalo cīvaralūkhaṃ vā passitvā pattalūkhaṃ vā passitvā senāsanalūkhaṃ vā passitvā vividhaṃ vā dukkarakārikaṃ passitvā tattha pamāṇaṃ gahetvā pasādaṃ janeti. Ayaṃ vuccati puggalo lūkhappamāṇo lūkhappasanno.
‘‘கதமோ ச புக்³க³லோ த⁴ம்மப்பமாணோ த⁴ம்மப்பஸன்னோ? இதே⁴கச்சோ புக்³க³லோ ஸீலங் வா பஸ்ஸித்வா ஸமாதி⁴ங் வா பஸ்ஸித்வா பஞ்ஞங் வா பஸ்ஸித்வா தத்த² பமாணங் க³ஹெத்வா பஸாத³ங் ஜனேதி. அயங் வுச்சதி புக்³க³லோ த⁴ம்மப்பமாணோ த⁴ம்மப்பஸன்னோ’’தி (பு॰ ப॰ 171-172).
‘‘Katamo ca puggalo dhammappamāṇo dhammappasanno? Idhekacco puggalo sīlaṃ vā passitvā samādhiṃ vā passitvā paññaṃ vā passitvā tattha pamāṇaṃ gahetvā pasādaṃ janeti. Ayaṃ vuccati puggalo dhammappamāṇo dhammappasanno’’ti (pu. pa. 171-172).
தத்த² ஆரோஹந்தி உச்சதங். ஸா ச கோ² தஸ்மிங் தஸ்மிங் காலே பமாணயுத்தா த³ட்ட²ப்³பா³. பரிணாஹந்தி நாதிகிஸதூ²லதாவஸேன பீணதங். ஸண்டா²னந்தி தேஸங் தேஸங் அங்க³பச்சங்கா³னங் ஸுஸண்டி²ததங் தீ³க⁴ரஸ்ஸவட்டாதி³யுத்தட்டா²னேஸு ததா²பா⁴வங். பாரிபூரிந்தி ஸப்³பே³ஸங் ஸரீராவயவானங் பரிபுண்ணதங் அவிகலதங். தத்த² பமாணங் க³ஹெத்வாதி தஸ்மிங் ரூபே ரூபஸம்பத்தியங் பமாணபா⁴வங் உபாதா³ய. பஸாத³ங் ஜனேதீதி அதி⁴மொக்க²ங் ஜனேதி உப்பாதே³தி.
Tattha ārohanti uccataṃ. Sā ca kho tasmiṃ tasmiṃ kāle pamāṇayuttā daṭṭhabbā. Pariṇāhanti nātikisathūlatāvasena pīṇataṃ. Saṇṭhānanti tesaṃ tesaṃ aṅgapaccaṅgānaṃ susaṇṭhitataṃ dīgharassavaṭṭādiyuttaṭṭhānesu tathābhāvaṃ. Pāripūrinti sabbesaṃ sarīrāvayavānaṃ paripuṇṇataṃ avikalataṃ. Tattha pamāṇaṃ gahetvāti tasmiṃ rūpe rūpasampattiyaṃ pamāṇabhāvaṃ upādāya. Pasādaṃ janetīti adhimokkhaṃ janeti uppādeti.
பரவண்ணனாயாதி ‘‘அஸுகோ ஏதி³ஸோ ச ஏதி³ஸோ சா’’தி பரஸ்ஸ கு³ணவசனேன. பரதோ²மனாயாதி பரம்முகா² பரஸ்ஸ ஸிலாகு⁴ப்பாத³கேன அபி⁴த்த²வனேன பரேன து²திவஸேன, கா³தா²தி³உபனிப³ந்த⁴னேன வுத்தாய தோ²மனாயாதி வுத்தங் ஹோதி. பரபஸங்ஸனாயாதி பரம்முகா² பரஸ்ஸ கு³ணஸங்கித்தனேன. பரவண்ணஹாரிகாயாதி பரம்பரவண்ணஹாரிகாய பரம்பராய பரஸ்ஸ கித்தனஸத்³த³ஸ்ஸ உபஸங்ஹாரேன. தத்தா²தி தஸ்மிங் து²திகோ⁴ஸே.
Paravaṇṇanāyāti ‘‘asuko ediso ca ediso cā’’ti parassa guṇavacanena. Parathomanāyāti parammukhā parassa silāghuppādakena abhitthavanena parena thutivasena, gāthādiupanibandhanena vuttāya thomanāyāti vuttaṃ hoti. Parapasaṃsanāyāti parammukhā parassa guṇasaṃkittanena. Paravaṇṇahārikāyāti paramparavaṇṇahārikāya paramparāya parassa kittanasaddassa upasaṃhārena. Tatthāti tasmiṃ thutighose.
