| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
9. ரூபியஸங்வோஹாரஸிக்கா²பத³வண்ணனா
9. Rūpiyasaṃvohārasikkhāpadavaṇṇanā
587. தேன ஸமயேனாதி ரூபியஸங்வோஹாரஸிக்கா²பத³ங். தத்த² நானப்பகாரகந்தி கதாகதாதி³வஸேன அனேகவித⁴ங். ரூபியஸங்வோஹாரந்தி ஜாதரூபரஜதபரிவத்தனங். ஸமாபஜ்ஜந்தீதி படிக்³க³ஹணஸ்ஸேவ படிக்கி²தத்தா படிக்³க³ஹிதபரிவத்தனே தோ³ஸங் அபஸ்ஸந்தா கரொந்தி.
587.Tena samayenāti rūpiyasaṃvohārasikkhāpadaṃ. Tattha nānappakārakanti katākatādivasena anekavidhaṃ. Rūpiyasaṃvohāranti jātarūparajataparivattanaṃ. Samāpajjantīti paṭiggahaṇasseva paṭikkhitattā paṭiggahitaparivattane dosaṃ apassantā karonti.
589. ஸீஸூபக³ந்திஆதீ³ஸு ஸீஸங் உபக³ச்ச²தீதி ஸீஸூபக³ங், பொத்த²கேஸு பன ‘‘ஸீஸூபக’’ந்தி லிகி²தங், யஸ்ஸ கஸ்ஸசி ஸீஸாலங்காரஸ்ஸேதங் அதி⁴வசனங். ஏஸ நயோ ஸப்³ப³த்த². கதேன கதந்திஆதீ³ஸு ஸுத்³தோ⁴ ரூபியஸங்வோஹாரோயேவ.
589.Sīsūpagantiādīsu sīsaṃ upagacchatīti sīsūpagaṃ, potthakesu pana ‘‘sīsūpaka’’nti likhitaṃ, yassa kassaci sīsālaṅkārassetaṃ adhivacanaṃ. Esa nayo sabbattha. Katena katantiādīsu suddho rūpiyasaṃvohāroyeva.
ரூபியே ரூபியஸஞ்ஞீதிஆதி³ம்ஹி புரிமஸிக்கா²பதே³ வுத்தவத்தூ²ஸு நிஸ்ஸக்³கி³யவத்து²னா நிஸ்ஸக்³கி³யவத்து²ங் சேதாபெந்தஸ்ஸ மூலக்³க³ஹணே புரிமஸிக்கா²பதே³ன நிஸ்ஸக்³கி³யங் பாசித்தியங், அபராபரபரிவத்தனே இமினா நிஸ்ஸக்³கி³யபாசித்தியமேவ. நிஸ்ஸக்³கி³யவத்து²னா து³க்கடவத்து²ங் வா கப்பியவத்து²ங் வா சேதாபெந்தஸ்ஸபி ஏஸேவ நயோ. யோ ஹி அயங் அரூபியே ரூபியஸஞ்ஞீ ரூபியங் சேதாபேதீதிஆதி³ து³தியோ திகோ வுத்தோ, தஸ்ஸானுலோமத்தா அவுத்தோபி அயமபரோபி ரூபியே ரூபியஸஞ்ஞீ அரூபியங் சேதாபேதீதிஆதி³ திகோ வேதி³தப்³போ³. அத்தனோ வா ஹி அரூபியேன பரஸ்ஸ ரூபியங் சேதாபெய்ய அத்தனோ வா ரூபியேன பரஸ்ஸ அரூபியங், உப⁴யதா²பி ரூபியஸங்வோஹாரோ கதோயேவ ஹோதி, தஸ்மா பாளியங் ஏகந்தேன ரூபியபக்கே² ஏகோயேவ திகோ வுத்தோதி.
Rūpiye rūpiyasaññītiādimhi purimasikkhāpade vuttavatthūsu nissaggiyavatthunā nissaggiyavatthuṃ cetāpentassa mūlaggahaṇe purimasikkhāpadena nissaggiyaṃ pācittiyaṃ, aparāparaparivattane iminā nissaggiyapācittiyameva. Nissaggiyavatthunā dukkaṭavatthuṃ vā kappiyavatthuṃ vā cetāpentassapi eseva nayo. Yo hi ayaṃ arūpiye rūpiyasaññī rūpiyaṃ cetāpetītiādi dutiyo tiko vutto, tassānulomattā avuttopi ayamaparopi rūpiye rūpiyasaññī arūpiyaṃ cetāpetītiādi tiko veditabbo. Attano vā hi arūpiyena parassa rūpiyaṃ cetāpeyya attano vā rūpiyena parassa arūpiyaṃ, ubhayathāpi rūpiyasaṃvohāro katoyeva hoti, tasmā pāḷiyaṃ ekantena rūpiyapakkhe ekoyeva tiko vuttoti.
