| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
9. ரூபியஸங்வோஹாரஸிக்கா²பத³வண்ணனா
9. Rūpiyasaṃvohārasikkhāpadavaṇṇanā
587. நவமே ஜாதரூபாதி³சதுப்³பி³த⁴னிஸ்ஸக்³கி³யவத்து² இத⁴ ரூபியக்³க³ஹணேனேவ க³ஹிதந்தி ஆஹ ‘‘ஜாதரூபரஜதபரிவத்தன’’ந்தி. படிக்³க³ஹிதபரிவத்தனேதி கப்பியவோஹாரேன, அகப்பியவோஹாரேன வா படிக்³க³ஹிதஸ்ஸ ரூபியஸ்ஸ பரிவத்தனே.
587. Navame jātarūpādicatubbidhanissaggiyavatthu idha rūpiyaggahaṇeneva gahitanti āha ‘‘jātarūparajataparivattana’’nti. Paṭiggahitaparivattaneti kappiyavohārena, akappiyavohārena vā paṭiggahitassa rūpiyassa parivattane.
589. பாளியங் க⁴னகதந்தி இட்ட²காதி³. ரூபியங் நாம ஸத்து²வண்ணோதிஆதீ³ஸு கிஞ்சாபி கேவலங் ரஜதங் ந க³ஹிதங், ததா²பி ரூபியபதே³னேவ தங் க³ஹிதந்தி த³ட்ட²ப்³ப³ங். ஸுத்³தோ⁴ ரூபியஸங்வோஹாரோ ஏவ வுத்தோதி அஜ்ஜா²ஹரிதப்³ப³ங். ரூபியே ரூபியஸஞ்ஞீதிஆதி³ம்ஹி வினிச்ச²யங் வக்கா²மாதி பாட²ஸேஸோ.
589. Pāḷiyaṃ ghanakatanti iṭṭhakādi. Rūpiyaṃ nāma satthuvaṇṇotiādīsu kiñcāpi kevalaṃ rajataṃ na gahitaṃ, tathāpi rūpiyapadeneva taṃ gahitanti daṭṭhabbaṃ. Suddho rūpiyasaṃvohāro eva vuttoti ajjhāharitabbaṃ. Rūpiye rūpiyasaññītiādimhi vinicchayaṃ vakkhāmāti pāṭhaseso.
591. பாளியங் ரூபியே ரூபியஸஞ்ஞீதி அத்தனா தி³ய்யமானங் ஸகஸந்தகங் ஸந்தா⁴ய வுத்தங். ரூபியங் சேதாபேதீதி பரஸந்தகங். ஏஸ நயோ ஸேஸேஸுபி. தத்த² அரூபிய-ஸத்³தே³ன து³க்கடவத்து²ம்பி ஸங்க³ண்ஹாதி. பச்சி²மே பன திகே ‘‘அரூபியே ரூபியஸஞ்ஞீ அரூபியங் சேதாபேதி, ஆபத்தி து³க்கடஸ்ஸா’’தி இமினா நயேன ஸப்³ப³த்த² யோஜனா வேதி³தப்³பா³. இமஸ்மிஞ்ச திகே அரூபிய-ஸத்³தே³ன கப்பியவத்து²யேவ க³ஹிதங், ந முத்தாதி³து³க்கடவத்து² அந்தே ‘‘பஞ்சன்னங் ஸஹ அனாபத்தீ’’தி வுத்தத்தா. கிஞ்சாபி து³க்கடவத்து² ந க³ஹிதங், ததா²பி து³க்கடவத்து²னா து³க்கடவத்து²ங், கப்பியவத்து²னா து³க்கடவத்து²ஞ்ச பரிவத்தயதோ து³க்கடங், நயதோ ஸித்³த⁴மேவ ஹோதி. தஞ்ச து³க்கடவத்து²ம்ஹி தத²ஸஞ்ஞாய வா அதத²ஸஞ்ஞாய வா விமதியா வா பரிவத்தெந்தஸ்ஸபி ஹோதியேவ அசித்தகத்தா இமஸ்ஸ ஸிக்கா²பத³ஸ்ஸ. பஞ்சன்னங் ஸஹாதி பஞ்சஹி ஸஹத⁴ம்மிகேஹி ஸஹ.
