| Library / Tipiṭaka / д̇ибидага • Tipiṭaka / махаавибхан̇г̇а-адтагат̇аа • Mahāvibhaṅga-aṭṭhakathā |
8. руубияасигкаабад̣̇аван̣н̣анаа
8. Rūpiyasikkhāpadavaṇṇanā
582. д̇зна самаязнаад̇и руубияасигкаабад̣̇ам̣. д̇ад̇т̇а бадивисод̇и годтаасо.
582.Tena samayenāti rūpiyasikkhāpadaṃ. Tattha paṭivisoti koṭṭhāso.
583-4. ж̇аад̇аруубараж̇ад̇анд̇и зд̇т̇а ж̇аад̇аруубанд̇и суван̣н̣асса наамам̣. д̇ам̣ бана яасмаа д̇ат̇ааг̇ад̇асса ван̣н̣асад̣̇исам̣ ход̇и, д̇асмаа ‘‘сад̇т̇уван̣н̣о вужжад̇ий’’д̇и бад̣̇абхааж̇анз вуд̇д̇ам̣. д̇ассад̇т̇о – ‘‘яо сад̇т̇уван̣н̣о лохависзсо, ид̣̇ам̣ ж̇аад̇аруубам̣ наамаа’’д̇и раж̇ад̇ам̣ бана ‘‘сан̇ко, силаа, баваала, раж̇ад̇ам̣, ж̇аад̇арууба’’нд̇иаад̣̇ийсу (баажи. 506) руубияам̣ вуд̇д̇ам̣. ид̇ха бана яам̣ гин̃жи вохаараг̇аманийяам̣ гахаабан̣аад̣̇и ад̇хиббзд̇ам̣. д̇знзвасса бад̣̇абхааж̇анз ‘‘гахаабан̣о лохамаасаго’’д̇иаад̣̇и вуд̇д̇ам̣. д̇ад̇т̇а гахаабан̣од̇и сован̣н̣амаяо ваа руубияамаяо ваа баагад̇иго ваа. лохамаасагод̇и д̇амб̣алохаад̣̇ийхи гад̇амаасаго. д̣̇аарумаасагод̇и саарад̣̇аарунаа ваа взл̣убзсигааяа ваа анд̇амасо д̇аалабан̣н̣знааби руубам̣ чинд̣̇ид̇ваа гад̇амаасаго. ж̇ад̇умаасагод̇и лаакааяа ваа нияяаасзна ваа руубам̣ самудтаабзд̇ваа гад̇амаасаго. ‘‘яз вохаарам̣ г̇ажчанд̇ий’’д̇и иминаа бана бад̣̇зна яо яо яад̇т̇а яад̇т̇а ж̇анабад̣̇з яад̣̇аа яад̣̇аа вохаарам̣ г̇ажчад̇и, анд̇амасо адтимаяоби жаммамаяоби ругкапалаб̣ийж̇амаяоби самудтаабид̇аруубоби асамудтаабид̇аруубоби саб̣б̣о сан̇г̇ахид̇о.
583-4.Jātarūparajatanti ettha jātarūpanti suvaṇṇassa nāmaṃ. Taṃ pana yasmā tathāgatassa vaṇṇasadisaṃ hoti, tasmā ‘‘satthuvaṇṇo vuccatī’’ti padabhājane vuttaṃ. Tassattho – ‘‘yo satthuvaṇṇo lohaviseso, idaṃ jātarūpaṃ nāmā’’ti rajataṃ pana ‘‘saṅkho, silā, pavāla, rajataṃ, jātarūpa’’ntiādīsu (pāci. 506) rūpiyaṃ vuttaṃ. Idha pana yaṃ kiñci vohāragamanīyaṃ kahāpaṇādi adhippetaṃ. Tenevassa padabhājane ‘‘kahāpaṇo lohamāsako’’tiādi vuttaṃ. Tattha kahāpaṇoti sovaṇṇamayo vā rūpiyamayo vā pākatiko vā. Lohamāsakoti tambalohādīhi katamāsako. Dārumāsakoti sāradārunā vā veḷupesikāya vā antamaso tālapaṇṇenāpi rūpaṃ chinditvā katamāsako. Jatumāsakoti lākhāya vā niyyāsena vā rūpaṃ samuṭṭhāpetvā katamāsako. ‘‘Ye vohāraṃ gacchantī’’ti iminā pana padena yo yo yattha yattha janapade yadā yadā vohāraṃ gacchati, antamaso aṭṭhimayopi cammamayopi rukkhaphalabījamayopi samuṭṭhāpitarūpopi asamuṭṭhāpitarūpopi sabbo saṅgahito.
ижжзд̇ам̣ саб̣б̣амби раж̇ад̇ам̣ ж̇аад̇аруубам̣ ж̇аад̇аруубамаасаго, вуд̇д̇аббабхзд̣̇о саб̣б̣оби раж̇ад̇амаасагод̇и жад̇уб̣б̣ид̇хам̣ ниссаг̇г̇ияавад̇т̇у ход̇и. муд̇д̇аа, ман̣и, взл̣урияо, сан̇ко, силаа, баваала, лохид̇ан̇го, масаараг̇аллам̣, сад̇д̇а д̇хан̃н̃аани, д̣̇аасид̣̇аасакзд̇д̇авад̇т̇убубпаараамапалаараамаад̣̇аяод̇и ид̣̇ам̣ д̣̇уггадавад̇т̇у. суд̇д̇ам̣ паало бадаго габбаасо анзгаббагаарам̣ абаран̣н̣ам̣ саббинаванийд̇ад̇зламад̇хупаан̣ид̇аад̣̇ибхзсаж̇ж̇ан̃жа ид̣̇ам̣ габбияавад̇т̇у. д̇ад̇т̇а ниссаг̇г̇ияавад̇т̇ум̣ ад̇д̇ано ваа сан̇гхаг̇ан̣абуг̇г̇алажзд̇ияаанам̣ ваа ад̇т̇ааяа самбадижчид̇ум̣ на ваддад̇и. ад̇д̇ано ад̇т̇ааяа самбадижчад̇о ниссаг̇г̇ияам̣ баажид̇д̇ияам̣ ход̇и, сзсаанам̣ ад̇т̇ааяа д̣̇уггадам̣. д̣̇уггадавад̇т̇ум̣ саб̣б̣зсамби ад̇т̇ааяа самбадижчад̇о д̣̇уггадамзва. габбияавад̇т̇умхи анаабад̇д̇и. саб̣б̣амби нигкибанад̇т̇ааяа бхан̣д̣ааг̇ааригасийсзна самбадижчад̇о убари рад̇анасигкаабад̣̇з ааг̇ад̇авасзна баажид̇д̇ияам̣.
