| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༩. རཱུཔིཡསཾཝོཧཱརསིཀྑཱཔདཝཎྞནཱ
9. Rūpiyasaṃvohārasikkhāpadavaṇṇanā
༥༨༧. རཱུཔིཡསཾཝོཧཱརསིཀྑཱཔདེ ཛཱཏརཱུཔཱདིཙཏུབྦིདྷམྤི ནིསྶགྒིཡཝཏྠུ ཨིདྷ རཱུཔིཡགྒཧཎེནེཝ གཧིཏནྟི ཨཱཧ ‘‘ཛཱཏརཱུཔརཛཏཔརིཝཏྟན’’ནྟི། པཊིགྒཧིཏཔརིཝཏྟནེཏི སཱདིཏརཱུཔིཡསྶ པརིཝཏྟནེ, ཨསཱདིཡིཏྭཱ ཝཱ ཀཔྤིཡེན གཱཧེན པཊིགྒཧིཏརཱུཔིཡཔརིཝཏྟནེ།
587. Rūpiyasaṃvohārasikkhāpade jātarūpādicatubbidhampi nissaggiyavatthu idha rūpiyaggahaṇeneva gahitanti āha ‘‘jātarūparajataparivattana’’nti. Paṭiggahitaparivattaneti sāditarūpiyassa parivattane, asādiyitvā vā kappiyena gāhena paṭiggahitarūpiyaparivattane.
༥༨༩. ག-ཀཱརསྶ ཀ-ཀཱརཾ ཀཏྭཱ ‘‘སཱིསཱུཔཀ’’ནྟི ལིཁིཏཾ, པདབྷཱཛནེ གྷནཀཏནྟི པིཎྜཾ ཀཏཾ། སཏྠུཝཎྞོཏིཨཱདཱིསུ ‘‘སཏྠུཝཎྞོ ཙ ཀཧཱཔཎོ ཙ…པེ॰… ཡེ ཙ ཝོཧཱརཾ གཙྪནྟཱི’’ཏི ཨེཝཾ སབྦཏྠ སམུཙྩཡོ ཝེདིཏབྦོ། རཱུཔིཡེ རཱུཔིཡསཉྙཱིཏི སཀསནྟཀཾ ཝདཏི། རཱུཔིཡཾ ཙེཏཱཔེཏཱིཏི པརསནྟཀཾ ཝདཏི། ‘‘ནིསྶགྒིཡཝཏྠུནཱ དུཀྐཊཝཏྠུཾ ཝཱ ཀཔྤིཡཝཏྠུཾ ཝཱ ཙེཏཱཔེནྟསྶཔི ཨེསེཝ ནཡོ’’ཏི ཨིདཾ ཀསྨཱ ཝུཏྟཾ། ན ཧི ‘‘རཱུཔིཡེ རཱུཔིཡསཉྙཱི ཨརཱུཔིཡཾ ཙེཏཱཔེཏི , ནིསྶགྒིཡཾ པཱཙིཏྟིཡ’’ནྟིཨཱདིཏྟིཀོ པཱལི༹ཡཾ ཝུཏྟོཏི ཨཱཧ ‘‘ཡོ ཧཱི’’ཏིཨཱདི། ཏསྶཱནུལོམཏྟཱཏི ཨེཏྠཱཡམདྷིཔྤཱཡོ – རཱུཔིཡསཾཝོཧཱརོ ནཱམ ན ཀེཝལཾ རཱུཔིཡེན རཱུཔིཡཔརིཝཏྟནམེཝ, ཨཐ ཁོ ‘‘ཨརཱུཔིཡེ རཱུཔིཡསཉྙཱི རཱུཔིཡཾ ཙེཏཱཔེཏཱི’’ཏི ཝུཏྟཏྟཱ ཨརཱུཔིཡེན རཱུཔིཡཙེཏཱཔནམྤི རཱུཔིཡསཾཝོཧཱརོ ནཱམ ཧོཏཱིཏི ཨེཏསྨིཾ པཀྑེཔི རཱུཔིཡེ སཏི རཱུཔིཡསཾཝོཧཱརོཡེཝ ཧོཏཱིཏི ཨཡམཏྠོ ཨཝུཏྟོཔི ཝིཉྙཱཡཏཱིཏི། ཨརཱུཔིཡཾ ནཱམ དུཀྐཊཝཏྠུཀཔྤིཡཝཏྠཱུནི། ཨེཀནྟེན རཱུཔིཡཔཀྑེཏི ཨེཀེན ཨནྟེན རཱུཔིཡཔཀྑེཏི ཨཡཾ ཨཏྠོ གཧེཏབྦོ། ‘‘ཨེཀཏོ རཱུཔིཡཔཀྑེ’’ཏི ཝཱ པཱཋོ ཝེདིཏབྦོ། ‘‘ཨེཀརཱུཔིཡཔཀྑེ’’ཏིཔི པཋནྟི, ཏཏྠཱཔི ཨེཀཏོ རཱུཔིཡཔཀྑེཏི ཨཡམེཝཏྠོ གཧེཏབྦོ།