து³க்கடவத்து²னா பன நிஸ்ஸக்³கி³யவத்து²ங் சேதாபெந்தஸ்ஸ மூலக்³க³ஹணே புரிமஸிக்கா²பதே³ன து³க்கடங், பச்சா² பரிவத்தனே இமினா நிஸ்ஸக்³கி³யங் பாசித்தியங், க³ருகஸ்ஸ சேதாபிதத்தா. து³க்கடவத்து²னா து³க்கடவத்து²மேவ, கப்பியவத்து²ங் வா சேதாபெந்தஸ்ஸ மூலக்³க³ஹணே புரிமஸிக்கா²பதே³ன து³க்கடங், பச்சா² பரிவத்தனேபி இமினா து³க்கடமேவ. கஸ்மா? அகப்பியவத்து²னா சேதாபிதத்தா. அந்த⁴கட்ட²கதா²யங் பன ‘‘ஸசே கயவிக்கயங் ஸமாபஜ்ஜெய்ய, நிஸ்ஸக்³கி³யங் பாசித்திய’’ந்தி பா⁴ஸிதங், தங் து³ப்³பா⁴ஸிதங். கஸ்மா? ந ஹி தா³னக்³க³ஹணதோ அஞ்ஞோ கயவிக்கயோ நாம அத்தி², கயவிக்கயஸிக்கா²பத³ஞ்ச கப்பியவத்து²னா கப்பியவத்து²பரிவத்தனமேவ ஸந்தா⁴ய வுத்தங், தஞ்ச கோ² அஞ்ஞத்ர ஸஹத⁴ம்மிகேஹி. இத³ங் ஸிக்கா²பத³ங் ரூபியேன ச ரூபியாரூபியசேதாபனங் அரூபியேன ச ரூபியசேதாபனங். து³க்கடவத்து²னா பன து³க்கடவத்து²னோ சேதாபனங் நேவ இத⁴ ந தத்த² பாளியங் வுத்தங், ந செத்த² அனாபத்தி ப⁴விதுங் அரஹதி. தஸ்மா யதே²வ து³க்கடவத்து²னோ படிக்³க³ஹணே து³க்கடங், ததே²வ தஸ்ஸ வா தேன வா சேதாபனேபி து³க்கடங் யுத்தந்தி ப⁴க³வதோ அதி⁴ப்பாயஞ்ஞூஹி வுத்தங்.
Dukkaṭavatthunā pana nissaggiyavatthuṃ cetāpentassa mūlaggahaṇe purimasikkhāpadena dukkaṭaṃ, pacchā parivattane iminā nissaggiyaṃ pācittiyaṃ, garukassa cetāpitattā. Dukkaṭavatthunā dukkaṭavatthumeva, kappiyavatthuṃ vā cetāpentassa mūlaggahaṇe purimasikkhāpadena dukkaṭaṃ, pacchā parivattanepi iminā dukkaṭameva. Kasmā? Akappiyavatthunā cetāpitattā. Andhakaṭṭhakathāyaṃ pana ‘‘sace kayavikkayaṃ samāpajjeyya, nissaggiyaṃ pācittiya’’nti bhāsitaṃ, taṃ dubbhāsitaṃ. Kasmā? Na hi dānaggahaṇato añño kayavikkayo nāma atthi, kayavikkayasikkhāpadañca kappiyavatthunā kappiyavatthuparivattanameva sandhāya vuttaṃ, tañca kho aññatra sahadhammikehi. Idaṃ sikkhāpadaṃ rūpiyena ca rūpiyārūpiyacetāpanaṃ arūpiyena ca rūpiyacetāpanaṃ. Dukkaṭavatthunā pana dukkaṭavatthuno cetāpanaṃ neva idha na tattha pāḷiyaṃ vuttaṃ, na cettha anāpatti bhavituṃ arahati. Tasmā yatheva dukkaṭavatthuno paṭiggahaṇe dukkaṭaṃ, tatheva tassa vā tena vā cetāpanepi dukkaṭaṃ yuttanti bhagavato adhippāyaññūhi vuttaṃ.