Iccetaṃ sabbampi rajataṃ jātarūpaṃ jātarūpamāsako, vuttappabhedo sabbopi rajatamāsakoti catubbidhaṃ nissaggiyavatthu hoti. Muttā, maṇi, veḷuriyo, saṅkho, silā, pavāla, lohitaṅko, masāragallaṃ, satta dhaññāni, dāsidāsakhettavatthupupphārāmaphalārāmādayoti idaṃ dukkaṭavatthu. Suttaṃ phālo paṭako kappāso anekappakāraṃ aparaṇṇaṃ sappinavanītatelamadhuphāṇitādibhesajjañca idaṃ kappiyavatthu. Tattha nissaggiyavatthuṃ attano vā saṅghagaṇapuggalacetiyānaṃ vā atthāya sampaṭicchituṃ na vaṭṭati. Attano atthāya sampaṭicchato nissaggiyaṃ pācittiyaṃ hoti, sesānaṃ atthāya dukkaṭaṃ. Dukkaṭavatthuṃ sabbesampi atthāya sampaṭicchato dukkaṭameva. Kappiyavatthumhi anāpatti. Sabbampi nikkhipanatthāya bhaṇḍāgārikasīsena sampaṭicchato upari ratanasikkhāpade āgatavasena pācittiyaṃ.
уг̇г̇ан̣хзяяаад̇и г̇ан̣хзяяа. яасмаа бана г̇ан̣ханд̇о аабад̇д̇им̣ аабаж̇ж̇ад̇и, д̇знасса бад̣̇абхааж̇анз ‘‘саяам̣ г̇ан̣хаад̇и ниссаг̇г̇ияам̣ баажид̇д̇ияа’’нд̇и вуд̇д̇ам̣. зса наяо сзсабад̣̇зсуби.
Uggaṇheyyāti gaṇheyya. Yasmā pana gaṇhanto āpattiṃ āpajjati, tenassa padabhājane ‘‘sayaṃ gaṇhāti nissaggiyaṃ pācittiya’’nti vuttaṃ. Esa nayo sesapadesupi.
д̇ад̇т̇а ж̇аад̇аруубараж̇ад̇абхан̣д̣зсу гахаабан̣амаасагзсу жа згам̣ г̇ан̣хад̇о ваа г̇ан̣хаабаяад̇о ваа згаа аабад̇д̇и. сахассам̣ жзби згад̇о г̇ан̣хаад̇и, г̇ан̣хаабзд̇и, вад̇т̇уг̇ан̣анааяа аабад̇д̇ияо. махаабажжарияам̣ бана гурунд̣̇ияан̃жа сит̇илаб̣ад̣̇д̇хааяа т̇авигааяа сит̇илабуурид̇з ваа бхааж̇анз руубаг̇ан̣анааяа аабад̇д̇и. гханаб̣ад̣̇д̇хз бана гханабуурид̇з ваа згаава аабад̇д̇ийд̇и вуд̇д̇ам̣.
Tattha jātarūparajatabhaṇḍesu kahāpaṇamāsakesu ca ekaṃ gaṇhato vā gaṇhāpayato vā ekā āpatti. Sahassaṃ cepi ekato gaṇhāti, gaṇhāpeti, vatthugaṇanāya āpattiyo. Mahāpaccariyaṃ pana kurundiyañca sithilabaddhāya thavikāya sithilapūrite vā bhājane rūpagaṇanāya āpatti. Ghanabaddhe pana ghanapūrite vā ekāva āpattīti vuttaṃ.
убанигкид̇д̇асаад̣̇ияанз бана ‘‘ид̣̇ам̣ аяяасса ход̇уу’’д̇и вуд̇д̇з сажзби жид̇д̇зна саад̣̇ияад̇и, г̇ан̣хид̇угаамо ход̇и, гааязна ваа ваажааяа ваа ‘‘наяид̣̇ам̣ габбад̇ий’’д̇и бадигкибад̇и, анаабад̇д̇и. гааяаваажаахи ваа аббадигкибид̇вааби суд̣̇д̇хажид̇д̇о худ̇ваа ‘‘наяид̣̇ам̣ амхаагам̣ габбад̇ий’’д̇и на саад̣̇ияад̇и, анаабад̇д̇иязва. д̇ийсу д̣̇ваарзсу хи язна гзнажи бадигкид̇д̇ам̣ бадигкид̇д̇амзва ход̇и. сажз бана гааяаваажаахи аббадигкибид̇ваа жид̇д̇зна ад̇хиваасзд̇и, гааяаваажаахи гад̇д̇аб̣б̣асса бадигкзбасса агаран̣ад̇о агирияасамудтаанам̣ гааяад̣̇ваарз жа важийд̣̇ваарз жа аабад̇д̇им̣ аабаж̇ж̇ад̇и, манод̣̇ваарз бана аабад̇д̇и наама над̇т̇и.
Upanikkhittasādiyane pana ‘‘idaṃ ayyassa hotū’’ti vutte sacepi cittena sādiyati, gaṇhitukāmo hoti, kāyena vā vācāya vā ‘‘nayidaṃ kappatī’’ti paṭikkhipati, anāpatti. Kāyavācāhi vā appaṭikkhipitvāpi suddhacitto hutvā ‘‘nayidaṃ amhākaṃ kappatī’’ti na sādiyati, anāpattiyeva. Tīsu dvāresu hi yena kenaci paṭikkhittaṃ paṭikkhittameva hoti. Sace pana kāyavācāhi appaṭikkhipitvā cittena adhivāseti, kāyavācāhi kattabbassa paṭikkhepassa akaraṇato akiriyasamuṭṭhānaṃ kāyadvāre ca vacīdvāre ca āpattiṃ āpajjati, manodvāre pana āpatti nāma natthi.
зго сад̇ам̣ ваа сахассам̣ ваа баад̣̇амуулз табзд̇и ‘‘д̇уяхид̣̇ам̣ ход̇уу’’д̇и, бхигкуу ‘‘наяид̣̇ам̣ габбад̇ий’’д̇и бадигкибад̇и, убаасаго барижжад̇д̇ам̣ маяаа д̇умхааганд̇и г̇ад̇о, ан̃н̃о д̇ад̇т̇а ааг̇анд̇ваа бужчад̇и – ‘‘гим̣, бханд̇з, ид̣̇а’’нд̇и? яам̣ д̇зна ад̇д̇анаа жа вуд̇д̇ам̣, д̇ам̣ аажигкид̇аб̣б̣ам̣. со жз вад̣̇ад̇и – ‘‘г̇обаяиссаами, бханд̇з, г̇уд̇д̇адтаанам̣ д̣̇ассзт̇аа’’д̇и, сад̇д̇абхуумигамби баасаад̣̇ам̣ абхирухид̇ваа ‘‘ид̣̇ам̣ г̇уд̇д̇адтаана’’нд̇и аажигкид̇аб̣б̣ам̣, ‘‘ид̇ха нигкибаахий’’д̇и на вад̇д̇аб̣б̣ам̣. зд̇д̇аавад̇аа габбияан̃жа агаббияан̃жа ниссааяа тид̇ам̣ ход̇и. д̣̇ваарам̣ бид̣̇ахид̇ваа рагканд̇зна васид̇аб̣б̣ам̣. сажз гин̃жи виггааяигабхан̣д̣ам̣ бад̇д̇ам̣ ваа жийварам̣ ваа ааг̇ажчад̇и, ‘‘ид̣̇ам̣ г̇ахзссат̇а бханд̇з’’д̇и вуд̇д̇з ‘‘убаасага ад̇т̇и амхаагам̣ иминаа ад̇т̇о, вад̇т̇у жа зваруубам̣ наама сам̣виж̇ж̇ад̇и, габбияагаараго над̇т̇ий’’д̇и вад̇д̇аб̣б̣ам̣. сажз со вад̣̇ад̇и, ‘‘ахам̣ габбияагаараго бхависсаами, д̣̇ваарам̣ виварид̇ваа д̣̇зт̇аа’’д̇и, д̣̇ваарам̣ виварид̇ваа ‘‘имасмим̣ огаасз табид̇а’’нд̇и вад̇д̇аб̣б̣ам̣, ‘‘ид̣̇ам̣ г̇ан̣хаа’’д̇и на вад̇д̇аб̣б̣ам̣. звамби габбияан̃жа агаббияан̃жа ниссааяа тид̇амзва ход̇и, со жз д̇ам̣ г̇ахзд̇ваа д̇асса габбияабхан̣д̣ам̣ д̣̇зд̇и, ваддад̇и. сажз ад̇хигам̣ г̇ан̣хаад̇и, ‘‘на маяам̣ д̇ава бхан̣д̣ам̣ г̇ан̣хаама, ‘‘нигкамаахий’’д̇и вад̇д̇аб̣б̣о.
