| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৮. রূপিযসিক্খাপদং
8. Rūpiyasikkhāpadaṃ
৫৮২. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন আযস্মা উপনন্দো সক্যপুত্তো অঞ্ঞতরস্স কুলস্স কুলূপকো হোতি নিচ্চভত্তিকো। যং তস্মিং কুলে উপ্পজ্জতি খাদনীযং ৰা ভোজনীযং ৰা ততো আযস্মতো উপনন্দস্স সক্যপুত্তস্স পটিৰিসো ঠপিয্যতি। তেন খো পন সমযেন সাযং তস্মিং কুলে মংসং উপ্পন্নং হোতি। ততো আযস্মতো উপনন্দস্স সক্যপুত্তস্স পটিৰিসো ঠপিতো হোতি। তস্স কুলস্স দারকো রত্তিযা পচ্চূসসমযং পচ্চুট্ঠায রোদতি – ‘‘মংসং মে দেথা’’তি। অথ খো সো পুরিসো পজাপতিং এতদৰোচ – ‘‘অয্যস্স পটিৰিসং দারকস্স দেহি। অঞ্ঞং চেতাপেত্ৰা অয্যস্স দস্সামা’’তি।
582. Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmā upanando sakyaputto aññatarassa kulassa kulūpako hoti niccabhattiko. Yaṃ tasmiṃ kule uppajjati khādanīyaṃ vā bhojanīyaṃ vā tato āyasmato upanandassa sakyaputtassa paṭiviso ṭhapiyyati. Tena kho pana samayena sāyaṃ tasmiṃ kule maṃsaṃ uppannaṃ hoti. Tato āyasmato upanandassa sakyaputtassa paṭiviso ṭhapito hoti. Tassa kulassa dārako rattiyā paccūsasamayaṃ paccuṭṭhāya rodati – ‘‘maṃsaṃ me dethā’’ti. Atha kho so puriso pajāpatiṃ etadavoca – ‘‘ayyassa paṭivisaṃ dārakassa dehi. Aññaṃ cetāpetvā ayyassa dassāmā’’ti.
অথ খো আযস্মা উপনন্দো সক্যপুত্তো পুব্বণ্হসমযং নিৰাসেত্ৰা পত্তচীৰরং আদায যেন তং কুলং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো সো পুরিসো যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৰা আযস্মন্তং উপনন্দং সক্যপুত্তং অভিৰাদেত্ৰা একমন্তং নিসীদি। একমন্তং নিসিন্নো খো সো পুরিসো আযস্মন্তং উপনন্দং সক্যপুত্তং এতদৰোচ – ‘‘হিয্যো খো, ভন্তে, সাযং মংসং উপ্পন্নং অহোসি। ততো অয্যস্স পটিৰিসো ঠপিতো। অযং , ভন্তে, দারকো রত্তিযা পচ্চূসসমযং পচ্চুট্ঠায রোদতি – ‘মংসং মে দেথা’তি। অয্যস্স পটিৰিসো দারকস্স দিন্নো। কহাপণেন, ভন্তে, কিং আহরিয্যতূ’’তি? ‘‘পরিচ্চত্তো মে, আৰুসো, কহাপণো’’তি? ‘‘আম, ভন্তে, পরিচ্চত্তো’’তি। ‘‘তঞ্ঞেৰ মে, আৰুসো, কহাপণং দেহী’’তি।
Atha kho āyasmā upanando sakyaputto pubbaṇhasamayaṃ nivāsetvā pattacīvaraṃ ādāya yena taṃ kulaṃ tenupasaṅkami; upasaṅkamitvā paññatte āsane nisīdi. Atha kho so puriso yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinno kho so puriso āyasmantaṃ upanandaṃ sakyaputtaṃ etadavoca – ‘‘hiyyo kho, bhante, sāyaṃ maṃsaṃ uppannaṃ ahosi. Tato ayyassa paṭiviso ṭhapito. Ayaṃ , bhante, dārako rattiyā paccūsasamayaṃ paccuṭṭhāya rodati – ‘maṃsaṃ me dethā’ti. Ayyassa paṭiviso dārakassa dinno. Kahāpaṇena, bhante, kiṃ āhariyyatū’’ti? ‘‘Pariccatto me, āvuso, kahāpaṇo’’ti? ‘‘Āma, bhante, pariccatto’’ti. ‘‘Taññeva me, āvuso, kahāpaṇaṃ dehī’’ti.