591. Pāḷiyaṃ rūpiye rūpiyasaññīti attanā diyyamānaṃ sakasantakaṃ sandhāya vuttaṃ. Rūpiyaṃ cetāpetīti parasantakaṃ. Esa nayo sesesupi. Tattha arūpiya-saddena dukkaṭavatthumpi saṅgaṇhāti. Pacchime pana tike ‘‘arūpiye rūpiyasaññī arūpiyaṃ cetāpeti, āpatti dukkaṭassā’’ti iminā nayena sabbattha yojanā veditabbā. Imasmiñca tike arūpiya-saddena kappiyavatthuyeva gahitaṃ, na muttādidukkaṭavatthu ante ‘‘pañcannaṃ saha anāpattī’’ti vuttattā. Kiñcāpi dukkaṭavatthu na gahitaṃ, tathāpi dukkaṭavatthunā dukkaṭavatthuṃ, kappiyavatthunā dukkaṭavatthuñca parivattayato dukkaṭaṃ, nayato siddhameva hoti. Tañca dukkaṭavatthumhi tathasaññāya vā atathasaññāya vā vimatiyā vā parivattentassapi hotiyeva acittakattā imassa sikkhāpadassa. Pañcannaṃ sahāti pañcahi sahadhammikehi saha.
இதா³னி ‘‘நிஸ்ஸக்³கி³யவத்து²னா து³க்கடவத்து²ங் வா’’திஆதி³னா வுத்தஸ்ஸ அத்த²ஸ்ஸ பாளியங் ஸரூபேன அனாக³தத்தேபி நயதோ லப்³ப⁴மானதங் த³ஸ்ஸேதுங் ‘‘யோ ஹி அய’’ந்திஆதி³ வுத்தங். எத்த² ச யஸ்மா ரூபியேன பரிவத்திதங் அரூபியங் நிஸ்ஸட்ட²ம்பி ஸப்³பே³ஸம்பி அகப்பியத்தா நிஸ்ஸக்³கி³யமேவ ந ஹோதி நிஸ்ஸஜ்ஜித்வா பரிபு⁴ஞ்ஜிதப்³ப³ஸ்ஸேவ நிஸ்ஸஜ்ஜிதப்³ப³தோ, கேவலங் பன இத³ங் ச²ட்³டெ³த்வா பாசித்தியமேவ பரிவத்தகேன தே³ஸேதப்³ப³ங், தஸ்மா ‘‘ரூபியே ரூபியஸஞ்ஞீ அரூபியங் சேதாபேதி, நிஸ்ஸக்³கி³யங் பாசித்திய’’ந்திஆதி³ திகோ ப⁴க³வதா ந வுத்தோ, தீஸுபி பதே³ஸு பரிவத்தியமானஸ்ஸ அரூபியத்தேன நிஸ்ஸக்³கி³யவசனாயோகா³ ரூபியஸ்ஸேவ நிஸ்ஸஜ்ஜிதப்³ப³தோ. ரூபியஸ்ஸேவ ஹி நிஸ்ஸட்ட²ஸ்ஸ ஆராமிகாதீ³ஹி படிபஜ்ஜனவிதி⁴ பாளியங் த³ஸ்ஸிதோ, ந அரூபியஸ்ஸ. தஸ்மா பாசித்தியமத்தஸம்ப⁴வத³ஸ்ஸனத்த²மேவ பனெத்த² அட்ட²கதா²யங் ‘‘அவுத்தோபி அயங்…பே॰… திகோ வேதி³தப்³போ³’’தி வுத்தங், ந பன தஸ்ஸ வத்து²னோ நிஸ்ஸக்³கி³யதாத³ஸ்ஸனத்த²ங். தேனேவ பத்தசதுக்கே ‘‘ந ஸக்கா கேனசி உபாயேன கப்பியங் காது’’ந்திஆதி³ வுத்தங். அயங் அம்ஹாகங் க²ந்தி. அத்தனோ வா ஹீதிஆதி³ து³தியதிகானுலோமேனேவ ததியத்திகஸ்ஸ ஸிஜ்ஜ²னப்பகாரங் ஸமத்தே²துங் வுத்தங். தத்ராயங் அதி⁴ப்பாயோ – யஸ்மா ஹி யதா² அத்தனோ அரூபியேன பரஸ்ஸ ரூபியங் சேதாபெந்தஸ்ஸ ஏகஸ்மிங் அந்தே ரூபியஸம்ப⁴வதோ ‘‘ரூபியஸங்வோஹாரோ கதோ ஏவ ஹோதீ’’தி து³தியத்திகோ வுத்தோ, ஏவங் அத்தனோ ரூபியேன பரஸ்ஸ அரூபியங் சேதாபெந்தஸ்ஸாபி ஹோதீதி ததியோ திகோ வத்தப்³போ³ ப⁴வெய்ய, ஸோ பன து³தியத்திகேனேவ ஏகதோ ரூபியபக்க²ஸாமஞ்ஞேன ஸிஜ்ஜ²தீதி பாளியங் ந வுத்தோதி. தத்த² ஏகந்தேன ரூபியபக்கே²தி ஏகேன அந்தேன ரூபியபக்கே², ‘‘ஏகதோ ரூபியபக்கே²’’தி வா பாடோ².
Idāni ‘‘nissaggiyavatthunā dukkaṭavatthuṃ vā’’tiādinā vuttassa atthassa pāḷiyaṃ sarūpena anāgatattepi nayato labbhamānataṃ dassetuṃ ‘‘yo hi aya’’ntiādi vuttaṃ. Ettha ca yasmā rūpiyena parivattitaṃ arūpiyaṃ nissaṭṭhampi sabbesampi akappiyattā nissaggiyameva na hoti nissajjitvā paribhuñjitabbasseva nissajjitabbato, kevalaṃ pana idaṃ chaḍḍetvā pācittiyameva parivattakena desetabbaṃ, tasmā ‘‘rūpiye rūpiyasaññī arūpiyaṃ cetāpeti, nissaggiyaṃ pācittiya’’ntiādi tiko bhagavatā na vutto, tīsupi padesu parivattiyamānassa arūpiyattena nissaggiyavacanāyogā rūpiyasseva nissajjitabbato. Rūpiyasseva hi nissaṭṭhassa ārāmikādīhi paṭipajjanavidhi pāḷiyaṃ dassito, na arūpiyassa. Tasmā pācittiyamattasambhavadassanatthameva panettha aṭṭhakathāyaṃ ‘‘avuttopi ayaṃ…pe… tiko veditabbo’’ti vuttaṃ, na pana tassa vatthuno nissaggiyatādassanatthaṃ. Teneva pattacatukke ‘‘na sakkā kenaci upāyena kappiyaṃ kātu’’ntiādi vuttaṃ. Ayaṃ amhākaṃ khanti. Attano vā hītiādi dutiyatikānulomeneva tatiyattikassa sijjhanappakāraṃ samatthetuṃ vuttaṃ. Tatrāyaṃ adhippāyo – yasmā hi yathā attano arūpiyena parassa rūpiyaṃ cetāpentassa ekasmiṃ ante rūpiyasambhavato ‘‘rūpiyasaṃvohāro kato eva hotī’’ti dutiyattiko vutto, evaṃ attano rūpiyena parassa arūpiyaṃ cetāpentassāpi hotīti tatiyo tiko vattabbo bhaveyya, so pana dutiyattikeneva ekato rūpiyapakkhasāmaññena sijjhatīti pāḷiyaṃ na vuttoti. Tattha ekantena rūpiyapakkheti ekena antena rūpiyapakkhe, ‘‘ekato rūpiyapakkhe’’ti vā pāṭho.
