| Library / Tipiṭaka / តិបិដក • Tipiṭaka / ធម្មសង្គណិ-អដ្ឋកថា • Dhammasaṅgaṇi-aṭṭhakathā |
រូបាវចរារូបាវចរវិបាកកថា
Rūpāvacarārūpāvacaravipākakathā
៤៩៩. ឥទានិ រូបាវចរាទិវិបាកំ ទស្សេតុំ បុន កតមេ ធម្មា អព្យាកតាតិអាទិ អារទ្ធំ។ តត្ថ យស្មា កាមាវចរវិបាកំ អត្តនោ កុសលេន សទិសម្បិ ហោតិ, អសទិសម្បិ, តស្មា ន តំ កុសលានុគតិកំ កត្វា ភាជិតំ។ រូបាវចរារូបាវចរវិបាកំ បន យថា ហត្ថិអស្សបព្ពតាទីនំ ឆាយា ហត្ថិអាទិសទិសាវ ហោន្តិ, តថា អត្តនោ កុសលសទិសមេវ ហោតីតិ កុសលានុគតិកំ កត្វា ភាជិតំ។ កាមាវចរកម្មញ្ច យទា កទាចិ វិបាកំ ទេតិ, រូបាវចរារូបាវចរំ បន អនន្តរាយេន, ទុតិយស្មិំយេវ អត្តភាវេ, វិបាកំ ទេតីតិបិ កុសលានុគតិកមេវ កត្វា ភាជិតំ។ សេសំ កុសលេ វុត្តនយេនេវ វេទិតព្ពំ។ អយំ បន វិសេសោ – បដិបទាទិភេទោ ច ហីនបណីតមជ្ឈិមភាវោ ច ឯតេសុ ឈានាគមនតោ វេទិតព្ពោ។ ឆន្ទាទីនំ បន អញ្ញតរំ ធុរំ កត្វា អនុប្បាទនីយត្តា និរធិបតិកានេវ ឯតានីតិ។
499. Idāni rūpāvacarādivipākaṃ dassetuṃ puna katame dhammā abyākatātiādi āraddhaṃ. Tattha yasmā kāmāvacaravipākaṃ attano kusalena sadisampi hoti, asadisampi, tasmā na taṃ kusalānugatikaṃ katvā bhājitaṃ. Rūpāvacarārūpāvacaravipākaṃ pana yathā hatthiassapabbatādīnaṃ chāyā hatthiādisadisāva honti, tathā attano kusalasadisameva hotīti kusalānugatikaṃ katvā bhājitaṃ. Kāmāvacarakammañca yadā kadāci vipākaṃ deti, rūpāvacarārūpāvacaraṃ pana anantarāyena, dutiyasmiṃyeva attabhāve, vipākaṃ detītipi kusalānugatikameva katvā bhājitaṃ. Sesaṃ kusale vuttanayeneva veditabbaṃ. Ayaṃ pana viseso – paṭipadādibhedo ca hīnapaṇītamajjhimabhāvo ca etesu jhānāgamanato veditabbo. Chandādīnaṃ pana aññataraṃ dhuraṃ katvā anuppādanīyattā niradhipatikāneva etānīti.
រូបាវចរារូបាវចរវិបាកកថា និដ្ឋិតា។
Rūpāvacarārūpāvacaravipākakathā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / ធម្មសង្គណីបាឡិ • Dhammasaṅgaṇīpāḷi / អព្យាកតវិបាកោ • Abyākatavipāko
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / ធម្មសង្គណី-មូលដីកា • Dhammasaṅgaṇī-mūlaṭīkā / រូបាវចរារូបាវចរវិបាកកថាវណ្ណនា • Rūpāvacarārūpāvacaravipākakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / ធម្មសង្គណី-អនុដីកា • Dhammasaṅgaṇī-anuṭīkā / រូបាវចរារូបាវចរវិបាកកថាវណ្ណនា • Rūpāvacarārūpāvacaravipākakathāvaṇṇanā