অথ খো সো পুরিসো আযস্মতো উপনন্দস্স সক্যপুত্তস্স কহাপণং দত্ৰা উজ্ঝাযতি খিয্যতি ৰিপাচেতি – ‘‘তথেৰ মযং রূপিযং পটিগ্গণ্হাম এৰমেৰিমে সমণা সক্যপুত্তিযা রূপিযং পটিগ্গণ্হন্তী’’তি। অস্সোসুং খো ভিক্খূ তস্স পুরিসস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো রূপিযং পটিগ্গহেস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… ‘‘সচ্চং কির ত্ৰং, উপনন্দ, রূপিযং পটিগ্গহেসী’’তি 1? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, রূপিযং পটিগ্গহেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho so puriso āyasmato upanandassa sakyaputtassa kahāpaṇaṃ datvā ujjhāyati khiyyati vipāceti – ‘‘tatheva mayaṃ rūpiyaṃ paṭiggaṇhāma evamevime samaṇā sakyaputtiyā rūpiyaṃ paṭiggaṇhantī’’ti. Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto rūpiyaṃ paṭiggahessatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, rūpiyaṃ paṭiggahesī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, rūpiyaṃ paṭiggahessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৫৮৩. ‘‘যো পন ভিক্খু জাতরূপরজতং উগ্গণ্হেয্য ৰা উগ্গণ্হাপেয্য ৰা উপনিক্খিত্তং ৰা সাদিযেয্য, নিস্সগ্গিযং পাচিত্তিয’’ন্তি।
583.‘‘Yo pana bhikkhu jātarūparajataṃ uggaṇheyya vā uggaṇhāpeyya vā upanikkhittaṃ vā sādiyeyya, nissaggiyaṃ pācittiya’’nti.
৫৮৪. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
584.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
জাতরূপং নাম সত্থুৰণ্ণো ৰুচ্চতি ।
Jātarūpaṃ nāma satthuvaṇṇo vuccati .
রজতং নাম কহাপণো লোহমাসকো দারুমাসকো জতুমাসকো যে ৰোহারং গচ্ছন্তি।
Rajataṃ nāma kahāpaṇo lohamāsako dārumāsako jatumāsako ye vohāraṃ gacchanti.
উগ্গণ্হেয্যাতি সযং গণ্হাতি নিস্সগ্গিযং পাচিত্তিযং 3।
Uggaṇheyyāti sayaṃ gaṇhāti nissaggiyaṃ pācittiyaṃ 4.
উগ্গণ্হাপেয্যাতি অঞ্ঞং গাহাপেতি নিস্সগ্গিযং পাচিত্তিযং 5।
Uggaṇhāpeyyāti aññaṃ gāhāpeti nissaggiyaṃ pācittiyaṃ 6.