Eko sataṃ vā sahassaṃ vā pādamūle ṭhapeti ‘‘tuyhidaṃ hotū’’ti, bhikkhū ‘‘nayidaṃ kappatī’’ti paṭikkhipati, upāsako pariccattaṃ mayā tumhākanti gato, añño tattha āgantvā pucchati – ‘‘kiṃ, bhante, ida’’nti? Yaṃ tena attanā ca vuttaṃ, taṃ ācikkhitabbaṃ. So ce vadati – ‘‘gopayissāmi, bhante, guttaṭṭhānaṃ dassethā’’ti, sattabhūmikampi pāsādaṃ abhiruhitvā ‘‘idaṃ guttaṭṭhāna’’nti ācikkhitabbaṃ, ‘‘idha nikkhipāhī’’ti na vattabbaṃ. Ettāvatā kappiyañca akappiyañca nissāya ṭhitaṃ hoti. Dvāraṃ pidahitvā rakkhantena vasitabbaṃ. Sace kiñci vikkāyikabhaṇḍaṃ pattaṃ vā cīvaraṃ vā āgacchati, ‘‘idaṃ gahessatha bhante’’ti vutte ‘‘upāsaka atthi amhākaṃ iminā attho, vatthu ca evarūpaṃ nāma saṃvijjati, kappiyakārako natthī’’ti vattabbaṃ. Sace so vadati, ‘‘ahaṃ kappiyakārako bhavissāmi, dvāraṃ vivaritvā dethā’’ti, dvāraṃ vivaritvā ‘‘imasmiṃ okāse ṭhapita’’nti vattabbaṃ, ‘‘idaṃ gaṇhā’’ti na vattabbaṃ. Evampi kappiyañca akappiyañca nissāya ṭhitameva hoti, so ce taṃ gahetvā tassa kappiyabhaṇḍaṃ deti, vaṭṭati. Sace adhikaṃ gaṇhāti, ‘‘na mayaṃ tava bhaṇḍaṃ gaṇhāma, ‘‘nikkhamāhī’’ti vattabbo.
сан̇гхамаж̇жхз ниссаж̇ж̇ид̇аб̣б̣анд̇и зд̇т̇а яасмаа руубияам̣ наама агаббияам̣, ‘‘д̇асмаа ниссаж̇ж̇ид̇аб̣б̣ам̣ сан̇гхасса ваа г̇ан̣асса ваа буг̇г̇аласса ваа’’д̇и на вуд̇д̇ам̣. яасмаа бана д̇ам̣ бадиг̇г̇ахид̇амад̇д̇амзва на д̇зна гин̃жи габбияабхан̣д̣ам̣ жзд̇аабид̇ам̣, д̇асмаа убааязна барибхог̇ад̣̇ассанад̇т̇ам̣ ‘‘сан̇гхамаж̇жхз ниссаж̇ж̇ид̇аб̣б̣а’’нд̇и вуд̇д̇ам̣. габбияам̣ аажигкид̇аб̣б̣ам̣ сабби ваад̇и ‘‘баб̣б̣аж̇ид̇аанам̣ сабби ваа д̇злам̣ ваа ваддад̇и убаасагаа’’д̇и звам̣ аажигкид̇аб̣б̣ам̣.
Saṅghamajjhe nissajjitabbanti ettha yasmā rūpiyaṃ nāma akappiyaṃ, ‘‘tasmā nissajjitabbaṃ saṅghassa vā gaṇassa vā puggalassa vā’’ti na vuttaṃ. Yasmā pana taṃ paṭiggahitamattameva na tena kiñci kappiyabhaṇḍaṃ cetāpitaṃ, tasmā upāyena paribhogadassanatthaṃ ‘‘saṅghamajjhe nissajjitabba’’nti vuttaṃ. Kappiyaṃ ācikkhitabbaṃ sappi vāti ‘‘pabbajitānaṃ sappi vā telaṃ vā vaṭṭati upāsakā’’ti evaṃ ācikkhitabbaṃ.