கப்பியவத்து²னா பன நிஸ்ஸக்³கி³யவத்து²ங் சேதாபெந்தஸ்ஸ மூலக்³க³ஹணே புரிமஸிக்கா²பதே³ன அனாபத்தி, பச்சா² பரிவத்தனே இமினா நிஸ்ஸக்³கி³யங் பாசித்தியங். வுத்தஞ்ஹேதங் – ‘‘அரூபியே அரூபியஸஞ்ஞீ ரூபியங் சேதாபேதி நிஸ்ஸக்³கி³யங் பாசித்திய’’ந்தி . தேனேவ கப்பியவத்து²னா து³க்கடவத்து²ங் சேதாபெந்தஸ்ஸ மூலபடிக்³க³ஹணே ததே²வ அனாபத்தி, பச்சா² பரிவத்தனே இமினா து³க்கடங். கஸ்மா? அகப்பியஸ்ஸ சேதாபிதத்தா. கப்பியவத்து²னா பன கப்பியவத்து²ங் அஞ்ஞத்ர ஸஹத⁴ம்மிகேஹி சேதாபெந்தஸ்ஸ மூலக்³க³ஹணே புரிமஸிக்கா²பதே³ன அனாபத்தி, பச்சா² பரிவத்தனே உபரி கயவிக்கயஸிக்கா²பதே³ன நிஸ்ஸக்³கி³யங் பாசித்தியங். கயவிக்கயங் மோசெத்வா க³ண்ஹந்தஸ்ஸ உபரிஸிக்கா²பதே³னபி அனாபத்தி, வட்³டி⁴ங் பயோஜெந்தஸ்ஸ து³க்கடங்.
Kappiyavatthunā pana nissaggiyavatthuṃ cetāpentassa mūlaggahaṇe purimasikkhāpadena anāpatti, pacchā parivattane iminā nissaggiyaṃ pācittiyaṃ. Vuttañhetaṃ – ‘‘arūpiye arūpiyasaññī rūpiyaṃ cetāpeti nissaggiyaṃ pācittiya’’nti . Teneva kappiyavatthunā dukkaṭavatthuṃ cetāpentassa mūlapaṭiggahaṇe tatheva anāpatti, pacchā parivattane iminā dukkaṭaṃ. Kasmā? Akappiyassa cetāpitattā. Kappiyavatthunā pana kappiyavatthuṃ aññatra sahadhammikehi cetāpentassa mūlaggahaṇe purimasikkhāpadena anāpatti, pacchā parivattane upari kayavikkayasikkhāpadena nissaggiyaṃ pācittiyaṃ. Kayavikkayaṃ mocetvā gaṇhantassa uparisikkhāpadenapi anāpatti, vaḍḍhiṃ payojentassa dukkaṭaṃ.
இமஸ்ஸ ச ரூபியஸங்வோஹாரஸ்ஸ க³ருகபா⁴வதீ³பகங் இத³ங் பத்தசதுக்கங் வேதி³தப்³ப³ங். யோ ஹி ரூபியங் உக்³க³ண்ஹித்வா தேன அயபீ³ஜங் ஸமுட்டா²பேதி, தங் கொட்டாபெத்வா தேன லோஹேன பத்தங் காரேதி, அயங் பத்தோ மஹாஅகப்பியோ நாம, ந ஸக்கா கேனசி உபாயேன கப்பியோ காதுங். ஸசே ஹி தங் வினாஸெத்வா தா²லகங் காரேதி, தம்பி அகப்பியங். வாஸிங் காரேதி, தாய சி²ன்னங் த³ந்தகட்ட²ம்பி அகப்பியங். ப³ளிஸங் காரோதி, தேன மாரிதா மச்சா²பி அகப்பியா. வாஸிப²லங் தாபெத்வா உத³கங் வா கீ²ரங் வா உண்ஹாபேதி, தம்பி அகப்பியமேவ.