589.Ga-kārassa ka-kāraṃ katvā ‘‘sīsūpaka’’nti likhitaṃ, padabhājane ghanakatanti piṇḍaṃ kataṃ. Satthuvaṇṇotiādīsu ‘‘satthuvaṇṇo ca kahāpaṇo ca…pe… ye ca vohāraṃ gacchantī’’ti evaṃ sabbattha samuccayo veditabbo. Rūpiye rūpiyasaññīti sakasantakaṃ vadati. Rūpiyaṃ cetāpetīti parasantakaṃ vadati. ‘‘Nissaggiyavatthunā dukkaṭavatthuṃ vā kappiyavatthuṃ vā cetāpentassapi eseva nayo’’ti idaṃ kasmā vuttaṃ. Na hi ‘‘rūpiye rūpiyasaññī arūpiyaṃ cetāpeti , nissaggiyaṃ pācittiya’’ntiādittiko pāḷiyaṃ vuttoti āha ‘‘yo hī’’tiādi. Tassānulomattāti etthāyamadhippāyo – rūpiyasaṃvohāro nāma na kevalaṃ rūpiyena rūpiyaparivattanameva, atha kho ‘‘arūpiye rūpiyasaññī rūpiyaṃ cetāpetī’’ti vuttattā arūpiyena rūpiyacetāpanampi rūpiyasaṃvohāro nāma hotīti etasmiṃ pakkhepi rūpiye sati rūpiyasaṃvohāroyeva hotīti ayamattho avuttopi viññāyatīti. Arūpiyaṃ nāma dukkaṭavatthukappiyavatthūni. Ekantena rūpiyapakkheti ekena antena rūpiyapakkheti ayaṃ attho gahetabbo. ‘‘Ekato rūpiyapakkhe’’ti vā pāṭho veditabbo. ‘‘Ekarūpiyapakkhe’’tipi paṭhanti, tatthāpi ekato rūpiyapakkheti ayamevattho gahetabbo.
ཀཔྤིཡཝཏྠུནཱ ཀཔྤིཡཝཏྠུནོ ཀཡཝིཀྐཡེཔི ཏཱཝ ནིསྶགྒིཡཾ ཧོཏི, དུཀྐཊཝཏྠུནཱ དུཀྐཊཝཏྠུནོ ཀཡཝིཀྐཡེ ཀསྨཱ ན ཧོཏཱིཏི ཨནྡྷཀཊྛཀཐཱཡ ཨདྷིཔྤཱཡོ། ཨིདཾ སིཀྑཱཔདཾ…པེ॰… ཨརཱུཔིཡེན ཙ རཱུཔིཡཙེཏཱཔནཾ སནྡྷཱཡ ཝུཏྟནྟི སམྦནྡྷོ། ཨིདྷཱཏི ཨིམསྨིཾ རཱུཔིཡསཾཝོཧཱརསིཀྑཱཔདེ། ཏཏྠཱཏི ཀཡཝིཀྐཡསིཀྑཱཔདེ། ཏེནེཝཱཏི ཀཔྤིཡཝཏྠུནཱཡེཝ།
Kappiyavatthunā kappiyavatthuno kayavikkayepi tāva nissaggiyaṃ hoti, dukkaṭavatthunā dukkaṭavatthuno kayavikkaye kasmā na hotīti andhakaṭṭhakathāya adhippāyo. Idaṃ sikkhāpadaṃ…pe… arūpiyena ca rūpiyacetāpanaṃ sandhāya vuttanti sambandho. Idhāti imasmiṃ rūpiyasaṃvohārasikkhāpade. Tatthāti kayavikkayasikkhāpade. Tenevāti kappiyavatthunāyeva.