руубияабадиг̇г̇аахагам̣ табзд̇ваа саб̣б̣зхзва барибхун̃ж̇ид̇аб̣б̣анд̇и саб̣б̣зхи бхааж̇зд̇ваа барибхун̃ж̇ид̇аб̣б̣ам̣. руубияабадиг̇г̇аахагзна бхааг̇о на г̇ахзд̇аб̣б̣о. ан̃н̃зсам̣ бхигкуунам̣ ваа аараамигаанам̣ ваа бад̇д̇абхааг̇амби лабхид̇ваа барибхун̃ж̇ид̇ум̣ на ваддад̇и, анд̇амасо маггадаад̣̇ийхи д̇ад̇о харид̇ваа аран̃н̃з табид̇ам̣ ваа д̇зсам̣ хад̇т̇ад̇о г̇ал̣ид̇ам̣ ваа д̇иражчаанаг̇ад̇абариг̇г̇ахид̇амби бам̣сугууламби на ваддад̇иязва, д̇ад̇о аахадзна паан̣ид̇зна сзнаасанад̇хуубанамби на ваддад̇и. саббинаа ваа д̇злзна ваа бад̣̇ийбам̣ гад̇ваа д̣̇ийбаалогз нибаж̇ж̇ид̇ум̣ гасин̣абаригаммамби гаад̇ум̣, бод̇т̇агамби ваажзд̇ум̣ на ваддад̇и. д̇зламад̇хупаан̣ид̇зхи бана сарийрз ван̣ам̣ магкзд̇ум̣ на ваддад̇иязва. д̇зна вад̇т̇унаа ман̃жабийтаад̣̇ийни ваа г̇ан̣ханд̇и, убосат̇ааг̇аарам̣ ваа бхож̇анасаалам̣ ваа гаронд̇и, барибхун̃ж̇ид̇ум̣ на ваддад̇и. чааяааби г̇зхабарижчзд̣̇зна тид̇аа на ваддад̇и, барижчзд̣̇аад̇игганд̇аа ааг̇анд̇угад̇д̇аа ваддад̇и. д̇ам̣ вад̇т̇ум̣ виссаж̇ж̇зд̇ваа гад̇зна маг̇г̇знаби сзд̇унааби наавааяаби ул̣умбзнаби г̇анд̇ум̣ на ваддад̇и, д̇зна вад̇т̇унаа канаабид̇ааяа богкаран̣ияаа уб̣бхид̣̇од̣̇агам̣ баад̇ум̣ ваа барибхун̃ж̇ид̇ум̣ ваа на ваддад̇и. анд̇о уд̣̇агз бана асад̇и ан̃н̃ам̣ ааг̇анд̇угам̣ уд̣̇агам̣ ваа вассод̣̇агам̣ ваа бавидтам̣ ваддад̇и. гийд̇ааяа язна уд̣̇агзна сад̣̇д̇хим̣ гийд̇аа д̇ам̣ ааг̇анд̇угамби на ваддад̇и, д̇ам̣ вад̇т̇ум̣ убанигкзбам̣ табзд̇ваа сан̇гхо бажжаяз барибхун̃ж̇ад̇и, д̇зби бажжаяаа д̇асса на вадданд̇и. аараамо г̇ахид̇о ход̇и, соби барибхун̃ж̇ид̇ум̣ на ваддад̇и. яад̣̇и бхуумиби б̣ийж̇амби агаббияам̣ нзва бхуумим̣ на палам̣ барибхун̃ж̇ид̇ум̣ ваддад̇и. сажз бхуумим̣язва гин̣ид̇ваа ан̃н̃аани б̣ийж̇аани робид̇аани палам̣ ваддад̇и, ат̇а б̣ийж̇аани гин̣ид̇ваа габбияабхуумияам̣ робид̇аани, палам̣ на ваддад̇и, бхуумияам̣ нисийд̣̇ид̇ум̣ ваа нибаж̇ж̇ид̇ум̣ ваа ваддад̇и.
Rūpiyapaṭiggāhakaṃ ṭhapetvā sabbeheva paribhuñjitabbanti sabbehi bhājetvā paribhuñjitabbaṃ. Rūpiyapaṭiggāhakena bhāgo na gahetabbo. Aññesaṃ bhikkhūnaṃ vā ārāmikānaṃ vā pattabhāgampi labhitvā paribhuñjituṃ na vaṭṭati, antamaso makkaṭādīhi tato haritvā araññe ṭhapitaṃ vā tesaṃ hatthato gaḷitaṃ vā tiracchānagatapariggahitampi paṃsukūlampi na vaṭṭatiyeva, tato āhaṭena phāṇitena senāsanadhūpanampi na vaṭṭati. Sappinā vā telena vā padīpaṃ katvā dīpāloke nipajjituṃ kasiṇaparikammampi kātuṃ, potthakampi vācetuṃ na vaṭṭati. Telamadhuphāṇitehi pana sarīre vaṇaṃ makkhetuṃ na vaṭṭatiyeva. Tena vatthunā mañcapīṭhādīni vā gaṇhanti, uposathāgāraṃ vā bhojanasālaṃ vā karonti, paribhuñjituṃ na vaṭṭati. Chāyāpi gehaparicchedena ṭhitā na vaṭṭati, paricchedātikkantā āgantukattā vaṭṭati. Taṃ vatthuṃ vissajjetvā katena maggenapi setunāpi nāvāyapi uḷumpenapi gantuṃ na vaṭṭati, tena vatthunā khanāpitāya pokkharaṇiyā ubbhidodakaṃ pātuṃ vā paribhuñjituṃ vā na vaṭṭati. Anto udake pana asati aññaṃ āgantukaṃ udakaṃ vā vassodakaṃ vā paviṭṭhaṃ vaṭṭati. Kītāya yena udakena saddhiṃ kītā taṃ āgantukampi na vaṭṭati, taṃ vatthuṃ upanikkhepaṃ ṭhapetvā saṅgho paccaye paribhuñjati, tepi paccayā tassa na vaṭṭanti. Ārāmo gahito hoti, sopi paribhuñjituṃ na vaṭṭati. Yadi bhūmipi bījampi akappiyaṃ neva bhūmiṃ na phalaṃ paribhuñjituṃ vaṭṭati. Sace bhūmiṃyeva kiṇitvā aññāni bījāni ropitāni phalaṃ vaṭṭati, atha bījāni kiṇitvā kappiyabhūmiyaṃ ropitāni, phalaṃ na vaṭṭati, bhūmiyaṃ nisīdituṃ vā nipajjituṃ vā vaṭṭati.
сажз со чад̣д̣зд̇ийд̇и яад̇т̇а гад̇т̇ажи кибад̇и, ат̇ааби на чад̣д̣зд̇и, саяам̣ г̇ахзд̇ваа г̇ажчад̇и, на ваарзд̇аб̣б̣о. но жз чад̣д̣зд̇ийд̇и ат̇а нзва г̇ахзд̇ваа г̇ажчад̇и, на чад̣д̣зд̇и, гим̣ маяхам̣ иминаа б̣яаабаарзнаад̇и язна гаамам̣ баггамад̇и, д̇ад̇о яат̇аавуд̇д̇алагкан̣о руубияачад̣д̣аго самманнид̇аб̣б̣о.
Sace so chaḍḍetīti yattha katthaci khipati, athāpi na chaḍḍeti, sayaṃ gahetvā gacchati, na vāretabbo. No ce chaḍḍetīti atha neva gahetvā gacchati, na chaḍḍeti, kiṃ mayhaṃ iminā byāpārenāti yena kāmaṃ pakkamati, tato yathāvuttalakkhaṇo rūpiyachaḍḍako sammannitabbo.
яо на чанд̣̇ааг̇ад̇инд̇иаад̣̇ийсу лобхавасзна д̇ам̣ вад̇т̇ум̣ ад̇д̇ано ваа гаронд̇о ад̇д̇аанам̣ ваа уггам̣сзнд̇о чанд̣̇ааг̇ад̇им̣ наама г̇ажчад̇и . д̣̇осавасзна ‘‘нзвааяам̣ маад̇игам̣ ж̇аанаад̇и, на винаяа’’нд̇и барам̣ абасаад̣̇знд̇о д̣̇осааг̇ад̇им̣ наама г̇ажчад̇и. мохавасзна мудтабамудтассад̇ибхаавам̣ аабаж̇ж̇анд̇о мохааг̇ад̇им̣ наама г̇ажчад̇и. руубияабадиг̇г̇аахагасса бхаязна чад̣д̣зд̇ум̣ ависаханд̇о бхаяааг̇ад̇им̣ наама г̇ажчад̇и. звам̣ агаронд̇о на чанд̣̇ааг̇ад̇им̣ г̇ажчад̇и, на д̣̇осааг̇ад̇им̣ г̇ажчад̇и, на мохааг̇ад̇им̣ г̇ажчад̇и, на бхаяааг̇ад̇им̣ г̇ажчад̇ийд̇и взд̣̇ид̇аб̣б̣о.