Imassa ca rūpiyasaṃvohārassa garukabhāvadīpakaṃ idaṃ pattacatukkaṃ veditabbaṃ. Yo hi rūpiyaṃ uggaṇhitvā tena ayabījaṃ samuṭṭhāpeti, taṃ koṭṭāpetvā tena lohena pattaṃ kāreti, ayaṃ patto mahāakappiyo nāma, na sakkā kenaci upāyena kappiyo kātuṃ. Sace hi taṃ vināsetvā thālakaṃ kāreti, tampi akappiyaṃ. Vāsiṃ kāreti, tāya chinnaṃ dantakaṭṭhampi akappiyaṃ. Baḷisaṃ kāroti, tena māritā macchāpi akappiyā. Vāsiphalaṃ tāpetvā udakaṃ vā khīraṃ vā uṇhāpeti, tampi akappiyameva.
யோ பன ரூபியங் உக்³க³ண்ஹித்வா தேன பத்தங் கிணாதி, அயம்பி பத்தோ அகப்பியோ. ‘‘பஞ்சன்னம்பி ஸஹத⁴ம்மிகானங் ந கப்பதீ’’தி மஹாபச்சரியங் வுத்தங். ஸக்கா பன கப்பியோ காதுங், ஸோ ஹி மூலே மூலஸாமிகானங் பத்தே ச பத்தஸாமிகானங் தி³ன்னே கப்பியோ ஹோதி. கப்பியப⁴ண்ட³ங் த³த்வா க³ஹெத்வா பரிபு⁴ஞ்ஜிதுங் வட்டதி.
Yo pana rūpiyaṃ uggaṇhitvā tena pattaṃ kiṇāti, ayampi patto akappiyo. ‘‘Pañcannampi sahadhammikānaṃ na kappatī’’ti mahāpaccariyaṃ vuttaṃ. Sakkā pana kappiyo kātuṃ, so hi mūle mūlasāmikānaṃ patte ca pattasāmikānaṃ dinne kappiyo hoti. Kappiyabhaṇḍaṃ datvā gahetvā paribhuñjituṃ vaṭṭati.
யோபி ரூபியங் உக்³க³ண்ஹாபெத்வா கப்பியகாரகேன ஸத்³தி⁴ங் கம்மாரகுலங் க³ந்த்வா பத்தங் தி³ஸ்வா ‘‘அயங் மய்ஹங் ருச்சதீ’’தி வத³தி. கப்பியகாரகோ ச தங் ரூபியங் த³த்வா கம்மாரங் ஸஞ்ஞாபேதி, அயம்பி பத்தோ கப்பியவோஹாரேன க³ஹிதோபி து³தியபத்தஸதி³ஸோயேவ, மூலஸ்ஸ ஸம்படிச்சி²தத்தா அகப்பியோ. கஸ்மா ஸேஸானங் ந கப்பதீதி? மூலஸ்ஸ அனிஸ்ஸட்ட²த்தா.
Yopi rūpiyaṃ uggaṇhāpetvā kappiyakārakena saddhiṃ kammārakulaṃ gantvā pattaṃ disvā ‘‘ayaṃ mayhaṃ ruccatī’’ti vadati. Kappiyakārako ca taṃ rūpiyaṃ datvā kammāraṃ saññāpeti, ayampi patto kappiyavohārena gahitopi dutiyapattasadisoyeva, mūlassa sampaṭicchitattā akappiyo. Kasmā sesānaṃ na kappatīti? Mūlassa anissaṭṭhattā.
யோ பன ரூபியங் அஸம்படிச்சி²த்வா ‘‘தே²ரஸ்ஸ பத்தங் கிணித்வா தே³ஹீ’’தி பஹிதகப்பியகாரகேன ஸத்³தி⁴ங் கம்மாரகுலங் க³ந்த்வா பத்தங் தி³ஸ்வா ‘‘இமே கஹாபணே க³ஹெத்வா இமங் தே³ஹீ’’தி கஹாபணே தா³பெத்வா க³ஹிதோ, அயங் பத்தோ ஏதஸ்ஸேவ பி⁴க்கு²னோ ந வட்டதி து³ப்³பி³சாரிதத்தா, அஞ்ஞேஸங் பன வட்டதி, மூலஸ்ஸ அஸம்படிச்சி²தத்தா.
Yo pana rūpiyaṃ asampaṭicchitvā ‘‘therassa pattaṃ kiṇitvā dehī’’ti pahitakappiyakārakena saddhiṃ kammārakulaṃ gantvā pattaṃ disvā ‘‘ime kahāpaṇe gahetvā imaṃ dehī’’ti kahāpaṇe dāpetvā gahito, ayaṃ patto etasseva bhikkhuno na vaṭṭati dubbicāritattā, aññesaṃ pana vaṭṭati, mūlassa asampaṭicchitattā.