པུན ཀཔྤིཡབྷཱཝཾ ནེཏུཾ ཨསཀྐུཎེཡྻཏྟཱ ‘‘མཧཱཨཀཔྤིཡོ ནཱམཱ’’ཏི ཝུཏྟཾ། ‘‘ན སཀྐཱ ཀེནཙི ཨུཔཱཡེན ཀཔྤིཡོ ཀཱཏུནྟི ཨིདཾ པཉྩནྣཾཡེཝ སཧདྷམྨིཀཱནཾ ཨནྟརེ པརིཝཏྟནཾ སནྡྷཱཡ ཝུཏྟཾ, གིཧཱིཧི པན གཧེཏྭཱ ཨཏྟནོ སནྟཀཾ ཀཏྭཱ དིནྣཾ སབྦེསཾ ཀཔྤཏཱི’’ཏི ཝདནྟི། ‘‘ན སཀྐཱ ཀེནཙི ཨུཔཱཡེན ཀཔྤིཡོ ཀཱཏུ’’ནྟི པན ཨིམིནཱཝ པཊིགྒཧིཏརཱུཔིཡཾ ཨནིསྶཛྫིཏྭཱཝ ཏེན ཙེཏཱཔིཏཾ ཀཔྤིཡབྷཎྜམྤི སངྒྷསྶ ནིསྶཊྛཾ པརིབྷུཉྫིཏུཾ ན ཝཊྚཏཱིཏི སིདྡྷཾ།
Puna kappiyabhāvaṃ netuṃ asakkuṇeyyattā ‘‘mahāakappiyo nāmā’’ti vuttaṃ. ‘‘Na sakkā kenaci upāyena kappiyo kātunti idaṃ pañcannaṃyeva sahadhammikānaṃ antare parivattanaṃ sandhāya vuttaṃ, gihīhi pana gahetvā attano santakaṃ katvā dinnaṃ sabbesaṃ kappatī’’ti vadanti. ‘‘Na sakkā kenaci upāyena kappiyo kātu’’nti pana imināva paṭiggahitarūpiyaṃ anissajjitvāva tena cetāpitaṃ kappiyabhaṇḍampi saṅghassa nissaṭṭhaṃ paribhuñjituṃ na vaṭṭatīti siddhaṃ.
ཡེ པན ‘‘པཊིགྒཧིཏརཱུཔིཡཾ ཨནིསྶཛྫིཏྭཱཔི ཏེན པརིཝཏྟིཏཾ ཀཔྤིཡབྷཎྜཾ སངྒྷསྶ ནིསྶཊྛཾ པརིབྷུཉྫིཏུཾ ཝཊྚཏཱི’’ཏི ཝདནྟི, ཏེསཾ ‘‘ན སཀྐཱ ཀེནཙི ཨུཔཱཡེན ཀཔྤིཡོ ཀཱཏུ’’ནྟི ཨིདཾ ན ཡུཛྫཏི། ཏེ པནེཏྠ ཨེཝཾ ཝདནྟི ‘‘ཡསྨཱ ནིསྶཛྫིཏབྦཝཏྠུཾ ཨནིསྶཛྫིཏྭཱཝ ཨུཔརཱུཔརི ཨཉྙཾ ཨཉྙཾཡེཝ ཀཏཾ, ཏསྨཱ པརིཙྪེདཱབྷཱཝཏོ ཨིདྷ ནིསྶཛྫིཏུཾ ཨཝཏྭཱ ‘ན སཀྐཱ ཀེནཙི ཨུཔཱཡེན ཀཔྤིཡོ ཀཱཏུ’ནྟི ཝུཏྟཾ, པརིཙྪེདཱབྷཱཝཏོཡེཝ ‘མཱུལེ མཱུལསཱམིཀཱནཾ , པཏྟེ ཙ པཏྟསཱམིཀཱནཾ དིནྣེ ཀཔྤིཡོ ཧོཏཱི’ཏི ཙ ན ཝུཏྟ’’ནྟི། ཡདི པཊིགྒཧིཏརཱུཔིཡཾ ཨནིསྶཛྫིཏྭཱ ཙེཏཱཔིཏཾ ཀཔྤིཡབྷཎྜམྤི སངྒྷསྶ ནིསྶཊྛཾ པརིབྷུཉྫིཏུཾ ཝཊྚཏི, ཨེཝཾ སནྟེ ཨིདྷཱཔི ཨཝསཱནཝཏྠུཾ གཧེཏྭཱ སངྒྷསྶ ནིསྶཊྛཾ ཀསྨཱ ན ཝཊྚཏི, ‘‘ཡོ པན རཱུཔིཡཾ ཨུགྒཎྷིཏྭཱ…པེ॰… པཏྟེ ཙ པཏྟསཱམིཀཱནཾ དིནྣེ ཀཔྤིཡོ ཧོཏཱི’’ཏི ཨིམིནཱཔི པཊིགྒཧིཏརཱུཔིཡཾ ཨནིསྶཛྫིཏྭཱ ཙེཏཱཔིཏཾ ཀཔྤིཡབྷཎྜམྤི སངྒྷསྶ ནིསྶཊྛཾ པརིབྷུཉྫིཏུཾ ན ཝཊྚཏཱིཏི སིདྡྷཾ། ཡདི ཏཾ ནིསྶཊྛཾ པརིབྷུཉྫིཏུཾ ཝཊྚེཡྻ, ‘‘མཱུལེ མཱུལསཱམིཀཱནཾ, པཏྟེ ཙ པཏྟསཱམིཀཱནཾ དིནྣེ ཀཔྤིཡོ ཧོཏཱི’’ཏི ན ཝདེཡྻ། ཨཔརེ པནེཏྠ ཨེཝཾ ཝདནྟི ‘‘ཡདི སངྒྷསྶ ནིསྶཊྛཾ ཧོཏི, རཱུཔིཡཔཊིགྒཱཧཀསྶ ན ཝཊྚཏི, ཏསྨཱ ཏསྶཔི ཡཐཱ ཝཊྚཏི, ཏཐཱ དསྶནཏྠཾ ‘མཱུལེ མཱུལསཱམིཀཱན’ནྟིཨཱདི ཝུཏྟ’’ནྟི།
Ye pana ‘‘paṭiggahitarūpiyaṃ anissajjitvāpi tena parivattitaṃ kappiyabhaṇḍaṃ saṅghassa nissaṭṭhaṃ paribhuñjituṃ vaṭṭatī’’ti vadanti, tesaṃ ‘‘na sakkā kenaci upāyena kappiyo kātu’’nti idaṃ na yujjati. Te panettha evaṃ vadanti ‘‘yasmā nissajjitabbavatthuṃ anissajjitvāva uparūpari aññaṃ aññaṃyeva kataṃ, tasmā paricchedābhāvato idha nissajjituṃ avatvā ‘na sakkā kenaci upāyena kappiyo kātu’nti vuttaṃ, paricchedābhāvatoyeva ‘mūle mūlasāmikānaṃ , patte ca pattasāmikānaṃ dinne kappiyo hotī’ti ca na vutta’’nti. Yadi paṭiggahitarūpiyaṃ anissajjitvā cetāpitaṃ kappiyabhaṇḍampi saṅghassa nissaṭṭhaṃ paribhuñjituṃ vaṭṭati, evaṃ sante idhāpi avasānavatthuṃ gahetvā saṅghassa nissaṭṭhaṃ kasmā na vaṭṭati, ‘‘yo pana rūpiyaṃ uggaṇhitvā…pe… patte ca pattasāmikānaṃ dinne kappiyo hotī’’ti imināpi paṭiggahitarūpiyaṃ anissajjitvā cetāpitaṃ kappiyabhaṇḍampi saṅghassa nissaṭṭhaṃ paribhuñjituṃ na vaṭṭatīti siddhaṃ. Yadi taṃ nissaṭṭhaṃ paribhuñjituṃ vaṭṭeyya, ‘‘mūle mūlasāmikānaṃ, patte ca pattasāmikānaṃ dinne kappiyo hotī’’ti na vadeyya. Apare panettha evaṃ vadanti ‘‘yadi saṅghassa nissaṭṭhaṃ hoti, rūpiyapaṭiggāhakassa na vaṭṭati, tasmā tassapi yathā vaṭṭati, tathā dassanatthaṃ ‘mūle mūlasāmikāna’ntiādi vutta’’nti.
