| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
9. ரூபியஸங்வோஹாரஸிக்கா²பத³ங்
9. Rūpiyasaṃvohārasikkhāpadaṃ
587. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² நானப்பகாரகங் ரூபியஸங்வோஹாரங் ஸமாபஜ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா நானப்பகாரகங் ரூபியஸங்வோஹாரங் ஸமாபஜ்ஜிஸ்ஸந்தி, ஸெய்யதா²பி கி³ஹீ காமபோ⁴கி³னோ’’தி ! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² நானப்பகாரகங் ரூபியஸங்வோஹாரங் ஸமாபஜ்ஜிஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர தும்ஹே, பி⁴க்க²வே, நானப்பகாரகங் ரூபியஸங்வோஹாரங் ஸமாபஜ்ஜதா²’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தும்ஹே, மோக⁴புரிஸா, நானப்பகாரகங் ரூபியஸங்வோஹாரங் ஸமாபஜ்ஜிஸ்ஸத²! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
587. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū nānappakārakaṃ rūpiyasaṃvohāraṃ samāpajjanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā nānappakārakaṃ rūpiyasaṃvohāraṃ samāpajjissanti, seyyathāpi gihī kāmabhogino’’ti ! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū nānappakārakaṃ rūpiyasaṃvohāraṃ samāpajjissantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, nānappakārakaṃ rūpiyasaṃvohāraṃ samāpajjathā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, nānappakārakaṃ rūpiyasaṃvohāraṃ samāpajjissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
588. ‘‘யோ பன பி⁴க்கு² நானப்பகாரகங் ரூபியஸங்வோஹாரங் ஸமாபஜ்ஜெய்ய, நிஸ்ஸக்³கி³யங் பாசித்திய’’ந்தி.
588.‘‘Yo pana bhikkhu nānappakārakaṃ rūpiyasaṃvohāraṃ samāpajjeyya, nissaggiyaṃ pācittiya’’nti.
589. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
589.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
நானப்பகாரகங் நாம கதம்பி அகதம்பி கதாகதம்பி. கதங் நாம ஸீஸூபக³ங் கீ³வூபக³ங் ஹத்தூ²பக³ங் பாதூ³பக³ங் கடூபக³ங். அகதங் நாம க⁴னகதங் வுச்சதி. கதாகதங் நாம தது³ப⁴யங்.
Nānappakārakaṃ nāma katampi akatampi katākatampi. Kataṃ nāma sīsūpagaṃ gīvūpagaṃ hatthūpagaṃ pādūpagaṃ kaṭūpagaṃ. Akataṃ nāma ghanakataṃ vuccati. Katākataṃ nāma tadubhayaṃ.
ரூபியங் நாம ஸத்து²வண்ணோ கஹாபணோ, லோஹமாஸகோ, தா³ருமாஸகோ, ஜதுமாஸகோ யே வோஹாரங் க³ச்ச²ந்தி.
Rūpiyaṃ nāma satthuvaṇṇo kahāpaṇo, lohamāsako, dārumāsako, jatumāsako ye vohāraṃ gacchanti.