மஹாஸுமத்தே²ரஸ்ஸ கிர உபஜ்ஜா²யோ அனுருத்³த⁴த்தே²ரோ நாம அஹோஸி. ஸோ அத்தனோ ஏவரூபங் பத்தங் ஸப்பிஸ்ஸ பூரெத்வா ஸங்க⁴ஸ்ஸ நிஸ்ஸஜ்ஜி. திபிடகசூளனாக³த்தே²ரஸ்ஸபி ஸத்³தி⁴விஹாரிகானங் ஏவரூபோ பத்தோ அஹோஸி. தங் தே²ரோபி ஸப்பிஸ்ஸ பூராபெத்வா ஸங்க⁴ஸ்ஸ நிஸ்ஸஜ்ஜாபேஸீதி. இத³ங் அகப்பியபத்தசதுக்கங்.
Mahāsumattherassa kira upajjhāyo anuruddhatthero nāma ahosi. So attano evarūpaṃ pattaṃ sappissa pūretvā saṅghassa nissajji. Tipiṭakacūḷanāgattherassapi saddhivihārikānaṃ evarūpo patto ahosi. Taṃ theropi sappissa pūrāpetvā saṅghassa nissajjāpesīti. Idaṃ akappiyapattacatukkaṃ.
ஸசே பன ரூபியங் அஸம்படிச்சி²த்வா ‘‘தே²ரஸ்ஸ பத்தங் கிணித்வா தே³ஹீ’’தி பஹிதகப்பியகாரகேன ஸத்³தி⁴ங் கம்மாரகுலங் க³ந்த்வா பத்தங் தி³ஸ்வா ‘‘அயங் மய்ஹங் ருச்சதீ’’தி வா ‘‘இமாஹங் க³ஹெஸ்ஸாமீ’’தி வா வத³தி, கப்பியகாரகோ ச தங் ரூபியங் த³த்வா கம்மாரங் ஸஞ்ஞாபேதி, அயங் பத்தோ ஸப்³ப³கப்பியோ பு³த்³தா⁴னம்பி பரிபோ⁴கா³ரஹோதி.
Sace pana rūpiyaṃ asampaṭicchitvā ‘‘therassa pattaṃ kiṇitvā dehī’’ti pahitakappiyakārakena saddhiṃ kammārakulaṃ gantvā pattaṃ disvā ‘‘ayaṃ mayhaṃ ruccatī’’ti vā ‘‘imāhaṃ gahessāmī’’ti vā vadati, kappiyakārako ca taṃ rūpiyaṃ datvā kammāraṃ saññāpeti, ayaṃ patto sabbakappiyo buddhānampi paribhogārahoti.
591. அரூபியே ரூபியஸஞ்ஞீதி க²ரபத்தாதீ³ஸு ஸுவண்ணாதி³ஸஞ்ஞீ. ஆபத்தி து³க்கடஸ்ஸாதி ஸசே தேன அரூபியங் சேதாபேதி து³க்கடாபத்தி ஹோதி. ஏஸ நயோ வேமதிகே. அரூபியஸஞ்ஞிஸ்ஸ பன பஞ்சஹி ஸஹத⁴ம்மிகேஹி ஸத்³தி⁴ ‘‘இத³ங் க³ஹெத்வா இத³ங் தே³தா²’’தி கயவிக்கயங் கரொந்தஸ்ஸாபி அனாபத்தி. ஸேஸங் உத்தானமேவ.
591.Arūpiye rūpiyasaññīti kharapattādīsu suvaṇṇādisaññī. Āpatti dukkaṭassāti sace tena arūpiyaṃ cetāpeti dukkaṭāpatti hoti. Esa nayo vematike. Arūpiyasaññissa pana pañcahi sahadhammikehi saddhi ‘‘idaṃ gahetvā idaṃ dethā’’ti kayavikkayaṃ karontassāpi anāpatti. Sesaṃ uttānameva.
ச²ஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மவசீகம்மங், திசித்தங், திவேத³னந்தி.
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ரூபியஸங்வோஹாரஸிக்கா²பத³வண்ணனா நிட்டி²தா.
Rūpiyasaṃvohārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரூபியஸங்வோஹாரஸிக்கா²பத³ங் • 9. Rūpiyasaṃvohārasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
