| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
8. ரூபியஸிக்கா²பத³ங்
8. Rūpiyasikkhāpadaṃ
582. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா உபனந்தோ³ ஸக்யபுத்தோ அஞ்ஞதரஸ்ஸ குலஸ்ஸ குலூபகோ ஹோதி நிச்சப⁴த்திகோ. யங் தஸ்மிங் குலே உப்பஜ்ஜதி கா²த³னீயங் வா போ⁴ஜனீயங் வா ததோ ஆயஸ்மதோ உபனந்த³ஸ்ஸ ஸக்யபுத்தஸ்ஸ படிவிஸோ ட²பிய்யதி. தேன கோ² பன ஸமயேன ஸாயங் தஸ்மிங் குலே மங்ஸங் உப்பன்னங் ஹோதி. ததோ ஆயஸ்மதோ உபனந்த³ஸ்ஸ ஸக்யபுத்தஸ்ஸ படிவிஸோ ட²பிதோ ஹோதி. தஸ்ஸ குலஸ்ஸ தா³ரகோ ரத்தியா பச்சூஸஸமயங் பச்சுட்டா²ய ரோத³தி – ‘‘மங்ஸங் மே தே³தா²’’தி. அத² கோ² ஸோ புரிஸோ பஜாபதிங் ஏதத³வோச – ‘‘அய்யஸ்ஸ படிவிஸங் தா³ரகஸ்ஸ தே³ஹி. அஞ்ஞங் சேதாபெத்வா அய்யஸ்ஸ த³ஸ்ஸாமா’’தி.
582. Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmā upanando sakyaputto aññatarassa kulassa kulūpako hoti niccabhattiko. Yaṃ tasmiṃ kule uppajjati khādanīyaṃ vā bhojanīyaṃ vā tato āyasmato upanandassa sakyaputtassa paṭiviso ṭhapiyyati. Tena kho pana samayena sāyaṃ tasmiṃ kule maṃsaṃ uppannaṃ hoti. Tato āyasmato upanandassa sakyaputtassa paṭiviso ṭhapito hoti. Tassa kulassa dārako rattiyā paccūsasamayaṃ paccuṭṭhāya rodati – ‘‘maṃsaṃ me dethā’’ti. Atha kho so puriso pajāpatiṃ etadavoca – ‘‘ayyassa paṭivisaṃ dārakassa dehi. Aññaṃ cetāpetvā ayyassa dassāmā’’ti.
அத² கோ² ஆயஸ்மா உபனந்தோ³ ஸக்யபுத்தோ புப்³ப³ண்ஹஸமயங் நிவாஸெத்வா பத்தசீவரங் ஆதா³ய யேன தங் குலங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸோ புரிஸோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தங் உபனந்த³ங் ஸக்யபுத்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ புரிஸோ ஆயஸ்மந்தங் உபனந்த³ங் ஸக்யபுத்தங் ஏதத³வோச – ‘‘ஹிய்யோ கோ², ப⁴ந்தே, ஸாயங் மங்ஸங் உப்பன்னங் அஹோஸி. ததோ அய்யஸ்ஸ படிவிஸோ ட²பிதோ. அயங் , ப⁴ந்தே, தா³ரகோ ரத்தியா பச்சூஸஸமயங் பச்சுட்டா²ய ரோத³தி – ‘மங்ஸங் மே தே³தா²’தி. அய்யஸ்ஸ படிவிஸோ தா³ரகஸ்ஸ தி³ன்னோ. கஹாபணேன, ப⁴ந்தே, கிங் ஆஹரிய்யதூ’’தி? ‘‘பரிச்சத்தோ மே, ஆவுஸோ, கஹாபணோ’’தி? ‘‘ஆம, ப⁴ந்தே, பரிச்சத்தோ’’தி. ‘‘தஞ்ஞேவ மே, ஆவுஸோ, கஹாபணங் தே³ஹீ’’தி.