དུཏིཡཔཏྟསདིསོཡེཝཱཏི ཨིམིནཱ པཉྩནྣམྤི སཧདྷམྨིཀཱནཾ ན ཀཔྤཏཱིཏི དསྶེཏི། ཏཏྠ ཀཱརཎམཱཧ ‘‘མཱུལསྶ སམྤཊིཙྪིཏཏྟཱ’’ཏི། ཨཐ མཱུལསྶ སམྤཊིཙྪིཏཏྟཱ རཱུཔིཡཔཊིགྒཱཧཀསྶ ཏཱཝ ཨཀཔྤིཡོ ཧོཏུ, སེསཱནཾ པན ཀསྨཱ ན ཀཔྤཏཱིཏི མཉྙམཱནོ པུཙྪཏི ‘‘ཀསྨཱ སེསཱནཾ ན ཀཔྤཏཱི’’ཏི། ཀཱརཎམཱཧ ‘‘མཱུལསྶ ཨནིསྶཊྛཏྟཱ’’ཏི། པཏྟསྶ ཀཔྤིཡབྷཱཝེཔི སམྤཊིཙྪིཏམཱུལསྶ ནིསྶཛྫིཏབྦསྶ ཨནིསྶཊྛཏྟཱ ཏེན གཧིཏཔཏྟོ སེསཱནམྤི ན ཀཔྤཏི། ཡདི ཧི ཏེན སམྤཊིཙྪིཏམཱུལཾ སངྒྷམཛ྄ཛྷེ ནིསྶཊྛཾ སིཡཱ, ཏེན ཀཔྤིཡེན ཀམྨེན ཨཱརཱམིཀཱདཱིཧི གཧེཏྭཱ དིནྣཔཏྟོ རཱུཔིཡཔཊིགྒཱཧཀཾ ཋཔེཏྭཱ སེསཱནཾ ཝཊྚཏི། ཨཔརེ པན ‘‘མཱུལཾ སམྤཊིཙྪིཏྭཱ གཧིཏཔཏྟོཔི ཡདི སངྒྷསྶ ནིསྶཊྛོ, སེསཱནཾ ཀཔྤཏཱི’’ཏི ཝདནྟི། ཨེཝཾ སནྟེ ‘‘མཱུལསྶ ཨནིསྶཊྛཏྟཱ’’ཏི ན ཝཏྟབྦཾ, ‘‘སངྒྷསྶ ཨནིསྶཊྛཏྟཱ’’ཏི ཨེཝམེཝ ཝཏྟབྦཾ།
Dutiyapattasadisoyevāti iminā pañcannampi sahadhammikānaṃ na kappatīti dasseti. Tattha kāraṇamāha ‘‘mūlassa sampaṭicchitattā’’ti. Atha mūlassa sampaṭicchitattā rūpiyapaṭiggāhakassa tāva akappiyo hotu, sesānaṃ pana kasmā na kappatīti maññamāno pucchati ‘‘kasmā sesānaṃ na kappatī’’ti. Kāraṇamāha ‘‘mūlassa anissaṭṭhattā’’ti. Pattassa kappiyabhāvepi sampaṭicchitamūlassa nissajjitabbassa anissaṭṭhattā tena gahitapatto sesānampi na kappati. Yadi hi tena sampaṭicchitamūlaṃ saṅghamajjhe nissaṭṭhaṃ siyā, tena kappiyena kammena ārāmikādīhi gahetvā dinnapatto rūpiyapaṭiggāhakaṃ ṭhapetvā sesānaṃ vaṭṭati. Apare pana ‘‘mūlaṃ sampaṭicchitvā gahitapattopi yadi saṅghassa nissaṭṭho, sesānaṃ kappatī’’ti vadanti. Evaṃ sante ‘‘mūlassa anissaṭṭhattā’’ti na vattabbaṃ, ‘‘saṅghassa anissaṭṭhattā’’ti evameva vattabbaṃ.