Yona chandāgatintiādīsu lobhavasena taṃ vatthuṃ attano vā karonto attānaṃ vā ukkaṃsento chandāgatiṃ nāma gacchati . Dosavasena ‘‘nevāyaṃ mātikaṃ jānāti, na vinaya’’nti paraṃ apasādento dosāgatiṃ nāma gacchati. Mohavasena muṭṭhapamuṭṭhassatibhāvaṃ āpajjanto mohāgatiṃ nāma gacchati. Rūpiyapaṭiggāhakassa bhayena chaḍḍetuṃ avisahanto bhayāgatiṃ nāma gacchati. Evaṃ akaronto na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchatīti veditabbo.
585. анимид̇д̇ам̣ гад̇ваад̇и нимид̇д̇ам̣ агад̇ваа, агкийни ниммийлзд̇ваа над̣̇ияаа ваа бабаад̇з ваа ванаг̇аханз ваа г̇уут̇ам̣ вияа анабзгкзна бад̇ид̇огаасам̣ асаманнаахаранд̇зна баад̇зд̇аб̣б̣анд̇и ад̇т̇о. звам̣ ж̇иг̇ужчид̇аб̣б̣зби руубияз бхаг̇аваа барияааязна бхигкуунам̣ барибхог̇ам̣ аажигки. руубияабадиг̇г̇аахагасса бана гзнажи барияааязна д̇ад̇о уббаннабажжаяабарибхог̇о на ваддад̇и. яат̇аа жааяам̣ зд̇асса на ваддад̇и, звам̣ асанд̇асамбхааванааяа ваа гулад̣̇уусагагаммзна ваа гуханаад̣̇ийхи ваа уббаннабажжаяаа нзва д̇асса на ан̃н̃асса вадданд̇и, д̇хаммзна самзна уббаннааби аббажжавзгкид̇ваа барибхун̃ж̇ид̇ум̣ на вадданд̇и.
585.Animittaṃ katvāti nimittaṃ akatvā, akkhīni nimmīletvā nadiyā vā papāte vā vanagahane vā gūthaṃ viya anapekkhena patitokāsaṃ asamannāharantena pātetabbanti attho. Evaṃ jigucchitabbepi rūpiye bhagavā pariyāyena bhikkhūnaṃ paribhogaṃ ācikkhi. Rūpiyapaṭiggāhakassa pana kenaci pariyāyena tato uppannapaccayaparibhogo na vaṭṭati. Yathā cāyaṃ etassa na vaṭṭati, evaṃ asantasambhāvanāya vā kuladūsakakammena vā kuhanādīhi vā uppannapaccayā neva tassa na aññassa vaṭṭanti, dhammena samena uppannāpi appaccavekkhitvā paribhuñjituṃ na vaṭṭanti.
жад̇д̇ааро хи барибхог̇аа – т̇зяяабарибхог̇о, ин̣абарибхог̇о, д̣̇ааяаж̇ж̇абарибхог̇о, саамибарибхог̇од̇и. д̇ад̇т̇а сан̇гхамаж̇жхзби нисийд̣̇ид̇ваа барибхун̃ж̇анд̇асса д̣̇уссийласса барибхог̇о ‘‘т̇зяяабарибхог̇о’’ наама. сийлавад̇о аббажжавзгкид̇абарибхог̇о ‘‘ин̣абарибхог̇о’’ наама. д̇асмаа жийварам̣ барибхог̇з барибхог̇з бажжавзгкид̇аб̣б̣ам̣, бин̣д̣абаад̇о аалобз аалобз. д̇ат̇аа асаггонд̇зна бурзбхад̇д̇абажчаабхад̇д̇абуримаяаамабажчимаяаамзсу. сажасса аббажжавзгкад̇ова арун̣о уг̇г̇ажчад̇и, ин̣абарибхог̇адтаанз д̇идтад̇и. сзнаасанамби барибхог̇з барибхог̇з бажжавзгкид̇аб̣б̣ам̣, бхзсаж̇ж̇асса бадиг̇г̇ахан̣зби барибхог̇зби сад̇ибажжаяад̇аа ваддад̇и, звам̣ санд̇зби бадиг̇г̇ахан̣з сад̇им̣ гад̇ваа барибхог̇з агаронд̇ассзва аабад̇д̇и, бадиг̇г̇ахан̣з бана сад̇им̣ агад̇ваа барибхог̇з гаронд̇асса анаабад̇д̇и.
Cattāro hi paribhogā – theyyaparibhogo, iṇaparibhogo, dāyajjaparibhogo, sāmiparibhogoti. Tattha saṅghamajjhepi nisīditvā paribhuñjantassa dussīlassa paribhogo ‘‘theyyaparibhogo’’ nāma. Sīlavato appaccavekkhitaparibhogo ‘‘iṇaparibhogo’’ nāma. Tasmā cīvaraṃ paribhoge paribhoge paccavekkhitabbaṃ, piṇḍapāto ālope ālope. Tathā asakkontena purebhattapacchābhattapurimayāmapacchimayāmesu. Sacassa appaccavekkhatova aruṇo uggacchati, iṇaparibhogaṭṭhāne tiṭṭhati. Senāsanampi paribhoge paribhoge paccavekkhitabbaṃ, bhesajjassa paṭiggahaṇepi paribhogepi satipaccayatā vaṭṭati, evaṃ santepi paṭiggahaṇe satiṃ katvā paribhoge akarontasseva āpatti, paṭiggahaṇe pana satiṃ akatvā paribhoge karontassa anāpatti.
жад̇уб̣б̣ид̇хаа хи суд̣̇д̇хи – д̣̇зсанаасуд̣̇д̇хи, сам̣варасуд̣̇д̇хи, барияздтисуд̣̇д̇хи, бажжавзгкан̣асуд̣̇д̇хийд̇и. д̇ад̇т̇а д̣̇зсанаасуд̣̇д̇хи наама баад̇имогкасам̣варасийлам̣ , д̇ан̃хи д̣̇зсанааяа суж̇жханад̇о ‘‘д̣̇зсанаасуд̣̇д̇хий’’д̇и вужжад̇и. сам̣варасуд̣̇д̇хи наама инд̣̇рияасам̣варасийлам̣, д̇ан̃хи на буна звам̣ гариссаамийд̇и жид̇д̇аад̇хидтаанасам̣варзнзва суж̇жханад̇о ‘‘сам̣варасуд̣̇д̇хий’’д̇и вужжад̇и. барияздтисуд̣̇д̇хи наама ааж̇ийвабаарисуд̣̇д̇хисийлам̣, д̇ан̃хи анзсанам̣ бахааяа д̇хаммзна самзна бажжаяз уббаад̣̇знд̇асса бариязсанааяа суд̣̇д̇хад̇д̇аа ‘‘барияздтисуд̣̇д̇хий’’д̇и вужжад̇и. бажжавзгкан̣асуд̣̇д̇хи наама бажжаяабарибхог̇асанниссид̇асийлам̣, д̇ан̃хи ‘‘бадисан̇каа яонисо жийварам̣ бадисзвад̇ий’’д̇иаад̣̇инаа (ма. ни. 1.23; а. ни. 6.58) наязна вуд̇д̇зна бажжавзгкан̣зна суж̇жханад̇о ‘‘бажжавзгкан̣асуд̣̇д̇хий’’д̇и вужжад̇и. д̇зна вуд̇д̇ам̣ – ‘‘бадиг̇г̇ахан̣з бана сад̇им̣ агад̇ваа барибхог̇з гаронд̇асса анаабад̇д̇ий’’д̇и.