இதா³னி து³தியத்திகே அரூபியபத³ஸ்ஸ அத்த²பூ⁴தேஸு து³க்கடவத்து²கப்பியவத்தூ²ஸு து³க்கடவத்து²னா ரூபியாதி³பரிவத்தனே ஆபத்திபே⁴த³ங் த³ஸ்ஸேதுங் ‘‘து³க்கடவத்து²னா’’திஆதி³ ஆரத்³த⁴ங். து³க்கடவத்து²னா து³க்கடவத்து²ந்திஆதி³ பன து³க்கடவத்து²னா பரிவத்தனப்பஸங்கே³ பாளியங் அவுத்தஸ்ஸாபி அத்த²ஸ்ஸ நயதோ லப்³ப⁴மானதங் த³ஸ்ஸேதுங் வுத்தங். தத்த² இமினாதி ரூபியஸங்வோஹாரஸிக்கா²பதே³ன, தேன ச து³க்கடஸ்ஸ அசித்தகதம்பி த³ஸ்ஸேதி. அஞ்ஞத்ர ஸஹத⁴ம்மிகேஹீதி ‘‘பஞ்சன்னங் ஸஹ அனாபத்தீ’’தி வசனதோ வுத்தங், தேனாபி கயவிக்கயஸிக்கா²பத³ஸ்ஸ கப்பியவத்து²னிஸ்ஸிததங் ஏவ ஸாதே⁴தி. இமங்…பே॰… ரூபியசேதாபனஞ்ச ஸந்தா⁴ய வுத்தந்தி பகதேன ஸம்ப³ந்தோ⁴. இதா⁴தி இமஸ்மிங் ஸிக்கா²பதே³. தத்தா²தி கயவிக்கயஸிக்கா²பதே³ (பாரா॰ 593).
Idāni dutiyattike arūpiyapadassa atthabhūtesu dukkaṭavatthukappiyavatthūsu dukkaṭavatthunā rūpiyādiparivattane āpattibhedaṃ dassetuṃ ‘‘dukkaṭavatthunā’’tiādi āraddhaṃ. Dukkaṭavatthunā dukkaṭavatthuntiādi pana dukkaṭavatthunā parivattanappasaṅge pāḷiyaṃ avuttassāpi atthassa nayato labbhamānataṃ dassetuṃ vuttaṃ. Tattha imināti rūpiyasaṃvohārasikkhāpadena, tena ca dukkaṭassa acittakatampi dasseti. Aññatra sahadhammikehīti ‘‘pañcannaṃ saha anāpattī’’ti vacanato vuttaṃ, tenāpi kayavikkayasikkhāpadassa kappiyavatthunissitataṃ eva sādheti. Imaṃ…pe… rūpiyacetāpanañca sandhāya vuttanti pakatena sambandho. Idhāti imasmiṃ sikkhāpade. Tatthāti kayavikkayasikkhāpade (pārā. 593).
ஏவங் து³க்கடவத்து²னா ரூபியாதி³பரிவத்தனே ஆபத்திபே⁴த³ங் த³ஸ்ஸெத்வா இதா³னி கப்பியவத்து²னாபி த³ஸ்ஸேதுங் ‘‘கப்பியவத்து²னா பனா’’திஆதி³ ஆரத்³த⁴ங். தத்த² தேனேவாதி கப்பியவத்து²னா ஏவ. ‘‘ரூபியங் உக்³க³ண்ஹித்வா’’தி இத³ங் உக்கட்ட²வஸேன வுத்தங். முத்தாதி³து³க்கடவத்து²ம்பி உக்³க³ஹெத்வா காரிதம்பி பஞ்சன்னம்பி ந வட்டதி ஏவ. ஸமுட்டா²பேதீதி ஸயங் க³ந்த்வா, ‘‘இமங் கஹாபணாதி³ங் கம்மகாரானங் த³த்வா பீ³ஜங் ஸமுட்டா²பேஹீ’’தி ஏவங் அஞ்ஞங் ஆணாபெத்வா வா