| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
५. रूपसुत्तवण्णना
5. Rūpasuttavaṇṇanā
६५. पञ्चमे रूपे पमाणं गहेत्वा पसन्नो रूपप्पमाणो नाम। रूपप्पसन्नोति तस्सेव अत्थवचनं। घोसे पमाणं गहेत्वा पसन्नो घोसप्पमाणो नाम। चीवरलूखपत्तलूखेसु पमाणं गहेत्वा पसन्नो लूखप्पमाणो नाम। धम्मे पमाणं गहेत्वा पसन्नो धम्मप्पमाणो नाम। इतरानि तेसंयेव अत्थवचनानि। सब्बसत्ते च तयो कोट्ठासे कत्वा द्वे कोट्ठासा रूपप्पमाणा, एको न रूपप्पमाणो। पञ्च कोट्ठासे कत्वा चत्तारो कोट्ठासा घोसप्पमाणा, एको न घोसप्पमाणो। दस कोट्ठासे कत्वा नव कोट्ठासा लूखप्पमाणा, एको न लूखप्पमाणो। सतसहस्सं कोट्ठासे कत्वा पन एको कोट्ठासोव धम्मप्पमाणो, सेसा न धम्मप्पमाणाति वेदितब्बा।
65. Pañcame rūpe pamāṇaṃ gahetvā pasanno rūpappamāṇo nāma. Rūpappasannoti tasseva atthavacanaṃ. Ghose pamāṇaṃ gahetvā pasanno ghosappamāṇo nāma. Cīvaralūkhapattalūkhesu pamāṇaṃ gahetvā pasanno lūkhappamāṇo nāma. Dhamme pamāṇaṃ gahetvā pasanno dhammappamāṇo nāma. Itarāni tesaṃyeva atthavacanāni. Sabbasatte ca tayo koṭṭhāse katvā dve koṭṭhāsā rūpappamāṇā, eko na rūpappamāṇo. Pañca koṭṭhāse katvā cattāro koṭṭhāsā ghosappamāṇā, eko na ghosappamāṇo. Dasa koṭṭhāse katvā nava koṭṭhāsā lūkhappamāṇā, eko na lūkhappamāṇo. Satasahassaṃ koṭṭhāse katvā pana eko koṭṭhāsova dhammappamāṇo, sesā na dhammappamāṇāti veditabbā.
रूपे पमाणिंसूति ये रूपं दिस्वा पसन्ना, ते रूपे पमाणिंसु नाम, पसीदिंसूति अत्थो। घोसेन अन्वगूति घोसेन अनुगता, घोसप्पमाणं गहेत्वा पसन्नाति अत्थो। छन्दरागवसूपेताति छन्दस्स च रागस्स च वसं उपेता। अज्झत्तञ्च न जानातीति नियकज्झत्ते तस्स गुणं न जानाति। बहिद्धा च न पस्सतीति बहिद्धापिस्स पटिपत्तिं न पस्सति। समन्तावरणोति समन्ततो आवारितो, समन्ता वा आवरणमस्साति समन्तावरणो। घोसेन वुय्हतीति घोसेन नियति, न गुणेन। अज्झत्तञ्च न जानाति, बहिद्धा च विपस्सतीति नियकज्झत्ते गुणं न जानाति, बहिद्धा पनस्स पटिपत्तिं पस्सति। बहिद्धा फलदस्सावीति तस्स परेहि कतं बहिद्धा सक्कारफलं पस्सन्तो। विनीवरणदस्सावीति विवटदस्सावी। न सो घोसेन वुय्हतीति सो घोसेन न नीयति।
Rūpe pamāṇiṃsūti ye rūpaṃ disvā pasannā, te rūpe pamāṇiṃsu nāma, pasīdiṃsūti attho. Ghosena anvagūti ghosena anugatā, ghosappamāṇaṃ gahetvā pasannāti attho. Chandarāgavasūpetāti chandassa ca rāgassa ca vasaṃ upetā. Ajjhattañca na jānātīti niyakajjhatte tassa guṇaṃ na jānāti. Bahiddhā ca na passatīti bahiddhāpissa paṭipattiṃ na passati. Samantāvaraṇoti samantato āvārito, samantā vā āvaraṇamassāti samantāvaraṇo. Ghosena vuyhatīti ghosena niyati, na guṇena. Ajjhattañca na jānāti, bahiddhā ca vipassatīti niyakajjhatte guṇaṃ na jānāti, bahiddhā panassa paṭipattiṃ passati. Bahiddhā phaladassāvīti tassa parehi kataṃ bahiddhā sakkāraphalaṃ passanto. Vinīvaraṇadassāvīti vivaṭadassāvī. Na so ghosena vuyhatīti so ghosena na nīyati.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ५. रूपसुत्तं • 5. Rūpasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५. रूपसुत्तवण्णना • 5. Rūpasuttavaṇṇanā