Catubbidhā hi suddhi – desanāsuddhi, saṃvarasuddhi, pariyeṭṭhisuddhi, paccavekkhaṇasuddhīti. Tattha desanāsuddhi nāma pātimokkhasaṃvarasīlaṃ , tañhi desanāya sujjhanato ‘‘desanāsuddhī’’ti vuccati. Saṃvarasuddhi nāma indriyasaṃvarasīlaṃ, tañhi na puna evaṃ karissāmīti cittādhiṭṭhānasaṃvareneva sujjhanato ‘‘saṃvarasuddhī’’ti vuccati. Pariyeṭṭhisuddhi nāma ājīvapārisuddhisīlaṃ, tañhi anesanaṃ pahāya dhammena samena paccaye uppādentassa pariyesanāya suddhattā ‘‘pariyeṭṭhisuddhī’’ti vuccati. Paccavekkhaṇasuddhi nāma paccayaparibhogasannissitasīlaṃ, tañhi ‘‘paṭisaṅkhā yoniso cīvaraṃ paṭisevatī’’tiādinā (ma. ni. 1.23; a. ni. 6.58) nayena vuttena paccavekkhaṇena sujjhanato ‘‘paccavekkhaṇasuddhī’’ti vuccati. Tena vuttaṃ – ‘‘paṭiggahaṇe pana satiṃ akatvā paribhoge karontassa anāpattī’’ti.
сад̇д̇аннам̣ сзгкаанам̣ бажжаяабарибхог̇о д̣̇ааяаж̇ж̇абарибхог̇о наама, д̇з хи бхаг̇авад̇о буд̇д̇аа, д̇асмаа бид̇усанд̇агаанам̣ бажжаяаанам̣ д̣̇ааяаад̣̇аа худ̇ваа д̇з бажжаяз барибхун̃ж̇анд̇и. гим̣ бана д̇з бхаг̇авад̇о бажжаяз барибхун̃ж̇анд̇и, г̇ихийнам̣ бажжаяз барибхун̃ж̇анд̇ийд̇и? г̇ихийхи д̣̇иннааби бхаг̇авад̇аа анун̃н̃аад̇ад̇д̇аа бхаг̇авад̇о санд̇агаа хонд̇и, д̇асмаа д̇з бхаг̇авад̇о бажжаяз барибхун̃ж̇анд̇ийд̇и (ма. ни. 1.29) взд̣̇ид̇аб̣б̣ам̣, д̇хаммад̣̇ааяаад̣̇асуд̇д̇ан̃жзд̇т̇а саад̇хагам̣.
Sattannaṃ sekkhānaṃ paccayaparibhogo dāyajjaparibhogo nāma, te hi bhagavato puttā, tasmā pitusantakānaṃ paccayānaṃ dāyādā hutvā te paccaye paribhuñjanti. Kiṃ pana te bhagavato paccaye paribhuñjanti, gihīnaṃ paccaye paribhuñjantīti? Gihīhi dinnāpi bhagavatā anuññātattā bhagavato santakā honti, tasmā te bhagavato paccaye paribhuñjantīti (ma. ni. 1.29) veditabbaṃ, dhammadāyādasuttañcettha sādhakaṃ.
кийн̣аасаваанам̣ барибхог̇о саамибарибхог̇о наама, д̇з хи д̇ан̣хааяа д̣̇аасаб̣яам̣ ад̇ийд̇ад̇д̇аа саамино худ̇ваа барибхун̃ж̇анд̇ийд̇и. имзсу барибхог̇зсу саамибарибхог̇о жа д̣̇ааяаж̇ж̇абарибхог̇о жа саб̣б̣зсамби ваддад̇и. ин̣абарибхог̇о на ваддад̇и, т̇зяяабарибхог̇з гат̇ааязва над̇т̇и.
Khīṇāsavānaṃ paribhogo sāmiparibhogo nāma, te hi taṇhāya dāsabyaṃ atītattā sāmino hutvā paribhuñjantīti. Imesu paribhogesu sāmiparibhogo ca dāyajjaparibhogo ca sabbesampi vaṭṭati. Iṇaparibhogo na vaṭṭati, theyyaparibhoge kathāyeva natthi.
абарзби жад̇д̇ааро барибхог̇аа – лаж̇ж̇ибарибхог̇о, алаж̇ж̇ибарибхог̇о, д̇хаммияабарибхог̇о, ад̇хаммияабарибхог̇од̇и.
Aparepi cattāro paribhogā – lajjiparibhogo, alajjiparibhogo, dhammiyaparibhogo, adhammiyaparibhogoti.
д̇ад̇т̇а алаж̇ж̇ино лаж̇ж̇инаа сад̣̇д̇хим̣ барибхог̇о ваддад̇и, аабад̇д̇ияаа на гаарзд̇аб̣б̣о. лаж̇ж̇ино алаж̇ж̇инаа сад̣̇д̇хим̣ яаава на ж̇аанаад̇и, д̇аава ваддад̇и. аад̣̇ид̇о бадтааяа хи алаж̇ж̇ий наама над̇т̇и, д̇асмаа яад̣̇аасса алаж̇ж̇ийбхаавам̣ ж̇аанаад̇и д̇ад̣̇аа вад̇д̇аб̣б̣о ‘‘д̇умхз гааяад̣̇ваарз жа важийд̣̇ваарз жа вийд̇иггамам̣ гарот̇а, д̇ам̣ аббад̇ируубам̣ маа звамагад̇т̇аа’’д̇и. сажз анаад̣̇ияид̇ваа гарод̇иязва, яад̣̇и д̇зна сад̣̇д̇хим̣ барибхог̇ам̣ гарод̇и, соби алаж̇ж̇ийязва ход̇и. яоби ад̇д̇ано бхаарабхууд̇зна алаж̇ж̇инаа сад̣̇д̇хим̣ барибхог̇ам̣ гарод̇и, соби ниваарзд̇аб̣б̣о. сажз на орамад̇и, аяамби алаж̇ж̇ийязва ход̇и. звам̣ зго алаж̇ж̇ий алаж̇ж̇ийсад̇амби гарод̇и. алаж̇ж̇ино бана алаж̇ж̇инаава сад̣̇д̇хим̣ барибхог̇з аабад̇д̇и наама над̇т̇и. лаж̇ж̇ино лаж̇ж̇инаа сад̣̇д̇хим̣ барибхог̇о д̣̇виннам̣ кад̇д̇ияагумаараанам̣ суван̣н̣абаад̇ияам̣ бхож̇анасад̣̇исод̇и.