ஸமாபஜ்ஜெய்யாதி கதேன கதங் சேதாபேதி, நிஸ்ஸக்³கி³யங் பாசித்தியங் 1. கதேன அகதங் சேதாபேதி, நிஸ்ஸக்³கி³யங் பாசித்தியங். கதேன கதாகதங் சேதாபேதி, நிஸ்ஸக்³கி³யங் பாசித்தியங். அகதேன கதங் சேதாபேதி, நிஸ்ஸக்³கி³யங் பாசித்தியங். அகதேன அகதங் சேதாபேதி, நிஸ்ஸக்³கி³யங் பாசித்தியங். அகதேன கதாகதங் சேதாபேதி, நிஸ்ஸக்³கி³யங் பாசித்தியங். கதாகதேன கதங் சேதாபேதி, நிஸ்ஸக்³கி³யங் பாசித்தியங். கதாகதேன அகதங் சேதாபேதி, நிஸ்ஸக்³கி³யங் பாசித்தியங். கதாகதேன கதாகதங் சேதாபேதி, நிஸ்ஸக்³கி³யங் பாசித்தியங். ஸங்க⁴மஜ்ஜே² நிஸ்ஸஜ்ஜிதப்³ப³ங். ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங். தேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அஹங், ப⁴ந்தே, நானப்பகாரகங் ரூபியஸங்வோஹாரங் ஸமாபஜ்ஜிங். இத³ங் மே நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. ஸசே தத்த² ஆக³ச்ச²தி ஆராமிகோ வா உபாஸகோ வா ஸோ வத்தப்³போ³ – ‘‘ஆவுஸோ, இமங் ஜானாஹீ’’தி. ஸசே ஸோ ப⁴ணதி – ‘‘இமினா கிங் ஆஹரிய்யதூ’’தி, ந வத்தப்³போ³ – ‘‘இமங் வா இமங் வா ஆஹரா’’தி. கப்பியங் ஆசிக்கி²தப்³ப³ங் – ஸப்பி வா தேலங் வா மது⁴ வா பா²ணிதங் வா. ஸசே ஸோ தேன பரிவத்தெத்வா கப்பியங் ஆஹரதி, ரூபியசேதாபகங் ட²பெத்வா, ஸப்³பே³ஹேவ பரிபு⁴ஞ்ஜிதப்³ப³ங். ஏவஞ்சேதங் லபே⁴த², இச்சேதங் குஸலங்; நோ சே லபே⁴த², ஸோ வத்தப்³போ³ – ‘‘ஆவுஸோ, இமங் ச²ட்³டே³ஹீ’’தி. ஸசே ஸோ ச²ட்³டே³தி, இச்சேதங் குஸலங்; நோ சே ச²ட்³டே³தி, பஞ்சஹங்கே³ஹி ஸமன்னாக³தோ பி⁴க்கு² ரூபியச²ட்³ட³கோ ஸம்மன்னிதப்³போ³ – யோ ந ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங் க³ச்செ²ய்ய, ந ப⁴யாக³திங் க³ச்செ²ய்ய, ச²ட்³டி³தாச²ட்³டி³தஞ்ச ஜானெய்ய. ஏவஞ்ச பன, பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Samāpajjeyyāti katena kataṃ cetāpeti, nissaggiyaṃ pācittiyaṃ 2. Katena akataṃ cetāpeti, nissaggiyaṃ pācittiyaṃ. Katena katākataṃ cetāpeti, nissaggiyaṃ pācittiyaṃ. Akatena kataṃ cetāpeti, nissaggiyaṃ pācittiyaṃ. Akatena akataṃ cetāpeti, nissaggiyaṃ pācittiyaṃ. Akatena katākataṃ cetāpeti, nissaggiyaṃ pācittiyaṃ. Katākatena kataṃ cetāpeti, nissaggiyaṃ pācittiyaṃ. Katākatena akataṃ cetāpeti, nissaggiyaṃ pācittiyaṃ. Katākatena katākataṃ cetāpeti, nissaggiyaṃ pācittiyaṃ. Saṅghamajjhe nissajjitabbaṃ. Evañca pana, bhikkhave, nissajjitabbaṃ. Tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, bhante, nānappakārakaṃ rūpiyasaṃvohāraṃ samāpajjiṃ. Idaṃ me nissaggiyaṃ. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Sace tattha āgacchati ārāmiko vā upāsako vā so vattabbo – ‘‘āvuso, imaṃ jānāhī’’ti. Sace so bhaṇati – ‘‘iminā kiṃ āhariyyatū’’ti, na vattabbo – ‘‘imaṃ vā imaṃ vā āharā’’ti. Kappiyaṃ ācikkhitabbaṃ – sappi vā telaṃ vā madhu vā phāṇitaṃ vā. Sace so tena parivattetvā kappiyaṃ āharati, rūpiyacetāpakaṃ ṭhapetvā, sabbeheva paribhuñjitabbaṃ. Evañcetaṃ labhetha, iccetaṃ kusalaṃ; no ce labhetha, so vattabbo – ‘‘āvuso, imaṃ chaḍḍehī’’ti. Sace so chaḍḍeti, iccetaṃ kusalaṃ; no ce chaḍḍeti, pañcahaṅgehi samannāgato bhikkhu rūpiyachaḍḍako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, chaḍḍitāchaḍḍitañca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
590. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் ரூபியச²ட்³ட³கங் ஸம்மன்னெய்ய. ஏஸா ஞத்தி.
590. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ rūpiyachaḍḍakaṃ sammanneyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங் ரூபியச²ட்³ட³கங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ரூபியச²ட்³ட³கஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho itthannāmaṃ bhikkhuṃ rūpiyachaḍḍakaṃ sammannati. Yassāyasmato khamati itthannāmassa bhikkhuno rūpiyachaḍḍakassa sammuti, so tuṇhassa; yassa nakkhamati, so bhāseyya.
‘‘ஸம்மதோ ஸங்கே⁴ன இத்த²ன்னாமோ பி⁴க்கு² ரூபியச²ட்³ட³கோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Sammato saṅghena itthannāmo bhikkhu rūpiyachaḍḍako. Khamati saṅghassa, tasmā tuṇhī, evametaṃ dhārayāmī’’ti.
தேன ஸம்மதேன பி⁴க்கு²னா அனிமித்தங் கத்வா பாதேதப்³ப³ங். ஸசே நிமித்தங் கத்வா பாதேதி, ஆபத்தி து³க்கடஸ்ஸ.
Tena sammatena bhikkhunā animittaṃ katvā pātetabbaṃ. Sace nimittaṃ katvā pāteti, āpatti dukkaṭassa.
591. ரூபியே ரூபியஸஞ்ஞீ ரூபியங் சேதாபேதி, நிஸ்ஸக்³கி³யங் பாசித்தியங். ரூபியே வேமதிகோ ரூபியங் சேதாபேதி, நிஸ்ஸக்³கி³யங் பாசித்தியங். ரூபியே அரூபியஸஞ்ஞீ ரூபியங் சேதாபேதி, நிஸ்ஸக்³கி³யங் பாசித்தியங். அரூபியே ரூபியஸஞ்ஞீ ரூபியங் சேதாபேதி, நிஸ்ஸக்³கி³யங் பாசித்தியங் . அரூபியே வேமதிகோ ரூபியங் சேதாபேதி, நிஸ்ஸக்³கி³யங் பாசித்தியங். அரூபியே அரூபியஸஞ்ஞீ ரூபியங் சேதாபேதி, நிஸ்ஸக்³கி³யங் பாசித்தியங்.
591. Rūpiye rūpiyasaññī rūpiyaṃ cetāpeti, nissaggiyaṃ pācittiyaṃ. Rūpiye vematiko rūpiyaṃ cetāpeti, nissaggiyaṃ pācittiyaṃ. Rūpiye arūpiyasaññī rūpiyaṃ cetāpeti, nissaggiyaṃ pācittiyaṃ. Arūpiye rūpiyasaññī rūpiyaṃ cetāpeti, nissaggiyaṃ pācittiyaṃ . Arūpiye vematiko rūpiyaṃ cetāpeti, nissaggiyaṃ pācittiyaṃ. Arūpiye arūpiyasaññī rūpiyaṃ cetāpeti, nissaggiyaṃ pācittiyaṃ.
அரூபியே ரூபியஸஞ்ஞீ, ஆபத்தி து³க்கடஸ்ஸ. அரூபியே வேமதிகோ, ஆபத்தி து³க்கடஸ்ஸ. அரூபியே அரூபியஸஞ்ஞீ, அனாபத்தி.
Arūpiye rūpiyasaññī, āpatti dukkaṭassa. Arūpiye vematiko, āpatti dukkaṭassa. Arūpiye arūpiyasaññī, anāpatti.
592. அனாபத்தி உம்மத்தகஸ்ஸ, ஆதி³கம்மிகஸ்ஸாதி.
592. Anāpatti ummattakassa, ādikammikassāti.
ரூபியஸங்வோஹாரஸிக்கா²பத³ங் நிட்டி²தங் நவமங்.
Rūpiyasaṃvohārasikkhāpadaṃ niṭṭhitaṃ navamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