དུབྦིཙཱརིཏཏྟཱཏི ཨིམིནཱ རཱུཔིཡསཾཝོཧཱརོ ཨནེན ཀཏོཏི དསྶེཏི། ཨཉྙེསཾ པན ཝཊྚཏཱིཏི ཡསྨཱནེན རཱུཔིཡསཾཝོཧཱརམཏྟམེཝ ཀཏཾ, ན མཱུལཾ སམྤཊིཙྪིཏཾ, ཏསྨཱ ཝིནཡཀམྨཝསེན སངྒྷསྶ ནིསྶཊྛཀཱལཏོ པཊྛཱཡ ཨཉྙེསཾ ཝཊྚཏི། ཨིམསྨིཾཡེཝ ཙ ཨཏྠེ པམཱཎཾ དསྶེནྟོ ‘‘མཧཱསུམཏྠེརསྶ ཀིརཱ’’ཏིཨཱདིམཱཧ། ཨཔརེ པན ‘‘དུབྦིཙཱརིཏཏྟཱཏི ཨིམིནཱ ཀེཝལཾ གིཧིསནྟཀབྷཱཝེན ཋིཏེ དུབྦིཙཱརིཏམཏྟཾ ཝུཏྟཾ, ན རཱུཔིཡསཾཝོཧཱརཱཔཛྫནཾ, ཏསྨཱ རཱུཔིཡསཾཝོཧཱརཱབྷཱཝཏོ སོ པཏྟོ ནིསྶཛྫིཏུཾ ན སཀྐཱཏི ཏསྶ ན ཀཔྤཏི, ཨནིསྶཊྛོཔི ཨཉྙེསཾ ཀཔྤཏི། ཨནིསྶཊྛསྶེཝ ཙ ཨཉྙེསཾ ཀཔྤིཡབྷཱཝདསྶནཏྠཾ ‘མཧཱསུམཏྠེརསྶ ཀིརཱ’ཏིཨཱདིཝཏྠཱུནི ཨུདཱཧཊཱནི། སངྒྷསྶ ནིསྶཛྫཱིཏི ཨིདཉྩ ཨཉྙེསཾ ཀཔྤིཡཏྟཱ ཀེཝལཾ སངྒྷསྶ པརིཙྩཏྟབྷཱཝཾ སནྡྷཱཡ ཝུཏྟཾ, ན པན ཝིནཡཀམྨཝསེན སངྒྷསྶ ནིསྶཊྛབྷཱཝཾ། ཨིམསྶ ཙ ཨཏྠསྶ སཔྤིསྶ པཱུརེཏྭཱཏི ཨིདཾ ཝཙནཾ སཱདྷཀ’’ནྟི ཝདནྟི།
Dubbicāritattāti iminā rūpiyasaṃvohāro anena katoti dasseti. Aññesaṃ pana vaṭṭatīti yasmānena rūpiyasaṃvohāramattameva kataṃ, na mūlaṃ sampaṭicchitaṃ, tasmā vinayakammavasena saṅghassa nissaṭṭhakālato paṭṭhāya aññesaṃ vaṭṭati. Imasmiṃyeva ca atthe pamāṇaṃ dassento ‘‘mahāsumattherassa kirā’’tiādimāha. Apare pana ‘‘dubbicāritattāti iminā kevalaṃ gihisantakabhāvena ṭhite dubbicāritamattaṃ vuttaṃ, na rūpiyasaṃvohārāpajjanaṃ, tasmā rūpiyasaṃvohārābhāvato so patto nissajjituṃ na sakkāti tassa na kappati, anissaṭṭhopi aññesaṃ kappati. Anissaṭṭhasseva ca aññesaṃ kappiyabhāvadassanatthaṃ ‘mahāsumattherassa kirā’tiādivatthūni udāhaṭāni. Saṅghassa nissajjīti idañca aññesaṃ kappiyattā kevalaṃ saṅghassa pariccattabhāvaṃ sandhāya vuttaṃ, na pana vinayakammavasena saṅghassa nissaṭṭhabhāvaṃ. Imassa ca atthassa sappissa pūretvāti idaṃ vacanaṃ sādhaka’’nti vadanti.