উপনিক্খিত্তং ৰা সাদিযেয্যাতি ইদং অয্যস্স হোতূতি উপনিক্খিত্তং সাদিযতি, নিস্সগ্গিযং হোতি। সঙ্ঘমজ্ঝে নিস্সজ্জিতব্বং। এৰঞ্চ পন, ভিক্খৰে, নিস্সজ্জিতব্বং – তেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, রূপিযং পটিগ্গহেসিং। ইদং মে নিস্সগ্গিযং। ইমাহং সঙ্ঘস্স নিস্সজ্জামী’’তি। নিস্সজ্জিত্ৰা আপত্তি দেসেতব্বা। ব্যত্তেন ভিক্খুনা পটিবলেন আপত্তি পটিগ্গহেতব্বা। সচে তত্থ আগচ্ছতি আরামিকো ৰা উপাসকো ৰা সো ৰত্তব্বো – ‘‘আৰুসো, ইমং জানাহী’’তি। সচে সো ভণতি – ‘‘ইমিনা কিং আহরিয্যতূ’’তি, ন ৰত্তব্বো – ‘‘ইমং ৰা ইমং ৰা আহরা’’তি। কপ্পিযং আচিক্খিতব্বং – সপ্পি ৰা তেলং ৰা মধু ৰা ফাণিতং ৰা। সচে সো তেন পরিৰত্তেত্ৰা কপ্পিযং আহরতি রূপিযপ্পটিগ্গাহকং ঠপেত্ৰা সব্বেহেৰ পরিভুঞ্জিতব্বং। এৰঞ্চেতং লভেথ, ইচ্চেতং কুসলং; নো চে লভেথ, সো ৰত্তব্বো – ‘‘আৰুসো, ইমং ছড্ডেহী’’তি। সচে সো ছড্ডেতি, ইচ্চেতং কুসলং; নো চে ছড্ডেতি, পঞ্চহঙ্গেহি সমন্নাগতো ভিক্খু রূপিযছড্ডকো সম্মন্নিতব্বো – যো ন ছন্দাগতিং গচ্ছেয্য, ন দোসাগতিং গচ্ছেয্য, ন মোহাগতিং গচ্ছেয্য, ন ভযাগতিং গচ্ছেয্য, ছড্ডিতাছড্ডিতঞ্চ জানেয্য। এৰঞ্চ পন, ভিক্খৰে, সম্মন্নিতব্বো। পঠমং ভিক্খু যাচিতব্বো। যাচিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –
Upanikkhittaṃvā sādiyeyyāti idaṃ ayyassa hotūti upanikkhittaṃ sādiyati, nissaggiyaṃ hoti. Saṅghamajjhe nissajjitabbaṃ. Evañca pana, bhikkhave, nissajjitabbaṃ – tena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, bhante, rūpiyaṃ paṭiggahesiṃ. Idaṃ me nissaggiyaṃ. Imāhaṃ saṅghassa nissajjāmī’’ti. Nissajjitvā āpatti desetabbā. Byattena bhikkhunā paṭibalena āpatti paṭiggahetabbā. Sace tattha āgacchati ārāmiko vā upāsako vā so vattabbo – ‘‘āvuso, imaṃ jānāhī’’ti. Sace so bhaṇati – ‘‘iminā kiṃ āhariyyatū’’ti, na vattabbo – ‘‘imaṃ vā imaṃ vā āharā’’ti. Kappiyaṃ ācikkhitabbaṃ – sappi vā telaṃ vā madhu vā phāṇitaṃ vā. Sace so tena parivattetvā kappiyaṃ āharati rūpiyappaṭiggāhakaṃ ṭhapetvā sabbeheva paribhuñjitabbaṃ. Evañcetaṃ labhetha, iccetaṃ kusalaṃ; no ce labhetha, so vattabbo – ‘‘āvuso, imaṃ chaḍḍehī’’ti. Sace so chaḍḍeti, iccetaṃ kusalaṃ; no ce chaḍḍeti, pañcahaṅgehi samannāgato bhikkhu rūpiyachaḍḍako sammannitabbo – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, chaḍḍitāchaḍḍitañca jāneyya. Evañca pana, bhikkhave, sammannitabbo. Paṭhamaṃ bhikkhu yācitabbo. Yācitvā byattena bhikkhunā paṭibalena saṅgho ñāpetabbo –
৫৮৫. ‘‘সুণাতু মে, ভন্তে, সঙ্ঘো। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং রূপিযছড্ডকং সম্মন্নেয্য। এসা ঞত্তি।
585. ‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ rūpiyachaḍḍakaṃ sammanneyya. Esā ñatti.