ஸமுட்டா²பேதி. மஹாஅகப்பியோதி அத்தனாவ பீ³ஜதோ பட்டா²ய தூ³ஸிதத்தா அஞ்ஞஸ்ஸ மூலஸாமிகஸ்ஸ அபா⁴வதோ வுத்தங். ஸோ ஹி சோரேஹி அச்சி²ன்னோபி புன லத்³தோ⁴ ஜானந்தஸ்ஸ கஸ்ஸசிபி ந வட்டதி. யதி³ ஹி வட்டெய்ய, தளாகாதீ³ஸு விய அச்சி²ன்னோ வட்டதீதி ஆசரியா வதெ³ய்யுங். ந ஸக்கா கேனசி உபாயேனாதி ஸங்கே⁴ நிஸ்ஸஜ்ஜனேன, சோராதி³அச்சி²ந்த³னாதி³னா ச கப்பியங் காதுங் ந ஸக்கா, இத³ஞ்ச தேன ரூபேன டி²தங், தம்மூலிகேன வத்து²முத்தாதி³ரூபேன டி²தஞ்ச ஸந்தா⁴ய வுத்தங். து³க்கடவத்து²ம்பி ஹி தம்மூலிககப்பியவத்து²ஞ்ச ந ஸக்கா கேனசி உபாயேன தேன ரூபேன கப்பியங் காதுங். யதி³ பன ஸோ பி⁴க்கு² தேன கப்பியவத்து²து³க்கடவத்து²னா புன ரூபியங் சேதாபெய்ய, தங் ரூபியங் நிஸ்ஸஜ்ஜாபெத்வா அஞ்ஞேஸங் கப்பியங் காதும்பி ஸக்கா ப⁴வெய்யாதி த³ட்ட²ப்³ப³ங்.
Evaṃ dukkaṭavatthunā rūpiyādiparivattane āpattibhedaṃ dassetvā idāni kappiyavatthunāpi dassetuṃ ‘‘kappiyavatthunā panā’’tiādi āraddhaṃ. Tattha tenevāti kappiyavatthunā eva. ‘‘Rūpiyaṃ uggaṇhitvā’’ti idaṃ ukkaṭṭhavasena vuttaṃ. Muttādidukkaṭavatthumpi uggahetvā kāritampi pañcannampi na vaṭṭati eva. Samuṭṭhāpetīti sayaṃ gantvā, ‘‘imaṃ kahāpaṇādiṃ kammakārānaṃ datvā bījaṃ samuṭṭhāpehī’’ti evaṃ aññaṃ āṇāpetvā vā samuṭṭhāpeti. Mahāakappiyoti attanāva bījato paṭṭhāya dūsitattā aññassa mūlasāmikassa abhāvato vuttaṃ. So hi corehi acchinnopi puna laddho jānantassa kassacipi na vaṭṭati. Yadi hi vaṭṭeyya, taḷākādīsu viya acchinno vaṭṭatīti ācariyā vadeyyuṃ. Na sakkā kenaci upāyenāti saṅghe nissajjanena, corādiacchindanādinā ca kappiyaṃ kātuṃ na sakkā, idañca tena rūpena ṭhitaṃ, tammūlikena vatthumuttādirūpena ṭhitañca sandhāya vuttaṃ. Dukkaṭavatthumpi hi tammūlikakappiyavatthuñca na sakkā kenaci upāyena tena rūpena kappiyaṃ kātuṃ. Yadi pana so bhikkhu tena kappiyavatthudukkaṭavatthunā puna rūpiyaṃ cetāpeyya, taṃ rūpiyaṃ nissajjāpetvā aññesaṃ kappiyaṃ kātumpi sakkā bhaveyyāti daṭṭhabbaṃ.