Tattha alajjino lajjinā saddhiṃ paribhogo vaṭṭati, āpattiyā na kāretabbo. Lajjino alajjinā saddhiṃ yāva na jānāti, tāva vaṭṭati. Ādito paṭṭhāya hi alajjī nāma natthi, tasmā yadāssa alajjībhāvaṃ jānāti tadā vattabbo ‘‘tumhe kāyadvāre ca vacīdvāre ca vītikkamaṃ karotha, taṃ appatirūpaṃ mā evamakatthā’’ti. Sace anādiyitvā karotiyeva, yadi tena saddhiṃ paribhogaṃ karoti, sopi alajjīyeva hoti. Yopi attano bhārabhūtena alajjinā saddhiṃ paribhogaṃ karoti, sopi nivāretabbo. Sace na oramati, ayampi alajjīyeva hoti. Evaṃ eko alajjī alajjīsatampi karoti. Alajjino pana alajjināva saddhiṃ paribhoge āpatti nāma natthi. Lajjino lajjinā saddhiṃ paribhogo dvinnaṃ khattiyakumārānaṃ suvaṇṇapātiyaṃ bhojanasadisoti.
д̇хаммияаад̇хаммияабарибхог̇о бажжаяавасзна взд̣̇ид̇аб̣б̣о. д̇ад̇т̇а сажз буг̇г̇алоби алаж̇ж̇ий бин̣д̣абаад̇оби ад̇хаммияо, убхо ж̇зг̇ужчаа. буг̇г̇ало алаж̇ж̇ий бин̣д̣абаад̇о д̇хаммияо, буг̇г̇алам̣ ж̇иг̇ужчид̇ваа бин̣д̣абаад̇о на г̇ахзд̇аб̣б̣о. махаабажжарияам̣ бана д̣̇уссийло сан̇гхад̇о уд̣̇д̣̇зсабхад̇д̇аад̣̇ийни лабхид̇ваа сан̇гхассзва д̣̇зд̇и, зд̇аани яат̇аад̣̇аанамзва г̇ад̇ад̇д̇аа вадданд̇ийд̇и вуд̇д̇ам̣. буг̇г̇ало лаж̇ж̇ий бин̣д̣абаад̇о ад̇хаммияо, бин̣д̣абаад̇о ж̇зг̇ужчо на г̇ахзд̇аб̣б̣о. буг̇г̇ало лаж̇ж̇ий, бин̣д̣абаад̇оби д̇хаммияо, ваддад̇и.
Dhammiyādhammiyaparibhogo paccayavasena veditabbo. Tattha sace puggalopi alajjī piṇḍapātopi adhammiyo, ubho jegucchā. Puggalo alajjī piṇḍapāto dhammiyo, puggalaṃ jigucchitvā piṇḍapāto na gahetabbo. Mahāpaccariyaṃ pana dussīlo saṅghato uddesabhattādīni labhitvā saṅghasseva deti, etāni yathādānameva gatattā vaṭṭantīti vuttaṃ. Puggalo lajjī piṇḍapāto adhammiyo, piṇḍapāto jeguccho na gahetabbo. Puggalo lajjī, piṇḍapātopi dhammiyo, vaṭṭati.
абарз д̣̇вз баг̇г̇ахаа; д̣̇вз жа барибхог̇аа – лаж̇ж̇ибаг̇г̇ахо, алаж̇ж̇ибаг̇г̇ахо; д̇хаммабарибхог̇о аамисабарибхог̇од̇и.
Apare dve paggahā; dve ca paribhogā – lajjipaggaho, alajjipaggaho; dhammaparibhogo āmisaparibhogoti.
д̇ад̇т̇а алаж̇ж̇ино лаж̇ж̇им̣ баг̇г̇ахзд̇ум̣ ваддад̇и, на со аабад̇д̇ияаа гаарзд̇аб̣б̣о. сажз бана лаж̇ж̇ий алаж̇ж̇им̣ баг̇г̇ан̣хаад̇и, анумод̣̇анааяа аж̇жхзсад̇и, д̇хаммагат̇ааяа аж̇жхзсад̇и, гулзсу убад̇т̇амбхзд̇и . ид̇ароби ‘‘амхаагам̣ аажарияо ийд̣̇исо жа ийд̣̇исо жаа’’д̇и д̇асса барисад̇и ван̣н̣ам̣ бхаасад̇и, аяам̣ саасанам̣ осаггаабзд̇и анд̇арад̇хаабзд̇ийд̇и взд̣̇ид̇аб̣б̣о.
Tattha alajjino lajjiṃ paggahetuṃ vaṭṭati, na so āpattiyā kāretabbo. Sace pana lajjī alajjiṃ paggaṇhāti, anumodanāya ajjhesati, dhammakathāya ajjhesati, kulesu upatthambheti . Itaropi ‘‘amhākaṃ ācariyo īdiso ca īdiso cā’’ti tassa parisati vaṇṇaṃ bhāsati, ayaṃ sāsanaṃ osakkāpeti antaradhāpetīti veditabbo.
д̇хаммабарибхог̇а-аамисабарибхог̇зсу бана яад̇т̇а аамисабарибхог̇о ваддад̇и, д̇ад̇т̇а д̇хаммабарибхог̇оби ваддад̇и. яо бана годияам̣ тид̇о г̇ант̇о д̇асса буг̇г̇аласса ажжаязна нассиссад̇и, д̇ам̣ д̇хаммаануг̇г̇ахзна уг̇г̇ан̣хид̇ум̣ ваддад̇ийд̇и вуд̇д̇ам̣.
Dhammaparibhoga-āmisaparibhogesu pana yattha āmisaparibhogo vaṭṭati, tattha dhammaparibhogopi vaṭṭati. Yo pana koṭiyaṃ ṭhito gantho tassa puggalassa accayena nassissati, taṃ dhammānuggahena uggaṇhituṃ vaṭṭatīti vuttaṃ.
