| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៥. រូបសុត្តវណ្ណនា
5. Rūpasuttavaṇṇanā
៦៥. បញ្ចមេ រូបេ បមាណំ គហេត្វា បសន្នោ រូបប្បមាណោ នាម។ រូបប្បសន្នោតិ តស្សេវ អត្ថវចនំ។ ឃោសេ បមាណំ គហេត្វា បសន្នោ ឃោសប្បមាណោ នាម។ ចីវរលូខបត្តលូខេសុ បមាណំ គហេត្វា បសន្នោ លូខប្បមាណោ នាម។ ធម្មេ បមាណំ គហេត្វា បសន្នោ ធម្មប្បមាណោ នាម។ ឥតរានិ តេសំយេវ អត្ថវចនានិ។ សព្ពសត្តេ ច តយោ កោដ្ឋាសេ កត្វា ទ្វេ កោដ្ឋាសា រូបប្បមាណា, ឯកោ ន រូបប្បមាណោ។ បញ្ច កោដ្ឋាសេ កត្វា ចត្តារោ កោដ្ឋាសា ឃោសប្បមាណា, ឯកោ ន ឃោសប្បមាណោ។ ទស កោដ្ឋាសេ កត្វា នវ កោដ្ឋាសា លូខប្បមាណា, ឯកោ ន លូខប្បមាណោ។ សតសហស្សំ កោដ្ឋាសេ កត្វា បន ឯកោ កោដ្ឋាសោវ ធម្មប្បមាណោ, សេសា ន ធម្មប្បមាណាតិ វេទិតព្ពា។
65. Pañcame rūpe pamāṇaṃ gahetvā pasanno rūpappamāṇo nāma. Rūpappasannoti tasseva atthavacanaṃ. Ghose pamāṇaṃ gahetvā pasanno ghosappamāṇo nāma. Cīvaralūkhapattalūkhesu pamāṇaṃ gahetvā pasanno lūkhappamāṇo nāma. Dhamme pamāṇaṃ gahetvā pasanno dhammappamāṇo nāma. Itarāni tesaṃyeva atthavacanāni. Sabbasatte ca tayo koṭṭhāse katvā dve koṭṭhāsā rūpappamāṇā, eko na rūpappamāṇo. Pañca koṭṭhāse katvā cattāro koṭṭhāsā ghosappamāṇā, eko na ghosappamāṇo. Dasa koṭṭhāse katvā nava koṭṭhāsā lūkhappamāṇā, eko na lūkhappamāṇo. Satasahassaṃ koṭṭhāse katvā pana eko koṭṭhāsova dhammappamāṇo, sesā na dhammappamāṇāti veditabbā.
រូបេ បមាណិំសូតិ យេ រូបំ ទិស្វា បសន្នា, តេ រូបេ បមាណិំសុ នាម, បសីទិំសូតិ អត្ថោ។ ឃោសេន អន្វគូតិ ឃោសេន អនុគតា, ឃោសប្បមាណំ គហេត្វា បសន្នាតិ អត្ថោ។ ឆន្ទរាគវសូបេតាតិ ឆន្ទស្ស ច រាគស្ស ច វសំ ឧបេតា។ អជ្ឈត្តញ្ច ន ជានាតីតិ និយកជ្ឈត្តេ តស្ស គុណំ ន ជានាតិ។ ពហិទ្ធា ច ន បស្សតីតិ ពហិទ្ធាបិស្ស បដិបត្តិំ ន បស្សតិ។ សមន្តាវរណោតិ សមន្តតោ អាវារិតោ, សមន្តា វា អាវរណមស្សាតិ សមន្តាវរណោ។ ឃោសេន វុយ្ហតីតិ ឃោសេន និយតិ, ន គុណេន។ អជ្ឈត្តញ្ច ន ជានាតិ, ពហិទ្ធា ច វិបស្សតីតិ និយកជ្ឈត្តេ គុណំ ន ជានាតិ, ពហិទ្ធា បនស្ស បដិបត្តិំ បស្សតិ។ ពហិទ្ធា ផលទស្សាវីតិ តស្ស បរេហិ កតំ ពហិទ្ធា សក្ការផលំ បស្សន្តោ។ វិនីវរណទស្សាវីតិ វិវដទស្សាវី។ ន សោ ឃោសេន វុយ្ហតីតិ សោ ឃោសេន ន នីយតិ។
Rūpe pamāṇiṃsūti ye rūpaṃ disvā pasannā, te rūpe pamāṇiṃsu nāma, pasīdiṃsūti attho. Ghosena anvagūti ghosena anugatā, ghosappamāṇaṃ gahetvā pasannāti attho. Chandarāgavasūpetāti chandassa ca rāgassa ca vasaṃ upetā. Ajjhattañca na jānātīti niyakajjhatte tassa guṇaṃ na jānāti. Bahiddhā ca na passatīti bahiddhāpissa paṭipattiṃ na passati. Samantāvaraṇoti samantato āvārito, samantā vā āvaraṇamassāti samantāvaraṇo. Ghosena vuyhatīti ghosena niyati, na guṇena. Ajjhattañca na jānāti, bahiddhā ca vipassatīti niyakajjhatte guṇaṃ na jānāti, bahiddhā panassa paṭipattiṃ passati. Bahiddhā phaladassāvīti tassa parehi kataṃ bahiddhā sakkāraphalaṃ passanto. Vinīvaraṇadassāvīti vivaṭadassāvī. Na so ghosena vuyhatīti so ghosena na nīyati.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៥. រូបសុត្តំ • 5. Rūpasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៥. រូបសុត្តវណ្ណនា • 5. Rūpasuttavaṇṇanā