பத்தங் கிணாதீதி எத்த² ‘‘இமினா கஹாபணாதி³னா கம்மாரகுலதோ பத்தங் கிணித்வா ஏஹீ’’தி ஆராமிகாதீ³ஹி கிணாபனம்பி ஸங்க³ஹிதந்தி வேதி³தப்³ப³ங். தேனேவ ராஜஸிக்கா²பத³ட்ட²கதா²யங் ‘‘எத்தகேஹி கஹாபணேஹி ஸாடகே ஆஹர, எத்தகேஹி யாகு³ஆதீ³னி ஸம்பாதே³ஹீதி வத³தி, யங் தே ஆஹரந்தி, ஸப்³பே³ஸங் அகப்பியங். கஸ்மா? கஹாபணானங் விசாரிதத்தா’’தி (பாரா॰ அட்ட²॰ 2.538-539) வுத்தங் . இமினா பன வசனேன யங் மாதிகாட்ட²கதா²யங் ரூபியஸங்வோஹாரஸிக்கா²பத³ங் ‘‘அனாணத்திக’’ந்தி வுத்தங், தங் ந ஸமேதி. ந கேவலஞ்ச இமினா, பாளியாபி தங் ந ஸமேதி. பாளியஞ்ஹி நிஸ்ஸட்ட²ரூபியேன ஆராமிகாதீ³ஹி ஸப்பியாதி³ங் பரிவத்தாபேதுங் ‘‘ஸோ வத்தப்³போ³ ‘ஆவுஸோ, இமங் ஜானாஹீ’தி. ஸசே ஸோ ப⁴ணதி ‘இமினா கிங் ஆஹரீயதூ’தி, ந வத்தப்³போ³ ‘இமங் வா இமங் வா ஆஹரா’தி. கப்பியங் ஆசிக்கி²தப்³ப³ங் ‘ஸப்பி வா’’’திஆதி³னா ரூபியஸங்வோஹாரங் பரிமோசெத்வாவ வுத்தங். ‘‘இமினா ரூபியேன கிங் ஆஹரீயதூ’’தி புச்ச²ந்தோ ‘‘இமங் ஆஹரா’’தி வுத்தேபி அதி⁴காரதோ ‘‘இமினா ரூபியேன இமங் ஆஹரா’’தி பி⁴க்கூ²ஹி ஆணத்தோ ஏவ ஹோதீதி தங் ரூபியஸங்வோஹாரங் பரிவஜ்ஜேதுங் ‘‘ந வத்தப்³போ³ ‘இமங் வா இமங் வா ஆஹரா’’’தி படிக்கே²போ கதோ, அனாபத்திவாரேபி ‘‘கப்பியகாரகஸ்ஸ ஆசிக்க²தீ’’தி ந வுத்தங். கயவிக்கயஸிக்கா²பதே³ (பாரா॰ 595) பன ததா² வுத்தங், தஸ்மா இத³ங் ஸாணத்திகங் கயவிக்கயமேவ அனாணத்திகந்தி க³ஹேதப்³ப³ங்.
Pattaṃ kiṇātīti ettha ‘‘iminā kahāpaṇādinā kammārakulato pattaṃ kiṇitvā ehī’’ti ārāmikādīhi kiṇāpanampi saṅgahitanti veditabbaṃ. Teneva rājasikkhāpadaṭṭhakathāyaṃ ‘‘ettakehi kahāpaṇehi sāṭake āhara, ettakehi yāguādīni sampādehīti vadati, yaṃ te āharanti, sabbesaṃ akappiyaṃ. Kasmā? Kahāpaṇānaṃ vicāritattā’’ti (pārā. aṭṭha. 2.538-539) vuttaṃ . Iminā pana vacanena yaṃ mātikāṭṭhakathāyaṃ rūpiyasaṃvohārasikkhāpadaṃ ‘‘anāṇattika’’nti vuttaṃ, taṃ na sameti. Na kevalañca iminā, pāḷiyāpi taṃ na sameti. Pāḷiyañhi nissaṭṭharūpiyena ārāmikādīhi sappiyādiṃ parivattāpetuṃ ‘‘so vattabbo ‘āvuso, imaṃ jānāhī’ti. Sace so bhaṇati ‘iminā kiṃ āharīyatū’ti, na vattabbo ‘imaṃ vā imaṃ vā āharā’ti. Kappiyaṃ ācikkhitabbaṃ ‘sappi vā’’’tiādinā rūpiyasaṃvohāraṃ parimocetvāva vuttaṃ. ‘‘Iminā rūpiyena kiṃ āharīyatū’’ti pucchanto ‘‘imaṃ āharā’’ti vuttepi adhikārato ‘‘iminā rūpiyena imaṃ āharā’’ti bhikkhūhi āṇatto eva hotīti taṃ rūpiyasaṃvohāraṃ parivajjetuṃ ‘‘na vattabbo ‘imaṃ vā imaṃ vā āharā’’’ti paṭikkhepo kato, anāpattivārepi ‘‘kappiyakārakassa ācikkhatī’’ti na vuttaṃ. Kayavikkayasikkhāpade (pārā. 595) pana tathā vuttaṃ, tasmā idaṃ sāṇattikaṃ kayavikkayameva anāṇattikanti gahetabbaṃ.