‘‘সুণাতু মে, ভন্তে, সঙ্ঘো। সঙ্ঘো ইত্থন্নামং ভিক্খুং রূপিযছড্ডকং সম্মন্নতি। যস্সাযস্মতো খমতি ইত্থন্নামস্স ভিক্খুনো রূপিযছড্ডকস্স সম্মুতি, সো তুণ্হস্স; যস্স নক্খমতি, সো ভাসেয্য।
‘‘Suṇātu me, bhante, saṅgho. Saṅgho itthannāmaṃ bhikkhuṃ rūpiyachaḍḍakaṃ sammannati. Yassāyasmato khamati itthannāmassa bhikkhuno rūpiyachaḍḍakassa sammuti, so tuṇhassa; yassa nakkhamati, so bhāseyya.
‘‘সম্মতো সঙ্ঘেন ইত্থন্নামো ভিক্খু রূপিযছড্ডকো। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Sammato saṅghena itthannāmo bhikkhu rūpiyachaḍḍako. Khamati saṅghassa, tasmā tuṇhī, evametaṃ dhārayāmī’’ti.
তেন সম্মতেন ভিক্খুনা অনিমিত্তং কত্ৰা পাতেতব্বং। সচে নিমিত্তং কত্ৰা পাতেতি, আপত্তি দুক্কটস্স।
Tena sammatena bhikkhunā animittaṃ katvā pātetabbaṃ. Sace nimittaṃ katvā pāteti, āpatti dukkaṭassa.
৫৮৬. রূপিযে রূপিযসঞ্ঞী রূপিযং পটিগ্গণ্হাতি, নিস্সগ্গিযং পাচিত্তিযং। রূপিযে ৰেমতিকো রূপিযং পটিগ্গণ্হাতি, নিস্সগ্গিযং পাচিত্তিযং। রূপিযে অরূপিযসঞ্ঞী রূপিযং পটিগ্গণ্হাতি, নিস্সগ্গিযং পাচিত্তিযং।
586. Rūpiye rūpiyasaññī rūpiyaṃ paṭiggaṇhāti, nissaggiyaṃ pācittiyaṃ. Rūpiye vematiko rūpiyaṃ paṭiggaṇhāti, nissaggiyaṃ pācittiyaṃ. Rūpiye arūpiyasaññī rūpiyaṃ paṭiggaṇhāti, nissaggiyaṃ pācittiyaṃ.
অরূপিযে রূপিযসঞ্ঞী, আপত্তি দুক্কটস্স। অরূপিযে ৰেমতিকো, আপত্তি দুক্কটস্স। অরূপিযে অরূপিযসঞ্ঞী, অনাপত্তি।
Arūpiye rūpiyasaññī, āpatti dukkaṭassa. Arūpiye vematiko, āpatti dukkaṭassa. Arūpiye arūpiyasaññī, anāpatti.
অনাপত্তি অজ্ঝারামে ৰা অজ্ঝাৰসথে ৰা উগ্গহেত্ৰা ৰা উগ্গহাপেত্ৰা ৰা নিক্খিপতি – যস্স ভৰিস্সতি সো হরিস্সতীতি, উম্মত্তকস্স, আদিকম্মিকস্সাতি।
Anāpatti ajjhārāme vā ajjhāvasathe vā uggahetvā vā uggahāpetvā vā nikkhipati – yassa bhavissati so harissatīti, ummattakassa, ādikammikassāti.
রূপিযসিক্খাপদং নিট্ঠিতং অট্ঠমং।
Rūpiyasikkhāpadaṃ niṭṭhitaṃ aṭṭhamaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৮. রূপিযসিক্খাপদৰণ্ণনা • 8. Rūpiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. রূপিযসিক্খাপদৰণ্ণনা • 8. Rūpiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. রূপিযসিক্খাপদৰণ্ণনা • 8. Rūpiyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. রূপিযসিক্খাপদৰণ্ণনা • 8. Rūpiyasikkhāpadavaṇṇanā