д̇ад̇рид̣̇ам̣ вад̇т̇у – махаабхаяз гира згассзва бхигкуно махаанид̣̇д̣̇зсо баг̇ун̣о ахоси. ат̇а жад̇унигааяигад̇иссад̇т̇зрасса убаж̇жхааяо махаад̇ибидагад̇т̇зро наама махаарагкид̇ад̇т̇зрам̣ ааха – ‘‘аавусо махаарагкид̇а, зд̇асса санд̇игз махаанид̣̇д̣̇зсам̣ г̇ан̣хаахий’’д̇и. ‘‘баабо гирааяам̣, бханд̇з, на г̇ан̣хаамий’’д̇и. ‘‘г̇ан̣хаавусо, ахам̣ д̇з санд̇игз нисийд̣̇иссаамий’’д̇и. ‘‘саад̇ху, бханд̇з, д̇умхзсу нисиннзсу г̇ан̣хиссаамий’’д̇и бадтабзд̇ваа рад̇д̇инд̣̇ивам̣ ниранд̇арам̣ барияаабун̣анд̇о осаанад̣̇ивасз хздтааман̃жз ид̇т̇им̣ д̣̇исваа ‘‘бханд̇з, суд̇ам̣язва мз буб̣б̣з, сажаахам̣ звам̣ ж̇аанзяяам̣, на ийд̣̇исасса санд̇игз д̇хаммам̣ барияаабун̣зяяа’’нд̇и ааха. д̇асса бана санд̇игз б̣ахуу махаат̇зраа уг̇г̇ан̣хид̇ваа махаанид̣̇д̣̇зсам̣ бад̇идтаабзсум̣.
Tatridaṃ vatthu – mahābhaye kira ekasseva bhikkhuno mahāniddeso paguṇo ahosi. Atha catunikāyikatissattherassa upajjhāyo mahātipiṭakatthero nāma mahārakkhitattheraṃ āha – ‘‘āvuso mahārakkhita, etassa santike mahāniddesaṃ gaṇhāhī’’ti. ‘‘Pāpo kirāyaṃ, bhante, na gaṇhāmī’’ti. ‘‘Gaṇhāvuso, ahaṃ te santike nisīdissāmī’’ti. ‘‘Sādhu, bhante, tumhesu nisinnesu gaṇhissāmī’’ti paṭṭhapetvā rattindivaṃ nirantaraṃ pariyāpuṇanto osānadivase heṭṭhāmañce itthiṃ disvā ‘‘bhante, sutaṃyeva me pubbe, sacāhaṃ evaṃ jāneyyaṃ, na īdisassa santike dhammaṃ pariyāpuṇeyya’’nti āha. Tassa pana santike bahū mahātherā uggaṇhitvā mahāniddesaṃ patiṭṭhāpesuṃ.
586. руубияз руубияасан̃н̃ийд̇и зд̇т̇а саб̣б̣амби ж̇аад̇аруубараж̇ад̇ам̣ руубияасан̇г̇ахамзва г̇ад̇анд̇и взд̣̇ид̇аб̣б̣ам̣.
586.Rūpiye rūpiyasaññīti ettha sabbampi jātarūparajataṃ rūpiyasaṅgahameva gatanti veditabbaṃ.
руубияз взмад̇игод̇и ‘‘суван̣н̣ам̣ ну ко, карабад̇д̇ам̣ ну ко’’д̇иаад̣̇инаа наязна сам̣саяаж̇аад̇о.
Rūpiye vematikoti ‘‘suvaṇṇaṃ nu kho, kharapattaṃ nu kho’’tiādinā nayena saṃsayajāto.
руубияз аруубияасан̃н̃ийд̇и суван̣н̣аад̣̇ийсу карабад̇д̇аад̣̇исан̃н̃ий. абижа бун̃н̃агаамаа рааж̇ород̇хаад̣̇аяо бхад̇д̇акаж̇ж̇агаг̇анд̇хабин̣д̣аад̣̇ийсу багкибид̇ваа хиран̃н̃асуван̣н̣ам̣ д̣̇знд̇и, жол̣абхигкааяа жаранд̇аанам̣ д̣̇ассанд̇з б̣ад̣̇д̇хагахаабан̣аад̣̇ийхиязва сад̣̇д̇хим̣ жол̣агаани д̣̇знд̇и, бхигкуу бхад̇д̇аад̣̇исан̃н̃ааяа ваа жол̣агасан̃н̃ааяа ваа бадиг̇г̇ан̣ханд̇и, звамби руубияз аруубияасан̃н̃ий руубияам̣ г̇ан̣хаад̇ийд̇и взд̣̇ид̇аб̣б̣о. бадиг̇г̇ан̣ханд̇зна бана ‘‘имасмим̣ г̇зхз ид̣̇ам̣ лад̣̇д̇ха’’нд̇и саллагкзд̇аб̣б̣ам̣. язна хи ассад̇ияаа д̣̇иннам̣ ход̇и, со сад̇им̣ бадилабхид̇ваа буна ааг̇ажчад̇и, ат̇асса вад̇д̇аб̣б̣ам̣ – ‘‘д̇ава жол̣агам̣ бассаахий’’д̇и. сзсамзд̇т̇а уд̇д̇аанад̇т̇амзва.
Rūpiye arūpiyasaññīti suvaṇṇādīsu kharapattādisaññī. Apica puññakāmā rājorodhādayo bhattakhajjakagandhapiṇḍādīsu pakkhipitvā hiraññasuvaṇṇaṃ denti, coḷabhikkhāya carantānaṃ dassante baddhakahāpaṇādīhiyeva saddhiṃ coḷakāni denti, bhikkhū bhattādisaññāya vā coḷakasaññāya vā paṭiggaṇhanti, evampi rūpiye arūpiyasaññī rūpiyaṃ gaṇhātīti veditabbo. Paṭiggaṇhantena pana ‘‘imasmiṃ gehe idaṃ laddha’’nti sallakkhetabbaṃ. Yena hi assatiyā dinnaṃ hoti, so satiṃ paṭilabhitvā puna āgacchati, athassa vattabbaṃ – ‘‘tava coḷakaṃ passāhī’’ti. Sesamettha uttānatthameva.
самудтаанаад̣̇ийсу часамудтаанам̣, сияаа гирияам̣ г̇ахан̣зна аабаж̇ж̇анад̇о, сияаа агирияам̣ бадигкзбасса агаран̣ад̇о руубияаан̃н̃аваад̣̇агаубассуд̇исигкаабад̣̇аани хи д̇ийн̣и згабарижчзд̣̇аани, носан̃н̃аавимогкам̣, ажид̇д̇агам̣, бан̣н̣ад̇д̇иваж̇ж̇ам̣, гааяагаммаважийгаммам̣, д̇ижид̇д̇ам̣, д̇ивзд̣̇ананд̇и.
Samuṭṭhānādīsu chasamuṭṭhānaṃ, siyā kiriyaṃ gahaṇena āpajjanato, siyā akiriyaṃ paṭikkhepassa akaraṇato rūpiyaaññavādakaupassutisikkhāpadāni hi tīṇi ekaparicchedāni, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
руубияасигкаабад̣̇аван̣н̣анаа нидтид̇аа.
Rūpiyasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 8. руубияасигкаабад̣̇ам̣ • 8. Rūpiyasikkhāpadaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 8. руубияасигкаабад̣̇аван̣н̣анаа • 8. Rūpiyasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 8. руубияасигкаабад̣̇аван̣н̣анаа • 8. Rūpiyasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 8. руубияасигкаабад̣̇аван̣н̣анаа • 8. Rūpiyasikkhāpadavaṇṇanā