༥༩༡. རཱུཔིཡཔཊིགྒཧཎརཱུཔིཡསཾཝོཧཱརེསུ ཡེན ཨེཀེཀམེཝ ཀཏཾ, ཏེན ཏཏྠ ཏཏྠ ཝུཏྟནཡེནེཝ ནིསྶཛྫིཏབྦཾ། ཡེན པན པཊིགྒཧིཏརཱུཔིཡེནེཝ སཾཝོཧཱརོ ཀཏོ, ཏེན ཀཐཾ ནིསྶཛྫིཏབྦནྟི? ནཡིདཾ དུཀྐརཾ, ‘‘ཨཧཾ, བྷནྟེ, ནཱནཔྤཀཱརཀཾ རཱུཔིཡསཾཝོཧཱརཾ སམཱཔཛྫི’’ནྟི ཨེཝམེཝ ནིསྶཛྫིཏབྦཾ། ‘‘ཨིམསྨིཾ སིཀྑཱཔདེཔི ‘ཨརཱུཔིཡེ རཱུཔིཡསཉྙཱི, ཨཱཔཏྟི དུཀྐཊསྶཱ’ཏིཨཱདིཏྟིཀསྶ ཨཝསཱནཔདེ ཨནཱཔཏྟིཡཱ ཝུཏྟཏྟཱ ཀཔྤིཡཝཏྠུཝསེནེཝ ཨིདཾ ཏིཀཾ ཝུཏྟ’’ནྟི ཏཱིསུཔི གཎྛིཔདེསུ ཝུཏྟཾ། ཀེཙི པན ‘‘ཨརཱུཔིཡགྒཧཎེན ཀཔྤིཡཝཏྠུདུཀྐཊཝཏྠཱུནཾ སངྒཧོཏི པུརིམཔདདྭཡཾ ཀཔྤིཡཝཏྠུདུཀྐཊཝཏྠཱུནཾ ཝསེན ཝུཏྟཾ, ཨཝསཱནཔདམེཝ ཀཔྤིཡཝཏྠུཝསེན ཝུཏྟ’’ནྟི ཝདནྟི, ཏཾ ན ཡུཛྫཏི ཨནཱཔཏྟིམིསྶིཏེ ཨཝསཱནཏྟིཀེ སཉྙཱནཱནཏྟཾ ཋཔེཏྭཱ ཝཏྠུནཱནཏྟསྶ ཨབྷཱཝཏོ། དུཀྐཊཝཏྠུནཱ པན དུཀྐཊཝཏྠུནོ ཙེཏཱཔནཾ ནེཝ ཨིདྷ, ན ཏཏྠ པཱལི༹ཡཾ ཝུཏྟནྟི ཝཙནམེཏྠ སཱདྷཀཾ། ཡཾ ཨཏྟནོ དྷནེན པརིཝཏྟཏི, ཏསྶ ཝཱ དྷནསྶ ཝཱ རཱུཔིཡབྷཱཝོ ཙེཝ, པརིཝཏྟནཉྩཱཏི ཨིམཱནེཏྠ དྭེ ཨངྒཱནི།
591. Rūpiyapaṭiggahaṇarūpiyasaṃvohāresu yena ekekameva kataṃ, tena tattha tattha vuttanayeneva nissajjitabbaṃ. Yena pana paṭiggahitarūpiyeneva saṃvohāro kato, tena kathaṃ nissajjitabbanti? Nayidaṃ dukkaraṃ, ‘‘ahaṃ, bhante, nānappakārakaṃ rūpiyasaṃvohāraṃ samāpajji’’nti evameva nissajjitabbaṃ. ‘‘Imasmiṃ sikkhāpadepi ‘arūpiye rūpiyasaññī, āpatti dukkaṭassā’tiādittikassa avasānapade anāpattiyā vuttattā kappiyavatthuvaseneva idaṃ tikaṃ vutta’’nti tīsupi gaṇṭhipadesu vuttaṃ. Keci pana ‘‘arūpiyaggahaṇena kappiyavatthudukkaṭavatthūnaṃ saṅgahoti purimapadadvayaṃ kappiyavatthudukkaṭavatthūnaṃ vasena vuttaṃ, avasānapadameva kappiyavatthuvasena vutta’’nti vadanti, taṃ na yujjati anāpattimissite avasānattike saññānānattaṃ ṭhapetvā vatthunānattassa abhāvato. Dukkaṭavatthunā pana dukkaṭavatthuno cetāpanaṃ neva idha, na tattha pāḷiyaṃ vuttanti vacanamettha sādhakaṃ. Yaṃ attano dhanena parivattati, tassa vā dhanassa vā rūpiyabhāvo ceva, parivattanañcāti imānettha dve aṅgāni.
རཱུཔིཡསཾཝོཧཱརསིཀྑཱཔདཝཎྞནཱ ནིཊྛིཏཱ།
Rūpiyasaṃvohārasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༩. རཱུཔིཡསཾཝོཧཱརསིཀྑཱཔདཾ • 9. Rūpiyasaṃvohārasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༩. རཱུཔིཡསཾཝོཧཱརསིཀྑཱཔདཝཎྞནཱ • 9. Rūpiyasaṃvohārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༩. རཱུཔིཡསཾཝོཧཱརསིཀྑཱཔདཝཎྞནཱ • 9. Rūpiyasaṃvohārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༩. རཱུཔིཡསཾཝོཧཱརསིཀྑཱཔདཝཎྞནཱ • 9. Rūpiyasaṃvohārasikkhāpadavaṇṇanā