சீவரலூக²ந்தி தூ²லஜிண்ணப³ஹுதுன்னகதாதி³சீவரஸ்ஸ லூக²பா⁴வங். பத்தலூக²ந்தி அனேகக³ந்தி²காஹடதாதி³பத்தஸ்ஸ லூக²பா⁴வங். விவித⁴ங் வா து³க்கரகாரிகந்தி து⁴தங்கா³தி³வஸேன பவத்தனானாவித⁴ங் து³க்கரசரியங். ஸீலங் வா பஸ்ஸித்வாதி ஸீலபாரிபூரிவஸேன விஸுத்³த⁴ங் காயவசீஸுசரிதங் ஞாணசக்கு²னா பஸ்ஸித்வா, ஜா²னாதி³அதி⁴க³மஸுத்³தி⁴ஸமாதி⁴ங் வா விபஸ்ஸனாபி⁴ஞ்ஞாஸங்கா²தங் பஞ்ஞங் வா பஸ்ஸித்வாதி அத்தோ².
Cīvaralūkhanti thūlajiṇṇabahutunnakatādicīvarassa lūkhabhāvaṃ. Pattalūkhanti anekaganthikāhaṭatādipattassa lūkhabhāvaṃ. Vividhaṃ vā dukkarakārikanti dhutaṅgādivasena pavattanānāvidhaṃ dukkaracariyaṃ. Sīlaṃ vā passitvāti sīlapāripūrivasena visuddhaṃ kāyavacīsucaritaṃ ñāṇacakkhunā passitvā, jhānādiadhigamasuddhisamādhiṃ vā vipassanābhiññāsaṅkhātaṃ paññaṃ vā passitvāti attho.
ஏவமேதஸ்மிங் சதுப்பமாணே லோகஸன்னிவாஸே பு³த்³தே⁴ஸு அப்பஸன்னா மந்தா³, பஸன்னா ப³ஹுகா. ரூபப்பமாணஸ்ஸ ஹி பு³த்³த⁴ரூபதோ உத்தரி பஸாதா³வஹங் ரூபங் நாம நத்தி². கோ⁴ஸப்பமாணஸ்ஸ பு³த்³தா⁴னங் கித்திகோ⁴ஸதோ உத்தரி பஸாதா³வஹோ கோ⁴ஸோ நாம நத்தி². லூக²ப்பமாணஸ்ஸ காஸிகானி வத்தா²னி மஹாரஹானி கஞ்சனபா⁴ஜனானி திண்ணங் உதூனங் அனுச்ச²விகே ஸப்³ப³ஸம்பத்தியுத்தே பாஸாத³வரே பஹாய பங்ஸுகூலசீவரஸேலமயபத்தருக்க²மூலாதி³ஸேனாஸனஸேவினோ பு³த்³த⁴ஸ்ஸ ப⁴க³வதோ லூக²தோ உத்தரி பஸாதா³வஹங் அஞ்ஞங் லூக²ங் நாம நத்தி². த⁴ம்மப்பமாணஸ்ஸ ஸதே³வகே லோகே அஸாதா⁴ரணஸீலாதி³கு³ணஸ்ஸ ததா²க³தஸ்ஸ ஸீலாதி³கு³ணதோ உத்தரி பஸாதா³வஹோ அஞ்ஞோ ஸீலாதி³கு³ணோ நாம நத்தி². இதி ப⁴க³வா இமங் சதுப்பமாணிகங் லோகஸன்னிவாஸங் முட்டி²னா க³ஹெத்வா விய டி²தோதி.
Evametasmiṃ catuppamāṇe lokasannivāse buddhesu appasannā mandā, pasannā bahukā. Rūpappamāṇassa hi buddharūpato uttari pasādāvahaṃ rūpaṃ nāma natthi. Ghosappamāṇassa buddhānaṃ kittighosato uttari pasādāvaho ghoso nāma natthi. Lūkhappamāṇassa kāsikāni vatthāni mahārahāni kañcanabhājanāni tiṇṇaṃ utūnaṃ anucchavike sabbasampattiyutte pāsādavare pahāya paṃsukūlacīvaraselamayapattarukkhamūlādisenāsanasevino buddhassa bhagavato lūkhato uttari pasādāvahaṃ aññaṃ lūkhaṃ nāma natthi. Dhammappamāṇassa sadevake loke asādhāraṇasīlādiguṇassa tathāgatassa sīlādiguṇato uttari pasādāvaho añño sīlādiguṇo nāma natthi. Iti bhagavā imaṃ catuppamāṇikaṃ lokasannivāsaṃ muṭṭhinā gahetvā viya ṭhitoti.
பமாணிங்ஸூதி பமாணங் அக்³க³ஹேஸுங். நியகஜ்ஜ²த்தே தஸ்ஸ கு³ணங் ந ஜானாதீதி தஸ்ஸ அப்³ப⁴ந்தரே பவத்தமானங் ஸீலாதி³கு³ணங் ந ஜானாதி. ஸேஸங் ஸுவிஞ்ஞெய்யமேவ.
Pamāṇiṃsūti pamāṇaṃ aggahesuṃ. Niyakajjhatte tassa guṇaṃ na jānātīti tassa abbhantare pavattamānaṃ sīlādiguṇaṃ na jānāti. Sesaṃ suviññeyyameva.
ரூபஸுத்தவண்ணனா நிட்டி²தா.
Rūpasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. ரூபஸுத்தங் • 5. Rūpasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. ரூபஸுத்தவண்ணனா • 5. Rūpasuttavaṇṇanā