மூலஸ்ஸ அனிஸ்ஸட்ட²த்தாதி யேன உக்³க³ஹிதமூலேன பத்தோ கீதோ, தஸ்ஸ மூலஸ்ஸ ஸங்க⁴மஜ்ஜே² அனிஸ்ஸட்ட²த்தா, ஏதேன ரூபியமேவ நிஸ்ஸஜ்ஜிதப்³ப³ங், ந தம்மூலிகங் அரூபியந்தி த³ஸ்ஸேதி. யதி³ ஹி தேன ரூபியேன அஞ்ஞங் ரூபியங் சேதாபெய்ய, தங் ரூபியஸங்வோஹாரஸிக்கா²பதே³ ஆக³தனயேனேவ நிஸ்ஸஜ்ஜாபெத்வா ஸேஸேஹி பரிபு⁴ஞ்ஜிதப்³ப³ங் ப⁴வெய்யாதி. ‘‘மூலஸ்ஸ அஸம்படிச்சி²தத்தா’’தி இமினா மூலஸ்ஸ கி³ஹிஸந்தகத்தங், தேனேவ பத்தஸ்ஸ ரூபியஸங்வோஹாரானுப்பன்னதஞ்ச த³ஸ்ஸேதி. பஞ்சஸஹத⁴ம்மிகஸந்தகேனேவ ஹி ரூபியஸங்வோஹாரதோ³ஸோ. தத்த² ச அத்தனோ ஸந்தகே பாசித்தியங், இதரத்த² து³க்கடங்.
Mūlassa anissaṭṭhattāti yena uggahitamūlena patto kīto, tassa mūlassa saṅghamajjhe anissaṭṭhattā, etena rūpiyameva nissajjitabbaṃ, na tammūlikaṃ arūpiyanti dasseti. Yadi hi tena rūpiyena aññaṃ rūpiyaṃ cetāpeyya, taṃ rūpiyasaṃvohārasikkhāpade āgatanayeneva nissajjāpetvā sesehi paribhuñjitabbaṃ bhaveyyāti. ‘‘Mūlassa asampaṭicchitattā’’ti iminā mūlassa gihisantakattaṃ, teneva pattassa rūpiyasaṃvohārānuppannatañca dasseti. Pañcasahadhammikasantakeneva hi rūpiyasaṃvohāradoso. Tattha ca attano santake pācittiyaṃ, itarattha dukkaṭaṃ.
நிஸ்ஸஜ்ஜீதி தா³னவஸேன வுத்தங், ந வினயகம்மவஸேன. தேனேவ ‘‘ஸப்பிஸ்ஸ பூரெத்வா’’தி வுத்தங். யங் அத்தனோ த⁴னேன பரிவத்தேதி, தஸ்ஸ வா த⁴னஸ்ஸ ரூபியபா⁴வோ, பரிவத்தனபரிவத்தாபனேஸு அஞ்ஞதரபா⁴வோ சாதி இமானெத்த² த்³வே அங்கா³னி.
Nissajjīti dānavasena vuttaṃ, na vinayakammavasena. Teneva ‘‘sappissa pūretvā’’ti vuttaṃ. Yaṃ attano dhanena parivatteti, tassa vā dhanassa rūpiyabhāvo, parivattanaparivattāpanesu aññatarabhāvo cāti imānettha dve aṅgāni.
ரூபியஸங்வோஹாரஸிக்கா²பத³வண்ணனா நிட்டி²தா.
Rūpiyasaṃvohārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரூபியஸங்வோஹாரஸிக்கா²பத³ங் • 9. Rūpiyasaṃvohārasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 9. ரூபியஸங்வோஹாரஸிக்கா²பத³வண்ணனா • 9. Rūpiyasaṃvohārasikkhāpadavaṇṇanā