Atha kho āyasmā upanando sakyaputto pubbaṇhasamayaṃ nivāsetvā pattacīvaraṃ ādāya yena taṃ kulaṃ tenupasaṅkami; upasaṅkamitvā paññatte āsane nisīdi. Atha kho so puriso yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinno kho so puriso āyasmantaṃ upanandaṃ sakyaputtaṃ etadavoca – ‘‘hiyyo kho, bhante, sāyaṃ maṃsaṃ uppannaṃ ahosi. Tato ayyassa paṭiviso ṭhapito. Ayaṃ , bhante, dārako rattiyā paccūsasamayaṃ paccuṭṭhāya rodati – ‘maṃsaṃ me dethā’ti. Ayyassa paṭiviso dārakassa dinno. Kahāpaṇena, bhante, kiṃ āhariyyatū’’ti? ‘‘Pariccatto me, āvuso, kahāpaṇo’’ti? ‘‘Āma, bhante, pariccatto’’ti. ‘‘Taññeva me, āvuso, kahāpaṇaṃ dehī’’ti.
அத² கோ² ஸோ புரிஸோ ஆயஸ்மதோ உபனந்த³ஸ்ஸ ஸக்யபுத்தஸ்ஸ கஹாபணங் த³த்வா உஜ்ஜா²யதி கி²ய்யதி விபாசேதி – ‘‘ததே²வ மயங் ரூபியங் படிக்³க³ண்ஹாம ஏவமேவிமே ஸமணா ஸக்யபுத்தியா ரூபியங் படிக்³க³ண்ஹந்தீ’’தி. அஸ்ஸோஸுங் கோ² பி⁴க்கூ² தஸ்ஸ புரிஸஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ ரூபியங் படிக்³க³ஹெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உபனந்த³ங் ஸக்யபுத்தங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், உபனந்த³, ரூபியங் படிக்³க³ஹேஸீ’’தி 1? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம த்வங், மோக⁴புரிஸ, ரூபியங் படிக்³க³ஹெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
Atha kho so puriso āyasmato upanandassa sakyaputtassa kahāpaṇaṃ datvā ujjhāyati khiyyati vipāceti – ‘‘tatheva mayaṃ rūpiyaṃ paṭiggaṇhāma evamevime samaṇā sakyaputtiyā rūpiyaṃ paṭiggaṇhantī’’ti. Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto rūpiyaṃ paṭiggahessatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, rūpiyaṃ paṭiggahesī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, rūpiyaṃ paṭiggahessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
583. ‘‘யோ பன பி⁴க்கு² ஜாதரூபரஜதங் உக்³க³ண்ஹெய்ய வா உக்³க³ண்ஹாபெய்ய வா உபனிக்கி²த்தங் வா ஸாதி³யெய்ய, நிஸ்ஸக்³கி³யங் பாசித்திய’’ந்தி.
583.‘‘Yo pana bhikkhu jātarūparajataṃ uggaṇheyya vā uggaṇhāpeyya vā upanikkhittaṃ vā sādiyeyya, nissaggiyaṃ pācittiya’’nti.
584. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
584.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ஜாதரூபங் நாம ஸத்து²வண்ணோ வுச்சதி .
Jātarūpaṃ nāma satthuvaṇṇo vuccati .
ரஜதங் நாம கஹாபணோ லோஹமாஸகோ தா³ருமாஸகோ ஜதுமாஸகோ யே வோஹாரங் க³ச்ச²ந்தி.
Rajataṃ nāma kahāpaṇo lohamāsako dārumāsako jatumāsako ye vohāraṃ gacchanti.
உக்³க³ண்ஹெய்யாதி ஸயங் க³ண்ஹாதி நிஸ்ஸக்³கி³யங் பாசித்தியங் 3.
Uggaṇheyyāti sayaṃ gaṇhāti nissaggiyaṃ pācittiyaṃ 4.
உக்³க³ண்ஹாபெய்யாதி அஞ்ஞங் கா³ஹாபேதி நிஸ்ஸக்³கி³யங் பாசித்தியங் 5.
Uggaṇhāpeyyāti aññaṃ gāhāpeti nissaggiyaṃ pācittiyaṃ 6.
உபனிக்கி²த்தங் வா ஸாதி³யெய்யாதி இத³ங் அய்யஸ்ஸ ஹோதூதி உபனிக்கி²த்தங் ஸாதி³யதி, நிஸ்ஸக்³கி³யங் ஹோதி. ஸங்க⁴மஜ்ஜே² நிஸ்ஸஜ்ஜிதப்³ப³ங். ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங் – தேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அஹங், ப⁴ந்தே, ரூபியங் படிக்³க³ஹேஸிங். இத³ங் மே நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீ’’தி. நிஸ்ஸஜ்ஜித்வா ஆபத்தி தே³ஸேதப்³பா³. ப்³யத்தேன பி⁴க்கு²னா படிப³லேன ஆபத்தி படிக்³க³ஹேதப்³பா³. ஸசே தத்த² ஆக³ச்ச²தி ஆராமிகோ வா உபாஸகோ வா ஸோ வத்தப்³போ³ – ‘‘ஆவுஸோ, இமங் ஜானாஹீ’’தி. ஸசே ஸோ ப⁴ணதி – ‘‘இமினா கிங் ஆஹரிய்யதூ’’தி, ந வத்தப்³போ³ – ‘‘இமங் வா இமங் வா ஆஹரா’’தி. கப்பியங் ஆசிக்கி²தப்³ப³ங் – ஸப்பி வா தேலங் வா மது⁴ வா பா²ணிதங் வா. ஸசே ஸோ தேன பரிவத்தெத்வா கப்பியங் ஆஹரதி ரூபியப்படிக்³கா³ஹகங் ட²பெத்வா ஸப்³பே³ஹேவ பரிபு⁴ஞ்ஜிதப்³ப³ங். ஏவஞ்சேதங் லபே⁴த², இச்சேதங் குஸலங்; நோ சே லபே⁴த², ஸோ வத்தப்³போ³ – ‘‘ஆவுஸோ, இமங் ச²ட்³டே³ஹீ’’தி. ஸசே ஸோ ச²ட்³டே³தி, இச்சேதங் குஸலங்; நோ சே ச²ட்³டே³தி, பஞ்சஹங்கே³ஹி ஸமன்னாக³தோ பி⁴க்கு² ரூபியச²ட்³ட³கோ ஸம்மன்னிதப்³போ³ – யோ ந ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங் க³ச்செ²ய்ய, ந ப⁴யாக³திங் க³ச்செ²ய்ய, ச²ட்³டி³தாச²ட்³டி³தஞ்ச ஜானெய்ய. ஏவஞ்ச பன, பி⁴க்க²வே, ஸம்மன்னிதப்³போ³. பட²மங் பி⁴க்கு² யாசிதப்³போ³. யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Upanikkhittaṃvā sādiyeyyāti idaṃ ayyassa hotūti upanikkhittaṃ sādiyati, nissaggiyaṃ hoti. Saṅghamajjhe nissajjitabbaṃ. Evañca pana, bhikkhave, nissajjitabbaṃ – tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, bhante, rūpiyaṃ paṭiggahesiṃ. Idaṃ me nissaggiyaṃ. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Sace tattha āgacchati ārāmiko vā upāsako vā so vattabbo – ‘‘āvuso, imaṃ jānāhī’’ti. Sace so bhaṇati – ‘‘iminā kiṃ āhariyyatū’’ti, na vattabbo – ‘‘imaṃ vā imaṃ vā āharā’’ti. Kappiyaṃ ācikkhitabbaṃ – sappi vā telaṃ vā madhu vā phāṇitaṃ vā. Sace so tena parivattetvā kappiyaṃ āharati rūpiyappaṭiggāhakaṃ ṭhapetvā sabbeheva paribhuñjitabbaṃ. Evañcetaṃ labhetha, iccetaṃ kusalaṃ; no ce labhetha, so vattabbo – ‘‘āvuso, imaṃ chaḍḍehī’’ti. Sace so chaḍḍeti, iccetaṃ kusalaṃ; no ce chaḍḍeti, pañcahaṅgehi samannāgato bhikkhu rūpiyachaḍḍako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, chaḍḍitāchaḍḍitañca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
585. ‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் ரூபியச²ட்³ட³கங் ஸம்மன்னெய்ய. ஏஸா ஞத்தி.
585. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ rūpiyachaḍḍakaṃ sammanneyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங் ரூபியச²ட்³ட³கங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ரூபியச²ட்³ட³கஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho itthannāmaṃ bhikkhuṃ rūpiyachaḍḍakaṃ sammannati. Yassāyasmato khamati itthannāmassa bhikkhuno rūpiyachaḍḍakassa sammuti, so tuṇhassa; yassa nakkhamati, so bhāseyya.
‘‘ஸம்மதோ ஸங்கே⁴ன இத்த²ன்னாமோ பி⁴க்கு² ரூபியச²ட்³ட³கோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Sammato saṅghena itthannāmo bhikkhu rūpiyachaḍḍako. Khamati saṅghassa, tasmā tuṇhī, evametaṃ dhārayāmī’’ti.
தேன ஸம்மதேன பி⁴க்கு²னா அனிமித்தங் கத்வா பாதேதப்³ப³ங். ஸசே நிமித்தங் கத்வா பாதேதி, ஆபத்தி து³க்கடஸ்ஸ.
Tena sammatena bhikkhunā animittaṃ katvā pātetabbaṃ. Sace nimittaṃ katvā pāteti, āpatti dukkaṭassa.
586. ரூபியே ரூபியஸஞ்ஞீ ரூபியங் படிக்³க³ண்ஹாதி, நிஸ்ஸக்³கி³யங் பாசித்தியங். ரூபியே வேமதிகோ ரூபியங் படிக்³க³ண்ஹாதி, நிஸ்ஸக்³கி³யங் பாசித்தியங். ரூபியே அரூபியஸஞ்ஞீ ரூபியங் படிக்³க³ண்ஹாதி, நிஸ்ஸக்³கி³யங் பாசித்தியங்.
586. Rūpiye rūpiyasaññī rūpiyaṃ paṭiggaṇhāti, nissaggiyaṃ pācittiyaṃ. Rūpiye vematiko rūpiyaṃ paṭiggaṇhāti, nissaggiyaṃ pācittiyaṃ. Rūpiye arūpiyasaññī rūpiyaṃ paṭiggaṇhāti, nissaggiyaṃ pācittiyaṃ.
அரூபியே ரூபியஸஞ்ஞீ, ஆபத்தி து³க்கடஸ்ஸ. அரூபியே வேமதிகோ, ஆபத்தி து³க்கடஸ்ஸ. அரூபியே அரூபியஸஞ்ஞீ, அனாபத்தி.
Arūpiye rūpiyasaññī, āpatti dukkaṭassa. Arūpiye vematiko, āpatti dukkaṭassa. Arūpiye arūpiyasaññī, anāpatti.
அனாபத்தி அஜ்ஜா²ராமே வா அஜ்ஜா²வஸதே² வா உக்³க³ஹெத்வா வா உக்³க³ஹாபெத்வா வா நிக்கி²பதி – யஸ்ஸ ப⁴விஸ்ஸதி ஸோ ஹரிஸ்ஸதீதி, உம்மத்தகஸ்ஸ, ஆதி³கம்மிகஸ்ஸாதி.
Anāpatti ajjhārāme vā ajjhāvasathe vā uggahetvā vā uggahāpetvā vā nikkhipati – yassa bhavissati so harissatīti, ummattakassa, ādikammikassāti.
ரூபியஸிக்கா²பத³ங் நிட்டி²தங் அட்ட²மங்.
Rūpiyasikkhāpadaṃ niṭṭhitaṃ aṭṭhamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 8. ரூபியஸிக்கா²பத³வண்ணனா • 8. Rūpiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. ரூபியஸிக்கா²பத³வண்ணனா • 8. Rūpiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. ரூபியஸிக்கா²பத³வண்ணனா • 8. Rūpiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. ரூபியஸிக்கா²பத³வண்ணனா • 8. Rūpiyasikkhāpadavaṇṇanā
